Iehova, te Atua o te rave i te mau ohipa maere

“E Atua rahi hoi oe, e te ohipa taa ê ta oe e rave ra! o oe anaˈe ra te Atua mau!”—SALAMO 86:10.

1, 2. (a) Mai te aha te huru o te mau ravea apî i iteahia mai e te taata i te ohiparaa i nia i teie nei ao? (b) Ihea roa tatou e ite ai i te tiaturiraa ia maitai atu te mau ohipa?

TE TEOTEO nei te taata i teie nei tau i te mau ravea apî maere mau i itehia mai e ana—te mau tauihaa uira, te mau ravea haapurororaa, te video, te pereoo uira, te manureva, e te mau matini roro uira. E au ra e na roto i teie mau ravea, ua nainai roa te ao nei. E eaha te huru o teie ao? Maoti i te hau, te ruperupe, e te mau taoˈa pue noa no te taatoaraa, ua roohia te huitaata nei i te mau tamaˈi haapohe, te taparahiraa taata, te mau ohipa totovaraa, te haaviiviiraa, te maˈi, e te veve. E nehenehe ta te mau mauhaa atomi tei purara na te ao nei, noa ˈtu e ua faaitihia mai, e haamou roa i te huitaata nei. Te tamau noa nei te feia hoo i te pohe, te feia hamani mauhaa tamaˈi, i te faatere i te ohipa imiraa moni rahi roa ˈˈe o te fenua nei. Te moni noa ˈtura te feia moni, e te veve noa ˈtura te feia veve. Te vai ra anei te hoê ravea?

² E! No te mea te vai ra te hoê Taata o te tǎpǔ maira i te faaoraraa, “o tei hau roa i te teitei ra,” te Atua ra o Iehova. (Koheleta 5:8) Ua faaurua mai oia i te papairaa o te mau salamo, o te horoa mai i te tamǎrûraa e te mau aˈoraa paari no te tau ahoaho. I rotopu ia ratou, te vai ra te Salamo 86, e ua papai-noa-hia i te omuaraa teie parau ohie roa: “E pure a Davida.” E pure teie o ta outou atoa e nehenehe e faahiti.

Tei roto oia i te ati, aita râ i taiva

3. I teie nei tau, eaha te hiˈoraa faaitoito mau ta Davida e horoa maira?

³ Ua papai o Davida i teie salamo i roto i te ati. Te farerei atoa nei tatou i te mau tamataraa i teie mahana, inaha te ora nei tatou i ‘te mau mahana hopea’ o te faanahoraa a Satani, oia hoi te ‘tau ati rahi.’ (Timoteo 2, 3:1; hiˈo atoa Mataio 24:9-13.) Mai ia tatou nei, ua faaoromai Davida i te taiâraa e te hepohepo no te mau fifi o tei faateimaha ia ˈna. Aita râ oia i vaiiho i teie mau tamataraa ia haaparuparu i to ˈna tiaturi taiva ore i to ˈna Poiete. Ua tiaoro oia e: “A fariu mai i to tariˈa, e Iehova, a faaroo mai ia ˈu; ua haehaa vau e te faufaa ore. E faaora hoi oe i tau varua, te arohahia mai nei hoi au e oe; ia ora, e tau Atua, to tavini e tiaturi ia oe nei.”—Salamo 86:1, 2.

4. Nafea tatou ia faaite i to tatou tiaturi?

⁴ E nehenehe tatou e tiaturi, mai ia Davida ra, e e fariu o Iehova, “te Atua no ˈna anaˈe te mahanahana,” i to ˈna tariˈa i nia i te fenua nei no te faaroo i ta tatou mau pure haehaa. (Korinetia 2, 1:3, 4) Ma te tiaturi taatoa i to tatou Atua, e nehenehe tatou e pee i teie aˈoraa a Davida: “E tuu oe i ta oe hopoia ia Iehova ra, e na ˈna oe e tauturu mai; e ore roa oia e vaiiho noa ˈtu i te taata parau-tia ia faaaueuehia.”—Salamo 55:22.

Te taairaa piri roa e o Iehova

5. (a) Mea nafea te mau tatararaa haapao maite i te faatitiaifaroraa i te mau hape a te mau papai parau ati Iuda? (b) Mea nafea na Salamo 85 e te 86 i te faahanahanaraa ia Iehova? (Hiˈo i te nota i raro i te api.)

