Te hiaai nei te mau mamoe a Iehova i te aupuru aroha

“Ia ite hoi outou, o Iehova anaˈe ra te Atua; . . . e taata [tatou] no ˈna, e te mamoe no tana ra aua.”—SALAMO 100:3.

1. Eaha to Iehova huru i nia i ta ˈna mau tavini?

O IEHOVA te Tiai mamoe Rahi. Mai te peu e e tavini tatou no ˈna, te faariro nei oia ia tatou ei mau mamoe na ˈna e te horoa mai nei oia i te aupuru aroha. Te tamahanahana nei e te tamǎrû nei to tatou Metua i te raˈi ra ia tatou e te aratai nei oia ia tatou na “te eˈa titiaifaro, no to ˈna ra iˈoa.” (Salamo 23:1-4) No to ˈna here rahi ia tatou nei, ua tae roa te Tiai mamoe Maitai, o Iesu Mesia, i te horoa i to ˈna ora no tatou nei.—Ioane 10:7-15.

2. Eaha te huru o te nunaa o te Atua?

² Ei feia fanaˈo i te aupuru aroha, e nehenehe tatou e parau mai te papai salamo e: “E haamori ia Iehova ma te oaoa: e haere mai i mua i tana aro ma te himene. Ia ite hoi outou, o Iehova anaˈe ra te Atua; na ˈna tatou i hamani, e no ˈna hoi tatou; e taata [tatou] no ˈna, e te mamoe no tana ra aua.” (Salamo 100:2, 3) Oia, e mea oaoa tatou e te paruru-maitai-hia. Mai te mea ra e ua paruruhia tatou i te mau animala taehae iino i roto i te hoê aua i patuhia i te ofai ra.—Numera 32:16; Samuela 1, 24:3; Zephania 2:6.

Te mau tiai nǎnǎ mamoe aau tae

3. Eaha te huru o te mau matahiapo kerisetiano nominohia i nia i te nǎnǎ a te Atua?

³ Eita e maerehia e e mau mamoe oaoa tatou na te Atua! Te rave nei hoi te mau matahiapo nominohia i te upoo i rotopu ia tatou. Aita ratou i riro mai ‘te mau arii rahi,’ e faahepo ra ia tatou, aore ra e tamata ra i te riro ei fatu no to tatou faaroo. (Numera 16:13; Mataio 20:25-28; Korinetia 2, 1:24; Hebera 13:7) Maoti râ, ua riro ratou ei mau tiai mamoe aroha o te pee nei i te aˈoraa a te aposetolo Petero: “A faaamu i te nǎnǎ a te Atua i roto ia outou na, . . . eiaha ra no te faaueue [ma te faahepohia, MN], no te hinaaro râ; eiaha no te taoˈa tia ore ra ia noaa, no te tae mau râ o te aau; eiaha ma te faahepo i nia iho i te tufaa a te Atua ra, ei aveia râ outou no [te] nǎnǎ.” (Petero 1, 5:2, 3) Ua parau atu te aposetolo Paulo i te mau hoa matahiapo e: “E ara ia outou iho, e te nǎnǎ atoa i faarirohia ˈi outou e te [varua moˈa] ei episekopo [tiaau, MN] i nia ihora, ia faaamu hoi outou i te ekalesia o te Atua, o ta ˈna i hoo i [te toto o ta ˈna Tamaiti, MN].” Auê te mau mamoe i te mauruuru e i te mea e te “faaherehere” nei teie mau taata nominohia e te varua moˈa “i te nǎnǎ”!—Ohipa 20:28-30.

4. Ua matau-maitai-hia o Charles T. Russell no teihea huru to ˈna i nia i te nǎnǎ?

⁴ Ua horoa o Iesu na te amuiraa i “te mau ô taata,” vetahi ei “orometua,” aore ra tiai mamoe, o te rave nei i te nǎnǎ a Iehova ma te aroha. (Ephesia 4:8, 11; MN) Hoê o teie mau taata, o Charles T. Russell ïa, te peretiteni matamua a te Taiete Watch Tower. Ua piihia oia Orometua Russell no ta ˈna mau ohipa aroha e te hamani maitai i te pae no te tiairaa i te nǎnǎ i raro aˈe i te Raatira Tiai mamoe ra, o Iesu Mesia. I teie mahana, te nominohia nei te mau matahiapo kerisetiano e te Tino Aratai a te mau Ite no Iehova, e te haapao-maitai-hia ra eiaha e faaohipa i te mau parau ra “orometua,” “matahiapo,” aore ra “orometua haapii” ei mau tiaraa iˈoa. (Mataio 23:8-12) Te rave nei te mau matahiapo no teie nei tau i te hoê ohipa tiai mamoe no te maitairaa o te mau mamoe o te aua a Iehova.

