HAAPIRAA 25
Eaha te opuaraa a te Atua no tatou?
Te faataa ra te Bibilia no te taata, e oraraa ‘poto to ratou e te î i te mauiui.’ (Ioba 14:1) Tera mau râ anei ta te Atua e hinaaro no tatou? Mai te peu aita, eaha ïa ta ˈna opuaraa no tatou? E tupu mau râ anei te reira? E hiˈo mai ïa tatou eaha te mau pahonoraa Bibilia tamahanahana mau.
1. Eaha te huru oraraa ta Iehova e hinaaro ra no tatou?
Ta Iehova e hinaaro ra no tatou, o te hoê ïa oraraa oaoa. Tera atoa ta Iehova i rave a poiete ai oia ia Adamu raua Eva, ua tuu oia ia raua i roto i te ô i Edene, te hoê paradaiso nehenehe mau. Te na ô ra te Bibilia: “Haamaitai ihora te Atua ia raua, e na ô atura te Atua: ‘Ia tamariihia orua e ia rahi, a faaî i te fenua e a haapao atu.’” (Genese 1:28) Ta Iehova e hinaaro ra, ia fanau raua i te tamarii, ia faariro i te fenua ei paradaiso e ia aupuru i te mau animara. Ta ˈna opuaraa ia oaoa te taata atoa e te hoê ea maitai e ia ora e a muri noa ˈtu.
Noa ˈtu aita te reira i tupu,a eita râ ta te Atua opuaraa i taui. (Isaia 46:10, 11) Te hinaaro noa ra Iehova ia ora te feia o te auraro ia ˈna, i te fenua e a muri noa ˈtu ma te tia roa.—A taio i te Apokalupo 21:3, 4.
2. Nafea tatou e fanaˈo ai i te hoê oraraa oaoa i teie nei â?
Ua poiete Iehova ia tatou ma te “hiaai . . . i te mau mea pae varua,” oia hoi, ma te hinaaro e ite o vai o ˈna e ma te haamori ia ˈna. (A taio i te Mataio 5:3-6.) Te hinaaro nei oia ia piri atu â tatou ia ˈna, “ia haere na to ˈna mau eˈa atoa, ia here ia ˈna,” e ia tavini ia ˈna “ma to [tatou] aau atoa.” (Deuteronomi 10:12; Salamo 25:14) Ia na reira tatou, e ite mau â tatou i te oaoa noa ˈtu e fifi to tatou. Ia haamori tatou ia Iehova, e ite tatou i te hoê oraraa oaoa no te mea te ora ra tatou mai ta ˈna e hinaaro ra ia ora tatou.
A FAAHOHONU ATU Â
A haapii no nia i te here rahi ta Iehova i faaite a faaineine ai oia i te fenua no tatou e eaha ta ta ˈna Parau e haapii mai ra no nia i te tumu o te oraraa.
3. E opuaraa faahiahia mau ta Iehova no te taata
A pata i te VIDEO, e a aparau i te uiraa i muri nei.
No te aha te Atua i poiete ai i to tatou fenua nehenehe mau?
A taio i te Koheleta 3:11, e a aparau i teie uiraa:
Eaha ta te reira e haapii ra ia oe no nia ia Iehova?
4. Aita te opuaraa a Iehova i taui
A taio i te Salamo 37:11, 29 e te Isaia 55:11, e a aparau i teie uiraa:
Nafea tatou e ite ai aita te opuaraa a Iehova no tatou i taui?
E nehenehe te hoê fare tei tuinohia e tataîhia. Hoê â huru no te fenua, ta te taata i tuino, e nehenehe atoa Iehova e tataî no te feia o te here ra ia ˈna
5. E horoa mai te haamoriraa ia Iehova i te hoê oraraa oaoa mau
E oaoa tatou ia ite eaha te tumu o te oraraa. A pata i te VIDEO, e a aparau i te uiraa i muri nei.
Mea nafea Terumi i te faufaaraahia i to ˈna haapiiraa eaha te tumu o te oraraa?
A taio i te Koheleta 12:13, e a aparau i teie uiraa:
Ua rave hoi Iehova i te mau mea atoa no tatou, e nafea tatou e faaite ai i to tatou mauruuru ia ˈna?
E ANI PAHA VETAHI: “Eaha te tumu o te oraraa?”
E nafea oe ia pahono?
HAAPOTORAA
Te hinaaro ra Iehova ia oaoa tatou i te ora e a muri noa ˈtu ma te tia roa i te fenua nei. E haamori tatou ia ˈna ma to tatou aau atoa e e ite tatou i te hoê oraraa oaoa mau i teie nei â.
Haamanaˈoraa
Eaha te opuaraa matamua a Iehova no Adamu raua Eva?
Nafea tatou e ite ai e aita te opuaraa a te Atua i taui?
Nafea oe e ite ai i te hoê oraraa oaoa?
HIˈOPOA
A hiˈo i te haapapuraa e ua vai mau â te ô i Edene i mutaa iho.
“Te ô i Edene—Aamu mau aore ra aai?” (Te Pare Tiairaa 1 no Fepuare 2011)
A haapii no te aha e papu ai ia tatou e vai noa te fenua e a muri noa ˈtu.
A hiˈopoa eaha ta te Bibilia e parau ra no te ite i te hoê oraraa oaoa i roto i to oe oraraa.
A hiˈo mea nafea te hoê taata i te iteraa ta ˈna i ere i roto i to ˈna oraraa, i manaˈo noa ˈi oia ua noaa mai ia ˈna te mau mea atoa.
a I roto i to muri iho haapiiraa, e ite mai oe e ere mai tera to tatou oraraa.