“O Iehova hoi tei horoa mai i te paari”

E PAU to outou taime e to outou itoito i roto i teihea mau titauraa? E haapeapearaa anei na outou te haamaitairaa i to outou roo? Te pûpû ra anei outou ia outou iho no te haaputu i te mau taoˈa rahi? Eaha râ no nia i te titauraa i te hoê toroa i roto i te hoê tuhaa taa ê aore ra te haamaitairaa i te aravihi i roto i te hoê tuhaa haapiiraa aore ra hau atu â? Mea faufaa anei na outou te atuaturaa i te mau taairaa maitai e o vetahi ê? O to outou anei haapeapearaa matamua te vai oraora-maitai-raa?

E au ra e e huru faufaa to te mau mea atoa i faahitihia iho nei. Eaha râ te mea faufaa roa? Te pahono ra te Bibilia e: “O te paari â te mea maitai; e titau i te paari.” (Maseli 4:7) Nafea ïa e noaa ˈi ia tatou te paari, e eaha te mau haamaitairaa o te reira? E horoa mai te pene piti o te buka Bibilia ra Maseli i te mau pahonoraa.

“Ia fariu mai i to tariˈa i te paari”

Ma te mau parau î i te here a te hoê metua tane, te na ô ra te Arii no Iseraela i tahito ra o Solomona e: “E tau tamaiti, ia farii mai oe i ta ˈu nei parau, e ia vaiiho maite i ta ˈu parau i pihaiiho ia oe; ia fariu mai i to tariˈa i te paari; e ia imi to aau i te ite [maite] ra; ia titau hua oe i te [maramarama], e ia faateitei i to reo ia noaa te ite [maite] ra; ia imi hua oe ia ˈna mai te ario ra, e ia paheru hua oe ia ˈna, mai te taoˈa hunahia ra; e ite ïa oe i te mǎtaˈu ia Iehova, e noaa ïa ia oe te ite i te Atua.”—Maseli 2:1-5; MN.

Te ite ra anei outou tei ia vai ra te hopoia e imi i te paari? I roto i teie mau irava, e itehia te mau parau ra “ia . . . oe” e toru taime. Papu maitai tei te taata taitahi te imiraa i te paari e to ˈna mau apee—te ite maite e te maramarama. Na mua râ, e titauhia tatou ia “farii” e ia “vaiiho maite” i te mau parau paari o te mau Papai i roto i to tatou mehara. No reira e hinaaro tatou e haapii i te Bibilia.

Te paari, o te aravihi ïa i te faaohipa maitai i te ite i horoahia mai e te Atua. E mea faahiahia mau ia horoa mai te Bibilia i te paari! Oia mau, e mau parau paari to roto, mai tei haaputuhia i roto i te mau buka Maseli e Koheleta, e mea titauhia ia haapao maitai tatou i taua mau parau ra. E ite atoa mai tatou i roto i te mau api o te Bibilia i te mau hiˈoraa e rave rahi o te faaite i te mau haamaitairaa ia faaohipahia te mau faaueraa tumu a te Atua e te mau marei ia ore ia tâuˈahia ˈtu. (Roma 15:4; Korinetia 1, 10:11) Ei hiˈoraa, a hiˈo na i te aamu o te taata nounou ra o Gehazi, te tavini a te peropheta ra o Elisaia. (Te mau arii 2, 5:20-27) Aita anei te reira e haapii maira ia tatou i te haerea paari eiaha e nounou? Eaha ïa no nia i te faahopearaa peapea o te mau tere e au ra e e ere i te mea atâta o te tamahine a Iakobo ra o Dina e farerei i “te mau vahine o taua fenua ra” o Kanaana? (Genese 34:1-31) Aita anei tatou e ite noa ra i te huru maamaa o te mau amuimuiraa iino?—Maseli 13:20; Korinetia 1, 15:33.

Te haapao-maitai-raa i te paari, te noaaraa atoa ïa i te ite maite e te maramarama. Ia au i te Webster’s Revised Unabridged Dictionary, te ite maite, o “te puai ïa aore ra te ravea o te feruriraa e faataa ê i te hoê mea i te tahi.” Te ite maite no ǒ mai i te Atua ra, o te aravihi ïa i te faataa ê i te mea tano e te mea hape e i te maiti i te haerea maitai. Ia ore ‘to tatou aau e imi’ i te ite maite aore ra e hinaaro ia noaa te reira, nafea tatou e nehenehe ai e faaea noa i nia i “te eˈa e tae atu ai i te ora”? (Mataio 7:14; a hiˈo i te Deuteronomi 30:19, 20.) E horoa mai te haapiiraa e te faaohiparaa i te Parau a te Atua i te ite maite.

