Te faatupuraa i te mǎtaˈu paieti
“O Iehova ra ta oe e mǎtaˈu, a faarue ai i te ino.”—MASELI 3:7.
1. No vai te buka Maseli i papaihia ˈi?
E MEA rahi te mau aˈoraa pae varua i roto i te buka bibilia ra a te mau Maseli. Ua horoa mai Iehova i teie buka aratairaa i te omuaraa ra no te haapii i to ˈna nunaa no Iseraela tahito ra. I teie mahana, te horoa maira teie buka i te mau parau paari no to ˈna nunaa kerisetiano moˈa, “te feia i roohia mai i te hopea o te mau [faanahoraa o te mau mea].”—Korinetia 1, 10:11; Maseli 1:1-5; Petero 1, 2:9.
2. No te aha e e tano roa te faaararaa a te Maseli 3:7 no teie nei mahana?
2 Te taio nei tatou i roto i te Maseli 3:7 e: “Eiaha oe ia paari i to oe iho manaˈoraa: o Iehova ra ta oe e mǎtaˈu, a faarue ai i te ino.” Mai te tau mai â o to tatou nau metua matamua, i to te Ophi faahemaraa ia Eva maoti te tǎpǔraa ˈtu e e riro raua “i te ite i te maitai e te ino,” aita te paari taata nei i manuïa i te haamâha i te mau hinaaro o te huitaata nei. (Genese 3:4, 5; Korinetia 1, 3:19, 20) Aita ˈtu tau i roto i te aamu maoti râ teie senekele e 20 te ite-papu-raahia te reira—e ‘mau mahana hopea’ teie i reira te roohia nei te huitaata, ma te ooti hoi i te mau hotu o te manaˈo tiaturi ore i te Atua e ua tupu noa mai te mau mea atoa, i te feiiraa i rotopu i te mau nunaa taata, te haavîraa uˈana, e te mau huru peu taiata atoa. (Timoteo 2, 3:1-5, 13; Petero 2, 3:3, 4) E ‘ao apî huanane’ teie, e eita e haere i te mau Nunaa amui e tae noa ˈtu i te mau haapaoraa amahamaha ia faaafaro.
3. Eaha te mau tupuraa o tei tohuhia mai no to tatou nei tau?
3 Te faaara maira te Parau tohu a te Atua ia tatou e ua haere te mau puai demoni “i te hui arii o te fenua nei e o te ao atoa nei, . . . e haaputu ia ratou i te tamaˈi i taua mahana rahi o te Atua Puai hope ra . . . i te hoê vahi, o Aramagedo te iˈoa i te parau Hebera ra.” (Apokalupo 16:14, 16) Fatata roa te riaria no ǒ mai ia Iehova ra i te puohu i teie mau arii, aore ra faatere. E riro te reira mai te mehameha i topa i nia i te mau ati Kanaana i to Iosua e te mau ati Iseraela haereraa mai no te faatupu i te haavaraa i nia ia ratou. (Iosua 2:9-11) I teie râ mahana, na te taata i faahohoˈahia e Iosua, o Iesu Mesia—te “Arii o te mau arii e te Fatu o te mau fatu”—e ‘tairi i te mau nunaa e e tavana ia ratou e te sepeta auri’ maoti “te hoturaa rahi o te riri o te Atua Puai hope ra.”—Apokalupo 19:15, 16.
4, 5. O vai te faaorahia, e no te aha?
4 O vai te ora i taua taime ra? Te feia e faaorahia, e ere ïa te feia o tei pohe roa i te riaria, o te feia atoa râ o tei faatupu i te mǎtaˈu faatura ia Iehova. Maoti i te tiaturiraa i to ratou iho paari, ua “faarue” teie mau taata “i te ino.” Ma te haehaa, te faaamu nei ratou i to ratou feruriraa i te mea maitai, ia hurihia te ino i rapae i to ratou manaˈo. Te atuatu nei ratou i te faatura tia no te Fatu Mana Hope ra o Iehova, te “Haava i to te ao atoa nei,” o te faaineine nei i te haapohe i te feia atoa o te rave tamau nei i te ino, mai ta ˈna i haamou i te mau taata faufau no Sodoma ra. (Genese 18:25) Oia mau, ua riro ‘te mǎtaˈu ia Iehova no te feia e haamori i te Atua ei tumu no te ora, no te haafariu ê mai i te mau marei o te pohe.’—Maseli 14:27.
