HAAPIIRAA 41
Eaha ta te Bibilia e parau ra no nia i te taatiraa i te pae tino?
E rave rahi taata aita ratou e au ia paraparau no nia i te taatiraa i te pae tino. Tera râ, ia faahiti te Bibilia no nia i te taatiraa i te pae tino, eita te Bibilia e huna, e faaite râ oia i te reira ma te faatura. E maitaihia tatou i ta te reira e parau ra. Mea tano iho â ta te Bibilia e parau ra no te mea no ǒ mai te reira ia Iehova ra to tatou Atua poiete. Ua ite oia eaha te mea maitai no tatou e ua faaite atoa oia eaha te titauhia ia tatou ia rave no te faaoaoa ia ˈna e ia ite i te oaoa e a muri noa ˈtu.
1. Eaha to Iehova manaˈo no nia i te taatiraa i te pae tino?
Te taatiraa i te pae tino e ô te reira no ǒ mai ia Iehova ra. Te hinaaro ra oia ia hopoi mai te taatiraa i te pae tino i te oaoa i te hoê tane e te hoê vahine faaipoipo. Ma teie ô, eita noa na hoa faaipoipo e fanau mai i te tamarii, oia atoa e faaiteraa te reira i to raua here rahi te tahi i te tahi. No reira te Bibilia i parau ai: “Ia oaoa oe e te vahine o to apîraa.” (Maseli 5:18, 19) No reira, te titau ra Iehova i te mau Kerisetiano faaipoipo ia faaite i te taiva ore i to ratou hoa faaipoipo, ia ore roa ˈtu ratou ia faaturi.—A taio i te Hebera 13:4.
2. Eaha te peu taotoraa tia ore?
Te parau ra te Bibilia: “Eita roa ˈtu te feia o te rave i te mau peu taotoraa tia ore . . . e fatu i te Faatereraa arii a te Atua.” (Korinetia 1, 6:9, 10) Ua faaohipa te feia papai Bibilia i te taˈo Heleni poreneia no te peu taotoraa tia ore. I roto i tera taˈo te vai ra (1) te taotoraaa e piti taata aita i faaipoipo te tahi i te tahi, (2) te taotoraa te tane e te tane, te vahine e te vahine, e (3) te taata e te animara. E oaoa mai Iehova ia tatou e e maitai tatou “ia haapae i te mau peu taotoraa tia ore.”—Tesalonia 1, 4:3.
A FAAHOHONU ATU Â
A hiˈo e nafea oe ia ape i te peu taotoraa tia ore e e nafea oe e faufaahia ˈi i te vai-mâ-raa i te pae feruriraa, paraparauraa e ohipa.
3. A maue ê atu i te mau peu tia ore
Ua aro te hoê taata taiva ore ra o Iosepha ia vai mâ i te pae feruriraa, paraparauraa e ohipa. A taio i te Genese 39:1-12, e a aparau i teie mau uiraa:
Na te aha i turai ia Iosepha ia maue ê?—A hiˈo i te irava 9.
No oe, ua rave anei Iosepha i te faaotiraa maitai? No te aha?
E nafea te feia apî e pee ai i to Iosepha hiˈoraa ma te maue ê atu i te peu taotoraa tia ore i teie mahana? A pata i te VIDEO.
Te hinaaro ra Iehova ia patoi tatou i te peu taotoraa tia ore. A taio i te Korinetia 1, 6:18, e a aparau i teie mau uiraa:
Eaha te mau tupuraa e aratai ai i te hoê taata ia rave i te peu taotoraa tia ore?
Nafea oe e nehenehe ai e maue ê i te peu taotoraa tia ore?
4. E nehenehe oe e patoi i te faahemaraa
Na te aha e haafifi i te hoê taata ia patoi i te faahemaraa e rave i te peu taotoraa tia ore? A pata i te VIDEO, e a aparau i te uiraa i muri nei.
I to te taeae i roto i te video taaraa e nehenehe to ˈna feruriraa e ta ˈna ohipa e turai ia ˈna ia taiva i ta ˈna vahine, eaha ta ˈna i rave?
Te aro atoa ra te mau Kerisetiano taiva ore ia vai mâ noa to ratou feruriraa. Eaha ta oe e rave ia ore e manaˈo noa i te mau peu tia ore? A taio i te Philipi 4:8, e a aparau i teie mau uiraa:
Ia feruri tatou i nia i te aha?