Nafea tatou e nehenehe ai ‘e titau hua i te maramarama’—te aravihi i te taa nafea te mau tuhaa o te hoê tumu parau i taaihia ˈi te tahi i te tahi e i te taatoaraa? E nehenehe iho â ïa te faito matahiti e te ite paari e tauturu mai ia faarahi atu â i te maramarama—e ere râ mai te reira noa. (Ioba 12:12; 32:6-12) “Ite rahi to ˈu i to te feia tahito ra,” ta te papai salamo ïa i parau, “no te mea te haapao nei au i ta oe [Iehova] parau.” Ua himene atoa oia e: “Tei te heheuraa o ta oe ra parau e noaa ˈi te maramarama, e noaa ˈi hoi te ite i te taata ite ore ra.” (Salamo 119:100, 130) O Iehova “To te mau mahana tahito ra” e mea maramarama rahi ê oia i te huitaata taatoa. (Daniela 7:13) E nehenehe te Atua e horoa i te maramarama na te taata ite ore, a nehenehe atu ai oia e hau aˈe i roto i taua huru maitai ra i te feia matahiti rahi aˈe. No reira, e tia ia tatou ia faaitoito i te haapii e i te faaohipa i te Parau a te Atua, te Bibilia.

I roto i te mau parau faahiti-noa-hia ra “ia . . . oe” i te omuaraa o te pene piti o te Maseli, te vai ra te mau parau mai teie, “farii,” “vaiiho maite,” “titau hua,” “imi hua,” “paheru hua.” No te aha te taata papai e faaohipa ˈi i teie mau parau ma te puai noa ˈtu â? Te na o râ te hoê buka faahororaa e: “Te haamatara ra te taata paari [i ǒ nei] i te faufaaraa o te manaˈo tia ia imihia te paari.” Oia mau, e tia ia tatou ia imi i te paari e te mau huru maitatai e apee i te reira—te ite maite e te maramarama—ma te manaˈo tia.

E rave anei outou i te tutavaraa?

Te hoê ohipa faufaa i roto i te imiraa i te paari, o te haapiiraa ïa i te Bibilia ma te itoito. E tia râ i teie haapiiraa ia hau aˈe i te taio-noa-raa no te farii i te tahi haamaramaramaraa. E tuhaa faufaa te feruri-hohonu-raa ma te hoê fa i ta tatou e taio ra no te haapiiraa i te mau Papai. No te fanaˈo i te paari e te ite maite, e titauhia ia feruri tatou nafea e faaohipa ˈi i ta tatou e haapii ra no te faatitiaifaro i te mau fifi e no te rave i te mau faaotiraa. Ia noaa te maramarama, e titauhia ia feruri nafea te mea apî e tuea ˈi e te mea ta tatou i ite aˈena. O vai te faahapa e e titau teie haapiiraa i te Bibilia ma te feruri maite i te taime e te tutava-puai-raa? E au te taime e te itoito e horoahia i tei faaohipahia no te ‘imi hua i te ario e te paheru hua i te taoˈa hunahia ra.’ E rave anei outou i te tutavaraa e titauhia? E “faaherehere maite” anei outou “i te taime” no te na reira?—Ephesia 5:15, 16.

A feruri na i te mau taoˈa rahi e tiai maira ia tatou ia paheru hohonu tatou i roto i te Bibilia ma te mafatu tia. Oia mau, e noaa mai ia tatou “te ite i te Atua”—te ite maitai e te papu i to tatou Poiete o te horoa i te ora! (Ioane 17:3) E taoˈa atoa “te mǎtaˈu ia Iehova” te tia ia noaa. Mea faufaa mau teie mǎtaˈu faatura ia ˈna! E tia i te mǎtaˈu maitai eiaha e faariri ia ˈna ia aratai i te mau tuhaa atoa o to tatou oraraa, a horoa ˈi i te hoê auraa pae varua i te mau mea atoa ta tatou e rave.—Koheleta 12:13.

E tia ia vai oraora noa te hinaaro mau e imi e e paheru i te mau taoˈa pae varua i roto ia tatou. No te faaohie i ta tatou maimiraa, ua horoa mai Iehova i te mau mauhaa heruraa maitai roa—te mau vea parau mau e tae mai i te taime au Te Pare Tiairaa e te A ara mai na!, oia atoa te tahi atu mau papai niuhia i nia i te Bibilia. (Mataio 24:45-47) No te haapii i ta ˈna parau e to ˈna mau eˈa ia tatou, ua horoa atoa mai Iehova i te mau putuputuraa Kerisetiano. Mea titauhia ia tae atu tatou, ia faaroo maitai i tei parauhia ra, ia tutava maitai i te haamau i te feruriraa e ia vaiiho maite i te mau manaˈo tumu, e ia feruri hohonu i nia i to tatou taairaa e o Iehova.—Hebera 10:24, 25.

