Te uiraa rahi: eaha mau na?

EAHA te uiraa rahi tei mua ia tatou tataitahi? O te maraaraa anei o te faito o te miti e te tauiuiraa o te ahuaraˈi no roto mai i te mahanahanaraa o te palaneta? O te inoraa anei o te tuhaa ozone, inaha, mea atâata roa ˈtura ia faaea i raro aˈe i te mau hihi ultraviolets ino roa o te mahana? O te maraa-taue-raa anei o te huiraatira, o te apitihia ˈtu i te tahi atu mau fifi o te fenua nei, mai te veve e te ohipa taparahi taata? Aore ra o te manaˈo anei no te haamouraa o te mau mirioni rahiraa taata i roto i te hoê tamaˈi atomi, e te feia e ora mai i teie ati rahi, e pohe ïa i te toetoe, te poia aore ra te mau hihi taero?

I muri aˈe i te faataaraa i teie e te tahi atu mau tupuraa, teie ta te vea Scientific American i faaoti i te matahiti 1989: “O te tupuraa o te tamaˈi atomi mau â te ati rahi roa ˈˈe e haamǎtaˈu ra (...) i te oraraa o te huitaata nei.” O te tamaˈi atomi anei ïa te uiraa rahi i mua ia tatou nei?

Te uiraa rahi

Maoti te tauiraa o te huru tupuraa politita mai te matahiti 1989 mai â, e au ra paha e ua iti rii mai te manuïaraa ia tupu te tamaˈi atomi. Noa ˈtu râ te reira, ia vai noa mai te mau mauhaa tamaˈi atomi, e riro ratou ei haamǎtaˈuraa ino mau no te huitaata nei. Teie râ, te faaite ra te tahi faahitiraa i roto i te buka 1990 Britannica Book of the Year i te tahi atu fifi. Ia au i teie buka, hau atu i te 230 mirioni taata, e feia tiaturi ore ïa i te Atua. Te faaite ra te tahi atu mau parau e te hutihia nei te tahi atu mau mirioni taata e te mau haapiiraa philosopho no te pae Hitia o te râ o te farii ra i te manaˈo e aita e Poiete. Hau atu, noa ˈtu e e mau hanere mirioni feia teie e tiaturi nei i te hoê Poiete, mea taa ê roa to ratou mau manaˈo no nia ia ˈna. E i roto e rave rahi mau tupuraa, te faaino nei ta ratou mau ohipa i te Atua o ta ratou e faahua haamori ra. — Petero 2, 2:1, 2.

Mai te peu e te vai ra te Atua — e te vai mau ra hoi oia — ua ô iho â ïa oia i roto i te tahi uiraa rahi i teie mahana. No te aha oia i poiete ai i te taata? Eaha ta tatou hopoia i mua ia ˈna? Eaha to ˈna huru ia ite oia i te taata ia vavahi i te fenua? E mea nafea oia ia pahono i te faatihaehaeraa e tupu ia patoi te feia e rave rahi i te tiaturi ia ˈna e i te auraro i to ˈna hinaaro? Inaha, te uiraa rahi i mua ia tatou tataitahi, oia ïa: E farii anei tatou aore ra e patoi anei tatou i te mana arii o te Atua, ‘o IEHOVA to ˈna iˈoa’? — Salamo 83:18.