5 I teie mahana haavaraa a te Atua, te feia atoa o te pûpû taatoa ia ratou no Iehova ma te mǎtaˈu i te haapeapearaa ia ˈna, e taa ïa ia ratou i te parau mau i faahohoˈahia i roto i te Maseli 3:8: “O te ora ïa [te mǎtaˈu ia Iehova] no to oe ra tino, o te haamǎrû ïa no to oe ra mau ivi.”
Te faaturaraa ia Iehova
6. Eaha te mea e turai ia tatou ia pee i te Maseli 3:9?
6 E tia i to tatou mǎtaˈu maitai ia Iehova, apitihia e to tatou here rahi no ˈna, ia turai ia tatou ia pee i te Maseli 3:9: “E faatura ˈtu ia Iehova i ta oe ra mau taoˈa rarahi, e te oho matamua o ta oe atoa ra taoˈa ia tupu.” Aita tatou e faahepohia ra ia faatura ia Iehova e ta tatou mau taoˈa pûpû. E tia ia horoahia ma te aau tae, mai te faaitehia ra tau 12 taime i roto mai te Exodo 35:29 e tae atu i te Deuteronomi 23:23 no nia i te mau tusia i Iseraela tahito ra. E tia i taua mau oho matamua ra na Iehova ia riro ei mau ô maitatai roa ˈˈe o ta tatou e nehenehe e pûpû, ei haamauruururaa i te maitai e te hamani maitai o ta tatou i fanaˈo na roto i to ˈna rima. (Salamo 23:6) E tia ia faahohoˈa te reira i ta tatou opuaraa e ‘tamau noa i te imi na mua i te basileia e te parau-tia na ˈna.’ (Mataio 6:33) E eaha te mau faahopearaa e noaa mai ia faatura tatou ia Iehova e ta tatou mau taoˈa faufaa? “E î roa ta oe ra mau fare vairaa taoˈa i reira, e î hoi ta oe mau farii uaina i reira e manii noa ˈtu.”—Maseli 3:10.
7. Eaha te mau oho matamua ta tatou e pûpû atu na Iehova, e eaha te faahopearaa?
7 Te haamaitai na mua nei Iehova ia tatou i te pae varua. (Malaki 3:10) No reira, te mau oho matamua o ta tatou e pûpû na ˈna, e mau oho pae varua ïa na mua roa ˈˈe. E tia ia tatou ia faaohipa i to tatou taime, to tatou itoito, e to tatou puai no te rave i to ˈna hinaaro. I te tahi aˈe pae, e faaamu te reira ia tatou, mai ta teie ohipa i riro ei “maa” faaitoito no Iesu. (Ioane 4:34) E î ta tatou mau fare vairaa taoˈa i te pae varua, e e î atoa to tatou oaoa, tei faataipehia i te uaina apî. Hau atu, ia pure tatou ma te tiaturi e ia navai ta tatou maa materia no te mahana tataitahi, e nehenehe tatou e pûpû i te ô ma te horoa maitai i nia i ta tatou mau ravea no te turu i te ohipa a te Basileia na te ao nei. (Mataio 6:11) Te mau mea atoa e vai ra ia tatou nei, e tae noa ˈtu te mau faufaa materia, no ǒ mai ïa i to tatou Metua here i te raˈi ra. E ninii mai â oia i te tahi atu mau haamaitairaa, ia au i te faito tatou e faaohipa ˈi i teie mau taoˈa faufaa no te arueraa ia ˈna.—Maseli 11:4; Korinetia 1, 4:7.
Te mau aˈoraa here
8, 9. Nafea tatou ia hiˈo i te aˈo e te faatitiaifaroraa?