E noaa ia outou

Mea pinepine, e mâuˈa te imiraa i te mau ofai maitatai, te auro, aore ra te ario. Eiaha ia na reira atoa no te imiraa i te mau taoˈa pae varua. No te aha ïa e ore ai? “O Iehova hoi tei horoa mai i te paari,” ta Solomona ïa e haapapu maira ia tatou, “e no roto i to ˈna vaha te parau e te ite [maite].”—Maseli 2:6; MN.

Ua tui te roo o te Arii Solomona no to ˈna paari. (Te mau arii 1, 4:30-32) Te faaite ra te mau Papai e ua ite oia i te mau tumu parau e rave rau, tae noa ˈtu i te mau tumu tiare, te animala, te huru o te taata, e te Parau a te Atua. Ua tui to ˈna roo na te ao atoa nei no te ite maite ta ˈna i faaite ei arii apî i to ˈna faaafaroraa i te mârôraa i rotopu i na vahine e piti tei parau tataitahi e o raua te metua vahine o te hoê pêpe. (Te mau arii 1, 3:16-28) Eaha te tumu o to ˈna ite rahi? Ua pure Solomona ia Iehova no te ani i “te paari e te ite” e te aravihi ‘i te ite i te maitai e te ino.’ Ua horoa Iehova i te reira na ˈna.—Paraleipomeno 2, 1:10-12, MN; Te mau arii 1, 3:9.

E tia atoa ia tatou ia pure no te ani i te tauturu a Iehova a haapii ai tatou ma te itoito i ta ˈna Parau. Ua pure te papai salamo e: “E haapii mai oe, e Iehova, i to oe ra eˈa, e haapao vau i ta oe ra parau mau: ia rotahi maite hoi tau aau i te mǎtaˈuraa i to iˈoa na.” (Salamo 86:11) Ua farii Iehova i taua pure ra, ua haapapai hoi oia i te reira i roto i te Bibilia. E nehenehe tatou e tiaturi e eita e ore e pahonohia ta tatou mau pure haavare ore e te tuutuu ore no te ani i ta ˈna tauturu no te imi i te mau taoˈa pae varua i roto i te Bibilia.—Luka 18:1-8.

Te haamatara ra Solomona e: “Te vaiiho ra oia i te [paari] no te feia parau-tia; e o te paruru hoi oia no te feia haerea tia ra. O tei haapao i te mau eˈa e au ai ra; te tiai ra hoi oia i te haerea o to ˈna ra feia moˈa. Ei reira oe e ite ai i te parau-tia, e te parau au, e te piˈo ore, e te mau eˈa maitatai atoa ra.” (Maseli 2:7-9; MN) E tamahanahanaraa mau teie! Eita noa Iehova e horoa i te paari na te feia e imi i te reira ma te aau rotahi, e riro atoa râ oia ei paruru no te feia parau-tia no te mea te faaohipa ra ratou i te paari mau e te faaau ra ratou ia ratou i te mau ture parau-tia ma te haapao maitai. Ia riro tatou ei roto atoa i te feia ta Iehova e tauturu ra ia taa i “te mau eˈa maitatai atoa ra.”

Ia “riro te ite ei mea maitai”

E ere iho â te haapiiraa Bibilia taitahi—te hoê titauraa rahi no te imi i te paari—i te hoê ohipa au roa no te taata e rave rahi. Ei hiˈoraa, te parau ra te taata ra o Lawrence, 58 matahiti e: “Ua rave noa vau i te ohipa e to ˈu rima. Mea fifi roa na ˈu te haapiiraa.” Te parau ra o Michael, 24 matahiti, tei ore i au i te haapii i te fare haapiiraa e: “Mea titauhia ia faahepo vau ia ˈu iho e parahi e e haapii.” E nehenehe râ e faahotuhia te hinaaro e haapii.

A hiˈo i ta Michael i rave. Te faatia nei oia e: “Ua haavî au ia ˈu iho no te haapii afa hora i te mau mahana atoa. Aita i maoro, ua ite au i te faahopearaa i nia i to ˈu huru, ta ˈu mau pahonoraa i te mau putuputuraa Kerisetiano, e ta ˈu mau aparauraa e o vetahi ê. I teie nei, e ru vau i ta ˈu mau taime haapiiraa, e eita vau e au ia haafifi mai te hoê noa ˈˈe mea i te reira.” Oia, e riro mai te haapiiraa taitahi ei ohipa au roa ia ite tatou i te mau haereraa i mua e noaa ia tatou. Ua haavî atoa Lawrence ia ˈna iho no te haapiiraa Bibilia e, ia maoro rii aˈe, ua tavini atura oia ei matahiapo i roto i te hoê amuiraa Ite no Iehova.