No hea mai te ao taatoa nei

Oia mau, no te feia tiaturi ore i te Atua, aita iho â ïa ta tatou e hopoia i mua ia ˈna. No te taata râ o te hiˈo ma te manaˈo afaro i te hohoˈa e te haviti o to tatou palaneta, e tia iho â ia ˈna ia farii e te vai ra te hoê Taata maramarama o tei opua maite i te reira. Mea papu maitai e, i to ratou tamataraa i te faataa i te mau mea hanahana o te natura e haaati ra ia tatou, ua vaiiho te rahiraa o te mau aivanaa i te Atua i te hiti. Ei hiˈoraa, e rave rahi teie e parau nei e ua haamata te ao taatoa nei i te tupu mai te hoê huˈa iti nainai aˈe i te upoo o te hoê pine e tae roa mai i to ˈna faito i teie mahana, e ua tupu noa mai te reira, na roto i te hoê tupuraa matapo noa, e aita roa ˈtu e Poiete. Teie râ, i muri aˈe i to ˈna faataaraa i te hoê tatararaa apî farii-maitai-hia no nia i te haamataraa o te ao taatoa nei, ua farii te taata tuatapapa i te huru o te mau taoˈa ra o Hanbury Brown i roto i ta ˈna buka Te paari o te ite aravihi (beretane) e: “No te rahiraa o te taata, e riro paha teie manaˈo mai te hoê parau hauti maoti hoi i te hoê tatararaa.” Te faaoti ra te orometua haapii Brown i te na ôraa e “e mau miterio rahi” anaˈe “te haamataraa e te tumu o te ao nei” ta te ite aravihi e ore e nehenehe e faataa.

Ua faaite te mau aivanaa e mea piri roa te taoˈa e te ito e e nehenehe te taoˈa e tauihia e e riro mai ai ei ito, e te ito ra ei taoˈa. Mai tei itehia i roto i te mau paainaraa atomi, e nehenehe te hoê pueraa taoˈa iti roa e horoa mai i te ito puai roa. Teihea roa ïa te pu o te ito rahi e vai ra i roto i na fetia e 100 000 mirioni o to tatou nei pueraa fetia, e to roto atoa i na hau atu i te 1 000 mirioni pueraa fetia e vai ra i roto i te ao o te reva teitei ite-mata-hia?

Te na ô ra te Bibilia e: “A nânâ na i to outou mata i nia; a hiˈo ai i tei hamani i te reira, te aratai ra oia i taua mau nuu ra i rapae ma te taiohia; e ua mairi-anaˈe-hia to ratou mau iˈoa e ana: no to ˈna ra puai rahi e te mana rahi ra, i ore ai te hoê i toe ai i te haere mai.” O vai teie? Ua tapao te Bibilia i te pahonoraa: “O vau o Iehova, o to ˈu ïa iˈoa, e ore au e horoa i to ˈu ra hanahana no vetahi ê.” — Isaia 40:26; 42:5, 8.

Te faaore ra te tatararaa e na ô ra e ua fa noa mai te fenua e te toea o te ao atoa nei ma te tumu ore, i te hanahana te tia ia horoahia na te Poiete, te Atua ra o Iehova (Apokalupo 4:11). E tatara atoa teie manaˈo i te hinaaro e haapao maitai i te fenua. Ahiri e ua taa maitai i te taata e e tia ia ratou ia amo i te hopoia i mua i te Atua no ta ratou ohipa atoa e rave i nia i ta ˈna poieteraa, eita e ore e e haapao maitai aˈe ratou i te mau fifi mai te haaviiviiraa i te fenua, te faainoraa i te tuhaa ozone e te mahanahanaraa o te palaneta.

No hea mai te ora

Teie te tahi uiraa: Mea nafea te ora i te haamataraa? Te haapiihia nei te taata e ua fa mai te ora, aita râ te Atua to roto i teie ohipa. Teie râ, te patoi nei teie manaˈo i te hoê ture aivanaa papu maitai. I te hoê tau, ua tiaturihia e no roto mai te mau manumanu i te tutae puaatoro, te mau toe i te iˈo ino, e te mau iore ra no roto mai ïa i te vari. I te senekele i mairi aˈenei atoa, e haapii na te mau aivanaa e no roto mai te mau manumanu iti i te taoˈa ora ore. Ua haapapu râ o Redi, o Pasteur e te tahi atu mau aivanaa e mea hape roa teie mau manaˈo. Te na ô ra te hoê buka parau paari (The World Book Encyclopedia, neneiraa 1990) e: “I muri aˈe i te mau tamataraa a Pasteur, ua farii te rahiraa o te feia maimi no nia i te ora i te manaˈo ra e no roto mai te ora i te tahi atu ora.”

