Ia haere mai o iesu i roto i te Basileia ma te hanahana

“O te tahi pae i teie nei feia e tia mai nei, e ore ïa e ite i te pohe, e ite ai ratou i te Tamaiti a te taata i te taeraa mai i to ˈna ra basileia.”—MATAIO 16:28.

1, 2. Eaha te ohipa i tupu i muri iti noa ˈˈe i te Penetekose 32 o to tatou tau, e eaha te tapao o taua ohipa ra?

I MURI iti noa ˈˈe i te Penetekose 32 o to tatou tau, ua ite e toru aposetolo a Iesu Mesia i te hoê orama te ore e moehia. Ia au i te faatiaraa i faauruahia, “ua aratai atura Iesu ia Petero, e ia Iakobo, e tana taeae ia Ioane i nia i te hoê mouˈa teitei, o ratou anaˈe ra, e huru ê atura oia i mua ia ratou.”—Mataio 17:1, 2.

² Ua tupu te orama o te faahuru-ê-raa i te hoê taime faufaa roa. Ua faaite atu o Iesu i ta ˈna mau pǐpǐ e e hamani-ino-hia oia e e haapohehia oia i Ierusalema, teie râ, aita ratou i taa i te auraa o ta ˈna mau parau. (Mataio 16:21-23) Ua haapuai te orama i te faaroo o na aposetolo e toru a Iesu, o te faaineine ia ratou no to ˈna poheraa a muri aˈe, e oia atoa no te mau matahiti rohiraa e tamataraa o ta te amuiraa kerisetiano e faaruru atu. E haapiiraa anei ta tatou e nehenehe e huti mai i teie mahana mai taua orama maira? Oia, no te mea te tupu mau nei te faahohoˈaraa o te reira i to tatou nei tau.

3, 4. (a) Eaha ta Iesu i parau e ono mahana na mua ˈˈe te faahuru-ê-raa? (b) A faataa mai e eaha te ohipa i tupu i roto i te faahuru-ê-raa.

³ E ono mahana na mua ˈˈe te faahuru-ê-raa, ua parau atu o Iesu i ta ˈna mau pǐpǐ e: “E tae mai hoi te Tamaiti a te taata ma tana ra mau melahi atoa, e te hanahana o to ˈna ra Metua, ei reira oia e faautua [“maitai,” MN] mai ai i te taata atoa ia au i ta ˈna ra ohipa.” E tupu teie mau parau i “te hopea o [“te faanahoraa o te mau mea,” MN].” Ua na ô faahou o Iesu e: “Oia mau teie ta ˈu e parau atu ia outou nei, O te tahi pae i teie nei feia e tia mai nei, e ore ïa e ite i te pohe, e ite ai ratou i te Tamaiti a te taata i te taeraa mai i to ˈna ra basileia.” (Mataio 16:27, 28; 24:3; 25:31-34, 41; Daniela 12:4) Ua faatupu ïa te faahuru-ê-raa i te mau parau i faahitihia mai nei.

⁴ Eaha mau na râ ta teie na aposetolo e toru i ite? Teie ïa ta Luka i faataa no nia i te ohipa i tupu: “Te pure ra [o Iesu], huru ê atura to ˈna mata, teatea ˈtura to ˈna ahu mai te uira ra. E inaha, te paraparau maira ia ˈna e toopiti pue taata, o Mose e o Elia: i fa mai raua i roto i te [“hanahana,” MN], e ua parau ihora i te poheraa no ˈna, oia i fatata i te pohe i Ierusalema ra.” I muri iho, “te ata maira i te tapoˈiraa mai [i te mau aposetolo], mǎtaˈu aˈera ratou i to ratou ôraa ˈtu i roto i taua ata ra. E te hoê reo maira no roto i taua ata ra, i te na ôraa mai, O tau Tamaiti here teie, a faaroo ia ˈna.”—Luka 9:29-31, 34, 35.

