Te haapii mai ra anei te Bibilia e mea parahurahu te fenua?

Te pahonoraa a te Bibilia

Aita te Bibilia e haapii mai ra e mea parahurahu te fenua.a E ere te Bibilia i te hoê buka ihi. Tera râ, aita te Bibilia e patoi ra i te mau haapapuraa i te pae o te ihi. “E nehenehe iho â [te Bibilia] e tiaturihia, i teie nei e a muri noa ˈtu.”—Salamo 111:8.

• Eaha te auraa o te parau Bibilia “na poro e maha o te fenua”?

• Eaha ïa tei tupu i to te Diabolo faahemaraa ia Iesu?

Eaha te auraa o te parau Bibilia “na poro e maha o te fenua”?

I roto i te Bibilia, ua faaohipahia te parau “na poro e maha o te fenua” e “te hopea o te fenua,” ei auraa parau. E ere te auraa e mea orapa te fenua aore ra e hopearaa to te fenua. (Isaia 11:12; Ioba 37:3) E huru paraparau râ te reira no te parau o te taatoaraa o te fenua. Te faaohipa atoa ra te Bibilia i na tuhaa e maha o te hoê aveia.—Luka 13:29.

E au ra e ua taaihia te taˈo Hebera hurihia ei “poro” aore ra “hopea” i te taˈo “pererau.” Ia au i te hoê buka aivanaa, “e faaohipa te manu i to ˈna pererau no te paruru i ta ˈna mau fanauˈa. No reira, ua taaihia [teie taˈo Hebera] i te hopearaa o te hoê mea te nehenehe e haamahorahia.” Ua parau atoa taua buka aivanaa ra e i roto i te Ioba 37:3 e te Isaia 11:12, “te auraa o tera taˈo, o te pae fenua ïa, te taotiaraa aore ra te hopea o te hoê tuhaa fenua.”b

Eaha ïa tei tupu i to te Diabolo faahemaraa ia Iesu?

No te faahema ia Iesu, “afai faahou aˈera te Diabolo ia Iesu i nia i te hoê mouˈa teitei roa, faaite maira ia ˈna i te mau faatereraa arii atoa o te ao nei e to ratou hanahana.” (Mataio 4:8) Te faaohipa ra vetahi i tera irava no te parau e e nehenehe e ite i te taatoaraa o te fenua mai te hoê vahi no te mea mea parahurahu te fenua. No tera râ parau “mou’a teitei roa,” e ere i te hoê iho â mouˈa, e auraa parau râ. No te aha mea tano ia manaˈo mai te reira?

• I nia i te fenua, aita roa ˈtu e mouˈa teitei roa no te ite i te mau faatereraa arii atoa o teie ao.

• Aita te Diabolo i faaite noa ia Iesu i te mau faatereraa arii atoa. Ua faaite atoa râ “to ratou hanahana.” Aita roa ˈtu te reira e itehia mai te hoê vahi atea roa. Te auraa ïa e ua faaohipa te Diabolo i te tahi orama no te faaite i te reira ia Iesu. Hoê â huru no te hoê taata e faaohipa ra i te matini no te pata ˈtu i nia i te hoê paruai i te mau hohoˈa o te vahi e rave rau o te fenua.

• Te faahiti ra te Luka 4:5 e ua faaite te Diabolo ia Iesu “maa taime noa i te mau faatereraa arii atoa o te ao nei.” Aita hoi te hoê taata e nehenehe e na reira. Te auraa ïa e ua hinaaro te Diabolo e faahema ia Iesu ma te faaohipa i te tahi mau ravea, e ere i te mea matauhia e te taata.