Eaha ta te Bibilia e faaite ra no nia i to ˈna Fatu?

1. No te aha outou e mauruuru ai no te Bibilia?

E MAURUURU iti rahi to tatou i te Atua ra o Iehova no te Bibilia! I roto i te Bibilia, e horoa mai oia i te aratairaa paari no te tauturu ia tatou ia faaruru i te mau fifi. E horoa atoa mai oia i te hoê tiaturiraa faahiahia no a muri aˈe. Tera râ, te mea faufaa roa ˈtu â, ua faaite mai Iehova i to ˈna huru na roto i te Bibilia. Ia feruriruri tatou i nia i to ˈna mau huru maitatai, e putapû roa to tatou aau. E turai te reira ia tatou ia faafatata ˈtu ia ˈna a riro atu ai ei hoa no ˈna.—Sal. 25:14.

2. Eaha te mau ravea ta Iehova i faaohipa no te faatae i ta ˈna mau poroi i te taata?

² E hinaaro Iehova ia matau te taata ia ˈna. I tahito ra, ua faaite oia o vai o ˈna na roto i te moemoeâ, te orama e te mau melahi. (Num. 12:6; Ohi. 10:3, 4) E nafea râ ia tuatapapa i teie mau moemoeâ, orama e poroi no ǒ mai i te mau melahi ahani aita te reira i papaihia? E tumu mau ïa Iehova i aratai ai i te tahi mau taata ia “papai i roto i te hoê buka” i te mea ta ˈna i hinaaro ia ite tatou. (Ier. 30:2) Inaha e “mea tia roa te eˈa o te Atua mau,” ua papu ïa ia tatou e tera te ravea maitai roa ˈˈe ia nehenehe te Atua e paraparau e e tauturu ia tatou.—Sal. 18:30.

3. Mea nafea to Iehova faaherehereraa i te poroi o te Bibilia? (Isaia 40:8)

³ A taio i te Isaia 40:8. Ua horoa noa te Parau a te Atua i te aratairaa papu i te taata i te roaraa o te tau. E ere anei i te mea faahiahia? Ua papaihia hoi te reira mea maoro aˈenei i nia i te otaro tei ino i muri mai, aita faahou nei ïa te reira i teie mahana. Ua haapao râ Iehova ia papai-faahou-hia teie mau papai moˈa. Noa ˈtu e taata tia ore te mau papai parau tei papai faahou i te reira, ua haapao maitai ratou i ta ratou ohipa. Ei hiˈoraa, no te mau Papai Hebera, ua parau te hoê taata ite i te Bibilia: “E nehenehe e haapapu e aita ˈtu e buka no tahito tei papai-faahou-hia ma te tano roa.” Noa ˈtu e mea maoro te Bibilia i te papairaahia, e mea tia ore te mau papai parau e ua ino te mau otaro tumu, ua papu râ ia tatou e o te poroi iho â a te Atua to roto i ta tatou Bibilia i teie mahana.

4. Eaha ta tatou e hiˈopoa i roto i teie tumu parau haapiiraa?

⁴ No ǒ mai ia Iehova ra “te mau ô maitatai atoa e te mau mea tia roa.” (Iak. 1:17) O te Bibilia hoê o te mau ô faufaa roa ˈˈe ta Iehova i horoa mai. E faaite te hoê ô i te tahi mea no nia i te taata horoa, oia hoi, ua matau maitai o ˈna ia tatou e ua ite o ˈna eaha ta tatou e hinaaro mau ra. Hoê â huru no Iehova, ia hiˈopoa tatou i te Bibilia, mea rahi ta tatou e haapii no nia ia ˈna. Ei hiˈoraa, e haapii tatou e ua ite maitai o ˈna i te huru o te taata e eaha ta tatou e hinaaro mau ra. I roto i teie tumu parau haapiiraa, e hiˈopoa tatou eaha ta te Bibilia e haapii mai ra no nia i te paari o Iehova, ta ˈna parau-tia e to ˈna here. E hiˈopoa anaˈe na mua eaha ta te Bibilia e haapii mai ra no nia i te paari o te Atua.

