Te hiaai ra anei outou e tavini hau atu â?

“UA RIRI au ia Iehova,” o ta Laura ïa e parau ra. “Ua pure au e ua pure â, ia tauturu mai oia ia mâua, ia matara to mâua mau fifi moni e ia nehenehe au e tamau noa i te taviniraa pionie—aita râ i manuïa. I te pae hopea, ua faaea ˈtura vau i ta ˈu taviniraa pionie. E tia atoa ia ˈu ia farii e, ua pohehae na vau i te tahi pae no te mea hoi e ua tamau noa ratou i ta ratou taviniraa pionie.”

A rave atoa na i te hiˈoraa o Michael, e tavini tauturu oia i roto i te hoê amuiraa a te mau Ite no Iehova. Ua tutava noa na oia ia riro mai ei tiaau. (Timoteo 1, 3:1) I te oreraa to ˈna hiaai i tupu e rave rahi matahiti te maoro, ua inoino roa ˈˈera oia e aita ˈtura oia i hinaaro faahou e ia opuahia e nomino ia ˈna no teie hopoia. “Eita ta ˈu e nehenehe e faaoromai i te mauiui ia ore â teie hiaai e tupu,” o ta ˈna ïa e parau ra.

Ua ite atoa anei outou i teie huru tupuraa? Ua titauhia anei outou ia vaiiho i te hoê hopoia teotaratia i poiherehia e outou? Ei hiˈoraa, ua titauhia anei outou ia faaea i te tavini ei pionie, oia hoi te hoê taata poro i te Basileia ma te taime taatoa? Aore ra te hiaai ra anei outou i te tahi mau hopoia i roto i te amuiraa, i horoahia na vetahi ê? E peneiaˈe, te hiaai rahi ra outou e tavini i te Betela aore ra ei mitionare, tera râ, aita to outou huru tupuraa e faatia ra i te reira.

“Ia faaroaroahia te taoˈa tiaihia ra e fatimauu te aau,” o ta te buka Maseli ïa e farii ra. (Maseli 13:12) Oia iho â râ mai te peu e e fanaˈo vetahi ê i te mau hopoia o ta outou e tiai noa ra. Te horoa maira anei te Parau a te Atua i te maramarama, te tamǎrûraa, e te tiaturiraa no te feia e faaruru nei i teie mau manuïa-ore-raa? Oia. Inaha, te faaite ra te Salamo 84 i te mau manaˈo o te hoê tavini a Iehova aore atoa to ˈna mau hiaai no te taviniraa a Iehova i tupu.

Te mauruuru o te hoê ati Levi

Te feia i papai i te Salamo 84, o te mau tamarii ïa a Kora, e mau ati Levi ratou o tei tavini i te hiero o Iehova, e o tei faatura-rahi-hia no ta ratou mau hopoia taviniraa. “E mea popou rahi to oe ra mau tiahapa, e Iehova sabaota,” o ta te hoê o ratou ïa i pii hua. “Te hinaaro nei tau aau, te nounou nei, i te mau hezere o Iehova; te oaoa nei tau aau e tau tino atoa i te Atua ora ra!”—Salamo 84:1, 2.

No to ˈna hiaai rahi i te tavini i te hiero o Iehova, ua tae roa teie ati Levi i te haafaahiahia i te eˈa matauhia e aratai tia ˈtu i Ierusalema. “Haere noâ ratou na te peho o Baka,” o ta ˈna e parau ra, “e ô ra ratou i te pape pihaa i reira.” (Salamo 84:6) Oia mau, e eˈa pǎpǎmǎrô noa ïa, ua au râ hoi i te hoê vahi rarirari maitai.

I te mea e e ati Levi te papai salamo, e ere râ oia i te tahuˈa, ua nehenehe noa oia e tavini i te hiero, hoê hebedoma i te mau ono avaˈe atoa. (Paraleipomeno 1, 24:1-19; Paraleipomeno 2, 23:8; Luka 1:5, 8, 9) Te toea o to ˈna taime ra, e faaea noa ïa oia i te fare, i te hoê o te mau oire ati Levi ra. No reira oia i himene ai e: “Ua noaa hoi i te [“manu,” MN] te fare no ˈna, e i te opea te ofaaraa no ˈna iho, ei fanauraa i to ˈna ra pinia, ta oe ra mau fata, e Iehova sabaota, e tau arii, e tau Atua hoi.” (Salamo 84:3) E oaoa rahi hoi te ati Levi ahiri e, mai te mau manu oia o tei parahi maoro aˈe i te hiero ra!