8 I te mau irava 11 e te 12, te faahiti faahou ra te Maseli pene 3 i te mau taairaa oaoa i rotopu i te metua tane e ta ˈna tamaiti e vai ra i roto i te mau utuafare fetii paieti, e tae noa ˈtu i rotopu ia Iehova e ta ˈna mau tamarii pae varua herehia i nia i te fenua. Te na ô ra te taioraa e: “Eiaha oe e inoino, e tau tamaiti, i te aˈo a Iehova, eiaha hoi e fatimauu i ta ˈna aˈoraa mai. O tei herehia e Iehova ra, o ta ˈna ïa e aˈo mai, mai te metua e aˈo i te tamaiti ta ˈna e here ra.” Mea riri roa na te mau taata no teie nei ao ia aˈohia ratou. E tia râ i te nunaa o Iehova ia farii popou i te reira. Ua faahiti te aposetolo Paulo i teie mau parau a te Maseli, i te na ôraa e: “E tau tamaiti, eiaha oe e haafaufaa ore i te aˈo a [Iehova], eiaha hoi ia pau te aho ia faahapahia mai oe e ana ra: o ta [Iehova] e here ra, o ta ˈna ïa e aˈo mai . . . Aita roa hoi e aˈo e riro ei mea oaoa i reira ra, e mea oto râ; area i muri aˈe, o te maitai ra ïa o te parau-tia te tupu i taua aˈo ra, i te feia i haamatarohia i te reira.”—Hebera 12:5, 6, 11.
9 Oia mau, e tuhaa titauhia te aˈo e te faatitiaifaroraa i roto i te haapiiraa ia tatou tataitahi, no ǒ mai anei i te mau metua, na roto i te amuiraa kerisetiano, aore ra ia feruri maite tatou i nia i te mau Papai i roto i ta tatou haapiiraa tataitahi. E ohipa te auraroraa i te aˈo i nia i to tatou ora aore ra to tatou pohe, ia au i ta te Maseli 4:1, 13 e faaite atoa ra: “E faaroo mai, e te mau tamarii ra, i te aˈo a te metua tane; e haapao maite mai ia noaa ia outou te ite. E tapea etaeta i te aˈo: eiaha roa e tuua; e vaiiho maite i te reira; o to oe ïa ora.”
Te oaoaraa rahi roa ˈˈe
10, 11. Eaha vetahi mau tuhaa o te mau parau au mau a te Maseli 3:13-18?
10 Auê ïa mau parau nehenehe e faahitihia ra i muri iho, oia mau ‘e parau au maitai e parau tia e te parau mau’! (Koheleta 12:10) Te faataa ra teia mau parau faauruahia a Solomona i te oaoaraa mau. E mau parau teie te tia ia tatou ia papai roa i nia i to tatou mafatu. Te na ôhia ra e:
11 “E ao to te taata i noaa ia ˈna te paari: te taata i noaa ia ˈna te ite ra! O te taoˈa hoi e hoona ˈi oia ra, e maitai rahi ïa i to te ario ra, e ia rahi hoi oia ra, e maitai rahi ïa i to te auro maitai ra. E maitai rahi to ˈna i to te poe; e te mau mea atoa i hinaarohia ra, e ore roa ïa e au ia ˈna. E mau mahana maoro tei tana rima atau, e te taoˈa rahi e te tura tei te rima aui. E fanaˈo-anaˈe-hia te mau parau atoa na ˈna; e e hau tei to ˈna ra mau haerea atoa. O te raau ora oia i te feia e tapea ia ˈna; e o te mau maite ia ˈna ra e ao to ˈna.”—Maseli 3:13-18.
12. Nafea tatou e faufaahia ˈi i te paari e te ite?
12 Te paari—e parau faahiti-pinepine-hia teie i roto i te buka Maseli, e 46 taime ia taio-pauroa-hia! “O te matamua o te paari ra, o te mǎtaˈu ïa ia Iehova.” Maoti te paari paieti e te tia niuhia i nia i te ite o te Parau a te Atua, e nehenehe ai to ˈna nunaa e aratai i to ratou aveia ma te peapea ore na roto i te mau vero atâta e uˈana nei i roto i te ao a Satani. (Maseli 9:10) Ua riro te ite, faahitihia e 19 taime i roto i te mau Maseli, ei apiti no te paari, ma te tauturu ia tatou ia aro i te mau raveraa a Satani. I te pae no te faaohiparaa i ta ˈna mau ravea paari, e mau tausani matahiti to muri i te Enemi rahi i reira to ˈna faaaravihiraa ia ˈna. Te vai nei râ ia tatou te mea faufaa roa ˈtu â i te aravihi e noaa mai i te orometua—te ite ïa a te Atua, te aravihi no te faataaraa i te maitai e te ino e no te maiti i te eˈa tia ia haere. Tera hoi ta Iehova e haapii maira ia tatou na roto i ta ˈna Parau.—Maseli 2:10-13; Ephesia 6:11.