E titauhia te tutava-tamau-raa no te faariro i te haapiiraa taitahi ei tupuraa au mau. Mea rahi râ te mau haamaitairaa. “Ia ô mai te paari i roto i to aau na, e ia riro te ite ei mea maitai ia oe ra,” ta Solomona ïa e parau ra, “na te haapao maitai e tiai ia oe i reira; e na te ite [maite] e faaora ia oe.”—Maseli 2:10, 11; MN.

“Ia ora oe i te eˈa ino ra”

Nafea te paari, te ite, te haapao maitai, e te ite maite e riro ai ei faaora? Maoti te reira e “[ora oe i te eˈa ino ra],” ta Solomona ïa e parau ra “i te mau taata e parau i te parau piˈo ra; o tei faarue i te eˈa haavare ore ra, e ua na te eˈa pouri i te haere; o tei fanaˈo i te raveraa i te parau ino, e ua oaoa i te mau parau taiata; o tei mârô i to ratou mau haerea, e te piˈo ra ta ratou parau.”—Maseli 2:12-15; MN.

Oia, e ape te feia mea au na ratou te paari mau i te auhoaraa e te taata atoa “e parau i te parau piˈo ra,” oia hoi te mau mea e ere roa ˈtu i te mea mau e te mea tano. E riro te haapao maitai e te ite maite ei paruru no tatou i te feia e patoi i te parau mau no te haere na te mau eˈa o te poiri e i te feia feruriraa piˈo e te hinaaro i te mau ohipa iino.—Maseli 3:32.

E nehenehe mau â tatou e mauruuru i te mea e e paruru atoa te paari mau e te mau huru maitatai i taaihia i te reira, ia tatou i te eˈa ino o te mau tane e mau vahine tia ore i te pae morare! Te na ô atoa ra Solomona e e au teie mau huru maitatai “ia ore hoi oe ia hape i te vahine ê, i te vahine ê ra, na ˈna te parau taparu, o tei taiva i te tiai ia ˈna i tana apîraa ra, e ua moe ia ˈna te faufaa a to ˈna ra Atua. Tei te eˈa pohe to ˈna ra utuafare; e to ˈna mau haerea tei te feia i pohe ra. E ore roa hoi tei faafatata ia ˈna e hoˈi mai, e ore roa e hoˈi faahou i te eˈa ora.”—Maseli 2:16-19.

Te faataahia ra “te vahine ê,” te vahine faaturi, mai te hoê o te taiva i “te tiai ia ˈna i tana apîraa ra”—papu mau te tane o to ˈna apîraa ra.a (A hiˈo i te Malaki 2:14.) Ua moe ia ˈna te opaniraa i te faaturi ei tuhaa o te faufaa o te Ture. (Exodo 20:14) Te aratai ra to ˈna mau eˈa i te pohe. E ore roa tei faahoa ia ˈna e “hoˈi faahou i te eˈa ora,” no te mea arauaˈe rii iho aore ra a muri rii aˈe e taea paha ia ratou te faito aita e ravea faahou, oia hoi te pohe, e eita ta ratou e nehenehe faahou e hoˈi mai. Ua itea maitai i te hoê taata ite maite e te haapao maitai te mau faahemaraa a te peu morare tia ore e e ape oia ma te paari eiaha oia ia roaahia i te reira.

‘E parahi te feia piˈo ore i te fenua’

Ma te haapoto i te tapao o ta ˈna aˈoraa no nia i te paari, te parau ra Solomona e: “E tena na, e na te eˈa o te taata maitatai ra te haere, e haapao maite i te eˈa o te feia parau-tia ra.” (Maseli 2:20) E tapao faahiahia mau ta te paari! E tauturu mai te reira ia ora tatou i te hoê oraraa oaoa e te mauruuruhia o te haapopouhia e te Atua.

A feruri atoa na i te mau haamaitairaa rahi e tiai maira i te feia e ‘haere ra na te eˈa o te taata maitatai.’ E na ô â Solomona e: “Na te feia piˈo ore hoi e parahi i te fenua, e te feia parau-tia [“hapa ore,” MN] te haapapuhia i reira; e tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.” (Maseli 2:21, 22) Ia riro outou ei roto i te feia hapa ore o te parahi e a muri noa ˈtu i roto i te ao apî parau-tia a te Atua.—Petero 2, 3:13.

[Nota i raro i te api]

[Hohoˈa i te api 26]

Ua pure Solomona no te ani i te paari. Ia na reira atoa tatou