‘E haaati au i to fata, e Iehova’
“E HOROI au i o ˈu pue rima i te hapa ore, a haaati atu ai au i to fata, e Iehova!” (Salamo 26:6) Na roto i teie mau parau, te faaite ra te arii tahito ra o Davida i to ˈna paieti no Iehova. No te aha râ e i roto i teihea auraa oia e “haaati” ai i te fata a Iehova?
No Davida, o te sekene e te fata veo o te tusia, tei haamauhia i Gibeona i te pae apatoerau no Ierusalema a faatere ai oia, te pu o te haamoriraa a Iehova. (Te mau arii 1, 3:4) Mea nainai aˈe teie fata, e 2,2 metera tuea, i te fata haviti i faatiahia i roto i te aua o te hiero a Solomona.a Teie râ, ua oaoa rahi Davida i te sekene e te fata, tei riro hoi ei pu no te haamoriraa viivii ore i Iseraela.—Salamo 26:8.
E ravehia te mau tusia taauahi, te mau tusia haamaitai, e te mau tusia taraehara i nia i te fata, e tei te Mahana Taraehara matahiti e pûpûhia ˈi te mau tusia no te nunaa. E faufaaraa to te fata e ta ˈna mau tusia no te mau Kerisetiano i teie mahana. Ua faataa te aposetolo Paulo e ua faahohoˈa te fata i te hinaaro o te Atua, no reira, ua farii Oia i te hoê tusia tano no te taraehara o te huitaata. Ua na ô Paulo e: “No taua hinaaro ra e moˈa ˈi tatou nei, i te pûpûraa hoê i te tino o Iesu Mesia ra.”—Hebera 10:5-10.
Na mua ˈˈe ratou a haamata ˈi i te tavini i te fata, mea matau na te mau tahuˈa i te horoi i to ratou rima i te pape no te tamâ ia ratou iho. Ma te tano roa, ua horoi te arii ra o Davida i to ˈna rima “i te hapa ore” hou oia a ‘haaati ai i te fata.’ Ua ohipa oia “ma te haapao maitai o te aau, e ma te parau-tia.” (Te mau arii 1, 9:4) Ia ore oia e horoi i to ˈna rima, eita ïa ta ˈna haamoriraa—to ˈna ‘haaatiraa i te fata’—e fariihia. Parau mau, e ere Davida i te hoê ati Levi e aita ta ˈna e haamaitairaa no te rave i te taviniraa a te mau tahuˈa i te fata. Noa ˈtu e e arii oia, aita atoa oia i fariihia i roto i te aua o te sekene. Noa ˈtu râ, ei ati Iseraela haapao maitai, ua auraro oia i te Ture a Mose e ua hopoi tamau oia i ta ˈna mau tusia no te pûpû i nia i te fata. Ua haaati oia i te fata i roto i te auraa e ua haamau oia i to ˈna oraraa i nia i te haamoriraa viivii ore.
E nehenehe anei tatou e pee i te hiˈoraa o Davida i teie mahana? E. E nehenehe atoa tatou e horoi i to tatou rima i te hapa ore e e haaati i te fata a te Atua ia faaohipa tatou i te faaroo i roto i te tusia a Iesu e ia tavini tatou ia Iehova ma to tatou mafatu atoa e te “rima mâ ra e te aau [viivii ore].”—Salamo 24:4; MN.
[Nota i raro i te api]
a Fatata e 9 metera tuea to taua fata ra.
[Hohoˈa i te api 23]
Ua faahohoˈa te fata i te hinaaro o Iehova, na roto i te reira oia e farii ai i te hoê tusia tano no te taraehara o te huitaata