Ia haamaitai na tatou i te iˈoa moˈa o Iehova!
“E parau tau vaha ma te arue ia Iehova; e ia haamaitai te taata atoa i to ˈna ra iˈoa moˈa e a muri noa ˈtu.” — SALAMO 145:21.
1, 2. a) Mea nafea to Satani patoiraa i te faatereraa a te Atua? b) Eaha te mau uiraa e ite ra i te pahonoraa i roto i te Salamo 145:11-21?
O IEHOVA mau te Arii Mana Hope i roto i te ao atoa nei. Teie râ, ua patoi o Satani i te parau-tia e te tiaraa o te faatereraa a te Atua (Genese 2:16, 17; 3:1-5). Ua faahapa atoa te Diabolo i te haapao maitai o te mau tavini atoa a te Atua i nia i te raˈi e i nia i te fenua nei (Ioba 1:6-11; 2:1-5; Luka 22:31). Ua vaiiho atura ïa o Iehova i te taime ia nehenehe ta ˈna mau poieteraa maramarama atoa e ite i te mau hotu iino o te patoiraa i ta ˈna faatereraa e ia faaite e eaha to ratou tiaraa no nia i taua mau tumu parau ra.
2 Te tauturu nei te Salamo 145 ia tatou ia rave i te hoê tiaraa papu no te faatereraa a te Atua. Nafea ïa te reira? Eaha ta Davida e parau ra no nia i te tiaraa arii o Iehova? E mea nafea te Atua e haapao ai i te feia e turu ra i to ˈna tiaraa arii? Te itehia ra te tahi mau pahonoraa anaanatae mau i taua mau uiraa ra i roto i te Salamo 145:11-21.
Ia parau anaˈe na tatou i te tiaraa arii o Iehova
3. Mai te peu e mea faufaa te tiaraa arii o Iehova no tatou, eaha ïa te ohipa ta tatou e rave?
3 Ua riro te faatereraa a Iehova ei tumu parau manaˈonaˈo-rahi-hia e Davida, o tei papai e: “E parau ratou i te hanahana o to oe ra basileia; e faatia noa hoi i ta oe ra mau ravea puai. I te faaiteraa i te tamarii a te taata nei i to ˈna ra mana, e te hanahana e te mana o to ˈna ra basileia.” (Salamo 145:11, 12). E paraparau tatou no te mau mea o ta tatou e anaanatae ra. E paraparau te hoê taata no to ˈna utuafare, no to ˈna fare aore ra no ta ˈna i ooti mai, ei hiˈoraa. Ua parau o Iesu e: “E tuu mai te taata maitai i te mea maitai no roto i te pueraa o te maitai ra o to ˈna aau.” (Luka 6:45). Mai te peu e mea faufaa na tatou te faatereraa a te Atua, e pure ïa tatou e ia tae mai to ˈna Basileia, e e paraparau tatou ia vetahi ê no nia i te parau-tia e te hau e vai i raro aˈe i taua faatereraa ra. E arue tatou ia Iehova, te ‘Arii mure ore’, e e paraparau tatou no nia i to ˈna mana arii, o te faaitehia mai na roto i te Basileia mesia tei horoahia i ta ˈna Tamaiti herehia o Iesu Mesia (Apokalupo 15:3; Isaia 9:6, 7). Ua riro mau hoi te faaiteraa i te hanahana no te raˈi o te tiaraa arii o Iehova ei haamaitairaa faahiahia roa, e e fatata hoi te reira i te itehia i roto i te ruperupe o te hoê paradaiso i nia i te fenua nei o te î roa i te mau poieteraa oaoa roa. — Luka 23:43.
4. Afea roa e nehenehe ai ta tatou e paraparau no nia i te “ravea puai” o Iehova, e na te aha e turu ra ia tatou i roto i taua ohipa ra?