⁵ I roto i te Salamo 86, te faaohipa ra o Davida i te parau “E Iehova” e 11 taime. Mea paieti mau teie pure a Davida e e mau taairaa piri roa to ˈna e o Iehova! I muri iho mai, ua au ore roa te mau papai parau ati Iuda ia faaohipahia te iˈoa o te Atua mai teie te huru, te feia iho â râ i parauhia te mau Sopherim. Ua mǎtaˈu hoi ratou i te faaohipa hape i teie iˈoa. Ma te haamoe i te mea e ua poietehia te taata ia au i te hohoˈa o te Atua, ua haamarirau aˈera ratou i te faatae atu i te Atua i te mau ateributi ta te mau taata e faaite atoa ra. No reira, e 7 taime i nia i te mau 11 taime e itehia ˈi te iˈoa o te Atua i roto i te papai Hebera o teie salamo, ua mono ratou i te iˈoa ra YHWH (Iehova) na roto i te tiaraa iˈoa ra ʼAdho-naiʹ (Fatu). E tia ia tatou ia mauruuru i te mea e ua faahoˈi faahou mai te Tatararaa a te ao apî o te mau Papai Moˈa (farani), e vetahi atu mau tatararaa haapao maitai, i te iˈoa o te Atua i to ˈna tiaraa mau i roto i te Parau a te Atua. No reira, te haafaufaahia ra to tatou taairaa e o Iehova mai tei titauhia.a

6. Nafea tatou ia faaite e e taoˈa faufaa mau te iˈoa o Iehova no tatou?

⁶ Te na ô râ te pure a Davida e: “E aroha mai oe ia ˈu, e Iehova; te tiaoro nei au ia oe, aita e mahana tuua. E faaoaoa mai i te [nephe] o to tavini; te faaaraara ˈtu nei au i tau [nephe] ia oe, e [Iehova] e.” (Salamo 86:3, 4) A tapao na e ua tiaoro Davida ia Iehova “aita e mahana tuua.” Oia mau, ua pure pinepine oia i te maororaa po, mai te tau a tapuni ai oia i roto i te medebara. (Salamo 63:6, 7) Oia atoa i teie mahana, ua tiaoro puai vetahi mau Ite i te taime a haruhia ˈi ratou aore ra a hamani-ino-hia ˈi ratou e te tahi taparahi taata, ia Iehova. I te tahi mau taime, ua maere roa ratou i te faahopearaa maitai i noaa mai.b E taoˈa faufaa te iˈoa o Iehova no tatou nei, mai ta “Iesu Mesia, e tamaiti na Davida,” i haafaufaa atoa i to ˈna vairaa mai i nia i te fenua nei. Ua haapii o Iesu i ta ˈna mau pǐpǐ ia pure ia raa te iˈoa o Iehova e ua faaite atu oia i te auraa mau o teie nei iˈoa.—Mataio 1:1; 6:9; Ioane 17:6, 25, 26.

7. Eaha te mau hiˈoraa e faaite ra e ua faateitei Iehova i te nephe o ta ˈna mau tavini, e nafea tatou ia pahono i te reira?

⁷ Ua faateitei o Davida i to ˈna nephe, oia hoi ia ˈna taatoa, ia Iehova ra. Te faaitoito ra oia ia tatou ia na reira atoa, i te na ôraa i roto i te Salamo 37:5 e: ‘A huri i to eˈa i nia ia Iehova, e a turui atu i nia ia ˈna, e na ˈna e ohipa.’ Inaha, eita ta tatou aniraa ia Iehova ia faaoaoa i to tatou nephe e ore e pahonohia mai. E rave rahi mau tavini taiva ore a Iehova o te tamau noa nei i te oaoa i roto i ta ˈna taviniraa—noa ˈtu te mau haafifiraa, te mau hamani-ino-raa, e te maˈi. Ua tamau noa to tatou mau taeae i roto i te mau fenua no Afirika tei roohia i te tamaˈi, mai ia Angola, Liberia, Mozambique, e Zaire, i te tuu i te taviniraa a Iehova i nia i te parahiraa matamua i roto i to ratou oraraa.c Ua faaoaoa mau Oia ia ratou na roto i te hoê ootiraa faito ore i te pae varua. Mai ta ratou i faaoromai, e tia atoa ia tatou ia faaoromai. (Roma 5:3-5) E ia faaoromai tatou, e nehenehe tatou e tiaturi e: “No te taime i haapaohia ra taua orama nei, ia tae râ i te hopea ra e [faaoromai noa oia] . . . e ore e haamaoro hua.” (Habakuka 2:3) Ma te auraro taatoa e te tiaturi ia Iehova, ia tamau noa atoa tatou i ‘te faaoromai,’ e tia ˈi.