E mea ohie hoi no te ati Levi ia inoino no te mea eita ta ˈna e nehenehe e tavini pinepine aˈe i te hiero. Teie râ, ua oaoa oia i te tavini i roto i teie faito, e ua papu maitai ia ˈna e, mea hoona te paieti pûpûhia ma te mafatu taatoa na Iehova. Na te aha i tauturu i teie ati Levi haapao maitai, ia mauruuru noa i ta ˈna mau hopoia taviniraa?

A haapii i te mauruuru noa

Te na ô ra te ati Levi e: “E maitai rahi to te mahana hoê i roto i te mau hezere no oe ra, i te mahana atoa e tausani noa ˈtu i te tahi vahi ê. E hinaaro rahi to ˈu i te tiai i te uputa i te fare o tau Atua, i te parahi i te mau tiahapa o te paieti ore ra.” (Salamo 84:10) Ua taa hoi ia ˈna e, e haamaitairaa hau aˈe i te faufaa, te parahiraa i te hoê noa ˈˈe mahana i te fare o Iehova ra. Ua hau atu râ i te hoê mahana to te ati Levi taviniraa i te hiero. No to ˈna mauruuru i ta ˈna mau hopoia taa ê, ua himene roa ˈtura oia ma te oaoa.

E o tatou ïa? Te haafaufaa ra anei tatou i ta tatou mau haamaitairaa, aore ra te moehia ra anei ia tatou i te mau mea o ta tatou i fanaˈo aˈena i roto i te taviniraa a Iehova? No to ratou pûpûraa ia ratou no ˈna, ua horoa mai o Iehova na ta ˈna mau tavini, e rave rau mau hopoia taa ê e mau ohipa atoa. Oia ïa, te mau hopoia teimaha aˈe i te pae no te tiaauraa, te faaamuraa i te mamoe, te haapiiraa, e te tahi atu mau ohipa i roto i te taviniraa ma te taime taatoa. Tera râ, te vai atoa ra te tahi atu mau mea faufaa i taaihia i te haamoriraa a Iehova.

E rave anaˈe na i te taviniraa kerisetiano. Te faaau ra te aposetolo Paulo i ta tatou hopoia taa ê e poro i te parau apî maitai, mai te hoê ‘taoˈa i roto i te farii repo nei.’ (Korinetia 2, 4:7) Te faariro ra anei outou i taua taviniraa ra mai te hoê taoˈa faufaa rahi? Tera hoi te manaˈo o Iesu Mesia, o tei omua na i te ohipa pororaa i te Basileia, e ua horoa mai oia i te hiˈoraa. (Mataio 4:17) “E teie nei, tei ia matou mai nei teie nei toroa, . . . aita ˈtura matou i rohirohi,” o ta Paulo ïa i parau.—Korinetia 2, 4:1.

Ua riro atoa te mau putuputuraa kerisetiano ei faanahoraa moˈa, o te ore e tia ia haafaufaa-ore-hia. I ta tatou mau putuputuraa, te horoahia mai nei te haapiiraa faufaa roa, e te fanaˈo nei tatou i te amuimuiraa hinaarohia. I te mau putuputuraa, e nehenehe atoa tatou e faˈi i to tatou faaroo e to tatou tiaturiraa i mua i te taata, na roto i te horoa-tamau-raa i te mau pahonoraa, e i te apitiraa i roto i te porotarama na roto i te tahi atu mau ravea. (Hebera 10:23-25) Ua riro mau â ta tatou mau putuputuraa ei faanahoraa e tia ia poiherehia!

Ua haafaufaa rahi o Michael, tei faahitihia i nia nei, i teie mau haamaitairaa e ua mauruuru hohonu oia no te reira. Tera râ, no to ˈna inoino i te oreraa oia e nehenehe e tavini ei matahiapo, ua ore aˈera to ˈna mauruuru, no te tahi area taime. Na roto râ i te faatano-faahou-raa i to ˈna feruriraa i nia i te reira, ua noaa faahou maira ia ˈna i to ˈna aifaito, e ua faaoromai atura oia i te tiairaa ia Iehova.

