Eaha te papuraa o te mau tohu a te Bibilia?

MEA rahi te mau buka tuatapaparaa aamu i teie mahana. Mea pinepine teie mau faatiaraa no nia i te mau ohipa i tupu i tahito ra i te haamaere ia tatou. Ia taio anaˈe tatou i te reira, e faahohoˈa roa tatou ia tatou iho i taua anotau ra. E araara roa to tatou feruriraa a pipiha mai ai te mau taata, te mau vahi, e te mau tupuraa mai roto mai i te mau api e vai mamû noa ra.

Mai te reira te huru o te Bibilia—e buka teie tei î roa i te mau faatiaraa aamu putapû mau. I roto i to ˈna mau api, e farerei tatou i te mau tane e te mau vahine mai ia Aberahama, e ta ˈna vahine o Sara, te Arii ra o Davida, te Arii vahine ra o Esetera, e te Orometua Rahi, o Iesu Mesia. E haere tatou na muri iho ia ratou, e faaroo i ta ratou parau, e e hiˈo i te mea o ta ratou iho i hiˈo. Teie râ, e rave rahi o te manaˈo nei e ua hau atu te Bibilia i te hoê noa buka aamu. Te tiaturi nei ratou e te vai ra i roto i te parau tei piihia, e aamu papaihia na mua ˈˈe e tupu ai. No te aha? No te mea ua î te Bibilia i te mau tohu, aore ra parau tohu.

Teie râ, eaha te papuraa o te mau tohu a te Bibilia? Mai te peu e ua tupu te mau parau tohu a te Bibilia no nia i te mau tupuraa no tahito ra, eita atoa anei ïa te mau tohu no nia i te mau ohipa no a muri aˈe e tupu atoa? E tuatapapa anaˈe na tatou i teie nei i te tahi mau hiˈoraa no te ite mai te peu e e nehenehe anei e tiaturi i te mau tohu a te Bibilia.

O Iseraela e o Asura i nia i te tahua o te ao nei

Ua tohu te peropheta a te Atua ra o Isaia, o tei haamata i te tohu i te area o te matahiti 778 hou to tatou nei tau e: “E taataahihia ratou i raro aˈe i te avae; te mau hei teoteo o te feia taero i Epheraima [Iseraela] ra. E te tiare maheahea noa ra o to ratou unauna nehenehe ra, i te hopea mai o te peho hotu maitai ra, e riro mai te maa para vave aita i tae i te auhune mau ra; o tei hiˈo atura, ua pofai ihora i reira ra, e tei te taeraa ˈtu i te rima ra, ua horomii ihora ïa.” (Isaia 28:3, 4) Mai tei tohuhia mai, i te afaraa o te senekele vau hou to tatou nei tau, ua riro maira o Samaria, te oire pu o Iseraela, mai te hoê maa suke para o tei pofaihia e o tei horomiihia e te mau nuu puai no Asura. O te ohipa ïa i tupu a haruhia ˈi o Samaria e to Asura i te matahiti 740 hou to tatou nei tau.—Arii 2, 17:6, 13, 18.

I muri iho, o Asura atura i teie nei o te riro mai ei hau emepera no tahito ra. O Nineve to ˈna oire pu, e no te riaria o ta ˈna huru raveraa taehae i nia i te feia tapeahia, ua piihia oia “te oire i viivii i te toto.” (Nahuma 3:1) Ua faaue te Atua ra o Iehova iho i te vavahiraa o Nineve. Ei hiˈoraa, na roto i te peropheta ra o Nahuma, ua parau te Atua e: “Inaha, e ore au e faatia ia oe, . . . e haaviivii atu [vau] ia oe, e faariro ia oe ei hiˈoraa. E riro hoi te feia atoa e hiˈo i te horo ê, e na ô hoi ia parau e, Ua pau Nineve.” (Nahuma 3:5-7) Ua tohu atoa o Zephania i te haamouraa o Asura e te vai-ano-raa o Nineve. (Zephania 2:13-15) Ua tupu teie mau parau tohu i te matahiti 632 hou to tatou nei tau, a haere mai ai, ma te hitimahuta, te mau nuu amui a te arii no Babulonia o Nabopolassar e Cyaxares no Media, e eiâ e e haamou roa ia Nineve—e inaha, aita te vahi o te oire i itehia i te roaraa hau atu i te 2 000 matahiti. O te Hau emepera no Babulonia to muri iho i nia i te tahua o te ao nei.

Ua tohuhia te mairiraa o Babulonia

Ua tohu te Bibilia e e faatahurihia te Hau emepera no Babulonia e ua tohu oia e mea nafea to ˈna oire pu, o Babulonia, e mairi ai. Tau piti senekele na mua ˈˈe, ua faaara te peropheta ra o Isaia e e haamârôhia te Anavai ra o Eupharate. E tahe na oia na roto ia Babulonia, e ua riro te mau uputa na te pae anavai ei tuhaa faufaa roa i roto i te parururaa o te oire. Ua faahiti te parau tohu i te iˈoa o Kuro ei taata haru e ua tapao oia e eita na “uputa” e piti raau no Babulonia e opanihia i mua i te feia haru oire. (Isaia 44:27–45:7) No reira, ua haapao te Atua e ia vai matara noa na uputa e piti raau no Babulonia na te hiti ia Eupharate i te tau oroa i te po a rave ai te mau nuu a Kuro Rahi i ta ratou aroraa. Ma te ohie roa, ua tomo aˈera ratou i roto i te oire na roto i te tahora e ua haru ihora ratou ia Babulonia.