Te maitai o Iehova

8. Eaha te mau taairaa ta tatou e nehenehe e faatupu e o Iehova, e mea nafea to ˈna faaiteraa mai i to ˈna maitai?

⁸ Te faatae faahou ra o Davida i teie aniraa hohonu: “Te maitai ra hoi oe, e [Iehova], e ua tia ia oe te faaore mai i te hara nei, e te aroha rahi i te feia atoa e tiaoro atu ia oe ra. E faaroo mai, e Iehova, i tau pure, e haapao mai i ta ˈu e ani nei. Ia tae i te mahana e ati ai au ra ua tiaoro vau ia oe ra, e faaroo mai hoi oe ia ˈu nei.” (Salamo 86:5-7) “E Iehova”—te putapû faahou nei tatou i mua i te hohonu o teie parau! E taairaa hohonu teie te tia ia faatupu-tamau-hia na roto i te pure. Ua pure o Davida i te tahi atu taime e: “Eiaha oe e manaˈo mai i te ino e te mau hara o tau apîraa ra; manaˈo maira oe ia ˈu, ma to aroha atoa, no to oe hamani maitai, e Iehova ra.” (Salamo 25:7) O Iehova te hiˈoraa hau aˈe o te maitai—i to ˈna pûpûraa mai i te hoo na roto ia Iesu, i to ˈna faaiteraa i te hamani maitai i te feia hara o te tatarahapa, e to ˈna faaiteraa i te aroha i to ˈna mau Ite taiva ore e te aau mehara.—Salamo 100:3-5; Malaki 3:10.

9. Eaha te haapapuraa ta te feia hara o te tatarahapa e nehenehe e feruri maite?

⁹ Te haapeapea ra anei tatou no te mau hape i ravehia i mutaa ihora? Mai te peu e te afaro nei to tatou haerea i teie nei, e faaitoitohia tatou ia haamanaˈo tatou i te haapapuraa a te aposetolo Petero i te feia tatarahapa e e no ǒ mai te “anotau haumâru” ia Iehova ra. (Ohipa 3:19) Ia ati maite noa tatou ia Iehova na roto i te pure e tia ˈi, maoti to tatou Taraehara, o Iesu, o tei parau ma te here e: “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e faaora. A rave mai i tau zugo i nia ia outou, e ia haapiihia outou e au, te mǎrû nei hoi au e te haehaa o te aau: e e noaa hoi te ora i to outou [nephe].” Ia pure anaˈe te mau Ite taiva ore ia Iehova i teie mahana na nia i te iˈoa faufaa rahi o Iesu ra, e noaa mai iho â te tamǎrûraa.—Mataio 11:28, 29; Ioane 15:16.

10. Eaha te faufaaraa ta te buka Salamo e horoa ra i te aroha o Iehova?

¹⁰ Te faahiti ra te buka Salamo i te “aroha” o Iehova hau atu i te hoê hanere taime. E aroha rahi mau â to ˈna! I roto i na irava matamua e maha, te titau nei te Salamo 118 i te mau tavini a te Atua ia haamauruuru ia Iehova, e maha taime te faahitiraahia e “e tia to ˈna aroha i te vai-maite-raa.” Te haafaufaa ra te Salamo 136 i te huru maitai o “to ˈna aroha” e 26 taime. Noa ˈtu eaha te hapa ta tatou e rave—inaha te na ô ra te Iakobo 3:2, “te hapa nei hoi tatou atoa i te mau mea atoa e rave rahi”—ia oioi noa tatou i te tatarahapa i mua ia Iehova, ma te tiaturi i to ˈna hamani maitai e to ˈna aroha. Ua riro to ˈna aroha ei tapao no to ˈna here taiva ore ia tatou nei. Mai te peu e e tamau noa tatou i te rave i te hinaaro o te Atua, e faaite mai oia i to ˈna here taiva ore na roto i te haapuairaa ia tatou no te faaruru i te mau tamataraa atoa.—Korinetia 1, 10:13.