5. No te aha e tia ˈi i te feia apî ia haamatau atu i te mau matahiapo nominohia i roto i te amuiraa kerisetiano?

⁵ Ei mau tiai mamoe, e tuhaa faufaa roa ta te mau matahiapo i roto i te haereraa i mua a te feia apî. No reira, te na ô ra te buka apî Te ite e aratai i te ora mure ore i te api 168 e: “A haamatau i te mau matahiapo i nominohia i roto i te amuiraa. Ua aravihi ratou i te faaohiparaa i te ite no nia i te Atua, inaha te faaî ra ratou i te mau titauraa a te mau tiaau e faataahia ra i roto i te Bibilia. (Timoteo 1, 3:1-7; Tito 1:5-9) Eiaha e haamarirau i te haafatata ˈtu i te hoê o ratou ia hinaaro anaˈe oe i te tauturu i te pae varua no te upootia mai i nia i te hoê peu aore ra i te hoê huru e patoi ra i te mau titauraa a te Atua. E ite hoi oe e te pee ra te mau matahiapo i te aˈoraa a Paulo e: ‘E haamahanahana ˈtu i te aau taiâ, e tauturu atu i tei paruparu, ia maoro te faaoromai i te taata atoa ra.’—Tesalonia 1, 2:7, 8; 5:14.”

Ia hinaaro anaˈe te feia apî e poro

6. Eaha te tia ia ravehia ia hinaaro te hoê taata haapii bibilia e riro ei taata poro no te Basileia?

⁶ I muri aˈe te noaaraa i te taata haapii bibilia i te ite e to ˈna apitiraa mai i te mau putuputuraa te tahi tau taime, e hinaaro paha oia e riro ei taata poro o te Basileia, e taata poro i te parau apî maitai. (Mareko 13:10) I reira, e tia i te Ite e faatere ra i te haapiiraa bibilia e teie taata, ia faaara i te tiaau peretiteni, e na ˈna e faanaho e ia farerei te hoê matahiapo no roto i te Tomite no te taviniraa a te amuiraa e te tahi atu matahiapo i te taata haapii bibilia e te taata e haapii ra ia ˈna. E niuhia te tauaparauraa i nia i te buka Organisés pour bien remplir notre ministère, i te mau api 98 e 99. Mai te peu e e ite na matahiapo e piti e te tiaturi ra teie taata apî i te mau haapiiraa tumu a te Bibilia e ua faaau oia i to ˈna oraraa i te mau faaueraa tumu a te Atua, e parauhia mai oia e ua ineine oia no te apiti i roto i te taviniraa i mua i te taata.a Ia tapao oia i ta ˈna ohipa i rave i roto i te taviniraa na roto i te tuuraa i te hoê tabula pororaa, e papaihia ˈtu ïa i nia i te Tabula a te taata poro a te amuiraa i faaîhia na nia i to ˈna iˈoa. E nehenehe atura ïa ta teie taata apî e tapao i ta ˈna ohipa pororaa i roto i ta te mau mirioni taata ê atu o ‘te parau haere ra i te parau a te Atua’ ma te oaoa. (Ohipa 13:5) E faataehia te hoê parau faaite i mua i te amuiraa e e taata poro bapetizo-ore-hia oia.

7, 8. Mea nafea te hoê taata poro bapetizo-ore-hia ia tauturuhia i roto i te taviniraa?

⁷ E hinaaro te taata poro bapetizo-ore-hia i te tauturu a te mau matahiapo e a te tahi atu mau kerisetiano paari. Ei hiˈoraa, e tia i te taeae faatere i te haapiiraa buka a te amuiraa o ta ˈna e haere ra ia anaanatae i ta ˈna mau haereraa i mua i te pae varua. E mea fifi paha na te taata poro apî ia paraparau ma te manuïa i roto i te pororaa na te mau fare. (Ohipa 20:20) E oaoa roa ïa oia e ia tauturuhia mai oia, na te taata iho â râ o tei haapii ia ˈna i nia i te buka Ite. E mea tano roa teie huru tauturu papu, inaha, ua faaineine o Iesu Mesia i ta ˈna mau pǐpǐ no te taviniraa.—Mareko 6:7-13; Luka 10:1-22.

