E faaora te aroha o Iehova ia tatou i te hepohepo
“E aroha mai oe ia ˈu, e te Atua e, i taua hamani maitai no oe ra, e no te rahi o to oe ra hamani maitai: e parai oe i ta ˈu nei mau hara.”—SALAMO 51:1.
1, 2. Mea nafea te hoê tavini a Iehova ia haapeapeahia e te hoê hara ino mau?
EITA e nehenehe e ofati i te ture a Iehova ma te ore e faautuahia. Mea papu maitai te reira ia rave tatou i te hoê hara ino mau i te Atua ra! Noa ˈtu e ua tavini tatou ia Iehova e rave rahi matahiti, e riro te ofatiraa i ta ˈna ture i te faatupu i te taiâ rahi aore ra te hepohepo hohonu. E nehenehe tatou e manaˈo e ua faarue mai Iehova ia tatou e eita e tia faahou ia tatou i te taviniraa ia ˈna. E riro hoi ta tatou hara mai te hoê ata teiaha o te haapouri i te maramarama o te farii maitai o te Atua.
2 Ua farerei te Arii no Iseraela tahito ra o Davida i teie huru tupuraa. Mea nafea hoi?
E nehenehe te mau taahiraa avae hape e aratai i te hara ino mau
3, 4. Eaha te ohipa i roohia i te Arii ra o Davida i te hoê tau ruperupe?
3 Mea here na Davida i te Atua, teie râ ua rave oia i te mau taahiraa avae hape o tei aratai ia ˈna i te mau hara iino mau. (A faaau e te Galatia 6:1.) E nehenehe te reira e roohia i te mau huru taata tia ore atoa, mai te peu iho â râ e e mana to ˈna i nia ia vetahi ê. Ei arii taoˈa rahi, ua fanaˈo o Davida i te roo e te puai. O vai hoi te tamata i te patoi atu i ta ˈna parau? Ua ineine noa te mau taata itoito i te tavini ia ˈna, e e oioi noa te taata i te auraro i ta ˈna mau faaueraa. Teie râ, ua hara o Davida i to ˈna raveraa e rave rahi mau vahine e to ˈna taioraa i te nunaa.—Deuteronomi 17:14-20; Paraleipomeno 1, 21:1.
4 I taua tau ruperupe i te pae materia ra, ua rave o Davida i te mau hara ino roa i te Atua e te taata. Inaha, ua aratai te hoê hara i te tahi atu hara mai te mau taura o te hoê ahu i ninohia e Satani! A aro ai te mau ati Iseraela i te mau ati Amona, mai nia mai i te tahua tapoˈi o to ˈna fare, ua mataitai atu o Davida i te vahine nehenehe mau a Uria, o Bate-seba, i te hopuraa i te pape. I te mea e tei te tamaˈi o Uria, ua faahaere maira te arii i teie vahine i to ˈna aorai e ua faaturi atura raua. A feruri na i to ˈna hitimahuta i to ˈna iteraa i muri iho e ua hapû o ˈna! Ua poroi atura o Davida ia hoˈi mai o Uria, ma te tiaturi e e taoto o ˈna i ta ˈna vahine o Bate-seba e ia manaˈo oia e na ˈna teie tamarii. Noa ˈtu e ua faataero o Davida ia ˈna, aita o Uria i hinaaro e taoto e ta ˈna vahine. I te mea e aita o ˈna i taa faahou e nafea râ, ua faatae huna ˈtura o Davida i te raatira ra o Ioaba i te faaueraa e tuu ia Uria i nia i te reni aroraa i te vahi e mea papu maitai e e pohe oia. Ua pohe o Uria i te tamaˈi, ua haapao ta ˈna vahine i te tau hevaraa, e ua faaipoipo atura o Davida ia ˈna hou te nunaa e ite ai e ua hapû o ˈna.—Samuela 2, 11:1-27.
5. Eaha te ohipa i tupu i muri aˈe i to Davida hararaa e o Bate-seba, e eaha te faahopearaa o ta ˈna mau hara i nia ia ˈna?