11. Nafea te ohipa a te mau matahiapo e riro ai ei tauturu no te faaore i te mau manaˈo faahapa?

¹¹ I te tahi mau taime, e faaturori vetahi ia tatou. Na roto i te mau hamani-ino-raa i te pae no te mau manaˈo hohonu aore ra i te pae tino i to ratou tamariiriiraa ra, ua roohia vetahi i te mau manaˈo faahapa aore ra te haafaufaa ore nei ratou ia ratou iho. E nehenehe teie mau taata o tei mauiui ra, e tiaoro atu ia Iehova, ma te tiaturi e e faaroo mai oia. (Salamo 55:16, 17) E nehenehe te hoê matahiapo mǎrû e tauturu atu i teie taata ia farii e e ere na ˈna te hape. I muri iho, ia taniuniu tamau atu te matahiapo ia ˈna ma te auhoa, e tauturu ïa te reira ia ˈna e tae roa ˈtu i te taime e maraa ˈi ia ˈna ia ‘amo i teie hopoia.’—Galatia 6:2, 5.

12. Mea nafea te mau fifi i te rahi-roa-raa, teie râ, nafea tatou e nehenehe ai e manuïa i te arai i te reira?

¹² E rave rahi mau tupuraa peapea te tia i te nunaa o Iehova ia faaruru i teie mahana. Mai te Tamaˈi rahi Matamua mai â i te matahiti 1914, ua haamata te mau ati i te tairi i te fenua nei. Mai tei tohuhia mai e Iesu, “e matamehai anaˈe râ teie nei mau mea no te [ati].” Ua rahi noa ˈtu te mau tupuraa peapea a mairi noa ˈi te tau o ‘te hopea o te faanahoraa o te mau mea.’ (Mataio 24:3, 8) “E maa taime poto” to te Diabolo e toe nei hou to ˈna hopea. (Apokalupo 12:12) “Mai te liona uuru” e imi ra i te pau ia ˈna, te imi nei teie Enemi rahi i te mau ravea haavarevare atoa no te faaatea ê ia tatou i te nǎnǎ a te Atua e no te haamou ia tatou. (Petero 1, 5:8) Eita râ oia e manuïa! Inaha, mai ia Davida ra, te haamau papu nei tatou i to tatou tiaturiraa taatoa i nia i to tatou Atua hoê roa o Iehova.

13. Nafea te mau metua e ta ratou mau tamarii e fanaˈo ai i te maitai o Iehova?

¹³ Ma te feaa ore, ua haapii hohonu o Davida i roto i te mafatu o ta ˈna tamaiti o Solomona i te faufaaraa e turui atu i nia i te maitai o Iehova. No reira, ua haapii atu o Solomona i ta ˈna iho tamaiti e: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea. Eiaha oe ia paari i to oe iho manaˈoraa; o Iehova ra ta oe e mǎtaˈu, a faarue ai i te ino.” (Maseli 3:5-7) E tia atoa i te mau metua i teie mahana ia haapii i ta ratou mau tamarii nafea ia pure ma te tiaturi ia Iehova e nafea ia faaruru i te mau haafifiraa a teie ao aroha ore—mai te mana o te mau hoa i te fare haapiiraa e te mau faahemaraa e rave i te peu viivii i te pae morare. Ia ora outou ia au i te parau mau e ta outou mau tamarii i te mahana taitahi, e mau hohonu roa i roto i to ratou mafatu apî i te here mau no Iehova e te turuiraa ˈtu i nia ia ˈna na roto i te pure.—Deuteronomi 6:4-9; 11:18, 19.

Te mau ohipa faito ore a Iehova

14, 15. Eaha vetahi mau ohipa faito ore a Iehova?

¹⁴ Ma te tiaturi papu, te na ô ra o Davida e: “Aore o oe e faito, e Iehova, i roto i te mau atua atoa ra, aore hoi e ohipa e au i ta oe ra ohipa.” (Salamo 86:8) Ua hau aˈe te mau ohipa a Iehova i te faahiahia, i te rahi, i te hanahana, i ta te taata e nehenehe e feruri. Mai ta te ite aivanaa no teie nei tau e faaite ra, ua hau aˈe te ao poietehia o te reva—to ˈna aano, to ˈna nahonaho maitai, to ˈna nehenehe—i te faahiahia i ta Davida i ite. Noa ˈtu râ, ua putapû roa oia e ua parau oia e: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima!”—Salamo 19:1.