E FAAITE TE BIBILIA I TE PAARI O TE ATUA

5. Eaha te hoê ravea e faaite ai te Bibilia i te paari o te Atua?

⁵ Ua ite Iehova eaha ta tatou e hinaaro mau. No reira, ia maitai mai to tatou oraraa, ua horoa mai oia i te mau aratairaa î i te paari i roto i te Bibilia. I te papairaahia te mau buka matamua o te Bibilia, ua parau Mose i to Iseraela, te nunaa o te Atua: “E ere hoi teie i te parau faufaa ore no outou, e riro râ te reira ei ora no outou.” (Deut. 32:47) No reira, e oaoa e e manuïa te oraraa o te taata o te auraro i te faaueraa a te Bibilia. (Sal. 1:2, 3) A mairi ai te tau, aita te mana o te Parau a te Atua i iti mai, e maitai noa mai hoi te oraraa o te taata i te reira. Ei hiˈoraa, i nia i te jw.org, i roto i te anairaa tumu parau “Ua taui te Bibilia i to ˈu oraraa,” e ite mai outou hau atu i te 50 aamu o te faaite ra e nafea te Bibilia e ‘ohipa ˈi i roto i te feia e tiaturi ra’ i te reira.—Tes. 1, 2:13.

6. No te aha tatou e parau ai e e buka taa ê roa te Bibilia?

⁶ E buka taa ê roa te Parau a te Atua. Eaha hoi? No te mea e Atua mana hope e te mure ore te Fatu o te Bibilia o Iehova, e aita ˈtu e Atua î i te paari mai ia ˈna. Noa ˈtu e rave rahi buka te taio-noa-hia ua pohe anaˈe te taata papai, pinepine râ te mau parau i roto i tera mau buka i te ore e tano faahou a mairi ai te tau. Area no te mau aratairaa î i te paari o te Bibilia, ua riro ïa ei aratairaa papu no te taata o te mau tau atoa. Ia taio e ia feruriruri tatou i nia i teie buka moˈa, e faaohipa to ˈna Fatu i te varua moˈa no te tauturu ia tatou ia faaohipa i te aratairaa Bibilia i roto i to tatou oraraa. (Sal. 119:27; Mal. 3:16; Heb. 4:12) Oia mau, te hinaaro ra te Fatu o te Bibilia e tauturu ia outou. Eita anei teie manaˈo e turai ia tatou ia taio i te Bibilia i te mau mahana atoa?

7. Mea nafea te Bibilia i te tahoêraa i te nunaa o te Atua i tahito ra?

⁷ Te tahi atu haapapuraa e itehia ˈi te paari o te Atua i roto i te Bibilia, o te iteraa ïa e nafea te reira e tahoê ai i te nunaa o te Atua. I te tomoraa to Iseraela i te Fenua tǎpǔhia, ua purara ê ratou. Ua riro mai vetahi ei ravaai, ua faaamu vetahi atu i te animara, area te tahi atu, ua faaapu ïa i te fenua. No reira, aita paha ïa to Iseraela i tâuˈa faahou i to ratou mau taeae o te ora ra i te tahi atu vahi o te fenua. Ua faanaho râ Iehova ia putuputu ratou paatoa no te faaroo i te taioraa e te tatararaa o te Parau a te Atua. (Deut. 31:10-13; Neh. 8:2, 8, 18) A feruri na eaha te huru o te hoê Iseraela taiva ore ia tae oia i Ierusalema e ia ite e mirioni tavini a Iehova no te fenua taatoa o Iseraela! Na roto i teie ravea, ua tauturu Iehova i to ˈna nunaa ia vai hoê noa. I muri aˈe, i te haamauraahia te amuiraa Kerisetiano, ua rau te reo e te tiaraa o te mau Kerisetiano. No te mea râ e mea au na ratou i te mau Papai, ua vai hoê ïa ratou no te haamori i te Atua mau. Ia hinaaro hoê e riro ei mero no te amuiraa, e tia ia tauturu te hoê Kerisetiano ia ˈna ia taa i te Parau a te Atua. Mea faufaa atoa ia putuputu taua taata ra e te amuiraa.—Ohi. 2:42; 8:30, 31.

8. E nafea te Bibilia e tahoê ai i te nunaa o Iehova i teie mahana?

⁸ Te haapii e te tahoê noa ra to tatou Atua î i te paari i to ˈna nunaa maoti te Bibilia. No roto mai i te Bibilia te maa pae varua ta tatou e hinaaro mau. E apiti pinepine tatou i te putuputuraa e ta tatou amuiraa, e te mau tairururaa atoa no te faaroo i te taioraa e te tatararaa o te mau Papai. No reira, e tuhaa faufaa rahi ta te Bibilia i roto i te opuaraa a te Atua, oia hoi “ia tavini [to ˈna feia haamori] ia ˈna ma te tahoê.”—Zeph. 3:9.