Ua haapuaihia to tatou faaroo

5. Eaha te huru o te aposetolo Petero i muri aˈe i te faahuru-ê-raa?

⁵ Ua faataa aˈena te aposetolo Petero e o Iesu ‘te Mesia, te Tamaiti a te Atua ora ra.’ (Mataio 16:16) Na te mau parau a Iehova mai te raˈi mai i haapapu i te reira, e ua riro te orama no nia i to Iesu faahuru-ê-raahia ei hiˈoraa o te haereraa mai o te Mesia i roto i te Basileia ma te mana e te hanahana, no te haava i te huitaata nei i te pae hopea. Hau atu i te 30 matahiti i muri aˈe i te faahuru-ê-raa, ua papai o Petero e: “E ere hoi ta matou i te fabula i faatupuhia e te paari ra, a faaite atu ai matou ia outou i te mana e te haerea mai o to tatou Fatu ra o Iesu Mesia, ua ite hua râ to matou mata i to ˈna hanahana. I noaa hoi ia ˈna i te Atua Metua ra te haamaitai e te faateitei, a tae mai ai ia ˈna taua reo no roto mai i te anaana rahi ra e, O tau Tamaiti here teie, ua mauruuru roa vau ia ˈna. Ua faaroo matou i taua reo no te raˈi maira, ia matou e oia atoa i nia i te mouˈa moˈa ra.”—Petero 2, 1:16-18; Petero 1, 4:17.

6. Mea nafea te tupuraa te mau ohipa i muri aˈe i te faahuru-ê-raa?

⁶ I teie mahana, te haapuai-atoa-hia nei to tatou faaroo na roto i te mea o ta teie na aposetolo e toru i ite. Parau mau, ua tupu noa na te mau ohipa mai te matahiti 32 o to tatou tau mai â. I te matahiti i muri iho, ua pohe o Iesu e ua faatiahia mai oia, e ua faateiteihia oia i te rima atau o to ˈna Metua. (Ohipa 2:29-36) I te Penetekose o taua matahiti ra, ua fa mai ‘te Iseraela [apî] o te Atua,’ e ua haamata ˈtura te ohipa pororaa, i Ierusalema na mua, e ati aˈe te fenua i muri iho. (Galatia 6:16; Ohipa 1:8) I muri noa iho, ua tamatahia te faaroo o te mau pǐpǐ a Iesu. Ua tapeahia e ua rutuhia te mau aposetolo, no to ratou oreraa e faaea i te pororaa. Aita i maoro, ua taparahihia o Setephano. I muri iho, o Iakobo, o tei ite mata i te faahuru-ê-raa, tei haapohehia. (Ohipa 5:17-40; 6:8–7:60; 12:1, 2) Teie râ, ua ora mai o Petero raua o Ioane no te tavini ia Iehova ma te haapao maitai e rave rahi atu â matahiti te maoro. Inaha, i te hopea o te senekele matamua o to tatou tau, ua faatia o Ioane i te tahi atu mau hiˈoraa orama no nia ia Iesu i roto i te hanahana i nia i te raˈi.—Apokalupo 1:12-20; 14:14; 19:11-16.

7. (a) Anafea te orama o te faahuru-ê-raa i te haamataraa i te tupu? (b) Anafea to Iesu faautua-maitai-raa i vetahi ia au i ta ratou ohipa?

⁷ Mai te haamataraa mai “te mahana o te Fatu ra” i te matahiti 1914 mai â, e rave rahi orama ta Ioane i ite na, tei tupu. (Apokalupo 1:10) Eaha ïa no nia i te ‘taeraa mai o Iesu ma te hanahana o to ˈna Metua,’ o tei faahohoˈahia e te faahuru-ê-raa? Ua haamata teie orama i te tupu i te haamauraahia te Basileia o te Atua i nia i te raˈi i te matahiti 1914 ra. I to Iesu, mai te hoê fetia poipoi, tiaraa mai i nia i te ao taatoa nei ei Arii faaterono-apî-hia, i roto i te hoê auraa parau, te hiti maira ïa te hoê mahana apî. (Petero 2, 1:19; Apokalupo 11:15; 22:16) Ua faautua maitai anei o Iesu i taua taime ra, i vetahi ia au i ta ratou ohipa? E. Te vai ra te hoê haapapuraa puai e i muri noa iho, ua haamata te tia-faahou-raa o te mau Kerisetiano faatavaihia no te haere i nia i te raˈi.—Timoteo 2, 4:8; Apokalupo 14:13.