5 Na roto i te peropheta ra o Natana, ua faaite tahaa ˈtura te Atua i te mau hara a Davida e ua na ô atura e: “Inaha, e faatupu vau i te ino ia oe i roto i to oe ra fare.” Inaha, ua pohe te tamarii i fanauhia mai e Bate-seba. (Samuela 2, 12:1-23) Ua hamani ino te tamaiti matahiapo a Davida o Amanona i to ˈna tuahine o Tamara e ua taparahi-pohe-hia oia e te taeae o Tamara. (Samuela 2, 13:1-33) Ua tamata te tamaiti a te arii ra o Abasaloma i te haru i te terono e ua faahaamâ oia i to ˈna metua tane na roto i te taotoraa i te mau vahine a Davida. (Samuela 2, 15:1–16:22) Ua hope te tamaˈi tivila i te poheraa o Abasaloma e ua rahi atu â te oto o Davida. (Samuela 2, 18:1-33) Teie râ, ua faahaehaa te mau hara a Davida ia ˈna e ua turai te reira ia ˈna ia ite i te faufaaraa o te ati-maite-raa ˈtu i to ˈna Atua hamani maitai. Ia hara noa ˈtu tatou, ia tatarahapa tatou ma te haehaa e ia haafatata ˈtu tatou ia Iehova, e tia ˈi.—A faaau e te Iakobo 4:8.
6. No te aha e e hara rahi ta te Arii ra o Davida?
6 E hapa rahi iho â râ ta Davida no te mea e arii Iseraela oia o tei ite maitai i te Ture a Iehova. (Deuteronomi 17:18-20) E ere oia mai te pharao no Aiphiti aore ra te arii no Babulonia o tei erehia i teie ite e o tei matau i te rave i te mau ohipa i opanihia e te Atua. (A faaau e te Ephesia 2:12; 4:18.) Ei melo no te hoê nunaa tei pûpûhia no Iehova, ua taa ia Davida e e mau hara faufau mau te faaturi e te taparahi taata. (Exodo 20:13, 14) Ua ite atoa te mau kerisetiano i te ture a te Atua. Teie râ, mai ia Davida, te ofati nei vetahi i te reira no to ratou huru taata hara, te paruparu taata nei, e i te mea e aita ratou i mau i mua i te faahemaraa. Mai te peu e e roohia tatou i teie huru tupuraa, eiaha ïa tatou ia faaea i roto i te pouri o te haamohimohi i to tatou hiˈoraa pae varua e o te vehî ia tatou i te hepohepo hohonu.
E hopoi mai te faˈiraa i te hara i te tamǎrûraa
7, 8. (a) Eaha te ohipa i roohia ia Davida i to ˈna tamataraa i te huna i ta ˈna mau hara? (b) No te aha e tia ˈi ia faˈi e ia haapae i te hara?
7 Mai te peu e ua rave tatou i te mau ofatiraa iino i te ture a te Atua, mea fifi paha na tatou ia faˈi i ta tatou mau hara, e tae noa ˈtu i mua ia Iehova. Eaha ïa te ohipa e nehenehe e tupu mai? I roto i te Salamo 32, ua farii o Davida e: “Ia ˈu i mamû noa ra [maoti i te faˈi i ta ˈna hara], ua ino roa o ˈu mau ivi, i te uuru no ˈu e rui noa ˈtu te mahana. Te teiaha maira hoi to rima [to Iehova] i nia ia ˈu, i te rui e te ao; ua mǎrô atura vau mai te mǎrô o te tau poai ra.” (Irava 3, 4) Ia ˈna i tamata i te huna i ta ˈna hara e ia haamamû i to ˈna haava manaˈo e faahapa ra ia ˈna, ua paruparu-roa-hia te taata taiâ ra o Davida. Ua faaiti roa te hepohepo i to ˈna itoito e ua riro roa oia mai te hoê tumu raau mǎrô tei erehia i to ˈna tapau ora. Inaha, peneiaˈe ua roohia oia i te maˈi i te pae feruriraa e te pae tino. Noa ˈtu râ, ua erehia oia i to ˈna oaoa. Mai te peu e tei roto tatou i teie huru tupuraa, eaha ïa te tia ia tatou ia rave?
