Iesu, to ˈna oraraa e ta ˈna taviniraa

Te aˈo nei Iesu i te mau Pharisea

TEIE te haaferuriraa ta Iesu e rave ra: mai te peu e maoti te puai a Satani oia e tiahi ˈi i te mau demoni, ua amahamaha ïa o Satani. “A haamaitai na i te raau, e e haamaitai atoa i te huero; e te na ǒ faahou ra oia e, e aore ra, a faaino i te raau, e e faaino atoa i te huero: te itea nei hoi te raau i te huero.”

E mea maamaa roa ïa ia parau e te faahotu nei Iesu i te hotu maitai, te tiahiraa i te mau demoni, no te mea te tavini nei oia ia Satani. Mai te peu e e hotu maitai te noaa mai, e ere ïa te tumu i te mea ino. Taa ê atu, te haapapu maira te mau hotu ino a te mau Pharisea, ta ratou mau faahaparaa parau maamaa mau e ta ratou patoiraa aita hoi e tumu ia Iesu e mea ino mau â ratou. “E te mau fanauˈa ehidena e, eaha outou te feia ino na e tia ˈi ia parau i te parau maitai? no te î o te aau hoi i parau ai te vaha.”

I te mea e e itehia na roto i ta tatou mau parau te huru mau o to tatou mafatu, e nehenehe tatou e haavahia na roto i ta tatou mau parau. Oia mau te haapapu ra o Iesu e: “Ia ite râ outou, E e haavahia te taata i te mau parau faufaa ore atoa ta ratou e parau ra ia tae i te mahana haavaraa. E tiahia hoi oe i ta oe parau, e e faahapahia oe i ta oe parau.”

Noa ˈtu te mau ohipa semeio atoa i ravehia e Iesu, ua faahiti te mau papai parau e te mau Pharisea i teie nei aniraa: “E Rabi, te hinaaro nei matou i te tahi semeio ia oe.” Noa ˈtu aita taua mau taata no Ierusalema i ite roa ˈtu i taua mau semeio ra, te vai ra râ te mau haapapuraa iteahia e o te ore roa e nehenehe e patoi e te tupu mau ra te reira. No reira Iesu e pahono atu ai i te mau upoo faatere ati iuda e: “E titau â te ui taata iino e te faaturi i te semeio; aita râ e semeio e horoahia ˈtu, maori râ te semeio i te peropheta ra ia Iona.”

Ua haapapu Iesu i ta ˈna parau i te na ôraa e: “Mai ia Iona hoi e toru o ˈna rui e toru hoi ao i roto i te opu o te iˈa rahi ra, e riro atoa i te toru to te Tamaiti a te taata nei rui e e toru hoi ao i raro i te repo.” I muri aˈe to ˈna horomiiraahia e te iˈa rahi, ua matara maira o Iona e mai te huru ra ïa e ua faatia-faahou-hia oia; ua tohu atoa o Iesu iho e e pohe oia e e tia faahou mai oia i te toru o te mahana. Teie râ, i te taime oia e faatia-faahou-hia ˈi, i muri iho, eita iho â te mau upoo faatere ati iuda e tâuˈa i “te tapao no nia ia Iona”.

No reira ˈtura, te haapapu nei Iesu e e tia faahou mai te mau taata no Nineve tei tatarahapa i to Iona pororaa ˈtu ia ratou i te mahana haavaraa e e faahapa ratou te mau ati Iuda o te ore e tâuˈa ra ia ˈna. Te faatupu atoa ra oia i te hoê faaauraa parau e te Arii vahine no Seba o tei haere mai mai te hopea o te fenua no te faaroo i te parau paari a Solomona, o tei faahiahia roa i te mea o ta ˈna i ite e ta ˈna i faaroo. “E, inaha, ta Iesu ïa e haapapu ra, e rahi teie ia Solomona.”

E i muri iho, ua horoa oia i te hiˈoraa o te hoê taata e na roto mai te hoê varua faufau ra. Teie nei râ, aita taua taata ra i faaî i te mau vahi e vai ano noa ra i te mau ohipa maitai, e ô atura e hitu na pue varua ino aˈe ia ˈna, e parahi atura i reira. “Oia atoa no teie nei ui taata iino”, ta Iesu ïa e parau ra. Ua tamâhia te nunaa Iseraela e ua itehia aˈera i te orure hau, o te nehenehe e faaauhia i te omuaraa, i te hoê haamataraa o te hoê feruriraa iino. I to ˈna râ faarueraa i te mau peropheta a te Atua, ua tapae ïa i to ˈna faito teitei a patoi ai te nunaa i te Mesia iho, te faaite ra ïa te reira e ua rahi aˈe to ˈna huru ino i to te haamataraa.

Te tamau noa ra Iesu i te parau, a haere mai ai to ˈna metua vahine e ta ˈna mau taeae e tei pihai iho ratou i te nǎnǎ rahi taata. E ua parau atura te hoê ia ˈna: “Te tia noa aˈera to metua vahine e to mau taeae i rapae au, te hinaaro ra i te parau mai ia oe.”

“O vai to ˈu metua vahine, e o vai hoi to ˈu mau taeae?” ani atura o Iesu. Ma te tohu i to ˈna rima i ta ˈna mau pǐpǐ ra, ua parau atura oia e: “A hiˈo na i to ˈu metua vahine e i to ˈu mau taeae o tei faaroo e ua haapao i te Parau a te Atua.” Na roto i taua haerea ra te faaite ra o Iesu noa ˈtu e mea puai roa te taairaa e vai ra i rotopu ia ˈna e to ˈna utuafare fetii, mea etaeta atu â te taairaa e vai ra i rotopu ia ˈna e ta ˈna mau pǐpǐ. Mataio 12:33-50; Mareko 3:31-35; Luka 8:19-21.

◆ No te aha e nehenehe ai e parau e, no nia iho â râ i te mau Pharisea e, e ere roa ˈtu to ratou tumu e ta ratou hotu i te mea maitai?

◆ Eaha mau na “te tapao no nia ia Iona”, e ua faaruehia te reira i roto i teihea auraa?

◆ I roto i teihea tuhaa to te nunaa Iseraela riroraa mai mai te taata na roto atu te hoê varua ino i te matara mai?

◆ Mea nafea to Iesu haafaufaaraa i te mau taairaa etaeta mau i rotopu ia ˈna e ta ˈna mau pǐpǐ?