Te haapiiraa Iona no nia i te aroha o Iehova

UA HOROA Iehova i te hoê hopoia na ta ˈna peropheta ra o Iona. Te tau oia hoi te senekele iva hou to tatou tau, e o Ieroboama II te faatere ra i Iseraela. No Gata-hephera o Iona, te hoê oire ati Zebuluna. (Iosua 19:10, 13; Te mau arii 2, 14:25) Te tono ra te Atua ia Iona i Nineve, te oire pu no Asura, hau atu i te 800 kilometera i te pae apatoerau hitia o te râ o to ˈna oire. E tia ia ˈna ia faaara i to Nineve e e haamouhia ratou e te Atua.

Ua manaˈo paha Iona mai teie e: ‘No te aha vau e haere ai i taua oire ra e taua nunaa ra? Aita hoi ratou i pûpû ia ratou no te Atua. Aita hoi teie mau taata hiaai toto no Asura, i fafau i te faufaa e Iehova mai ia Iseraela atoa ra. Inaha, e faariro paha teie nunaa taata ino i ta ˈu mau faaararaa ei haamǎtaˈuraa e e haru paha ratou ia Iseraela! Eiaha vau! Eita vau e haere. E horo vau i Iopa e e fano vau na te tahi aˈe pae—tae noa ˈtu i Taresisa, i te tahi roa ˈˈe pae o te Miti Rahi. Ta ˈu ïa e rave!’—Iona 1:1-3.

Te fifi atâta i nia i te miti!

Aita i maoro ua tapae Iona i Iopa i te pae no Mediteranea. Ua aufau atura oia i to ˈna tarahu pahi e ua paiuma i nia i te pahi e fano ra i Taresisa, tei pinepine i te parauhia e tei te fenua Paniora, hau atu i te 3 500 kilometera i te pae tooa o te râ no Nineve. I te tereraa te pahi, ua haere atura te peropheta, tei rohirohi, i raro i te hâti e varea ˈtura i te taoto. Aita i maoro roa i muri iho, ua tuu maira Iehova i te hoê vero rahi i te miti ra, e ua tau atura te mau ihitai atoa, e riaria ra, i to ratou iho atua no te ani i te tauturu. No te mea hoi e te opaopa ra e te taueue rahi roa ra te pahi, ua hurihia te mau tauihaa i roto i te miti no te haamâmâ i te pahi. E au ra râ e e tomo iho â te pahi, e ua faaroo atura Iona i te piiraa te tapena ma te riri e: “Eaha ta oe, e tena na taata taoto, a tia, a tau i to Atua; peneiaˈe o te manaˈo mai te Atua ia tatou, ia ore tatou ia pohe.” Ua tia maira Iona e haere atura i nia i te tahua.—Iona 1:4-6.

“A haere mai, e tuu tatou i te kelero,” o ta te mau ihitai ïa i parau, “ia ite tatou i te hara i roohia ˈi tatou i teie nei ino.” Ua riro atura te kelero ia Iona. A feruri na i to ˈna peapea i to te mau ihitai parauraa e: “A faaite mai na oe ia matou i te hara i roohia ˈi tatou i teie nei ino? Eaha to oe na toroa? e mai hea roa mai oe na? o vai to oe na fenua? e no te hea nunaa oe?” Ua parau atura Iona e e ati Hebera o ˈna o te haamori “ia Iehova, i te Atua o te raˈi ra” e te mǎtaˈu nei oia i “[T]ei hamani i te tai e te fenua atoa nei.” Ua tuuhia mai te vero rahi i nia ia ratou no te mea te maue ê nei o ˈna i mua i te aro o Iehova maoti râ i te afai ma te auraro i te poroi a te Atua i Nineve.—Iona 1:7-10.