13. Eaha te mea e paruru ia tatou i teie mau tau fifi i te pae faanavairaa, e mea nafea?
13 Ua riro te huanane i te pae faanavairaa faufaa i roto i teie nei ao ei tapao matamua no te tupuraa o te parau tohu i roto i te Ezekiela 7:19: “E faarue ratou i ta ratou ario i roto i te aroâ, e riro hoi ta ratou auro mai te mea viivii ra; e ore hoi ratou e ora i te ario e te auro, i te mahana e riri ai Iehova ra.” Eita te faufaa materia atoa i nia i te fenua e nehenehe e faaauhia i te mana faaora o te paari e te ite. Ua faaite te Arii paari ra o Solomona i te tahi atu taime e: “E haapuraa hoi tei te paari, e haapuraa tei te moni, teie râ te maitai o te paari ia noaa, na te reira e horoa mai i te ora i te feia fatu ra.” (Koheleta 7:12) E feia oaoa mau â te feia atoa i teie mahana o te haere nei na nia i te mau eˈa au mau a Iehova e o te maiti nei ma te paari i te “mau mahana maoro,” te ora mure ore o tei riro ei ô a te Atua i te feia atoa e faatupu i te faaroo i roto i te tusia o te hoo a Iesu!—Maseli 3:16; Ioane 3:16; 17:3.
Te faatupuraa i te paari mau
14. Na roto i teihea mau ravea to Iehova faaiteraa i te paari hau aˈe?
14 E mea tano e ia tutava tatou, te mau taata, o tei poietehia ia au i te hohoˈa o te Atua, i te faatupu i te paari e te ite, e mau huru maitatai hoi ta Iehova iho i faaite ia ˈna i rave i ta ˈna mau ohipa faahiahia mau o te poieteraa. “Ua haamau Iehova i te tumu o te fenua i to ˈna ra paari; e na to ˈna ite i haamau i te mau raˈi ra.” (Maseli 3:19, 20) Ua hamani ihora oia i te mau mea ora, eiaha na roto i te tupu-noa-raa o te mau mea taa-ore-hia, o te ore e tia ia tatarahia, tera râ, na roto i te ohipa poieteraa, te mau mea ora tataitahi “ma to ratou huru” e no te hoê opuaraa paari. (Genese 1:25) I te taime a hamanihia ˈi te taata ma te maramarama e te mau aravihi tei hau aˈe i to te mau animala ra, ua faaroohia te vevo o te mau haapopouraa a te mau tamaiti melahi a te Atua e ua atutu na roto i te mau raˈi. (A faaau e te Ioba 38:1, 4, 7.) Te ite-papu-hia ra te ite atea o Iehova, to ˈna paari, e to ˈna here i roto i ta ˈna mau mea atoa i hamani i nia i te fenua.—Salamo 104:24.
15. (a) No te aha eita noa e navai ia faatupu i te paari? (b) Eaha te tiaturiraa ta te Maseli 3:25, 26 e haaputapû i roto ia tatou?
15 Aita noa tatou e titau ra i te faatupu i te mau huru o Iehova oia hoi te paari e te ite, e tia atoa râ ia tapea maite tatou i te reira, ma te ore e faahupehupe i roto i ta tatou haapiiraa i ta ˈna Parau. Te aˈo maira oia ia tatou e: “E tau tamaiti, eiaha roa teie ia moe ê atu i to mata; e tapeâ oe i te paari maitai e te haapao; o te ora ïa no to oe ra [nephe], e o te nehenehe ïa i nia i to oe ra aˈî.” (Maseli 3:21, 22) E nehenehe ïa ta tatou e haere ma te peapea ore e te hau o te feruriraa, e tae noa ˈtu i te tau e fatata mai ai mai te eiâ ra te huru te mahana o te ‘haamouraa oioi’ o te tairi i te ao a Satani. (Tesalonia 1, 5:2, 3) I te ati rahi iho, “eiaha oe e mǎtaˈu i te haamǎtaˈu ia faauˈana mai, e te pau i te feia paieti ore ia fatata mai: o Iehova hoi to oe tiaturiraa, e na ˈna e tiai i to oe avae ia ore ïa ia fifi i te marei.”—Maseli 3:23-26.