⁸ Ia manuïa ta tatou taviniraa, e mea faufaa ia faaineine na mua ˈˈe. No reira, e nehenehe na feia poro e piti e farerei no te tamatamata i te mau faaiteraa i faataahia i roto i te mau Taviniraa o te Basileia taavaˈe. Ia haamata raua i ta raua taviniraa, na te taata poro aravihi aˈe e paraparau i te fare matamua e te piti o te fare. I muri aˈe i te hoê omuaraa parau auhoa, e nehenehe na feia poro e piti atoa ra e horoa i te faaiteraa. I muri aˈe i to raua poro-amui-raa tau hebedoma, e noaa mai paha te mau hoˈi-faahou-raa e farerei maitatai e peneiaˈe te hoê haapiiraa bibilia i nia i te buka Te ite e aratai i te ora mure ore. Na te taata poro aravihi aˈe paha e faatere i te haapiiraa i te haamataraa, e i muri iho, a horoa ˈtu ai na te taata poro apî o te Basileia. Auê na feia poro toopiti i te oaoa e ahiri e e faaite teie taata haapii bibilia i te mauruuru no te ite a te Atua!

9. Eaha te mau faanahoraa e ravehia ia hinaaro anaˈe te hoê taata poro e bapetizo?

⁹ A haere ai te hoê taata poro bapetizo-ore-hia i mua i te pae varua, e riro paha oia i te pûpû ia ˈna no te Atua na roto i te pure e e hinaaro oia e bapetizo. (A faaau e te Mareko 1:9-11.) E tia ia ˈna ia faaite i to ˈna hinaaro e bapetizo i te tiaau peretiteni o te amuiraa, e na ˈna e faanaho e ia hiˈopoa faahou te mau matahiapo i te mau uiraa i te mau api 175 tae atu i te 218 o te buka Organisés pour bien remplir notre ministère na muri iho i te taata poro. E nehenehe te mau uiraa i tatuhaahia i roto e maha tuhaa e hiˈopoahia i roto e toru farereiraa e e toru matahiapo taa ê mai te peu e e nehenehe. Mai te peu e e manaˈo ratou e ua noaa i te taata poro bapetizo-ore-hia te maramarama e au no nia i te mau haapiiraa a te Bibilia e ua aravihi oia i roto i te tahi atu mau tuhaa, e faaite mai ratou ia ˈna e e nehenehe oia e bapetizo. Ei faahopearaa no to ˈna pûpûraa e to ˈna bapetizoraa, e ‘tapaohia’ oia no te faaoraraa.—Ezekiela 9:4-6.

Te haapaoraa i te mau hinaaro taa ê

10. Ia oti oia i te haapii i te buka Ite e ia bapetizohia oia, nafea te hoê taata ia faarahi atu â i to ˈna ite no nia i te mau Papai?

¹⁰ Ia faaoti te hoê taata i ta ˈna haapiiraa bibilia i nia i te buka Ite e ua bapetizohia oia, eita e faufaa ia faatere i te haapiiraa mai tei matauhia e o ˈna i nia i te piti o te buka, mai te buka Tahoêhia i roto i te haamoriraa o te Atua mau hoê roa.b Papu maitai, e haapii hau atu â te taata i bapetizo-apî-hia ia faaineine anaˈe oia i te mau putuputuraa kerisetiano e ia haere tamau atu oia. E noaa atoa mai ia ˈna i te tahi ite ia turai anaˈe to ˈna poihâ no te parau mau ia ˈna ia taio e ia tuatapapa i te mau pueraa buka kerisetiano o ˈna anaˈe iho e ia tauaparau atu oia e te tahi mau hoa faaroo no nia i te mau tumu parau a te mau Papai. Eaha râ mai te peu e e hinaaro oia i te tahi mau mea taa ê?

11. (a) Mea nafea to Perisila raua o Akuila tautururaa ia Apolo? (b) Eaha te tauturu e nehenehe e horoahia i te hoê taurearea taata paari i bapetizo-apî-hia o te opua ra e faaipoipo?

