HAAPIIRAA 34
Nafea ia faaite i to tatou here ia Iehova?
Ua rahi anei to oe here no te Atua i to oe haamataraa i te haapii i te Bibilia? Hinaaro anei oe e tamau i te haapuai i to oe auhoaraa e o ˈna? Mai te peu e a haamanaˈo, hau atu â Iehova i te ite e te rahi noa ˈtu ra to oe here no ˈna, hau atu â oia i te here ia oe e i te aupuru ia oe. Nafea oe e faaite ai e te here ra oe ia ˈna?
1. Nafea ia faaite ia Iehova e te here ra tatou ia ˈna?
E faaite tatou i to tatou here ia Iehova ma te auraro ia ˈna. (A taio i te Ioane 1, 5:3.) Aita oia e faahepo noa ˈˈe i te hoê taata ia auraro ia ˈna. E vaiiho râ oia ia tatou ia faaoti e auraro anei ia ˈna aore ra aita. No te aha? Te hinaaro nei Iehova ia auraro tatou “ma te aau tae.” (Roma 6:17) Te auraa, ia auraro oe ia ˈna eiaha no te mea e faaheporaa, no te mea râ te here ra oe ia ˈna. Ua faaineinehia te tuhaa 3 e te 4 o teie buka no te tauturu ia oe ia faaite i to oe here ia Iehova ma te rave i ta ˈna e au ra e ma te patoi i ta ˈna e au ore ra.
2. No te aha e ere i te mea ohie ia faaite i to tatou here ia Iehova?
“Mea rahi te ati o te taata parau-tia.” (Salamo 34:19) Te aro ra tatou pauroa no to tatou iho huru tia ore. E faaruru atoa paha tatou i te fifi i te pae moni, te parau-tia ore e te tahi atu mau fifi. Ia faaruru tatou i te hoê ati, e ere paha i te mea ohie ia rave i ta Iehova e ani ra ia tatou no te mea mea ohie aˈe ia faaroo ore ia Iehova. Ia rave râ oe ma te taiva ore i ta Iehova e ani ra ia oe, te faaite ra ïa oe i to oe here ia ˈna hau atu i te tahi mau mea. E haapapu oe i to oe taiva ore ia ˈna e e faaite mai oia i to ˈna taiva ore ia oe. E eita roa oia e faarue ia oe.—A taio i te Salamo 4:3.
A FAAHOHONU ATU Â
A hiˈo no te aha mea faufaa ia auraro ia Iehova, e a haapii eaha te tauturu ia oe ia tapea i to oe taiva ore ia ˈna.
3. Te pari ra Satani ia oe
Ia au i te buka a Ioba, ua pari Satani eiaha noa ia Ioba, i te taatoaraa râ o te taata tei hinaaro ra e tavini ia Iehova. A taio i te Ioba 1:1, 6–2:10, e a aparau i teie mau uiraa:
No Satani, no te aha Ioba i auraro ai ia Iehova?—A hiˈo i te Ioba 1:9-11.
Eaha ta Satani i parau no nia i te taatoaraa o te taata e no oe atoa?—A hiˈo i te Ioba 2:4.
A taio i te Ioba 27:5b, e a aparau i teie uiraa:
Nafea Ioba i te haapapuraa e ua here iho â oia ia Iehova?
Ua haapapu Ioba i to ˈna here ia Iehova ma te tapea i to ˈna taiva ore ia ˈna
E haapapu tatou i to tatou here ia Iehova ma te tapea i to tatou taiva ore ia ˈna
4. A faaoaoa i to Iehova aau
A taio i te Maseli 27:11, e a aparau i teie mau uiraa:
Eaha to Iehova huru ia faaite oe i te paari e ia auraro oe ia ˈna? No te aha?
5. E nehenehe oe e vai taiva ore ia Iehova
E turai to tatou here ia Iehova ia paraparau ia vetahi ê no nia ia ˈna. E turai atoa to tatou taiva ore ia ˈna ia rave i te reira noa ˈtu e ere i te mea ohie. A pata i te VIDEO, e a aparau i te mau uiraa i muri nei.
Mea fifi anei no oe ia paraparau ia vetahi ê no nia ia Iehova?
I roto i te video, eaha tei tauturu ia Grayson ia ore ia mǎtaˈu?
Mea ohie ia vai taiva ore ia Iehova, ia here tatou i ta ˈna e here ra e ia faufau tatou i ta ˈna e faufau ra. A taio i te Salamo 97:10, e a aparau i teie mau uiraa:
Ia au i ta oe i haapii, eaha te tahi mau mea ta Iehova e here ra? Eaha te tahi mau mea ta ˈna e faufau ra?
Nafea oe e haapii ai i te here i te mea maitai e i te faufau i te mea ino?
6. E maitaihia tatou ia auraro tatou ia Iehova
Mea maitai aˈe ia auraro tatou ia Iehova. A taio i te Isaia 48:17, 18, e a aparau i teie mau uiraa:
No oe, e nehenehe anei tatou e tiaturi e ua ite iho â Iehova eaha te mea maitai no tatou? No te aha?
Nafea ta oe haapiiraa Bibilia e te Atua mau ra, Iehova, i te tautururaa ia oe e tae roa i teie mahana?
TE MANAˈO O VETAHI: “E ere roa ˈtu te mau mea ta ˈu e rave ra i te mea faufaa no te Atua.”
Eaha te irava ta oe e faaohipa no te faaite e nehenehe te mau mea ta tatou e rave ra e faaoaoa aore ra faaoto ia Iehova?
HAAPOTORAA
E nehenehe oe e faaite i to oe here ia Iehova ma te auraro ia ˈna e ma te tapea i to oe taiva ore ia ˈna noa ˈtu te mau fifi.
Haamanaˈoraa
Eaha ta oe i haapii no nia i te hiˈoraa o Ioba?
Nafea oe e haapapu ai i to oe here ia Iehova?
Eaha te tauturu ia oe ia tapea i to oe taiva ore ia Iehova?
HIˈOPOA
A hiˈo nafea oe e nehenehe ai e vai taiva ore ia Iehova e i te amuiraa.
A haapii hau atu â no nia i te mau pariraa a Satani no nia i te mau taata.
A hiˈo nafea te feia apî e faaite ai i to ratou here ia Iehova.
Nafea te hoê taurearea tei faaruru i te faaheporaa a te tahi atu mau taurearea e nehenehe ai e tapea i to ˈna taiva ore i te Atua?