Te here no te raveraa i te maitai
16. Eaha te ohipa e titauhia i te mau kerisetiano taa ê atu i te itoito i roto i te taviniraa?
16 E mau mahana teie no te faaiteraa i te itoito i roto i te pororaa i teie parau apî maitai o te Basileia ia ite te mau nunaa atoa. Teie râ, e tia ia apitihia teie ohipa pororaa e te tahi atu ohipa kerisetiano, ia au i tei faaitehia i roto i te Maseli 3:27, 28: “Eiaha oe e tapea i te maitai i te taata e au ia ˈna ia hopoi ra, tei to rima taua maitai ra ia hopoi. Eiaha oe e parau i to taata tupu ra, A haere, e e hoˈi faahou mai, e ananahi au e hopoi atu ai ia oe ra; e te vai ra hoi taua mea ra, tei ia oe.” (A faaau e te Iakobo 2:14-17.) I te mea e tei roto te pae rahi o te ao nei i te veve e te pohe poia, te vai nei te mau titauraa ru e ia tauturu atu tatou i to tatou taata-tupu, to tatou mau taeae iho â râ i te pae varua. Eaha ta te mau Ite no Iehova i rave?
17-19. (a) Eaha te titauraa ru o tei farereihia i te matahiti 1993 ra, e eaha te pahonoraa i horoahia? (b) Na te aha e haapapu ra e ‘te riro nei te re i taua mau mea atoa nei’ i to tatou mau taeae e fifihia ra?
17 A rave na i te hoê hiˈoraa: I te matahiti i mairi aˈenei, ua tae mai te hoê titauraa ru no ǒ mai i te fenua tei piihia o Yugoslavia na mua ˈˈe. Ua pahono atu te mau taeae no te mau fenua tapiri mai ma te faahiahia mau. I te mau avaˈe o te tau toetoe i mairi aˈenei, ua nehenehe e rave rahi mau pereoo uta tauihaa tauturu e tomo atu i roto i te vahi tamaˈi, ma te faauta i te mau buka, te mau ahu mahanahana, te maa, e te mau raau na te mau Ite e atihia ra. I te hoê taime, ua titau te mau taeae i te hoê parau faatia no te afai e 15 tane tauihaa tauturu, tera râ, i te taeraa mai te parau faatia, ua fariihia e 30 tane! Ua tono oioi noa te mau Ite no Iehova no Auteteria e toru pereoo rarahi. Ia amuihia te taatoaraa, e 25 tane tauihaa o tei tapae atu i te vahi i titauhia. Auê to tatou mau taeae i te oaoa e i te fanaˈoraa i teie mau tauihaa pue noa i te pae varua e i te pae materia!
18 Eaha te huru o te feia i fanaˈo i teie tauturu? I te omuaraa o teie matahiti, ua papai mai te hoê matahiapo e: “Ua ora mai te mau taeae e te mau tuahine no Sarajevo e mea maitai ratou, e te mea faufaa roa ˈtu â, e mea puai noâ matou i te pae varua no te faaoromai i teie tamaˈi maamaa. Mea fifi roa te mau ohipa i te pae no te maa. Ia haamaitai Iehova ia outou e ia haamauruuru oia ia outou no te mau tutavaraa o ta outou i rave no matou. Te faaite nei te mau tia mana i te hoê faatura taa ê no te mau Ite no Iehova no to ratou huru oraraa maitai e no to ratou faatura i te mau tia mana. Te haamauruuru atoa ˈtu nei matou no te maa pae varua o ta outou i faatae mai.”—A faaau e te Salamo 145:18.
19 Ua faaite atoa teie mau taeae o te faaruru nei i te tupuraa atâta i to ratou mauruuru na roto i ta ratou taviniraa itoito i roto i te pororaa. E rave rahi mau taata tapiri o te haere maira e farerei ia ratou no te ani i te mau haapiiraa bibilia. I te oire no Tuzla, i reira e pae tane maa o tei haponohia ˈtu, e 40 taata poro o tei tapao e 25 hora te taata tataitahi i roto i te taviniraa i roto i te faito au noa no te avaˈe, ei tururaa maitai i na pionie e iva o te amuiraa. Ua naeahia ia ratou i te numera faahiahia roa e 243 taata i tae mai i te oroa Haamanaˈoraa i te poheraa o Iesu. Ma te papu maitai, ‘te riro nei te re i taua mau mea atoa nei [i teie mau taeae herehia], i tei aroha mai ia tatou nei.’—Roma 8:37.