8 E nehenehe te faˈiraa i te hara i te Atua e afai mai i te faaoreraa hapa e te tamǎrûraa. Ua himene hoi o Davida e: “E maoro aˈera, ua faˈi atura vau i tau hara ia oe; e aore au i huna i to ˈu nei piˈo: i na ô aˈera hoi au e, E faˈi au i tau hara ia Iehova ra; e ua faaore mai oe i te ino o taua hara na ˈu ra.” (Salamo 32:5) Te hepohepo ra anei outou i te tahi hara huna? E ere anei e mea maitai aˈe ia faˈi e ia haapae i teie hara no te fanaˈo i te aroha o te Atua? No te aha outou e ore ai e faaara i te mau matahiapo o te amuiraa e e ani i te rapaauraa i te pae varua? (Maseli 28:13; Iakobo 5:13-20) E fariihia to outou aau tatarahapa, e i muri iho, e nehenehe outou e fanaˈo faahou i to outou oaoa kerisetiano. “E ao to ˈna! to tei faaorehia ta ˈna hara, e tei tapoˈihia to ˈna ino,” o ta Davida ïa e parau ra. “E ao to te taata, aore i parihia e Iehova i te hara, e aore e haavare o roto i to ˈna aau.”—Salamo 32:1, 2.
9. Afea te Salamo 51 i te papairaahia, e no te aha?
9 E hopoia ta Davida e o Bate-seba i mua i te Atua ra o Iehova no ta raua hara. Noa ˈtu e e nehenehe raua e haapohehia no ta raua mau hara, ua aroha te Atua ia raua. Ua aroha iho â râ oia ia Davida no te faufaa o te Basileia. (Samuela 2, 7:11-16) Te itehia ra te haerea tatarahapa o Davida no ta ˈna mau hara e o Bate-seba i roto i te Salamo 51. Ua papaihia teie salamo putapû mau e te arii tatarahapa ra i muri aˈe i to te peropheta ra o Natana faaaraararaa i to ˈna haava manaˈo i te ino o ta ˈna mau ofatiraa i te ture a te Atua. Ua faaite mau â o Natana i te itoito no te haere atu e vauvau i te mau hara a Davida i mua ia ˈna, e oia atoa, e tia i te mau matahiapo kerisetiano ia faaite i te itoito no te na reira i teie mahana. Maoti i te patoi i te pariraa e i te faaue e ia haapohehia o Natana, ua farii te arii i ta ˈna hara ma te haehaa. (Samuela 2, 12:1-14) Te faataa ra te Salamo 51 i te parau ta ˈna i faaite atu i te Atua na roto i te pure no nia i ta ˈna mau ohipa haamâ mau e ua tano roa teie salamo ei feruri-hohonu-raa na tatou i roto i te pure, mai te peu iho â râ e ua hara tatou e te titau nei tatou i te aroha o Iehova.
E hopoia ta tatou i mua i te Atua
10. Nafea o Davida e ora mai ai i te pae varua?
10 Aita o Davida i imi i te tahi otoheraa no ta ˈna hara, ua taparu râ oia e: “E aroha mai oe ia ˈu, e te Atua e, i taua hamani maitai no oe ra, e no te rahi o to oe ra hamani maitai: e parai oe i ta ˈu nei mau hara.” (Salamo 51:1) I to ˈna hararaa, ua na nia ˈtu o Davida i te mau otia o te Ture a te Atua. Teie râ, e nehenehe oia e tiaturi e e ora faahou mai oia i te pae varua, mai te peu e e faaite mai te Atua i to ˈna aroha ia au i To ˈna hamani maitai, oia hoi to ˈna here taiva ore. Ua horoa te aroha rahi ta te Atua i faaite na mua ˈtu i te niu ia tiaturi te arii tatarahapa e e parai to ˈna Poiete i ta ˈna mau hara.
11. Eaha te faaitehia ra na roto i te mau tusia o te Mahana o te Taraehara, e eaha te titauhia ia ora tatou i teie mahana?
11 Na roto i te hohoˈa i tohuhia mai o te mau tusia i te Mahana o te Taraehara, ua faaite Iehova e e ravea ta ˈna no te tamâ i te feia tatarahapa i ta ratou hara. Ua ite tatou i teie nei e ua haafanaˈohia tatou i to ˈna aroha e to ˈna faaoreraa i te hara ia au i to tatou faaroo i roto i te tusia o te hoo a Iesu Mesia. Mai te peu e ua tia ia Davida, maoti noa te mau faahohoˈaraa e te mau taipe o teie tusia i roto i to ˈna feruriraa, ia tiaturi i te hamani maitai e te aroha o Iehova, eaha ˈtu ïa te mau tavini a te Atua i teie nei tau o te faatupu i te faaroo i roto i te hoo i pûpûhia mai ia ora ratou!—Roma 5:8; Hebera 10:1.