Taa ê atu i te mauruuru ore no te mea aita i noaa ia tatou i te tahi hopoia taa ê, e mea maitai aˈe ia hiˈopoa faahou tatou e mea nafea to Iehova haamaitairaa mai ia tatou, mai ta te papai salamo i rave.a Mai te peu e aita tatou e ite ra, a hiˈopoa faahou ïa ma te ani ia Iehova ia haamaramarama mai i to tatou mata, ia ite tatou i ta tatou mau hopoia taa ê, e mea nafea oia i te haamaitairaa mai e i te faaohiparaa ia tatou no te arue ia ˈna.—Maseli 10:22.

E mea faufaa atoa ia papu e, no te amo i te mau hopoia taa ê mai te ohipa tiaau, e titauhia te mau huru taa maitai. (Timoteo 1, 3:1-7; Tito 1:5-9) E tia ïa ia tatou ia hiˈopoa ia tatou iho, ma te maimi i te mau vahi e tia ia tatou ia haamaitai e i muri iho, ia tutava puai no te haamaitai atu.—Timoteo 1, 4:12-15.

Eiaha e haaparuparu

Mai te peu e eita e noaa mai ia tatou i te hoê hopoia taviniraa taa ê, eiaha ïa tatou e faaoti e mea here aˈe na Iehova te feia i fanaˈo ra i te reira, aore ra te faaere ra oia ia tatou i te tahi maitai. Oia mau, eiaha tatou, no to tatou pohehae, e faaoti oioi noa e aita i tano i te horoaraahia te tahi mau hopoia taa ê na vetahi pae, no te mea ua haafanaˈohia ratou ia au i te manaˈo taata, aita râ ratou i nominohia ia au i te faanahoraa teotaratia. Ia amuamu noa tatou ia au i teie nei mau huru manaˈo, e aratai ïa te reira ia tatou ia pohehae, ia feii, e ia faarue atoa.—Korinetia 1, 3:3; Iakobo 3:14-16.

Aita o Laura, tei faahitihia i nia nei, i faarue. I te pae hopea, ua manuïa ˈtura oia i te faaore i to ˈna riri e to ˈna pohehae. Ua pure tamau noa o Laura i te Atua, ia tauturu mai ia ˈna ia faaore i to ˈna mauruuru ore i to ˈna vaiihoraa i te taviniraa pionie. Ua imi atoa oia i te tauturu i pihai iho i te mau taata aravihi i roto i te amuiraa, e ua papu faahou atura ia ˈna i te here o te Atua. Ua parau oia e: “Ua horoa mai o Iehova i te hau o te feruriraa. Noa ˈtu e eita ta ˈu e ta ta ˈu tane e nehenehe e tavini ei pionie i teie nei, te poihere nei mâua i te tau a riro ai mâua ei pionie, e te huti nei mâua i te puai na roto i te mau ohipa i farereihia na e mâua. Te tauturu atoa nei mâua i ta mâua tamaiti paari i roto i ta ˈna taviniraa pionie.” I te mea e ua mauruuru oia, e nehenehe ïa ta Laura i teie nei “e oaoa atoa i te feia e oaoa ra” i roto i ta ratou taviniraa pionie.—Roma 12:15.

A haamau i te mau tapao e nehenehe e naeahia

E ere no te mea e ua mauruuru tatou i te mau hopoia taa ê o ta tatou e fanaˈo ra i teie nei, e faaea ïa tatou i te haamau i te mau tapao teotaratia apî. I to ˈna tuatapaparaa i te parau no te tia-faahou-raa i nia i te raˈi, ua faahiti o Paulo i “te titauraa ˈtu hoi i tei mua.” Ua na ô atoa oia e: “Ta tatou râ vahi i noaa maira, e na reira tatou i te haere na taua tapao nei â ma te haapao maite â hoi i te mea hoê â.” (Philipi 3:13-16) E nehenehe te mau tapao teotaratia e tauturu ia tatou ia titau atu i tei mua. Te fifi râ, o te titauraa ïa i te mau tapao papu.

