3. Mai tei papaihia i roto i te Ioba 38:22, 23, 25-29, ua ui te Atua no nia i te aha?

³ I te hoê taime, ua ui te Atua ia Ioba e: “Ua tomo anei oe i roto i te pueraa o te hiona? e ua hiˈo oe i te pueraa o te ûa-paari, i vaiihohia e au no te mahana e roohia ˈi i te ati, no te mahana tamaˈi e te aroraa ra.” I te mau vahi e rave rahi o to tatou fenua, mea matauhia te hiona e te ûa paari. Ua na ô â te Atua e: “Na vai i haapao i to te pape pue ra haerea, e te tereraa no te uira patiri ra? Ia ûahia to te fenua taata ore, i nia i te medebara aore i parahihia e te taata ra; ei faarari i te fenua moemoe, e te faaruehia, e te ano, e ia oteu mai te raau apî ra i nia. O vai to te ûa ra metua? e na vai te hau nei i fanau? No to vai ra opu te vai-paari; e te mâriri uouo no te raˈi, na vai oia i fanau?”—Ioba 38:22, 23, 25-29.

7. Mai te aha te hohonu o te ite o te taata no nia i te ûa?

⁷ E te ûa ïa? Ua ui te Atua ia Ioba e: “O vai to te ûa ra metua? e na vai te hau nei i fanau?” Te na ô ra taua noâ buka ite rahi no nia i te ihi ra e: “No te huru rau o te mau hautiutiraa o te reva e te huru tauiui rahi o te mau ata pape e te mau huˈahuˈa e vai ra i roto i te mataˈi, e au ra e eita roa ˈtu e nehenehe e hamani i te hoê manaˈo rahi tia roa no nia i te ravea e tupu ai te mau ata e te ûa.” Ei faaohieraa, ua pûpû te mau aivanaa i te tahi mau manaˈo i tataratara-maitai-hia, eita mau râ ta ratou e nehenehe e faataa maitai i te ûa. Ua ite râ outou e e topa mai te ûa faufaa rahi, a faarari ai i te fenua, a faaoraora ˈi i te mau raau tupu, a faatupu ai i te ora e a faariro atu ai ei mea au mau.