12. Eaha te auraa o te parau e hara, e eaha te huru o Davida i mua i ta ˈna hara?
12 I to ˈna taparuraa i te Atua, ua parau â o Davida e: “E horoi hua mai oe ia ˈu i to ˈu nei ino, tamâ hua mai ia ˈu i ta ˈu nei hara. Te faˈi nei hoi au i ta ˈu nei hara, e te vai noa nei â to ˈu ino i pihaiiho ia ˈu.” (Salamo 51:2, 3) Te hara, o te ereraa ïa i te tapao ia au i te mau ture a Iehova. O ta Davida mau ïa i rave. Teie râ, e ere oia mai te hoê taparahi taata aore ra te hoê taata faaturi o te ore roa e tâuˈa i ta ˈna hara, ma te haapeapea noa no te utua aore ra te rooraahia oia i te hoê maˈi. Ei taata here ia Iehova, ua riri o Davida i te ino. (Salamo 97:10) Ua faufau roa oia i te hara e ua hinaaro oia e ia tamâ roa te Atua ia ˈna. Ua taa maitai ia Davida i ta ˈna mau hara e ua mauiui roa oia i te mea e ua vaiiho oia i to ˈna hinaaro hara ra ia upootia i nia ia ˈna. Ua vai ta ˈna hara i mua ia ˈna i te mau taime atoa, no te mea eita te haava manaˈo o te hoê taata mǎtaˈu i te Atua e tamǎrûhia e tae roa ˈtu i te tatarahaparaa, te faˈiraa i te hara, e te faaoreraa mai Iehova i te hara.
13. No te aha o Davida e nehenehe ai e parau e ua hara oia i te Atua anaˈe?
13 Ma te farii i ta ˈna hopoia i mua ia Iehova, ua parau o Davida e: “I mua i to aro, to oe anaˈe ra, i hara ˈi au nei, e i mua i to mata i rave ai au i teie nei ino: ia faatiahia hoi ta oe parau, e eiaha e faahapahia ia parauhia ra.” (Salamo 51:4) Ua ofati Davida i te mau ture a te Atua, ua haavahavaha oia i te toroa arii, e ‘ua faatura ore roa oia ia Iehova,’ ma te faatae i te haamâ i nia Ia ˈna. (Samuela 2, 12:14; Exodo 20:13, 14, 17) Ua riro atoa te mau hara a Davida ei mau faainoraa i te totaiete Iseraela e te mau melo o to ˈna utuafare, mai ta te hoê taata hara bapetizohia i teie mahana e faatupu i te mauiui aore ra te peapea i roto i te amuiraa kerisetiano e i rotopu i te feia herehia. Noa ˈtu e ua ite te arii tatarahapa ra e ua hara oia i te taata mai ia Uria ra, ua farii oia i ta ˈna hopoia rahi atu â i mua ia Iehova. (A faaau e te Genese 39:7-9.) Ua farii o Davida e e haavaraa parau-tia ta Iehova. (Roma 3:4) Mea titauhia ia pee atoa te mau kerisetiano o tei hara i teie huru manaˈo.
Te mau tupuraa o tei aratai i te hara
14. Eaha te mau tupuraa e aratai i te hara i faahitihia e Davida?
14 Noa ˈtu e aita o Davida i tamata i te paruru ia ˈna iho, ua parau oia e: “Inaha, i fanau mai au ma te hara! e i tôhia vau e tau metua vahine ma te ino.” (Salamo 51:5) Ua fanauhia mai o Davida ma te hapa, e ua roohia to ˈna metua vahine i te mauiui fanau no te hara. (Genese 3:16; Roma 5:12) Aita o ˈna e hinaaro ra e parau e e hara te mau taatiraa tano i te pae tino i roto i te faaipoiporaa, te tôraa, e te fanauraa i te tamarii, inaha na te Atua iho i horoa mai i te ravea o te faaipoiporaa e te fanauraa i te tamarii; aita atoa o Davida e faahiti ra i te tahi hara taa ê a to ˈna metua vahine. Ua tôhia oia i roto i te hara no te mea e tiaraa taata hara to to ˈna mau metua mai te mau taata tia ore atoa.—Ioba 14:4.