4 E turai atoa to tatou mauruuru ia paraparau no nia i te mau “ravea puai” o Iehova. Noa ˈtu te ‘faito ore o to ˈna mana’, eita oia e faaohipa i te reira ma te tia ore (Ioba 37:23). Ua faaohipa oia i to ˈna puai no te poiete i te fenua e te taata, e e faaohipa oia i te reira no te haamou i te feia iino. Te vai ra ia tatou te ravea no te paraparau no nia i te puai o te Atua ia poro anaˈe tatou i te parau apî maitai. E eita anei tatou e mauruuru ra no te mea te horoa nei taua Pu teitei o te puai ra no tatou i te itoito no te faatupu i taua ohipa ra (Isaia 40:29-31)? Oia, o tatou nei te mau Ite no Iehova, te turuhia nei tatou i roto i te taviniraa moˈa e te puai e te varua o te Atua. Maoti noa taua turu ra e porohia ˈi te poroi o te Basileia i teie mahana, ma te hoê manuïaraa faahiahia mau, i roto i te ao taatoa nei. — Salamo 28:7, 8; Zekaria 4:6.
5. I te mea e e rave rahi taata o te ore e ite ra i te “mana” o Iehova, eaha ïa te tia ia tatou ia rave?
5 E tia ia tatou ia faaite i te mau tamaiti a te taata i te “mana” o Iehova, mai te mau ati Iseraela i faaite na i ta ratou mau tamarii e mea nafea to Iehova faaoraraa ia ratou mai te faatîtîraa i Aiphiti (Exodo 13:14-16). Te patu nei te mau taata i te mau tihi no te faahanahana i te mau taata o tei rave i te mau ohipa ta ratou e feruri ra e mea faahiahia, e hia râ teie e ite nei i te mau ravea puai a te Atua? Ua papai te hoê taata tuatapapa i te Bibilia e: “Te tapaopao nei ratou i te mau upootiaraa a to ratou mau aito i nia i te patu veo, area te mau ohipa faahiahia a Iehova, ua papaihia ïa i nia i te one, e na te tau e faaore i te reira i roto i to ratou feruriraa taatoa.” Oia mau, eita taua mau ohipa ra e tumâhia, noa ˈtu e aita te reira e itehia ra e te mau taata e rave rahi. Ia poro anaˈe tatou i tera e tera fare, ia faatere anaˈe tatou i te mau haapiiraa bibilia, e i roto atoa i te tahi atu mau tupuraa, ia paraparau ïa tatou ma te itoito no nia i te mau ravea puai a te Atua.
6. a) E rave rahi matahiti i teie nei, i teihea taime te itoito ta tatou e faatupu ra i roto i ta tatou taviniraa i faaite-maitai-hia ˈi? b) Ei haapoto-noa-raa, eaha tei parauhia i te matahiti 1922 ra no nia i te faaiteraa i te Basileia?
6 E tia atoa ia tatou ia faaite ma te itoito i te hanahana o te tiaraa arii o te Atua. Ua ite-maitai-hia te itoito no te taviniraa o taua Basileia ra a faaite ai o Joseph Rutherford, te peretiteni o te Totaiete Watch Tower, i te rahiraa taata i putuputu mai no te tairururaa i Cedar Point (Etats-Unis), i te matahiti 1922, e: “Mai te matahiti 1914 ra, ua rave mai te Arii hanahana i to ˈna mana (...). Ua fatata mai te basileia o te raˈi; te faatere ra te Arii; te topa ra te hau emepera a Satani; e ore roa te tahi mirioni taata o te ora nei i teie nei mahana e pohe. Te tiaturi ra anei outou i te reira? (...) Mai te peu e e, a hoˈi i roto i te aua, o outou, te mau tamarii a te Atua teitei ra! A rave i to outou haana tamaˈi! Ia tapea noa outou i te hoê faito au, te haapao maitai, te puai, te itoito! A haere i mua i roto i te aroraa e tae roa ˈtu i te taime te mau vahi atoa o Babulonia e riro ai ei medebara. A haaparare i te poroi i te mau vahi atoa. E tia i te ao atoa nei ia ite e o Iehova te Atua e o Iesu Mesia te Arii o te mau arii e te Fatu o te mau fatu. O teie te mahana o te mau mahana atoa. Teie, te faatere nei te Arii! O outou te feia ta ˈna i tono. No reira: A poro, a poro, a poro i te arii e to ˈna basileia.”