9. Eaha te huru maitai te titauhia ia faatupu no te taa i te poroi o te Bibilia? (Luka 10:21)

⁹ Teie te tahi atu haapapuraa o to Iehova paari. E rave rahi tuhaa o te Bibilia e o te feia haehaa anaˈe te nehenehe e taa. (A taio i te Luka 10:21.) Na te ao nei, e taio te taata i te Bibilia. Mai ta te hoê taata ite i te Bibilia e parau ra, “ia faaauhia i te tahi atu mau buka, o te Bibilia te buka taio-roa-hia e te tuatapapa-roa-hia na te ao nei.” Tera râ, o te taata haehaa anaˈe te taa e te faaohipa i ta te Bibilia e haapii ra.—Kor. 2, 3:15, 16.

10. Eaha te tahi atu ravea e faaite ai te Bibilia i te paari o Iehova?

¹⁰ E faaite te Bibilia i te paari o Iehova na roto i te tahi atu ravea. E faaohipa Iehova i te Bibilia no te haapii ia tatou ei pǔpǔ, no te haapii atoa râ e no te tamahanahana ia tatou tataitahi. (Isa. 30:21) Ia faaruru outou i te hoê fifi, aita anei outou i tano i nia i te hoê irava Bibilia ta outou i hinaaro mau i tera taime? Papu maitai e e, inaha hoi e putapû iho â te aau o te taata e rave rahi i te Bibilia. E nafea teie buka e nehenehe ai e haaputapû i to oe aau i te taime tano? Eita tatou e maere, inaha hoi, e paari taa ê mau to te Fatu o te Bibilia.—Tim. 2, 3:16, 17.

E FAAITE TE BIBILIA I TE PARAU-TIA A TE ATUA

11. E nafea te papairaa o te Bibilia e faaite ai e ere Iehova i te Atua maitiiti?

¹¹ O te parau-tia te tahi atu huru maitai o Iehova. (Deut. 32:4) Inaha e mea piri te huru maitiiti ore i te parau-tia, e nehenehe ïa e parau e Atua maitiiti ore o Iehova. (Ohi. 10:34, 35; Roma 2:11) E itehia tera huru to ˈna na roto i te mau reo i papaihia ˈi te Bibilia. Fatata pauroa na 39 buka matamua o te Bibilia tei papaihia na roto i te reo Hebera, oia hoi te reo matauhia e te nunaa o te Atua i tera ra tau. I te senekele matamua, o te reo Heleni tei paraparau-rahi-hia, tera atoa ïa te reo tei faaohipahia no te papai i na 27 buka hopea o te Bibilia. Aita Iehova i haapapai i ta ˈna Parau na roto i te hoê noa reo. I teie mahana, e rave rahi reo ta te taata e paraparau ra. E nafea tera rahiraa taata e nehenehe ai e haapii no nia ia Iehova?

12. E nafea te Daniela 12:4 e tupu atoa ˈi i teie mau mahana hopea?

¹² Na roto i te peropheta Daniela, ua fafau Iehova e i te anotau o te hopea, e haere “te ite mau” itehia i roto i te Bibilia “i te rahiraa.” E rave rahi taata o te taa i te reira. (A taio i te Daniela 12:4.) E itehia tera ite o te haere ra i te rahiraa na roto i te huriraa, te piaraa e te opereraa i te Bibilia e te mau papai Bibilia. O te Bibilia te buka huri-roa-hia e opere-roa-hia na te ao nei. Mea moni te mau huriraa Bibilia ta te mau taiete e hoo ra. Area te Bibilia a te nunaa o Iehova, te taatoaraa aore ra te tahi noa mau buka Bibilia, ua hurihia ïa na roto hau i te 240 reo e e nehenehe te taata atoa e fanaˈo i te reira ma te tamoni ore. Te auraa ïa e fanaˈo te taata no te mau nunaa atoa i “te parau apî oaoa o te Faatereraa arii” hou te hopea a tae mai ai. (Mat. 24:14) Te horoa ra to tatou Atua parau-tia i te ravea i te taata atoa ia ite o vai o ˈna na roto i te taioraa i ta ˈna Parau. No to ˈna here rahi ia tatou paatoa i na reira ˈi oia.