15. Noa ˈtu e e haapao atoa te Atua i te mau tupuraa e aratai ia hara, eaha te ore e tia ia tatou ia rave?
15 Mai te peu e ua hara tatou, e nehenehe tatou e faahiti i roto i ta tatou pure i te Atua i te mau tupuraa o tei aratai ia outou ia hara. Eiaha râ e faariro i ta tatou aniraa i te aroha faito ore o te Atua ei parururaa i to tatou haerea taiata aore ra e faaohipa i to tatou tiaraa taata hara ei tapoˈi no te huna i te hopoia te tia ia tatou ia amo no ta tatou hara. (Iuda 3, 4) Ua farii o Davida i te hopoia i to ˈna faatupuraa i te mau manaˈo viivii e to ˈna toparaa i roto i te faahemaraa. Ia pure atoa tatou e tia ˈi, ia ore tatou ia hema e i muri iho, a ohipa ia au maite i teie pure.—Mataio 6:13.
Te taparuraa e ia tamâhia oia
16. Eaha te huru maitai ta te Atua e oaoa, e nafea te reira ia ohipa i nia i to tatou haerea?
16 Ia hiˈohia vetahi taata, e feia tavini maitatai ratou no te Atua, teie râ, e hiˈo oia i muri mai i te hohoˈa rapaeau e e ite oia i to tatou huru i roto. Ua parau o Davida e: “Inaha, o te parau mau no roto ra ta oe [Iehova] e hinaaro! e haapii mai oe ia ˈu i te haapao maitai i te vahi moe ra.” (Salamo 51:6) Ua hara o Davida i to ˈna haavareraa e to ˈna taviriraa i te mau ohipa ia pohe o Uria e to ˈna hunaraa i te ohipa i tupu no nia i te hapu o Bate-seba. Noa ˈtu râ, ua ite oia e e oaoa te Atua i te parau mau e te tiaraa moˈa. E ohipa te reira i nia i to tatou haerea i roto i te hoê ravea maitai, no te mea e nehenehe Iehova e faautua ia tatou mai te peu e e feia taviri ohipa atoa tatou. (Maseli 3:32) Ua taa atoa ia Davida e ‘ia haapii mai te Atua ia ˈna i te haapao maitai,’ ei arii tatarahapa, e nehenehe oia e pee i te mau ture a te Atua i te toea o to ˈna oraraa.
17. Eaha te auraa o te pureraa ia tamâhia e te hisopa?
17 I te mea e ua ite te papai salamo e te titau ra oia i te tauturu a te Atua no te faatitiaifaro i to ˈna mau hinaaro hara, te taparu ra oia i muri aˈe e: “E tamâ mai oe ia ˈu i te hisopa e ia mâ roa vau; e horoi oe ia ˈu, e uouo roa aˈera vau i to te hiona.” (Salamo 51:7) E vetahi atu mau taoˈa, e faaohipahia na te hisopa (peneiaˈe te marjoram, oia hoi Origanum maru) i roto i te oroa tamâraa o te feia o tei roohia i te lepera na mua ˈˈe. (Levitiko 14:2-7) No reira, ua tano roa e ia pure o Davida e ia tamâhia oia i te hara e te hisopa. Ua taai-atoa-hia te manaˈo o te viivii ore e ta ˈna taparuraa e ia horoi Iehova ia ˈna ia mâ roa oia, ia uouo oia mai te hiona ra o tei ore i repohia aore ra i ino i te pehu. (Isaia 1:18) Mai te peu e te mauiui ra te haava manaˈo o vetahi i rotopu ia tatou no te tahi hara, e nehenehe tatou e tiaturi e, ia ani tatou i te Atua ma te aau tatarahapa e ia faaore mai oia i ta tatou hara, e nehenehe oia e tamâ e e horoi ia tatou na nia i te tusia o te hoo a Iesu.
Te taparuraa e ia faahoˈihia mai oia
18. Eaha te tiaraa o Davida hou oia e tatarahapa ˈi e e faˈi ai i ta ˈna hara, e nafea te iteraa i te reira ia tauturu ia tatou i teie mahana?