7. Eaha ïa to tatou mau manaˈo hohonu no nia i ta tatou taviniraa ei taata poro i te Basileia?
7 Auê hoi te oaoa ‘ia manaˈo i te iˈoa o te Atua’, ia paraparau ia vetahi ê no nia i ta ˈna faatereraa e ia poro i te Basileia mesia a ta ˈna Tamaiti herehia (Malaki 3:16)! O tatou te feia poro e te feia e paruru ra i te Basileia, te haafaufaa nei tatou i te haamaitairaa e vai ra ia tatou ia faaite i te parau apî maitai e ia haafariu i te mafatu o to tatou mau taata-tupu i nia i te Atua, i nia i te Mesia e i nia i te Basileia. E tia ia roaa ia tatou te hinaaro ia parau na pihai iho ia tatou i te hanahana rahi o te tiaraa arii o Iehova. — Hiˈo Ieremia 20:9.
8. a) Te faaauhia nei te faatereraa a Iehova i teie nei mahana i te aha? b) No te aha e nehenehe ai e parau e te faaohipa ra te Atua i ta ˈna faatereraa i roto “i te mau ui atoa”?
8 E tia ia outou ia hinaaro e faaite i te Basileia o te Atua ma te hoê itoito rahi, no te mea te parau ra o Davida i muri iho e: “O to oe ra basileia, e basileia mure ore ïa, e to oe ra mana, e tae ïa i te mau ui atoa ra.” (Salamo 145:13). Ma te tamau â i te feruri hohonu i nia i te tiaraa arii o Iehova, te faaohipa ra te papai salamo i te tahi atu mono iˈoa: “to oe”, maoti i te faahiti “ta ˈna”, ma te faatae ïa i ta ˈna pure i te Atua iho. Oia mau, eita te faatereraa a Iehova tei tiahia e te Basileia mesia e mono i te tiaraa arii mure ore o te Atua. Oia mau, ia tae roa te huitaata auraro i nia i te huru taata tia roa, e faahoˈi ïa te Mesia i te Basileia i to ˈna Metua (Korinetia 1, 15:24-28). Te faaohipa mau ra ïa te Atua i ta ˈna faatereraa i roto “i te mau ui atoa”. O Iehova te Arii a poietehia ˈi o Adamu e e faaohipa oia i ta ˈna faatereraa i nia i te mau taata parau-tia e a muri noa ˈtu.
9. I roto i te Salamo 145, eaha ïa te nehenehe e parau no nia i te hoê irava e haamata ra na roto i te leta hebera ra noun?
9 I roto i te papai a te feia ati iuda e tuatapapa i te Bibilia, aita e itehia i roto i taua salamo ra i papaihia mai te pehepehe ra te huru, i te hoê noa ˈˈe irava e haamata na roto i te leta hebera noun. Teie nei râ, ia au i te Septante (tatararaa heleni), te Peshitto (tatararaa no Suria) e te Vulgate (tatararaa latino), te taiohia ra i roto i te hoê papai hebera e: “E haapao maitai to Iehova i roto i ta ˈna mau parau atoa, e e faaite oia i te parau-tia i roto i ta ˈna mau ohipa atoa.” (Tatararaa a te ao apî, neneiraa beretane e te faahororaa, nota). E tapea te Atua i ta ˈna mau parau tǎpǔ atoa e “e faaite oia i te parau-tia” i te feia e au ra i to ˈna maitai. — Iosua 23:14.
Eita roa te turu o Iehova e ore
10. Mea nafea to te Atua ‘tururaa ia tatou’?
10 Eita roa ˈtu te Arii mure ore e tapo i to ˈna mata i mua i te mau ati o ta ˈna mau tavini. No reira o Davida i nehenehe ai e parau e: “Te mau ra Iehova i te feia e hiˈa ra, e ua faatia i te feia e piˈo i raro ra.” (Salamo 145:14). Mai te tau o Abela, te turu noa ra o Iehova i te feia e haamori ra ia ˈna. Mai te peu e e faarue oia ia tatou, e pinepine ïa tatou i te topa i raro aˈe i ta tatou mau hopoia. Tatou anaˈe, aita ïa to tatou e puai no te faaoromai i te mau ati atoa o te oraraa e te hamani-ino-raa e roohia i nia ia tatou no te mea te tavini ra tatou ia Iehova, area ra O ˈna, te turu nei oia ia tatou. Te faaite ra te huru o te iho parau haa hebera i faaohipahia i roto i teie irava e ‘te turu tamau nei te Atua ia tatou’. Ia tapao na tatou e ua tauturu aˈera o Ioane Bapetizo e te Tamaiti a te Atua i te feia hara o tei paruparu roa, ia tia faahou mai i te pae morare. A faaite ai taua mau taata ra i te tatarahapa e a riro mai ai ratou ei tavini no Iehova, ua tamata aˈera ratou i te hoê haamaitairaa faahiahia mau: te turu o te Atua. — Mataio 21:28-32; Mareko 2:15-17.