¹¹ O Apolo atoa, o ‘tei paari hoi i te parau i papaihia ra’ e o tei haapii atu no nia ia Iesu ma te tano roa, ua faufaahia oia i to te mau kerisetiano aravihi ra o Akuila raua o Perisila ‘aratairaa mai ia ˈna i to raua iho utuafare, e ua faaite maite atura ia ˈna i te parau a te Atua.’ (Ohipa 18:24-26; a faaau e te Ohipa 19:1-7.) A rave na râ i te hiˈoraa e e opua te hoê taurearea taata paari i bapetizo-apî-hia i te haamatau e i te faaipoipo. E riro paha te hoê kerisetiano aravihi aˈe i te tauturu ia ˈna ia maimi i te mau haamaramaramaraa no nia i teie mau tumu parau i roto i te mau pueraa buka a te Taiete Watch Tower. Ei hiˈoraa, te vai ra te mau tumu parau maitai roa i roto i te buka Les jeunes s’interrogent—Réponses pratiques, i te tuhaa 7.c E nehenehe te taata poro o tei haapii ia ˈna e tauaparau no nia i teie tumu parau e teie taata apî, noa ˈtu e eita raua e haapii tamau.

12. Eaha te tauturu e nehenehe e horoahia na te mau hoa faaipoipo bapetizo-apî-hia e farerei ra i te fifi?

¹² A rave na i te tahi atu hiˈoraa. Peneiaˈe e te fifi ra e piti hoa faaipoipo bapetizo-apî-hia i te faaohiparaa i te mau faaueraa a te Atua. E haere atu paha raua e farerei i te hoê matahiapo, e e haere mai oia ia raua ra i te tahi mau ahiahi no te tauaparau no nia i te mau Papai e no te aratai i to raua ara-maite-raa i nia i te mau haamaramaramaraa e vai ra i roto i te mau pueraa buka a te Taiete Watch Tower. Teie râ, eita te matahiapo e haamau roa i te hoê haapiiraa bibilia tamau e teie nau feia faaipoipo.

Ia hapa te hoê taata bapetizo-apî-hia

13. No te aha te mau matahiapo a te amuiraa e faaite ai i te aroha i nia i te hoê taata bapetizo-apî-hia o tei hapa, o te tatarahaparâ?

¹³ Te pee nei te mau matahiapo i te hiˈoraa o te Tiai mamoe Rahi, o Iehova, o tei parau e: “Na ˈu e faaamu i tau nǎnǎ, . . . ua taamu hoi i tei fati ra, e na ˈu e faaetaeta i tei maˈihia ra.” (Ezekiela 34:15, 16; Ephesia 5:1) Ia au i teie huru feruriraa, ua aˈo te pǐpǐ ra o Iuda e ia faaitehia te hamani maitai i nia i te mau kerisetiano faatavaihia o tei feaa te manaˈo aore ra o tei hara. (Iuda 22, 23) I te mea e e titau-rahi-hia atu â i te mau kerisetiano aravihi, e tia mau â ia faaite i te hamani maitai i nia i te hoê taata bapetizo-apî-hia—e pinia mamoe noa hoi—o tei hapa, o tei tatarahapa râ. (Luka 12:48; 15:1-7) Te horoa nei ïa te mau matahiapo, ‘e haava ra na Iehova,’ i te aupuru aroha mau i teie mau mamoe e te faatitiaifaro nei hoi ia ratou ma te mǎrû.—Paraleipomeno 2, 19:6; Ohipa 20:28, 29; Galatia 6:1.d

14. Eaha te tia ia ravehia ia rave te hoê taata poro bapetizo-apî-hia i te hoê hara ino mau, e nafea oia ia tauturuhia?

¹⁴ E rave anaˈe na i te hiˈoraa o te hoê taata poro i bapetizo-apî-hia o te inu to ˈna fifi na mua ˈˈe e ua taero oia i te hoê aore ra e piti taime. Aore ra ua faaea oia i te puhipuhi i te avaava e mea maoro hoi to ˈna raveraa i tera peu, tera râ, ua hema oia e ua puhipuhi huna oia i te avaava hoê aore ra e piti taime. Noa ˈtu e ua pure to tatou taeae apî e ia faaore mai te Atua i ta ˈna hara, e tia ia ˈna ia imi i te tauturu a te hoê matahiapo ia ore te hara ia riro mai ei peu matauhia. (Salamo 32:1-5; Iakobo 5:14, 15) Ia faaite atu oia i ta ˈna hapa i te hoê o te mau matahiapo, e tia i teie matahiapo ia tamata i te faatitiaifaro i te taata apî ma te hamani maitai. (Salamo 130:3) E navai noa paha ia horoa ˈtu i te mau aˈoraa a te mau Papai no te tauturu ia ˈna ia faatitiaifaro i te eˈa o ta ˈna e haere a muri aˈe. (Hebera 12:12, 13) E tauaparau teie matahiapo e te tiaau peretiteni o te amuiraa no nia i te ohipa i tupu no te faataa e eaha ˈtu â te tauturu e nehenehe e horoahia.