Ua ani atura te mau ihitai e: “E nahea ˈtu matou ia oe, ia mania te miti ia matou nei?” I te mea hoi e te rahi roa ˈtura te fetoitoi o taua miti ra, parau atura Iona e: “E rave mai outou ia ˈu, e huri i raro i te tai; ei reira e mania ˈi te tai ia outou: ua ite hoi au e, no ˈu i roohia ˈi tatou i teie nei vero rahi.” Aita ratou i hinaaro e huri i te tavini o Iehova i roto i te miti e e pohe atu ai oia, ua tamata te mau taata i te tapiri te pahi i tatahi. No to ratou manuïa ore, ua pii atura te mau ihitai e: “Te pure atu nei matou ia oe, e Iehova, te pure atu nei matou ia oe, eiaha matou ia pohe i te hara a teie nei taata, eiaha ei toto hara ore e haiohia mai i nia ia matou nei, ua rave hoi oe, e Iehova, i ta oe i hinaaro ra.”—Iona 1:11-14.

I roto i te miti!

Ua huri atura te mau ihitai ia Iona i raro i te miti. A paremo noa ˈi oia i raro i te tai e fetoitoi ra, haamata ˈtura te miti i te mania. I to ratou iteraa i te reira, ‘mǎtaˈu roa ˈtura te mau taata ia Iehova, e ua pûpû i te hoê tusia na ˈna e ua faatupu ihora i te euhe.’—Iona 1:15, 16.

A tapoˈi ai te miti ia Iona, e mea papu e ua pure o ˈna. I muri iho, te ite ra o ˈna ia ˈna i te heeraa na roto i te hoê vahi mǎrû e tae atu ai i roto i te hoê apoo rahi. Te mea maere, e nehenehe â o ˈna e huti i te aho! A tataratara ˈi Iona i te remu i tafifi i nia i to ˈna upoo, ite atura Iona e tei roto oia i te hoê vahi taa ê mau. No te mea e “ua haapaohia e Iehova te iˈa rahi ei horomii ia Iona. E i roto hoi Iona i te opu o taua iˈa ra e e toru rui, e toru hoi ao.”—Iona 1:17.

Te pure uˈana a Iona

I roto i te opu o te iˈa rahi ra, e taime to Iona no te pure. Ua tuea rii te tahi mau taˈo o ta ˈna pure e vetahi mau salamo. Ua papai Iona i muri iho i ta ˈna mau pure o te faaite ra i to ˈna hepohepo e te peapea. Ei hiˈoraa, ua riro te opu o te iˈa no ˈna mai ia hade, to ˈna apoo hunaraa. No reira oia i pure ai e: “I tiaoro atura vau i to ˈu nei ati, ia Iehova, e ua faaroo mai oia ia ˈu; i roto i te opu o hade to ˈu tiaoro-hua-raa ˈtu, e ua faaroo mai oe i tau reo.” (Iona 2:1, 2) Te faaite atoa ra e piti Sire a te Moluta—peneiaˈe tei himenehia e te mau ati Iseraela o te haere ra i Ierusalema no te mau oroa matahiti—i te hoê â mau manaˈo.—Salamo 120:1; 130:1, 2.

Ma te feruri i nia i to ˈna paremoraa i raro i te miti, ua pure Iona e: “Ua huri oe [Iehova] ia ˈu i raro i te moana, i ropu mau i te tai ra; ua haaatihia vau e te moana: ua na nia mai ia ˈu te mau vavea e te mau are atoa na oe ra.”—Iona 2:3; a faaau e te Salamo 42:7; 69:2.

Ua mǎtaˈu Iona e e erehia o ˈna i te farii maitai a te Atua no to ˈna faaroo ore e eita oia e ite faahou i te hiero o te Atua. Ua pure oia e: “Ua parau ihora vau, Ua tuua-ê-hia vau i mua i to aro na; e hiˈo faahou râ vau i to hiero moˈa ra.” (Iona 2:4; a faaau e te Salamo 31:22.) E au ra e e mea ino roa te huru tupuraa o Iona i parau ai oia e: “Ua haaati-roa-hia vau e te miti e mai pohe au: ua puni roa vau i te moana; e ua fifi te rimu miti i nia i tau upoo.” (Iona 2:5; a faaau e te Salamo 69:1.) A feruri na i te fifi o Iona, no reira o ˈna i na ô faahou ai e: “Haere roa ˈtura vau i raro i te tumu o te mau mouˈa [i roto i te iˈa]; te fenua e to ˈna mau teˈa [mai to te hoê apoo hunaraa] tei haaati tamau roa ia ˈu ra: ua hopoi maira oe i to ˈu ora [i te toru o te mahana] i te pohe nei, e tau Atua, e Iehova e.”—Iona 2:6; a faaau e te Salamo 30:3.