11. Mea nafea Iehova ia ‘faatia i te feia atoa i piˈo i raro’?
11 Ua riro mau ei tamahanahanaraa ia ite e ‘e faatia o Iehova i te feia piˈo i raro’ na roto i te mau tamataraa e rave rahi. Te horoa faahou ra oia i te itoito no te feia i rotopu ia tatou o tei hepohepo roa, te tamahanahana ra oia i te feia i roto i te ati e te tauturu ra oia ia tatou ia parau i ta ˈna parau ma te itoito ia hamani-ino-anaˈe-hia tatou (Ohipa 4:29-31). Eita roa ˈtu oia e faatia e ia faateimaha mai ta tatou mau hopoia ia tatou mai te peu e e farii tatou i ta ˈna tauturu (Salamo 55:22). No reira, mai te vahine, te “huaai o Aberahama” o tei “fefe roa i raro”, o tei faaorahia râ e Iesu, e tia ia tatou ‘ia haamaitai i te Atua’ ia faatia anaˈe oia ia tatou i te pae varua ma te here (Luka 13:10-17). Ua haamauruuru te mau kerisetiano i faatavaihia o tei fefe roa i raro aˈe i te zugo a Babulonia, i te Atua, a faatia ˈi oia ia ratou i te matahiti 1919 ra; e mai te matahiti 1935, te faatia nei oia i te mau “mamoe ê atu” o te faaite ra i te mauruuru. — Ioane 10:16.
12. I roto i teihea auraa ‘te mata o te mau mea atoa e hiˈo ai i te Atua ma te tiaturi’?
12 Eita roa ˈtu o Iehova e faarue i ta ˈna mau tavini, mai ta Davida i faaite maramarama i muri iho na roto i teie mau parau e: “Te hiˈo nei te mata o te mau mea atoa nei ia oe, e te horoa maira oe i te maa na ratou i te tau mau. Te heheu nei oe i to rima, e te haamâha nei i te hiaai o te mau mea ora atoa nei.” (Salamo 145:15, 16). Mai te huru ra e ua huri tia ˈtu te mau mata o te mau poieteraa atoa i nia i te Arii o te ao atoa nei ma te tiaturi. Te huri tia nei te mau melahi i nia i te Atua no te tamau â i te ora. E, mai te hoê tamarii o te huri tia i nia i to ˈna metua tane aore ra i nia i to ˈna metua vahine ia noaa te mea e hinaarohia e ana, te huri tia atoa nei tatou i nia i to tatou Metua i te raˈi. Oia mau, na ˈna e horoa ra i te mau taata e i te mau animala, i te mea no te atuatu i to ratou ora. Aita ˈtu taata e nehenehe e haamâha i to ratou mau hinaaro. Te horoa nei te Atua “i te maa na ratou i te tau mau”, oia hoi ia hinaaro-anaˈe-hia.