20. Eaha te ‘faitoraa’ o tei tupu i Rusia tahito?
20 Ua tuea atoa te horoa maitai i faaitehia na roto i te mau haapueraa rarahi o te maa e te mau ahu mahanahana i faataehia ˈtu i Rusia tahito e te itoito o te mau taeae no taua fenua ra. Ei hiˈoraa, i Moscou, e 7 549 taata i tae mai i te oroa Haamanaˈoraa i teie matahiti, faaauhia e e 3 500 i te matahiti i mairi aˈenei. I roto noâ i taua area taime ra, ua maraa te mau amuiraa i roto i taua oire ra mai te 12 i nia i te 16. I roto ia Rusia tahito taatoa (eiaha râ te mau hau Baltes), e 14 i nia i te hanere te maraaraa no te mau amuiraa, e 25 i nia i te hanere no te feia poro i te Basileia, e e 74 i nia i te hanere no te mau pionie. Auê ïa aau itoito e te faatusia tei faaitehia e! Te faahaamanaˈo maira te reira i te huru aau i faaitehia i te senekele matamua ra, i te taime a tupu ai te hoê ‘faafaitoraa.’ Ua pûpû te mau kerisetiano te vai ra ta ratou mau faufaa i te pae varua e te pae materia i te mau ô ma te horoa maitai na te feia e erehia ra, area te itoito o te feia i atihia ra, ua hopoi mai ïa i te oaoa e te faaitoitoraa no te feia o tei pûpû i te ô.—Korinetia 2, 8:14.
A riri i te ino!
21. Nafea te feia paari e te feia maamaa ia faataa-ê-hia i roto i te mau parau opaniraa a te Maseli pene 3?
21 Te horoa ra te pene toru a te mau Maseli i te tahi mau parau faataa-ê-raa, ma te opani e teie aˈoraa: “Eiaha oe e imi i te ino i to taata-tupu ra; te parahi maitai noa ra hoi oia i pihaiiho ia oe. Eiaha oe e mârô noa ˈtu i te taata aita e hara ra; e aita oia i hamani ino mai ia oe ra. Eiaha oe e feii i te taata hamani ino mai, eiaha e haere na ta ˈna ra mau eˈa. E mea faufau hoi na Iehova te feia mârô ra, tei te feia parau-tia ra ta ˈna parau moe. Te vai ra te katara a Iehova i nia i te fare o te feia paieti ore ra, area te fare o te feia parau-tia ra, te haamaitai ra oia i te reira. Te vahavaha nei oia i te feia e vahavaha; area te feia haehaa te ite nei oia i te reira. E noaa te maitai i te feia paari; area te maamaa ra, o te haama ta ratou e noaa.”—Maseli 3:29-35.
22. (a) Nafea tatou ia ape e ia taiohia tatou i rotopu i te feia maamaa? (b) Eaha ta te feia paari e riri, e eaha ta ratou e faatupu, maoti teihea haamauruururaa?
22 Nafea tatou ia ape i te taiohia i rotopu i te feia maamaa? E tia ia tatou ia haapii i te riri i te ino, oia mau, i te haafaufau i te mea faufau i mua ia Iehova—te mau haerea piˈo atoa o teie ao haavî uˈana e te haamanii toto. (Hiˈo atoa Maseli 6:16-19.) Taa ê atu râ, e tia ia tatou ia faatupu i te maitai—te haerea piˈo ore, te parau-tia, e te mǎrû—ia naeahia ia tatou na roto i te haehaa e te mǎtaˈu ia Iehova ‘te taoˈa rahi, te tura, e te ora.’ (Maseli 22:4) Te reira te haamauruururaa no te feia atoa i rotopu ia tatou o te faaohipa ma te haapao maitai i te faaueraa ra: ‘E tiaturi ia Iehova ma to mafatu atoa ra.’
Eaha ta outou pahonoraa?
◻ Nafea te irava tumu o teie haapiiraa e tano ai i teie mahana?
◻ Nafea tatou ia faatura ia Iehova?
◻ No te aha eita e tia ia haafaufaa ore tatou i te faatitiaifaroraa?
◻ Ihea roa e itehia ˈi te oaoaraa rahi roa ˈˈe?
◻ Nafea tatou ia here i te maitai e ia riri i te ino?
[Hohoˈa i te api 18]
E haamaitai-hua-hia te feia o te pûpû i te tusia maitai roa ˈˈe na Iehova