E FAAITE TE BIBILIA I TE HERE O TE ATUA

13. E nafea te Bibilia e faaite ai i te here o Iehova? (Ioane 21:25)

¹³ E faaite papu mai te Bibilia e o te here te huru maitai roa ˈˈe o te Fatu o te Bibilia. (Ioa. 1, 4:8) A feruri na eaha ta ˈna i faaoti i te tuu e i te ore e tuu i roto i te Bibilia. Ua tuu noa oia i te mea hinaarohia e tatou no te riro ei hoa no ˈna, no te fanaˈo i te oraraa oaoa i teie nei â e te ora mure ore a muri aˈe. Tera râ, no to Iehova here ia tatou, aita oia i horoa mai hau atu haamaramaramaraa i ta tatou e hinaaro no te tavini ia ˈna.—A taio i te Ioane 21:25.

14. E nafea ˈtu â te Bibilia e faaite ai i te here o te Atua?

¹⁴ E ite-atoa-hia to Iehova here na roto i te huru e faaite ai oia i to ˈna faatura ia tatou. I roto i te Bibilia, aita oia i horoa mai i te hoê tapura faatureraa era aˈe te roa no te faatere i te mau tuhaa atoa o to tatou oraraa. Ua horoa mai râ oia i te aamu, te parau tohu e te aratairaa papu ia nehenehe tatou e rave i te faaotiraa maitai. Maoti te Bibilia e here e e auraro ai tatou ia Iehova ma te aau atoa.

15. (1) E nafea te Bibilia e haapapu ai e te tâuˈa mau ra Iehova ia tatou? (2) I nia i te hohoˈa, o vai te mau hiˈoraa Bibilia ta te tamahine iti, te taeae apî e te tuahine paari e feruriruri ra? (Gen. 39:1, 10-12; Arii 2, 5:1-3; Luka 2:25-38)

¹⁵ Te haapapu ra te Bibilia e te tâuˈa mau ra Iehova ia tatou. I roto i ta ˈna Parau, e rave rahi aamu o te faaite ra i te mau huru aau o te taata. E taa ia tatou te huru o te mau hiˈoraa Bibilia no te mea e taata ratou “mai ia tatou te huru.” (Iak. 5:17) Te mea faufaa roa ˈtu â, ia ite tatou i ta Iehova i rave no ratou, e taa ˈtu â ia tatou e “e Atua here rahi Iehova e te aroha hamani maitai.”—Iak. 5:11.

16. Eaha ta tatou e haapii no nia ia Iehova a taio ai i te aamu Bibilia o vetahi tei hape na? (Isaia 55:7)

¹⁶ Te tahi atu ravea e faaite ai Iehova i to ˈna here, na roto ïa i te haapapuraa e eita o ˈna e faarue ia tatou ia hape tatou. Noa ˈtu ua hara te mau Iseraela e rave rahi taime, ua faaore te Atua i ta ratou mau hara i to ratou tatarahaparaa. (A taio i te Isaia 55:7.) Ua ite atoa te mau Kerisetiano matamua i to Iehova here rahi ia ratou. I raro aˈe i te aratairaa a te varua moˈa, ua faaitoito te aposetolo Paulo ia ratou ia faaore i te hara a te hoê taata tei tatarahapa e ia tamahanahana ia ˈna. (Kor. 2, 2:6, 7; Kor. 1, 5:1-5) Mea faahiahia roa te huru o Iehova i nia i ta ˈna mau tavini, aita hoi oia i faarue ia ratou noa ˈtu ta ratou mau hapa. Ma te here râ, ua tauturu, ua aˈo e ua titau o ˈna ia ratou ia hoˈi mai ia ˈna ra. I teie mahana, tera atoa ta ˈna e rave ra no te feia atoa o te tatarahapa mau ra.—Iak. 4:8-10.

A HAAFAUFAA I TE ‘Ô MAITAI’ O TE PARAU A TE ATUA

17. No te aha e ô faahiahia mau â te Bibilia?

¹⁷ E ô faahiahia mau â te Parau a te Atua. Mai ta tatou i haapii, e faaite te Bibilia i te paari o te Atua, ta ˈna parau-tia e to ˈna here. Te haapapu ra teie buka e te hinaaro ra Iehova ia ite tatou o vai o ˈna e ia riro tatou ei hoa no ˈna.

18. E nafea tatou e faaite ai i to tatou mauruuru ia Iehova no te ‘ô maitai’ o te Bibilia?

¹⁸ Eiaha roa ˈtu e moˈe ia tatou e e ‘ô maitai’ te Parau a te Atua. (Iak. 1:17) E tamau anaˈe ïa i te faaite i to tatou mauruuru no teie ô ma te taio e te feruriruri i nia i teie mau parau moˈa. Ma te na reira, e haamaitai Iehova i ta tatou mau tutavaraa e “e noaa mai ia [tatou] te ite no nia i te Atua.”—Mas. 2:5.