Ua papai te taata tuatapapa aamu ra o Herodotus e: “Ua faanoho o Kuro . . . i te hoê pae o to ˈna nuu i te vahi i reira te Eupharate e tahe ai i roto [ia Babulonia] e te tahi pǔpǔ i te tahi aˈe pae i reira oia e tahe atu ai i rapae, ma te faaue atu i na pǔpǔ toopiti ia tomo atu na roto i te tahora ia ite anaˈe ratou e ua papaˈu roa te pape. . . . Na roto i te ǒraa i te hoê eˈa pape, ua faatioi oia i te anavai tae atu i te hoê roto (e vahi vari hoi i taua taime ra) e mea na reira to ˈna faaiti-rahi-raa i te hohonu o te pape i roto i te tahora matamua e ua nehenehe atura e haere na roto, e ua tomo atura te nuu Peresia, o tei vaiihohia i Babulonia no taua tumu ra, na roto i te anavai, o tei naeahia te faito i te afa humaha o te hoê taata, e, na reira e tae roa ˈtu i roto i te oire. . . . Te tupu ra te hoê oroa, e a topa ˈi te oire, te ori ra ratou e te arearea noa ra, e tae roa ˈtu i te taime a araara ˈi ratou i mua i te ati e tupu ra.”—Herodotus—Te mau aamu (beretane), hurihia e Aubrey de Selincourt.

I taua po ra iho, ua faaara te peropheta a te Atua ra o Daniela i te arii no Babulonia i te ati e fatata maira. (Daniela, pene 5) Ua vai noa mai o Babulonia tei itihia te puai te tahi tau senekele i muri aˈe. Ei hiˈoraa, i reira, ua papai te aposetolo Petero i ta ˈna rata matamua i faauruahia i te senekele matamua o to tatou nei tau. (Petero 1, 5:13) Ua haapapu râ te parau tohu a Isaia e: “E o Babulonia, . . . hoê â taihitumu-atoa-raa mai ia Sodoma e mai ia Gomora i taihitumuhia e te Atua ra. E ore roa e taata-faahou-hia.” E ua parau atoa te Atua e: “E tâpû ê atu vau i te iˈoa i Babulonia nei, e na toea; e te tamaiti, e te tamaiti na taua tamaiti ra.” (Isaia 13:19-22; 14:22) Mai tei tohuhia mai, ua riro maira o Babulonia ei haapueraa ofai. Te umehia nei te feia ratere i te manaˈo e patu faahou i taua oire tahito ra, teie râ e ere-noa-hia oia i ta ˈna “tamaiti, e te tamaiti na taua tamaiti ra.”

Ua ite o Daniela—te peropheta a Iehova tei Babulonia oia i to ˈna mairiraa—i te hoê orama no nia i te haruraa a to Medai e Peresia. Ua ite oia i te hoê mamoe oni e piti tara e te hoê puaaniho pae e te hoê tara rahi i ropu i te area mata. Ua tuhi atura te puaaniho i te mamoe oni e ua faatahuri atura ia ˈna, ma te ofati i na tara e piti. I muri iho, ua ofatihia ˈtura te tara rahi o te puaaniho, e ua tupu maira e maha tara i to ˈna vahi. (Daniela 8:1-8) Mai ta te Bibilia i tohu e ta te aamu i haapapu, te mamoe oni e piti tara, o Medai-Peresia ïa. Te faahohoˈa ra te puaaniho pae ia Heleni. E eaha ïa taua “tara rahi” ra? O Alesanedero Rahi ïa. I te taime a ofatihia ˈi te tara rahi taipe ra, e maha tara taipe (oia hoi e mau basileia) o tei mono mai ia ˈna. Ia au i te parau tohu, i muri aˈe i te poheraa o Alesanedero, ua rave mai e maha o ta ˈna mau tenerara i te mana—o Ptolémée Lagus i Aiphiti e i Paletetina; o Seleucus Nicator i Mesopotamia e i Suria; o Cassandre i Makedonia e i Heleni; e o Lysimaque i Thrace e i Asia Iti.—Daniela 8:20-22.

Te mau tohu no te hoê oraraa oaoa no a muri aˈe

Ua riro noa te mau tohu bibilia no nia i te mau ohipa mai te vai-ano-raa o Babulonia e te faatahuriraahia o Medai-Peresia ei mau hiˈoraa o te mau parau tohu e rave rahi a te mau Papai o tei tupu i tahito ra. Te vai atoa ra i roto i te Bibilia te mau tohu no te hoê oraraa oaoa no a muri aˈe o te tupu mau iho â maoti te Mesia, te taata Faatavaihia a te Atua.