13. Mea nafea Iehova ia ‘heheu i to ˈna rima e ia haamâha i te hiaai o te mau mea ora atoa nei’?
13 ‘Te heheu nei te Atua i to ˈna rima, e te haamâha nei oia i te hiaai o te mau mea ora atoa nei’. (Salamo 104:10-28.) Oia mau, i te tahi taime e pohe te mau animala i te poia. Te ere nei e rave rahi taata i te maa, no te miimii, no te haavîraa e no te hoê faaohipa-ino-raa o te mau faufaa. Hau atu, ua faaite o Iesu e e riro te mau “oˈe” ei hoê o te mau tuhaa o te “tapao” o to ˈna hoˈiraa mai i te mau mahana hopea (Mataio 24:3, 7). Eita roa ˈtu râ te reira e faahapa ra i te horoa maitai o Iehova aore ra i to ˈna neheneheraa e horoa mai i te mea e hinaarohia e tatou. A feruri na i te mau miria poieteraa ta ˈna e faatamaa ra! Hau atu, te horoa maira taua salamo ra i te haapapuraa e, i raro aˈe i te Basileia, ‘ia ore te taata e faahepo i te taata no to ˈna ra pohe’, e haamâha te Atua i to tatou mau hinaaro i te pae materia e i te pae varua (Koheleta 8:9; Isaia 25:6). Mai teie atu nei, te paruruhia nei tatou i te oˈe i te pae varua, no te mea te horoa maira te Atua i te hoê haapueraa maa rahi i te pae varua na tatou, i te taime mau ra, na roto i te arai o “te tavini haapao maitai e te paari”. (Mataio 24:45-47; Petero 1, 2:2.) I te pae varua, ua riro te mau Ite no Iehova ei mau taata o te faatamaa-maitai-roa-hia ˈˈe. Te faaite ra anei outou i te hoê mauruuru hohonu no taua rahiraa maa?
Te haapao ra o Iehova i te feia e here ra ia ˈna
14. No te aha Davida i nehenehe ai e parau e “e parau-tia ta Iehova i tana atoa ra mau haerea, e te hamani maitai i ta ˈna atoa ra mau ohipa”?
14 E nehenehe to tatou huru maamaa e ‘haapiˈo i to tatou haerea’ a roohia ˈtu ai tatou i te mau ati, eiaha roa ˈtu râ tatou e faaino i te Atua no taua mau fifi ra (Maseli 19:3). Te faataa ra o Davida no te aha ra a parau ai oia e: “E parau-tia ta Iehova i tana atoa ra mau haerea, e te hamani maitai i ta ˈna atoa ra mau ohipa.” (Salamo 145:17). E ohipa noa te Atua ma te afaro, ma te parau-tia e ma te aroha faito ore. Ua faaite taa ê oia i taua huru maitai hopea ra ma te rave e ia nehenehe te ora e roaa maoti te tusia taraehara o Iesu (Ohipa 2:21; 4:8-12). “Te hamani maitai” atoa ra o Iehova “i ta ˈna atoa ra mau ohipa”, i te mau taime atoa e faaite oia i to ˈna here e e ore oia e haapao i te huru o te taata. O tatou te feia ‘e pee ra i te Atua’, ia faaite na ïa tatou i te huru afaro, te parau-tia, te aroha faito ore, te oreraa e hiˈo i te huru o te taata e te haapao maitai. — Ephesia 5:1, 2; Deuteronomi 32:4; Salamo 7:10; 25:8; Isaia 49:7; Ohipa 10:34, 35.
15. Mea nafea to tatou ‘tiaororaa i te Atua ma te haavare ore’, e eaha ta te reira i horoa mai na tatou?
15 No te parau-tia e te haapao maitai o te Atua tatou e haere ai ia ˈna ra. Hau atu, te horoa maira o Davida i teie haapapuraa e: “Te fatata maira Iehova i te feia e tiaoro atu ia ˈna, i te feia atoa i tiaoro atu ia ˈna ma te haavare ore.” (Salamo 145:18). Na roto i te bapetizoraa ia tatou ei taata faaroo o tei pûpû ia tatou iho no te Atua, ua tiaoro tatou i te iˈoa o Iehova (Ohipa 8:12; 18:8; Roma 10:10-15). No te mea ïa e ua haafatata tatou i te Atua, e haafatata mai oia ia tatou (Iakobo 4:8). ‘Te tiaoro nei tatou ia ˈna ma te haavare ore’ no te mea te na reira nei tatou ma te tano maitai, na roto i te arai o Iesu Mesia. E e vai noa Iehova i pihai iho ia tatou mai te peu e e haamori tatou ia ˈna “ma te varua e te parau mau”, mai te peu e e faaite tatou i te hoê “faaroo haavare ore”, e mai te peu e e ‘vai itoito noa tatou i te hiˈoraa ˈtu i te Atua, i tei ore e itea ia hiˈo ra’. (Ioane 4:23, 24; Timoteo 1, 1:5; Hebera 11:27.) Ia na reira tatou, eita tatou e pure ma te faufaa ore, eita atoa tatou e faaruru tatou anaˈe iho i te ao a Satani, e tamau râ tatou i te fanaˈo i te tauturu e i te aratairaa a te Atua (Salamo 65:2; Ioane 1, 5:19). Auê ïa hau ta te reira e horoa mai na tatou!