¹⁵ Te ite-atoa-hia ra te faahiahia o te mau ohipa a Iehova ia hiˈohia te vahi i reira to ˈna tuuraa i te fenua e mea nafea to ˈna faaineineraa ia ˈna, ia tupu te ao e te rui, te mau tau, te tau ueueraa huero e te tau ootiraa, e e rave rau atu â mau mea au mau e oaoa ˈi te taata a muri aˈe. E mea faahiahia te hamaniraa o to tatou tino e te mau melo aravihi atoa, ia nehenehe tatou e oaoa i te mau ohipa a Iehova e haaati ra ia tatou!—Genese 2:7-9; 8:22; Salamo 139:14.

16. Eaha te faaiteraa rahi roa ˈˈe o te maitai o Iehova, e ua faatupu te reira i teihea mau ohipa faito ore ê atu?

¹⁶ I te taime a faaroo ore ai to tatou na metua matamua i te Atua, o te omuaraa hoi o te mau ati o tei tairi i te fenua nei e tae roa mai i teie mahana, na roto i to ˈna here ua rave aˈera Iehova i te hoê ohipa faahiahia mau na roto i te tonoraa i ta ˈna Tamaiti i nia i te fenua nei no te faaite i te Basileia o te Atua e no te pohe ei hoo no te huitaata nei. E te mea hau aˈe i te faahiahia! Ua faatia maira Iehova i te Mesia ia riro mai oia ei Arii faatoroahia no ˈna. (Mataio 20:28; Ohipa 2:32, 34) Ua maiti atoa te Atua i rotopu i te mau taata taiva ore, ‘te hoê poieteraa apî’ o te faatere e te Mesia ei “raˈi apî” maitai i nia i te totaiete o te “fenua apî” tei roto atoa te mau miria taata o te faatiahia mai. (Korinetia 2, 5:17; Apokalupo 21:1, 5-7; Korinetia 1, 15:22-26) E naeahia ïa te mau ohipa a Iehova i te hoê faito hanahana mau! Oia mau, e nehenehe tatou e pii e: “E Iehova e, . . . I te rahi hoi o te mau mea maitatai na oe, i tei vaiihohia e oe no te feia i mǎtaˈu ia oe ra!”—Salamo 31:17-19.

17. No nia i te mau ohipa a Iehova, mea nafea te Salamo 86:9 i te tupuraa i teie nei?

¹⁷ I roto i te mau ohipa a Iehova no teie nei tau, te vai ra te tuhaa ta Davida e faaite ra i roto i te Salamo 86:9: “Te mau fenua atoa i hamanihia e oe ra, e tae atoa mai e haamori i mua ia oe, e Iehova, a faateitei ai i to oe ra iˈoa.” I muri aˈe i to ˈna haaputuraa mai i te toea o ta ˈna poieteraa apî no roto mai i te huitaata nei, oia hoi te “nǎnǎ iti” o te feia aiˈa o te Basileia, ua haamata ˈtura o Iehova i te haaputuputu mai i “te feia rahi roa” o te mau “mamoe ê atu” mai roto mai i “te mau fenua atoa,” e mau mirioni taata o te faatupu atoa ra i te faaroo i roto i te toto o Iesu. Ua haamau oia ia ratou ei faanahonahoraa itoito, te totaiete otahi roa o te mau hoa o te hau na te fenua nei i teie mahana. Ia ite ratou i te reira, te tipapa nei te mau melahi i nia i te raˈi i mua ia Iehova, i te na ôraa e: “O te arue, e te hanahana, e te paari, e te haamaitai, e te tura, e te mana, e te puai, ei to tatou Atua ïa e a muri noa ˈtu.” Te faahanahana atoa ra te feia rahi roa i te iˈoa o Iehova, i te taviniraa ia ˈna “i te rui e te ao,” ma te tiaturiraa e ora ˈtu i te hopea o teie nei ao e e ora e a muri noa ˈtu i roto i te paradaiso i nia i te fenua nei.—Luka 12:32; Apokalupo 7:9-17; Ioane 10:16.