Ua faatano te feia papai i te mau Papai Heleni Kerisetiano i vetahi mau tohu no nia i te Mesia i roto i te mau Papai Hebera i nia ia Iesu Mesia. Ei hiˈoraa, ua faahiti te feia papai i te mau Evanelia e ua fanauhia o Iesu i Betelehema, mai ta te peropheta ra o Mika i tohu. (Mika 5:2; Luka 2:4-11; Ioane 7:42) Ei faatupuraa i te parau tohu a Ieremia, ua taparahihia te mau aiû i muri aˈe i te fanauraa o Iesu. (Ieremia 31:15; Mataio 2:16-18) Ua tupu te mau parau a Zekaria (9:9) i to te Mesia tomoraa i Ierusalema i nia i te hoê pinia asini. (Ioane 12:12-15) E i to te mau faehau tufaraa i te mau ahu o Iesu i muri aˈe i to ˈna rîraahia i nia i te pou, ua tupu ïa te mau parau a te papai salamo ra e: “Ua tufa ratou i tau mau ahu ra no ratou, e te haa-mairi-kelero nei i tau pereue.”—Salamo 22:18.

Ua faataa te tahi atu mau tohu no nia i te Mesia i te hoê tau oaoa no te huitaata nei. I roto i te hoê orama, ua ite o Daniela i “te hoê mai te Tamaiti a te taata ra” i te horoaraahia “te mana, e te hinuhinu, e te basileia” no ǒ mai ia Iehova ra, “To te mau mahana tahito ra.” (Daniela 7:13, 14) No nia i te faatereraa Mesia o taua Arii i nia i te raˈi ra, o Iesu Mesia, ua faaite o Isaia e: “E mairihia to ˈna iˈoa, ia Hau ê, e Aˈo, te Atua puai, te Metua no te ui a muri atu, te Arii no te hau. E te tupuraa o to ˈna mana i te rahi e to ˈna hau, aore ïa e hopea; e mana hoi oia i nia i te terono o Davida, e i nia i to ˈna ra basileia ei haamau e ei faaitoito i te reira, ma te parau au e te parau-tia i teie nei e a muri noa ˈtu: na te itoito o Iehova sabaota teie e rave.”—Isaia 9:6, 7.

Hou te faatereraa parau-tia a te Mesia e mana taatoa ˈi, e tia ia tupu i te hoê ohipa faufaa roa. Ua tohu-atoa-hia te reira i roto i te Bibilia. No nia i te Arii Mesia, ua himene te papai salamo e: “A tatua na i to ˈoˈe i to humaha, e tei puai ra . . . e ma to mana ra, a horo ai ma te [manuïa], ei faatupu i te parau mau, e te mǎrû, e te parau-tia.” (Salamo 45:3, 4) No nia i to tatou nei tau, ua tohu atoa te mau Papai e: “Ia tae i te anotau o taua mau arii ra, e faatupu ai te Atua o te raˈi ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.”—Daniela 2:44.

Te vauvau ra te Salamo 72 i te hoê hiˈoraa no te mau huru tupuraa e itehia i raro aˈe i te faatereraa a te Mesia. Ei hiˈoraa, “i to ˈna ra tau e tupu roa ˈi te parau-tia; e rahi roa hoi te hau, oi vai aˈe te marama.” (Irava 7) Aita faahou e rave-ino-raa aore ra e haavîraa uˈana. (Irava 14) Eita te taata e pohe faahou i te poia, no te mea “e riro hoi e maa sitona tei te fenua i nia i te tupuai o te mau mouˈa ra.” (Irava 16) A feruri na! E nehenehe outou e fanaˈo i te reira e te tahi atu mau haamaitairaa i roto i te hoê paradaiso i nia i te fenua nei ia monohia mai teie faanahoraa o te mau mea e te ao apî i tǎpǔhia mai e te Atua.—Luka 23:43; Petero 2, 3:11-13; Apokalupo 21:1-5.

Mea papu maitai e e tano iho â ia tuatapapa outou i te mau tohu a te Bibilia. No reira, no te aha outou e ore ai e ani atu i te mau Ite no Iehova i te mau haamaramaramaraa hau atu? E tauturu te tuatapaparaa i te mau parau tohu a te Bibilia ia outou ia ite e teihea roa tatou i roto i te tereraa o te tau. E nehenehe atoa e faatupu i roto i to outou mafatu i te mauruuru hohonu no te Atua ra o Iehova e no ta ˈna ravea faahiahia o te haamaitairaa mure ore no te feia atoa e here e e auraro ia ˈna.

[Hohoˈa i te api 5]

Ua ite anei outou i te auraa o te orama a Daniela no nia i te hoê puaaniho pae e te hoê mamoe oni?

[Hohoˈa i te api 7]

Tei reira anei outou no te fanaˈo i te tupuraa o te mau tohu a te Bibilia no nia i te oraraa oaoa i roto i te hoê paradaiso i nia i te fenua?