Noa ˈtu e tei roto o ˈna i te opu o te iˈa, aita Iona i manaˈo e: ‘Ua hepohepo roa vau e eita ta ˈu e nehenehe e pure.’ Aita râ, ua pure oia e: “A tarapape ai tau [“nephe,” MN] i roto ia ˈu ra [fatata i te pohe], ua manaˈo ihora vau ia Iehova [i roto i te faaroo, mai Tei mau na te mana e te aroha faito ore]: e ua tae tau pure ia oe, i to hiero moˈa ra.” (Iona 2:7) Mai to ˈna hiero i te raˈi ra, ua faaroo te Atua ia Iona e ua faaora mai ia ˈna.

I roto i ta ˈna pure faaotiraa te na ô ra Iona e: “Te feia i haapao i te mea faufaa ore haavare ra [ma te tiaturi i te mau idolo pohe o te mau atua haavare], ua faarue ratou i te tumu o to ratou iho maitai ra [ma te faarue i Tei faaite i teie huru maitai]. E hopoi râ vau i te tusia na oe [te Atua ra o Iehova] ma te haamaitai; ta ˈu hoi i euhe ra [i teie taime aore ra i te tahi atu], o ta ˈu ïa e hopoi. Tei ia Iehova te ora.” (Iona 2:8, 9; a faaau e te Salamo 31:6; 50:14.) Ma te ite e o te Atua anaˈe te nehenehe e faaora mai ia ˈna mai te pohe mai, te faatae ra te peropheta tei tatarahapa (mai te mau arii ra o Davida e o Solomona na mua ˈˈe ia ˈna) i te faaoraraa ia Iehova ra.—Salamo 3:8; Maseli 21:31.

Te auraro o Iona

I muri aˈe i te feruri-rahi-raa e te pure-uˈana-raa, ua faahaerehia mai Iona i rapaeau na roto i te vahi e mea na reira oia i te tomoraa ˈtu. I te pae hopea, ua haapuaihia mai o ˈna i nia i te pae tahatai. (Iona 2:10) No to ˈna mauruuru no to ˈna faaoraraahia mai, ua auraro Iona i te mau parau a te Atua e: “A tia, a haere i taua oire rahi ra i Nineve, a tiaoro atu ai i ta ˈu i faaue atu ia oe na.” (Iona 3:1, 2) Ua haere atura Iona i te oire pu no Asura. I to ˈna iteraa eaha mau taua mahana ra, ite atura oia e ua vai na o ˈna i roto i te opu o te iˈa e toru mahana te maororaa. Ua na roto atu te peropheta i te Anavai Eupharate e ua ati ia ˈna na te pae tooa o te râ, ua tere oia i te pae hitia o te râ na te pae apatoerau no Mesopotamia, ua haere oia i te Anavai Hidekela, e tapae atura i te pae hopea i te oire rahi ra.—Iona 3:3.

Ua tomo atura Iona i roto i te oire rahi no Nineve. Ua haere oia na roto e hoê mahana taatoa e ua na ô atura e: “E piti taau mahana toe e taihitumuhia ˈi Nineve.” Ua horoahia anei ma te semeio ia Iona ra te ite i te reo asura? Aita tatou i ite. Teie râ, noa ˈtu e ua paraparau oia na roto i te reo hebera e na te tahi taata i huri, ua faatupu ta ˈna faaiteraa i te mau faahopearaa maitatai. Ua haamata te mau taata no Nineve i te faatupu i te faaroo i roto i te Atua. Ua faaoti ratou i te haapaeraa maa e ua ahu i te ahu oto, mai te taata rahi roa ˈˈe e tae noa ˈtu i tei iti. Ua tae roa taua parau ra i te arii no Nineve, ua tia aˈera oia mai nia mai i to ˈna terono, ua tatara oia i to ˈna ahu toroa, tapoˈi ihora ia ˈna iho i te ahu oto, e ua parahi ihora oia i roto i te rehu auahi.—Iona 3:4-6.