16. No te aha e mea nafea Iehova e ‘faatia ˈi i te hinaaro o te feia e mǎtaˈu ra ia ˈna’?
16 Te ite atoa ra tatou i te hau mau no te tahi atu â mau ohipa ta Iehova e rave ra no tatou. Ua parau o Davida e: “E faatia oia i te hinaaro o te feia i mǎtaˈu ia ˈna, e faaroo mai oia i ta ratou tiaoro, e e faaora hoi ia ratou.” (Salamo 145:19). ‘Te faatia nei o Iehova i to tatou hinaaro’ no te mea te faaite nei tatou i te hoê faatura hohonu no ˈna e te hoê mǎtaˈu faaora ia ore tatou ia rave i te mau mea ta ˈna e ore e au ra (Maseli 1:7). Ua turai to tatou mafatu auraro ia tatou ia pûpû ia tatou no Iehova, e ua tuea to tatou mau manaˈo e teie pure: “Ia haapaohia to oe hinaaro.” I te mea e to ˈna hinaaro, oia hoi ia poro tatou i te poroi o te Basileia, te haamâha nei oia i to tatou hinaaro no te faatupu i taua ohipa ra (Mataio 6:10; Mareko 13:10). ‘Te faatupu nei oia i to tatou hinaaro’ no te mea aita tatou e pure nei ia ˈna ma te miimii, te faatae atu nei râ tatou i ta tatou mau aniraa ia ˈna ia au i to ˈna hinaaro. E horoa mai oia na tatou i te mea e au i to ˈna hinaaro e i te mea e horoa mai i te oaoa no tatou. — Ioane 1, 3:21, 22; 5:14, 15; hiˈo Mataio 26:36-44.
17. No te aha tatou e nehenehe ai e papu e e faaroo te Atua ia “tiaoro” tatou ia ˈna?
17 Tatou te mau Ite haapao maitai no Iehova, e nehenehe tatou e papu e eita roa ˈtu oia e tapiri i to ˈna tariˈa ia “tiaoro” anaˈe tatou ia ˈna. Ua faaora te Atua ia Davida i te ati e ua faaora oia ia Iesu, ma te faatia mai ia ˈna mai roto mai i te feia pohe. E nehenehe tatou e papu e e faaora atoa o Iehova ia tatou i te mau aroraa a to tatou mau enemi, i te taime iho â râ e aro ai o Goga (Ezekiela 38:1 e tae atu i te 39:16). Oia mau, noa ˈtu eaha to tatou mau fifi, e nehenehe tatou e pure ma te tiaturi mai ia Davida o tei parau e: “E aroha mai, e Iehova, ua ahoaho hoi au (...). Te ite nei au i te faaino a te rahi o te taata nei; ua haapunihia vau e te haamǎtaˈu e ati noa ˈˈe: te faaau ra ratou i ta ratou parau e rave ia ˈu nei, te imi ra i ta ratou ravea ia pohe au. Area vau nei, te tiaturi nei au ia oe, e Iehova: te parau nei au e, O oe tau Atua!” — Salamo 31:9-14.
18. I te mea e te ite nei tatou e ‘te tiai ra o Iehova i te feia e here ra ia ˈna’, e haamou râ oia i te feia iino, eaha ta te reira e faaite maira ia tatou?
18 Ua ineine noâ te Atua ra o Iehova no te tauturu mai ia tatou. Oia mau, te parau ra o Davida e: “Te tiai nei Iehova i te feia i hinaaro ia ˈna; area te feia paieti ore ra, e haamouhia ïa e ana.” (Salamo 145:20). Oia mau, mai te peu e te here ra tatou i te Atua, e haamaitai oia ia tatou e e tiai oia ia tatou (Numera 6:24-26). “E faautua hua oia i tei teoteo”, e faaora râ oia i ta ˈna mau tavini haehaa, ma te ore e faatia i te hoê mea ia faaino tamau noa ia ratou. No te mea e tei ia tatou ra o Iehova, e faaite ïa tatou i te itoito (Salamo 31:20-24; Ohipa 11:19-21). “Te mauhaa ra na oe i hamanihia ˈi ra, e ore ïa e tupu.” (Isaia 54:17; Salamo 9:17; 11:4-7). O ta te feia ïa o te haapapu ra i to ratou here no te Atua ma te tavini ia ˈna ma te haapao maitai e te itoito, e ite ra. Ia ravehia ratou i roto i to ratou taatoaraa, e ora mai te mau Ite no Iehova i “te ati rahi” e tupu mai i nia i te feia iino (Apokalupo 7:14). Auê ïa te oaoaraa ia faaafaro-anaˈe-hia te tumu parau rahi no nia i te tiaraa arii o Iehova i roto i te ao taatoa nei no ‘te feia atoa e here ra ia ˈna’!