15. I roto i te tahi mau huru tupuraa, eaha paha te titauhia ia hara anaˈe te hoê taata i bapetizo-apî-hia?

¹⁵ I roto i te tahi mau tupuraa, e titauhia paha ia rave hau atu â. Mai te peu e ua parare teie ohipa, te vai ra te atâtaraa no te nǎnǎ, aore ra vetahi atu mau fifi ino mau, e nomino te tino matahiapo e piti matahiapo no te tuatapapa i teie ohipa. Mai te peu e e manaˈo teie nau matahiapo e, no te ino o teie ohipa e tia ia faanahohia te hoê tomite haavaraa, e faaara ˈtu ïa raua i te tino matahiapo. E nomino te tino matahiapo i reira i te hoê tomite haavaraa no te tauturu i te taata rave hara. E tia i te tomite haavaraa ia rave ia ˈna ma te mǎrû. E tia ia ratou ia tutava ia faatitiaifaro ia ˈna maoti te mau Papai. Ia farii mai oia i te mau tutavaraa aroha a te tomite haavaraa, i reira ïa ratou e faataa ahiri e e tia mau anei ia tapea ia ˈna ia vauvau i te mau tuhaa na mua mai i te mau putuputuraa i te Piha no te Basileia aore ra ahiri e e faatiahia anei oia ia pahono i te mau putuputuraa.

16. Eaha ta te mau matahiapo e nehenehe e rave no te tauturu i te taata rave hara?

¹⁶ Ia farii mai te taata rave hara, e nehenehe te hoê matahiapo aore ra e piti no roto i te tomite haavaraa e faanaho i te rave i te mau tere farereiraa a te tiai mamoe no te faaitoito i to ˈna faaroo e no te faaetaeta i to ˈna mauruuru no te mau ture parau-tia a te Atua. E riro raua tataitahi i te ohipa na muri ia ˈna i roto i te taviniraa i te tahi mau taime. E rave paha raua i te tahi mau aparauraa niuhia i nia i te mau Papai e o ˈna, peneiaˈe na roto i te faaohiparaa i te mau tumu parau a Te Pare Tiairaa e te A ara mai na! e tano, eita râ raua e haamau roa i te hoê haapiiraa bibilia tamau. Maoti teie aupuru aroha, e riro paha te taata rave hara i te haapuaihia no te patoi atu i te mau paruparu o te tino i te mau mahana i muri iho.

17. Eaha te mau taahiraa avae e ravehia mai te peu e eita te hoê taata rave hara bapetizohia e tatarahapa e e faarue i to ˈna haerea hara?

¹⁷ Parau mau, e ere no te mea e mea apî oia i te bapetizoraahia, e faatia-noa-hia ïa te hoê taata ia rave tamau i te hara ma te tatarahapa ore. (Hebera 10:26, 27; Iuda 4) Mai te peu e eita te hoê taata rave hara bapetizohia e tatarahapa e e faarue i to ˈna haerea hara, e tiavaruhia ïa oia i te amuiraa. (Korinetia 1, 5:6, 11-13; Tesalonia 2, 2:11, 12; Ioane 2, 9-11) Mai te peu e e au ra e titauhia e ia tiavaruhia oia, e maiti te tino matahiapo i te hoê tomite haavaraa. Mai te peu e e tiavaruhia iho â teie taata, e faataehia teie parau faaite poto noa: “Ua tiavaruhia o . . .”e

A tauturu ia ratou ia ‘haere â i mua i te paari mau ra’

18. No te aha tatou e papu ai e e tia noâ i te mau kerisetiano bapetizo-apî-hia e vetahi pae atoa, ia haapii hau atu â no nia ia Iehova e to ˈna hinaaro?