E nafea te taioraa i te Bibilia e te tamauraa i te ohipa i roto i ta Iehova taviniraa e tauturu ai ia tatou ia patoi i te faahemaraa e rave i te hara?
5. Mea maitai te mau ture aveia a Iehova no tatou
Ua ite Iehova eaha te mea maitai no tatou. Te faaite mai ra oia ia tatou e nafea ia vai mâ i te pae feruriraa, paraparauraa e ohipa e e nafea e faufaahia ˈi ia na reira. A taio i te Maseli 7:7-27, aore ra a pata i te VIDEO, e a aparau i te mau uiraa i muri nei.
Mea nafea te hoê taurearea i te hemaraa i tera tupuraa?—A hiˈo i te Maseli 7:8, 9.
Ia au i te Maseli 7:23, 26, e faahopearaa ino mau ta te peu taotoraa tia ore e hopoi mai. Ia vai mâ noa oe i te pae feruriraa, paraparauraa e ohipa, eaha te mau fifi ta oe e nehenehe e ape?
E nafea te vai-mâ-raa i te pae feruriraa, paraparauraa e ohipa e tauturu ai ia tatou ia oaoa e a muri noa ˈtu?
Te manaˈo ra te tahi mau taata mea etaeta roa ta te Bibilia e parau ra no nia i te taotoraa te tane e te tane, te vahine e te vahine. Area Iehova te Atua here, te hinaaro ra oia ia oaoa tatou e a muri noa ˈtu. Ia manuïa mai tatou, mea titauhia ia ora tatou ia au i ta ˈna mau ture aveia. A taio i te Korinetia 1, 6:9-11, e a aparau i teie uiraa:
No te Atua, o te taotoraa te tane e te tane, te vahine e te vahine noa te mea tano ore?
Ia mauruuru mai te Atua ia tatou, mea titauhia ia tatou paatoa ia rave i te mau tauiraa. Mea hoona anei? A taio i te Salamo 19:8, 11, e a aparau i teie mau uiraa:
No oe, mea tano anei te mau ture aveia teitei a Iehova? No te aha oia aore ra no te aha aita?
Ua tauturu Iehova e rave rahi taata ia auraro i ta ˈna mau ture aveia teitei. E nehenehe atoa oia e tauturu ia oe
TE MANAˈO O VETAHI: “Te taatiraa i te pae tino i roto e piti taata mea au roa, aita hoi e fifi te here ra hoi raua.”
Eaha ta oe e parau?
HAAPOTORAA
Te taatiraa i te pae tino e ô te reira no ǒ mai ia Iehova ra no te hoê tane e ta ˈna vahine ia oaoa raua.
Haamanaˈoraa
Eaha te ô mai i roto i te peu taotoraa tia ore?
Eaha te tauturu ia tatou ia ape i te peu taotoraa tia ore?
E nafea tatou e faufaahia ˈi i te peeraa i te mau ture aveia teitei a Iehova?
HiˈOPOA
A haapii no te aha te Atua e hinaaro ai ia faaipoipo te hoê tane e te hoê vahine e faaea fare ra.
A hiˈo no te aha te Bibilia e haapii ai mea ino te peu mahu eiaha râ ia hae i te taata iho e rave ra i tera peu.
A haapii e nafea te mau ture a te Atua no nia i te mau peu taotoraa tia ore atoa e paruru ai ia tatou.
“E taatiraa pae tino mau anei te taatiraa na roto i te vaha?” (Tumu parau natirara)
I roto i te aamu “Ua faaite ratou i te faatura ia ˈu,” a hiˈo eaha tei turai i te hoê tane tei taoto i te hoê tane ia taui i to ˈna oraraa no te faaoaoa i te Atua.
“Ua taui te Bibilia i to ˈu oraraa” (Tumu parau o Te Pare Tiairaa)
a Ua rau te ohipa e ravehia i roto i teie mau taatiraa tia ore, te vai ra te taotoraa te tane i te vahine, te taatiraa na roto i te vaha e te tiho, te mirimiriraa i te mero atiraa e te tahi taata e ere i to ˈna hoa faaipoipo.