Teie râ, te faataa nei te mau aivanaa e i mutaa ihora, mea taa ê roa te mau ohipa. Te parau nei ratou e ua fa taue noa mai te mau taoˈa tahi ora matamua ma te tumu ore mai roto mai i te hoê anoiraa ora ore o ta ratou e pii ra te anoiraa matamua, te vai ra i roto te mau taoˈa atoa e titauhia ia tupu te ora. “Maoti te manuïaraa matapo, e te manuïaraa anaˈe, i riro mai ai te anoiraa matamua ei taata,” o ta Christian de Duve ïa e faaite ra i roto i te buka “E haere anaˈe e mataitai i te taoˈa tahi ora” (beretane).

No nia i te Atua, te na ô ra te Bibilia e: “Tei ia oe hoi te tumu o te ora.” (Salamo 36:9). Ua tuea maitai teie parau e te mea tei itehia — oia hoi e nehenehe noa te ora e na roto mai i te tahi atu ora e vai ê na ra. Mea au aˈe râ na te ite aravihi ia faariro i te hoê o te mau ǒ faufaa rahi a te Atua oia hoi te ora, mai te hoê ohipa o tei tupu noa mai, e no reira, e rave rahi mau taata o te ore roa ˈtu e manaˈo ra e e hopoia ta ratou i mua i te Atua. Te ofati nei ïa ratou i te mau ture a te Atua, ma te haavî te tahi e te tahi, te eiâraa e te taparahiraa i te tahi e te haamâuˈa-rahi-raa i te moni, te taime e te ite no te hamani i te mau mauhaa tamaˈi o te haapohe i te taata ma te aravihi riaria mau.

Te pahonoraa i te uiraa

Taa ê noa ˈtu i te feia Atua ore e te feia e titau ra e ia tatara-apî-hia te mau tiaturiraa e te mau haapiiraa faaroo tumu, eita e taiohia te rahiraa feia e patoi nei i te mana arii o te Atua. E rave rahi feia i teie mahana teie e parau nei e te tiaturi nei ratou i te Atua, e hau atu i te 1 700 mirioni e parau nei e e mau kerisetiano ratou. E rave rahi senekele to te mau ekalesia a te amuiraa faaroo kerisetiano tiaoro-noa-raa i te Atua i roto i ta ratou mau oroa. Teie râ, eaha mau na te tiaraa o teie mau 1 700 mirioni “kerisetiano” no nia i te uiraa o te mana arii o te Atua?

Ua haapapu te feia tataitahi e te mau nunaa taatoa i to ratou tâuˈa ore na roto i te auraro-ore-raa i te mau faaueraa a te Atua. Ua faaino te mau nunaa o tei parau e e kerisetiano ratou i te Atua na roto i te raveraa i te mau ohipa hamani ino, oia atoa hoi na tamaˈi ino roa ˈˈe e piti o te aamu taata nei — e ua haamaitai te mau upoo faaroo “kerisetiano” o na pae e piti atoa ra i teie mau tamaˈi! Na roto i teie huru haavare, ua faahapa roa ratou i te Atua. Mai ta te Bibilia e parau ra: “Te parau nei ratou e ua ite i te Atua, area ta ratou ohipa, te parau nei ïa aore i ite ia ˈna.” — Tito 1:16.

Teie râ, “e ore” te Atua “e tahuna i ta ˈna iho”. (Timoteo 2, 2:13.) E tae mai te tau i reira oia e faaafaro ai i te mau tuhaa atoa o teie uiraa no nia i te mana arii ia au maite i ta ˈna iho opuaraa: “E ite hoi [te mau nunaa] e, o vau o Iehova.” (Ezekiela 38:23). No te aha râ e haamaoro ai? Nafea teie uiraa e hope roa ˈi i te pahonohia? E nafea outou ia rave i te faaotiraa tia i roto i teie ohipa faufaa roa ˈˈe?

[Faaiteraa i te fatu o te hohoˈa i te api 2]

Hohoˈa i muri mai i nia i te api matamua: U.S. Naval Observatory photo

[Faaiteraa i te fatu o te hohoˈa i te api 3]

Hohoˈa i muri mai: U.S. Naval Observatory photo