Hutihutiraa i te sitona i te Sabati

Reva ˈtura Iesu e ta ˈna mau pǐpǐ i te pae apatoerau i Galilea. Ua tae mai te tau o te matahiti ua paari te sitona i roto i te mau faaapu. No te poia, hutihuti aˈera te mau pǐpǐ i te sitona e amu atura. E Sabati râ taua mahana ra, e te hiˈopoa mai ra te mau Pharisea i ta ratou e rave ra.

A haamanaˈo na e i hinaaro aˈenei te tahi mau ati Iuda i Ierusalema e haapohe ia Iesu, ta ratou i pari i te ofatiraa i te Sabati. Faahapa maira te mau Pharisea i te mau pǐpǐ no ta ratou i rave: “A hiˈo na! Te rave nei ta oe mau pǐpǐ i tei opanihia ia rave i te Sabati.”—Mataio 12:2.

No te mau Pharisea, te taata o te hutihuti e o te orooro i te sitona i roto i te rima no te amu, te ooti ra e te taataahi ra ïa oia i te sitona. (Exodo 34:21) No ta ratou tatararaa etaeta i te parau o te ohipa, ua teimaha roa ˈtu â te Sabati. Te tanoraa râ, e mahana oaoa e e faaitoitoraa i te pae varua. Ua faahapa Iesu i to ratou manaˈo tano ore na roto i te tahi mau hiˈoraa no te faaite e aita roa ˈtu te Atua ra o Iehova i haamau i ta ˈna ture o te Sabati ia faaohipahia mai tera te huru.

Te hiˈoraa matamua ta Iesu i horoa, no Davida ïa e to ˈna mau taata. No to ratou poia, haere aˈera ratou i te tiahapa e amu atura i te pane pûpûhia. O te mau tahuˈa anaˈe te nehenehe e amu i te reira, tei tatara-aˈena-hia mai mua mai i te aro o Iehova e tei monohia ˈtu i te pane apî. Aita râ Davida e to ˈna mau taata i faautuahia i te amuraa i taua mau pane ra.—Levitiko 24:5-9; Samuela 1, 21:1-6.

Teie te piti o te hiˈoraa ta Iesu i horoa: “Aita atoa anei outou i taio i roto i te ture a Mose e i te Sabati e rave te mau tahuˈa i te ohipa i te hiero e aore ratou i hara?” Te hinaaro ra oia e parau e i te Sabati atoa, e tupai te mau tahuˈa i te animara no te tusia e e rave ratou i te tahi atu â mau ohipa i te hiero. Na ô atura Iesu: “Te parau atu nei râ vau e to ǒ nei te hoê taata tei hau aˈe i te hiero.”—Mataio 12:5, 6; Numera 28:9.

Faahiti faahou ihora Iesu i te mau Papai no te faataa i to ˈna manaˈo: “Ahiri râ outou i taa i te auraa o teie parau: ‘O te aroha hamani maitai ta ˈu e hinaaro eiaha te tusia,’ e ore ïa outou e faahapa i te feia hapa ore.” Na ô atura oia: “E Fatu hoi te Tamaiti a te taata nei no te Sabati.” Te faahiti ra Iesu i ta ˈna Faatereraa arii hoê tausani matahiti a muri aˈe o te faatupu i te hau.—Mataio 12:7, 8; Hosea 6:6.

Ahia ˈtura maororaa to te huitaata faarururaa i te faatîtîraa teimaha a Satani, e te haavîraa e te tamaˈi e uˈana noa ˈtu ra. Mea taa ê roa râ i raro aˈe i te faatereraa a te Mesia, oia hoi te Sabati rahi, o te horoa mai i te hau ta tatou e tiai ru nei e e hinaaro mau â!