Te mau tapao papu, e mau tapao aifaito ïa o te nehenehe e naeahia. (Philipi 4:5, MN) Eiaha e faaoti e, te hoê tapao o te titau e rave rahi matahiti rohiraa, e ere ïa i te tapao papu. E nehenehe hoi teie huru tapao no te hoê tau maoro, e naea-mǎrû-noa-hia, na roto i te haamauraa i te mau tapao, aore ra taahiraa avae, iti aˈe i taua area tau ra. E riro hoi teie nei mau tapao ei faaiteraa i te mau haereraa i mua i te pae varua. Ia manuïa anaˈe te taahiraa avae tataitahi, e oaoa ïa tatou a haere noa ˈi i mua, eita râ tatou e inoino.

E manaˈo aifaito maitai

E mea faufaa râ ia farii e, no to tatou mau huru tupuraa e to tatou mau otia, peneiaˈe aita e noaa ra ia tatou i te tahi mau hopoia. E ia haamau tatou i te reira ei tapao, e ite atu tatou i te mauruuru ore e te inoino. E tia ia tatou ia tuu i teie mau tapao i te hiti, peneiaˈe no teie nei taime. E ere te reira i te mea fifi roa, mai te peu e e pure tatou ia noaa mai i te mauruuru paieti e e faariro tatou i te raveraa i te hinaaro o Iehova, ei tapitapiraa matamua no tatou. Ia titau tatou i te mau hopoia taa ê, te mea faufaa, o te hanahana ïa o Iehova—eiaha râ ia itehia mai to tatou iho manuïaraa. (Salamo 16:5, 6; Mataio 6:33) Ua tano roa te Bibilia i te na ôraa mai e: “E tuu atu i ta oe ohipa ia Iehova ra, e e haapapuhia ta oe i opua ra.”—Maseli 16:3.

Ia tuatapapa anaˈe tatou i te Salamo 84, e ite tatou e, ua faaohipa te papai salamo i taua manaˈo ra no nia i te mau hopoia taviniraa, e ua haamaitai rahi mai o Iehova ia ˈna. Hau atu, te tamau noa nei teie salamo i te haafaufaa i te nunaa a Iehova e tae roa mai i teie nei tau.

Na roto i te turuiraa i nia ia Iehova ma te pure, e nehenehe outou e faaaifaito i to outou hiaai ia noaa mai i te mau hopoia apî, e te mauruuru no te mea o ta outou e fanaˈo aˈena ra. Eiaha e vaiiho i te hiaai ia rave hau atu â, e faaere ia outou i te mauruuru o ta outou e fanaˈo ra i teie nei, e i te oaoa i te taviniraa ia Iehova e a muri noa ˈtu. A tiaturi ia Iehova no te mea, e hopoi mai te reira i te oaoa, mai ta te mau parau a te ati Levi e faaite ra: “E Iehova sabaota e, e [“oaoa,” MN] to te taata i tiaturi ia oe ra.”—Salamo 84:12.

[Nota i raro i te api]

[Tumu parau tarenihia i te api 11]

Te mau tapao ta tatou e nehenehe e haamau

Te taioraa i te Bibilia i te mau mahana atoa.—Iosua 1:8; Mataio 4:4

Te haapuairaa i te mana o to tatou feruriraa na roto i te haamataroraa a te mau Papai.—Hebera 5:14

Te atuaturaa i te mau taairaa fatata aˈe e te Atua.—Salamo 73:28

Te faatupuraa i te hotu tataitahi o te varua.—Galatia 5:22, 23

Te haamaitairaa i ta tatou mau pure.—Philipi 4:6, 7

Te faaaravihiraa ˈtu â ia tatou i roto i te pororaa e te haapiiraa ia vetahi ê.—Timoteo 1, 4:15, 16

Te taioraa e te feruri-hohonu-raa i nia i te vea tataitahi o Te Pare Tiairaa e te A ara mai na!—Salamo 49:3

[Hohoˈa i te api 9]

Ia haamau outou i te mau tapao, a tuu i te raveraa i te hinaaro o te Atua na mua