¹⁸ E vai noa mai te pae rahi o te mau tavini a te Atua i roto i te nǎnǎ. Te mea oaoa atoa, e nehenehe tatou tataitahi e haafatata roa ˈtu â i to tatou Metua i te raˈi ra no te mea e e nehenehe noâ ta tatou e haapii hau atu â no nia ia ˈna e to ˈna hinaaro. (Koheleta 3:11; Iakobo 4:8) E mea papu maitai e e rahi atu â tei tia i te mau tausani taata o tei bapetizohia i te Penetekose o te matahiti 33 o to tatou nei tau ia haapii. (Ohipa 2:5, 37-41; 4:4) Hoê â huru no te mau Etene, o tei erehia i te ite no nia i te mau Papai. Ei hiˈoraa, o te ohipa ïa i itehia i nia i te feia o tei bapetizohia i muri aˈe i te oreroraa parau a Paulo i nia i te Areopago i Ateno. (Ohipa 17:33, 34) I teie mahana atoa, mea rahi atu â te tia i te feia bapetizo-apî-hia ia haapii e te titau nei ratou i te taime e te tauturu no te haapuai i ta ratou opuaraa e tamau noa i te rave i te mea tia i mua i te aro o te Atua.—Galatia 6:9; Tesalonia 2, 3:13.

19. Nafea te feia e bapetizohia ra ia tauturuhia ia ‘haere â i mua i te paari mau ra’?

¹⁹ I te mau matahiti atoa, e mau tausani taata o te bapetizohia ra e o te hinaaro ra i te tauturu ia nehenehe ratou e ‘haere â i mua i te paari mau ra.’ (Hebera 6:1-3) Na roto i te parau, te hiˈoraa e te tautururaa papu i roto i te taviniraa, e nehenehe outou e turu i vetahi ia ahu i te huru taata apî e “ia tamau noa i te haere i roto i te parau mau.” (Ioane 3, 4, MN; Kolosa 3:9, 10) Mai te peu e e taata poro aravihi outou, e riro paha te mau matahiapo i te ani ia outou ia tauturu i te hoê hoa faaroo apî i roto i te pororaa aore ra ia tauaparau e o ˈna no nia i te tahi mau tuhaa a te mau Papai i roto i te area tau hebedoma no te haapuai i to ˈna faaroo i roto i te Atua, to ˈna mauruuru no te mau putuputuraa kerisetiano, e te vai atu râ. Ua riro te huru raveraa a te mau tiai mamoe i nia i te nǎnǎ mai to te hoê metua tane ra i te pae no te aˈoraa e to te hoê metua vahine ra i te pae no te mǎrû. (Tesalonia 1, 2:7, 8, 11) Eita râ ta te tahi noa mau matahiapo e mau tavini tauturu e nehenehe e haapao i te mau mea atoa e titauhia ra e te amuiraa. Ua riro tatou paatoa mai te mau melo o te hoê utuafare o te tauturu i te tahi e te tahi. E nehenehe ta tatou tataitahi e rave i te tahi mea no te tauturu atu i to tatou mau hoa haamori. E nehenehe outou iho e horoa i te faaitoitoraa, e tamahanahana i te feia e taiâ ra, e tauturu i te feia paruparu.—Tesalonia 1, 5:14, 15.

20. Eaha ta outou e nehenehe e rave no te haaparare i te ite a te Atua e no te horoa i te aupuru aroha na te mau mamoe o te aua a Iehova?

²⁰ Te hiaai ra te huitaata nei i te ite a te Atua, e ei mau Ite no Iehova, e nehenehe outou e rave i te hoê tuhaa oaoa mau i roto i te haaparareraa i teie ite. Te hiaai ra te mau mamoe a Iehova i te aupuru aroha, e e nehenehe outou e hauti i te hoê tuhaa here mau i roto i te tautururaa ia horoa i teie aupururaa. Ia haamaitai Iehova i ta outou taviniraa e tia ˈi, e ia haamauruuru oia ia outou no ta outou mau tutavaraa hohonu mau no te tauturu i te mau mamoe o ta ˈna ra aua.

[Nota i raro i te api]

Nafea outou ia pahono?

◻ Eaha te huru o Iehova i nia i ta ˈna mau mamoe?

◻ Eaha te mea e ravehia ia hinaaro te feia apî e poro?

◻ Nafea te mau hoa faaroo ia tauturu i te feia apî o te hinaaro ra i te tahi tauturu taa ê?

◻ Eaha te tauturu ta te mau matahiapo e nehenehe e horoa na te feia o tei hapa, o te tatarahapa râ?

◻ Nafea outou ia tauturu i te hoê taata bapetizo-apî-hia ia ‘haere â i mua i te paari mau ra’?

[Hohoˈa i te api 16]

Ua matau-maitai-hia o Charles T. Russell ei tiai mamoe here mau i te nǎnǎ

[Hohoˈa i te api 18]

Te aupuru nei te mau tiai mamoe hamani maitai i te nǎnǎ a te Atua