Auê te maere o Iona e! Ua faatae te arii no Asura i te parau e: “Eiaha roa te taata e te puaa atoa, te nǎnǎ puaatoro e te nǎnǎ mamoe, e tamata noa ˈˈe i te maa, eiaha e amu, eiaha hoi e inu i te pape. Ia tapoˈihia râ te taata e te puaa atoa i te ahu oto; e tiaoro hua ˈtu hoi te taata i te Atua, a fariu ê mai ai ratou atoa i ta ratou parau ino, e te hamani ino o to ratou rima. Peneiaˈe o te fariu te Atua, e o te tatarahapa, a faarue atu ai i to ˈna riri rahi, ia ore tatou ia pohe.”—Iona 3:7-9.

Ua auraro to Nineve i te parau a to ratou arii. I to te Atua iteraa e ua faarue ratou i ta ratou parau ino, ua tatarahapa ihora oia i te ati ta ˈna i parau e e faatae mai oia i nia ia ratou, aita oia i na reira aˈe. (Iona 3:10) No to ratou tatarahapa, haehaa, e te faaroo, ua faaoti Iehova eiaha e haava ia ratou mai ta ˈna i opua.

Te riri o te peropheta

Ua mairi e maha ahuru mahana e aita te haavaraa i tupu i nia ia Nineve. (Iona 3:4) I to ˈna taaraa e eita to Nineve e haamouhia, inoino roa ˈˈera Iona e rahi atura to ˈna riri e ua pure oia e: “E parau atu vau ia oe, e Iehova, e ere anei teie ta ˈu i parau ia ˈu i parahi i to ˈu ra fenua? i horo ai hoi au i Taresisa i mutaaihora; ua ite na hoi au e, e Atua hamani maitai oe e te aroha, e te riri vave ore, e te hamani maitai rahi, e e tatarahapâ oe i te ino. E teie nei, e Iehova, a rave mai oe ia ˈu ia pohe; e mea maitai atura te pohe i te ora.” Pahono atura te Atua na roto i teie uiraa e: “E mea tia ia oe te riri?”—Iona 4:1-4.

No to ˈna riri, reva atura Iona i rapaeau i te oire. Haere atura oia i te pae hitia o te râ, ua hamani oia i te tahi tamǎrû no ˈna i reira e ua parahi ihora i raro aˈe e tae noa ˈtu i te taime e ite ai oia i te hopea o te oire. I te pae o Iehova, no to ˈna aroha ua “faatupu ihora . . . i te hoê kikiuna, tupu aˈera na nia ia Iona, ei tamǎrû i nia i tana upoo, ia ora oia i to ˈna ra ati.” Auê Iona i te oaoa i taua kikiuna ra! Ua tuu maira râ te Atua i te hoê toˈe no te haapau i te kikiuna i te aahiata, e ua haamata aˈera i te maemae. Aita i maoro roa, mǎrô roa ˈtu oia. Ua faatupu atoa te Atua i te hoê mataˈi veavea no te pae hitia o te râ mai. I teie nei te hiti ra te mahana i nia i te upoo o te peropheta, e ua matapoirihia oia. Ua tamau noa oia i te ani e ia pohe oia. E, ua na ô noa Iona e: “E mea maitai ia ˈu te pohe i te ora.”—Iona 4:5-8.

Paraparau mai nei Iehova. Ua ani atura oia ia Iona e: “E mea tia ia oe te riri i te kikiuna nei?” Pahono atura Iona e: “E mea tia ia ˈu te riri, e pohe noa ˈtu.” Ua parau roa ˈtura Iehova i te peropheta e: ‘E hinaaro faaherehere to oe i teie nei kikiuna. E ere hoi i te mea ohipahia aore ra i te mea faatupuhia e oe. Ua tupu mai e ua pohe i te rui hoê.’ Ua haaferuri faahou te Atua ia ˈna e: ‘E eiaha ïa vau e faaherehere i te oire rahi ra o Nineve, hau atu i te 120 000 taata aore i ite e teihea to ratou rima atau e to ratou rima aui; e te puaa atoa hoi e rave rahi?’ (Iona 4:9-11) E mea papu iho â te pahonoraa tia.