Ia tamau â tatou i te haamaitai i te iˈoa moˈa o Iehova
19. No te aha to tatou vaha e faahiti ai i ‘te arueraa ia Iehova’?
19 Ua faaoti o Davida i taua salamo putapû ra na roto i teie mau parau e: “E parau tau vaha ma te arue ia Iehova; e ia haamaitai te taata atoa i to ˈna ra iˈoa moˈa e a muri noa ˈtu.” (Salamo 145:21). Tatou te mau Ite no Iehova, ua papu maitai ia tatou i te rahi o te Atua, to ˈna maitai, te here ta ˈna e faaite ra ia faaohipa anaˈe o ˈna i to ˈna tiaraa arii, te turu taiva ore e te atuatu-maite-raa ta ˈna e horoa mai na tatou. No reira, ‘ia parau’ na to tatou nei vaha, mai to Davida, ‘ma te arue i te Atua’! Te hinaaro nei tatou ia haamori ia ˈna anaˈe, ia haamauruuru ia ˈna no ta ˈna mau haamaitairaa e rave rahi, e ia arue i to ˈna “iˈoa hanahana”. — Paraleipomeno 1, 29:10-13; Exodo 20:4-6.
20. I te mea e te tiaturi nei tatou i te ora mure ore, eaha ïa ta tatou e hinaaro e rave?
20 I te mea e te haamaitai nei Iehova ia tatou i te mau mahana atoa, ia haamaitai tamau tatou ia ˈna, aore ra ia paraparau tamau tatou no nia ia ˈna ma te maitai. Ia poro tatou i te parau apî maitai ma te itoito no te arue ia ˈna, ma te parau ia vetahi ê e fatata roa ‘te taata atoa i te haamaitai i to ˈna iˈoa moˈa’. Auê ïa oaoa i te ora e ia himene anaˈe te mau taata atoa e ora i nia i te fenua nei — e te mau poieteraa atoa i roto i te ao taatoa nei — i te mau arueraa i to tatou Metua i te raˈi ra (Salamo 148:1-13)! Ia haamaitaihia Iehova no to ˈna faaiteraa mai ia tatou i to ˈna iˈoa e no te horoaraa mai ia tatou i te haamaitairaa no te riro ei Ite no ˈna (Salamo 83:18; Isaia 43:10-12)! Ia nehenehe noa tatou ia faaohipa i te hoê haerea e au i te mau taata o te amo ra i taua iˈoa moˈa ra e ia pure no te faaraaraa ia ˈna (Luka 11:2)! Ia tavini tatou i te Atua ma te haapao maitai, ia nehenehe tatou, i roto i ta ˈna faanahonahoraa apî, e apiti atu i to tatou reo i te reo o te feia o te haamaitai i te iˈoa moˈa ra o Iehova e a muri noa ˈtu!
Eaha to outou manaˈo?
◻ Mai te peu e mea faufaa na tatou te tiaraa arii o Iehova, eaha ïa te ohipa ta tatou e rave?
◻ I teie nei mahana, te faaauhia nei te tiaraa arii o te Atua i te aha?
◻ Mea nafea Iehova ia ‘faatia mai i te feia atoa i piˈo i raro’?
◻ Mea nafea te Atua ia ‘heheu i to ˈna rima e ia haamâha i te hiaai o te mau mea ora atoa nei’?
◻ Mea nafea tatou e nehenehe ai e haamaitai i te iˈoa moˈa o Iehova?
[Hohoˈa i te api 28]
I te matahiti 1922, ua faaitoito te titauraa ‘ia faaite i te Arii e te Basileia’ i te feia paruru i te tiaraa arii o Iehova.