18 E taa maitai i te kerisetiano o tei haamauiuihia e te hoê haava manaˈo faahapa i te mau parau a Davida: “E faaite mai oe ia ˈu i te oaoa e te rearea [e Iehova], ia oaoa te mau ivi i ofatihia e oe ra.” (Salamo 51:8) Hou Davida i tatarahapa ˈi e i faˈi ai i ta ˈna mau hara, ua haaparuparu roa to ˈna haava manaˈo peapea ia ˈna. Aita oia i putapû i te mau himene umereraa e te oaoa i faaotohia e te mau taata himene navenave e te feia faataˈi upaupa aravihi. No te mauiui rahi o te taata rave hara ra o Davida i to ˈna ereraa i te farii maitai o te Atua, ua riro oia mai te hoê taata o tei ofatihia to ˈna mau ivi. Ua hiaai oia e ia faaorehia ta ˈna hapa, ia ora mai oia i te pae varua, e ia noaa faahou mai ia ˈna te oaoa o ta ˈna i fanaˈo na mua ˈˈe. I teie mahana, te titau atoa ra te hoê taata rave hara o tei tatarahapa e ia faaore mai Iehova i ta ˈna hara ia noaa faahou mai ia ˈna te oaoa e vai ra ia ˈna hou oia i rave ai i te hoê mea o tei faaino i to ˈna mau taairaa e te Atua. Te faaite ra te noaa-faahou-raa mai te ‘oaoa a te varua moˈa’ i te hoê taata tatarahapa e ua faaore Iehova i ta ˈna hara e te here ra oia ia ˈna. (Tesalonia 1, 1:6) Auê ïa tamahanahanaraa e!
19. Eaha te huru o Davida mai te peu e e tumâ te Atua i ta ˈna mau hape atoa?
19 I muri iho, ua pure o Davida e: “E huna ê atu oe i to mata i ta ˈu nei mau hara, e parai hua i to ˈu nei mau ino.” (Salamo 51:9) Eita e tia ia Iehova ia farii noa i te hara. Teie râ, ua anihia oia ia huna i to ˈna mata i te mau hara a Davida. Ua taparu atoa te arii e ia parai te Atua i ta ˈna mau hapa atoa, ia tumâ i to ˈna parau-tia ore atoa. Ahiri e e na reira o Iehova! E haamama mai ïa te reira i te aau o Davida, e iriti i te hopoia teimaha o te hoê haava manaˈo peapea, e e vaiiho i te arii e tatarahapa ra i teie nei ia ite e ua faaore mai to ˈna Atua here ra i ta ˈna hara.
Mai te peu e ua hara outou, nafea ïa?
20. Eaha te titauhia ra i te kerisetiano o tei rave i te hoê hara ino mau?
20 Te faaite ra te Salamo 51 e e nehenehe te mau tavini pûpûhia a Iehova o tei rave i te hara ino mau, tera râ, o te tatarahapa, e ani ia ˈna ma te tiaturi e ia faaite mai oia i to ˈna farii maitai e ia horoi oia ia ratou i ta ratou hara. Mai te peu e e kerisetiano outou e ua hara outou, no te aha outou e ore ai e ani i to outou Metua i te raˈi ia faaore i ta outou hara na roto i te pure haehaa? A farii e te titau ra outou i te tauturu a te Atua ia nehenehe outou e tia ˈtu ma te fariihia i mua ia ˈna, e a ani e ia faahoˈi faahou mai oia i te oaoa ta outou i fanaˈo na na mua ˈtu. E nehenehe te mau kerisetiano tatarahapa e haafatata ˈtu ma te tiaturi ia Iehova na roto i te pure maoti teie mau aniraa, inaha, “te rahi ra hoi ia ˈna te faaore i te hara.” (Isaia 55:7; Salamo 103:10-14) Oia mau, e tia ia titau i te mau matahiapo o te amuiraa ia horoa mai ratou i te tauturu e hinaarohia ra i te pae varua.—Iakobo 5:13-15.
21. Eaha ta tatou e tuatapapa i muri iho?
21 E faaora te aroha o Iehova i to ˈna nunaa i te hepohepo. Teie râ, e tuatapapa na tatou i te tahi atu mau aniraa a te taata tatarahapa ra o Davida i roto i te Salamo 51. E faaite mai ta tatou tuatapaparaa e eita Iehova e haafaufaa ore i te mafatu e oto ra.
Nafea outou ia pahono mai?
◻ Eaha te faahopearaa o te hara ino mau i nia i te tavini a Iehova?
◻ Eaha te huru o Davida i to ˈna tamataraa i te huna i ta ˈna hara?
◻ No te aha o Davida e parau ai e ua hara oia i te Atua anaˈe?
◻ Noa ˈtu e e haapao atoa te Atua i te mau tupuraa e turai ia tatou ia hara, eaha te ore e tia ia tatou ia rave?
◻ Eaha te tia i te hoê kerisetiano ia rave mai te peu e ua rave oia i te hoê hara ino mau?