Ua tatarahapa Iona e ua ora oia no te papai i te buka bibilia e amo ra i to ˈna iˈoa. Mea nafea to ˈna iteraa e ua mǎtaˈu te mau ihitai ia Iehova, ua pûpû i te hoê tusia Na ˈna, e ua faatupu i te mau euhe? Na roto i to ˈna faauruaraahia e te Atua aore ra na te hoê ihitai paha aore ra te hoê horopatete i faatia ia ˈna i roto i te hiero.—Iona 1:16; 2:4.

‘Te semeio a Iona’

I to te mau papai parau e te mau Pharisea aniraa ia Iesu Mesia i te hoê tapao, ua na ô oia e: “E titau â te ui taata ino e te faaturi i te semeio; aita râ e semeio e horoahia ˈtu, maori râ te semeio i te peropheta ra ia Iona.” Ua na ô faahou Iesu e: “Mai ia Iona hoi e toru o ˈna rui e toru hoi ao i roto i te opu o te iˈa rahi ra, e riro atoa i te toru to te Tamaiti a te taata nei rui e e toru hoi ao i raro i te repo.” (Mataio 12:38-40) E haamata te mau mahana ati Iuda i te toparaa mahana. Ua pohe te Mesia i te mahana pae ahiahi, i te 14 no Nisana, 33 o to tatou tau. Ua tuuhia to ˈna tino i roto i te hoê menema na mua ˈˈe te toparaa mahana i taua mahana ra. Ua haamata te 15 no Nisana i taua rui ra e tae noa ˈtu i te toparaa mahana i te mahana maa, te hitu o te mahana e te mahana hopea o te hebedoma. I taua taime ra i haamata ˈi te 16 no Nisana e tae noa ˈtu i te toparaa mahana o te mahana o ta tatou e pii ra te sabati. No reira, ua pohe e ua tuuhia Iesu i roto i te menema no te hoê area taime i te 14 no Nisana, ua vai noa oia i roto i te menema i te mahana taatoa o te 15 no Nisana, e tae noa ˈtu i te rui o te 16 no Nisana. I te haereraa mai vetahi mau vahine i te menema i te sabati poipoi, ua faatia-ê-na-hia oia.—Mataio 27:57-61; 28:1-7.

E toru mahana to Iesu vairaa i roto i te menema. Ua noaa ïa i to ˈna mau enemi i “te semeio o Iona,” ua na ô râ te Mesia e: “Na to Nineve i te tia-atoa-raa i te haavaraa ra, e faahapa i teie nei ui; i te mea ua tatarahapa ratou i te aˈoraahia e Iona ra; e inaha, e rahi teie ia Iona.” (Mataio 12:41) E parau mau iho â! Ua parahi Iesu Mesia i rotopu i te mau ati Iuda—te hoê peropheta rahi roa ˈˈe ia Iona. Noa ˈtu e ua riro Iona ei semeio tano maitai no te mau taata no Nineve, ua rahi aˈe râ te mana o Iesu i roto i ta ˈna pororaa e mea rahi aˈe ta ˈna mau haapapuraa i ta taua peropheta ra. Aita râ te rahiraa o te mau ati Iuda i tiaturi.—Ioane 4:48.

Ei nunaa, aita te mau ati Iuda i farii ma te haehaa i te Peropheta rahi roa ˈˈe ia Iona, e aita ratou i faatupu i te faaroo i roto Ia ˈna. E to ratou ïa mau tupuna? Ua erehia atoa ratou i te faaroo e te haehaa. Inaha, ua faaite te ohipa pororaa a Iona i Nineve i te taa-ê-raa i rotopu i te mau taata tatarahapa no Nineve e te mau ati Iseraela mârô, o tei ere-rahi-hia i te faaroo e te haehaa.—A faaau e te Deuteronomi 9:6, 13.

E no Iona iho? Ua haapii oia no nia i te aroha rahi o te Atua. Hau atu, na roto i te huru o Iehova i nia i te amuamuraa a Iona no te mea ua tatarahapa to Nineve, e tia ia tatou ia ape i te amuamu ia faaite anaˈe to tatou Metua i te raˈi ra i to ˈna aroha i nia i te mau taata i to tatou nei tau. Oia mau, ia oaoa tatou i te mea e e mau tausani taata teie e huri tia ˈtu nei i nia ia Iehova ra ma te faaroo e ma te mafatu haehaa i te mau matahiti atoa.