Iesu, to ˈna oraraa e ta ˈna taviniraa

Te huhuti ra ratou i te sitona i te mahana sabati

FATATA roa Iesu e ta ˈna mau pǐpǐ i te faarue mai ia Ierusalema no te hoˈi atu i Galilea. Tei te tau uaaraa tiare tatou i roto i te mau faaapi sitona e inaha ua paari hoi te sitona. Te poia ra te mau pǐpǐ. Te huhuti ra hoi ratou i te tahi maa sitona e te amu ra. I te hoê râ mahana sabati, eita ta ratou ohipa e ore i te itehia mai.

I Ierusalema, ua imi te mau upoo faatere haapaoraa i te taparahi ia Iesu ma te parau e aita oia e haapao ra i te mahana sabati. Teie atura ïa ta te mau Pharisea pariraa ia Iesu: “Inaha, te rave nei ta oe mau pǐpǐ i te mea au ore i te ture ia rave i te sabati.”

Te parau nei hoi te mau Pharisea e ia ofati te hoê taata i te sitona e a uu atu ai i roto i to ratou rima e a amu atu ai, mai te huru ra ïa e te tupaihia ra te huero. Ua faariro aˈera râ ta ratou huru faaauraa i te ohipa i te mahana sabati ei hopoia teimaha mau, inaha e taime oaoa hoi te reira e te faaitoitoraa i te pae varua. No reira ˈtura ïa o Iesu e horoa mai ai na te mau Pharisea te mau hiˈoraa no roto mai i te mau Papai e faaite maira e e ere roa ˈtu te opuaraa a te Atua ra o Iehova i te faaohiparaa ma te paari mau i Ta ˈna ture no nia i te sabati.

A poia ˈi o Davida e to ˈna mau taata, ta Iesu hoi i parau, ua tapea aˈera ratou i te sekene e ua amu aˈera hoi i te pane e faaitehia ra. Noa ˈtu â ïa e ua iritihia mai te mau pane mai mua ˈtu i te aro o Iehova e ua monohia mai te mea apî, ua faahereherehia hoi te reira na te mau tahuˈa. Teie râ, i roto i taua huru tupuraa nei, aita o Davida e to ˈna mau taata i faautuahia i te mea e ua amu ratou.

Te horoa mairâ o Iesu i teie faahiˈoraa: “Aitâ outou i ite i roto i te ture e te faahapa nei te feia tahuˈa i te sabati i roto i te hiero, e aore i hara?” E, i te mahana sabati atoa, e tamau na te mau tahuˈa, i te hiero, i te uumi i te tahi mau animala e i te rave hoi i te tahi atu mau ohipa no te horoa i te tusia animala. “E faaite papu atu râ vau ia outou, Tei ǒ nei te hoê, e rahi ïa oia i te hiero.”

E i muri iho, te aˈo ra oia i te mau Pharisea i te na ôraa ˈtu e: “Ahiri outou i ite na i te auraa i teie nei maa parau, O te aroha ta ˈu i hinaaro eiaha te tusia, e ore ïa outou e faahapa mai i te feia hara ore.” E ua faaoti aˈera oia e: “O te Tamaiti a te taata nei hoi te Fatu o te sabati.” Eaha hoi ta ˈna e hinaaro ra e parau?

Te faahiti ra hoi oia i te parau no ta ˈna faatereraa hau hoê tausani matahiti. E 6 000 matahiti te maororaa to te huitaata nei vai-noa-raa i raro aˈe i te faatîtîraa teiaha mau a te Diabolo ra o Satani, i raro aˈe te haavîraa puai e te tamaˈi tei riro ei tuhaa no te oraraa i te mau mahana atoa. Taa ê atu, e haamâha te sabati rahi o te Faatereraa a te Mesia i nia i te mau taata, i te mau mauiui atoa e te mau haamauiuiraa atoa. Mataio 12:1-8; Levitiko 24:5-9; Samuela 1, 21:1-6; Numera 28:9; Hosea 6:6.

◆ Eaha te pariraa i parihia i te mau pǐpǐ a Iesu e mea nafea to Iesu pahonoraa mai?

◆ Eaha te hape a te mau Pharisea ta Iesu i faaite mai?

◆ Ua riro Iesu ei “Fatu no te sabati” i roto i tei hea auraa?