Te rahi o Iehova

18. Mea nafea to Iehova faaiteraa e o ‘O ˈna anaˈe te Atua’?

¹⁸ I muri iho, te huti ra o Davida i te ara-maite-raa i nia i te tiaraa Atua o Iehova, i te na ôraa e: “E Atua rahi hoi oe, e te ohipa taa ê ta oe e rave ra! o oe anaˈe ra te Atua mau!” (Salamo 86:10) Mai mutaa ihora mai â, ua faaite o Iehova e o ˈna “anaˈe ra te Atua.” Ua faatihaehae te Pharao haavî ra no Aiphiti ia Mose i te parauraa e: “O vai Iehova, a faaroo atu ai au i to ˈna reo, a tuu atu ai au ia Iseraela? aore au i ite ia Iehova.” E ite atu râ oia i muri iho i te rahi o Iehova! Ua faahaama te Atua Mana hope i te mau atua e te mau tahuˈa tahutahu no Aiphiti na roto i te faataeraa i te mau ati, ma te taparahi i te mau tamaroa matahiapo no Aiphiti, e ma te haamou roa ia Pharao e to ˈna nuu rahi i te Miti Uteute. Oia mau, aita e atua tei au ia Iehova i rotopu i te tahi atu mau atua!—Exodo 5:2; 15:11, 12.

19, 20. (a) Afea te himene a te Apokalupo 15:3, 4 e ite ai i to ˈna faaiteraa rahi roa ˈˈe? (b) Nafea tatou e nehenehe ai e apiti i roto i te ohipa a Iehova i teie nei?

¹⁹ Ei Atua hoê roa, ua rave aˈera Iehova i te mau ohipa maere ei faaineineraa i te faaoraraa mai i te feia auraro e haamori ra ia ˈna mai roto mai i te Aiphiti no teie nei tau—oia hoi te ao a Satani. Ua faanaho oia e ia haapararehia ta ˈna mau haavaraa e ati noa ˈˈe te fenua ei faaiteraa na roto i te arai o te ohipa pororaa rahi roa ˈˈe i ravehia aˈenei i roto i te aamu, e ua faatupu te reira i te parau tohu a Iesu i roto i te Mataio 24:14. Fatata roa, e tae mai “te hopea,” ia faaite Iehova i to ˈna tiaraa rahi i nia i te hoê faito aitâ i itehia aˈenei na roto i te tumâraa i te ino atoa i nia i te fenua nei. (Salamo 145:20) I reira ïa te himene a Mose e te Arenio e naeahia ˈi i te hoê faito faahiahia roa: “E ohipa rahi e te faahiahia ta oe, e [Iehova] ra, e te Atua Mana hope ra e; e haerea tia e te parau mau ta oe, e te Arii o te feia moˈa ra e [te Arii hau mure ore]. O vai hoi te ore e mǎtaˈu ia oe, e [Iehova] e, e te faahanahana i to oe iˈoa? o oe anaˈe hoi tei maitai roa.”—Apokalupo 15:3, 4.

²⁰ Ia faaitoito atoa tatou e tia ˈi i te faaiteraa ia vetahi ê i teie mau opuaraa faahiahia a te Atua. (A faaau e te Ohipa 2:11.) E tamau noa Iehova i te rave i te mau ohipa rahi e te maere i to tatou nei tau e i te tau a muri aˈe, mai ta te tumu parau i muri nei e faataa mai.

[Nota i raro i te api]

Te haamanaˈo ra anei outou?

◻ No te aha e tia ˈi ia tatou ia faahiti atoa i te pure a te Salamo 86?

◻ Nafea tatou e fanaˈo ai i te mau taairaa piri roa e o Iehova?

◻ Nafea Iehova ia faaite i to ˈna maitai i nia ia tatou?

◻ Eaha vetahi mau ohipa faito ore a Iehova?

◻ Nafea to Iehova riroraa ei ‘Atua hoê roa’ i te pae no te tiaraa rahi aˈe?

[Hohoˈa i te api 10]

I roto i te “fenua apî” i mua nei, e tamau noa te mau ohipa faahiahia a Iehova i te haapapu i to ˈna hanahana e to ˈna maitai