8. Eaha te mau ohipa e tapao i te tupuraa hopea o te orama o te faahuru-ê-raa?

⁸ Eita râ e maoro roa, e tae mai o Iesu ‘ma ta ˈna hanahana, e te mau melahi atoa,’ no te haava i te huitaata taatoa nei. (Mataio 25:31) I taua taime ra oia e faaite ai ia ˈna ma to ˈna hanahana rahi atoa, e e horoa ˈi na “te taata atoa” i te utua maitai e au no ta ratou ohipa. E fanaˈo te feia e au i te mamoe i te ora mure ore i roto i te Basileia i faaineinehia no ratou, area te feia e au i te puaaniho ra, e rave ïa ratou i “te pohe mure ore.” Auê ïa faahopearaa faahiahia o te tupuraa o te orama o te faahuru-ê-raa!—Mataio 25:34, 41, 46; Mareko 8:38; Tesalonia 2, 1:6-10.

Te mau hoa o Iesu i faahanahanahia

9. E tia anei ia tatou ia tiaturi e e fa tino mai o Mose raua o Elia i pihai iho ia Iesu i roto i te tupuraa o te orama o te faahuru-ê-raa? A faataa mai na.

⁹ E ere o Iesu anaˈe tei roto i te faahuru-ê-raa. Ua itehia o Mose raua o Elia i pihai iho ia ˈna. (Mataio 17:2, 3) Ua fa tino roa mai anei raua? Aita, no te mea ua pohe aˈena nau taata toopiti, e ua taoto raua i roto i te repo a tiai noa ˈi te tia-faahou-raa. (Koheleta 9:5, 10; Hebera 11:35) E fa mai anei raua e o Iesu, ia haere mai oia ma te hanahana i nia i te raˈi? Eita, no te mea ua ora na o Mose raua o Elia hou a tatarahia ˈi te tiaturiraa no te taata e haere i nia i te raˈi. E fanaˈo raua i te “tia-faahou-raa to . . . te feia parau-tia” i nia i te fenua nei. (Ohipa 24:15) No reira, e faraa taipe to raua i roto i te orama o te faahuru-ê-raa. E taipe ïa no te aha?

10, 11. O vai ta Elia e ta Mose e faahohoˈa ra i roto i te mau tupuraa taa ê?

¹⁰ I roto i te tahi atu mau hiˈoraa, e mau taipe o Mose raua o Elia. Ei arai no te faufaa a te Ture, ua faahohoˈa o Mose ia Iesu, te Arai o te faufaa apî. (Deuteronomi 18:18; Galatia 3:19; Hebera 8:6) Ua faahohoˈa o Elia ia Ioane Bapetizo, o tei na mua ˈtu i te Mesia. (Mataio 17:11-13) Hau atu, i roto i te mau irava tapiri o te Apokalupo pene 11, te faahohoˈa ra o Mose raua o Elia i te toea faatavaihia i te tau hopea. Mea nafea tatou i te iteraa i te reira?

¹¹ E rave na tatou i te Apokalupo 11:1-6. I te irava 3, te taio nei tatou e: “Na ˈu e poroi i na [“ite,” MN] toopiti na ˈu ra, ia tohu raua ma te ahu i te ahu paau, e ia hoê aˈe tausani, ia piti hanere, e ia ono hoi ahuru i te mahana.” Ua tupu teie parau tohu i nia i te toea o te mau Kerisetiano faatavaihia i te tau o te Tamaˈi Rahi Matamua.a No te aha e piti ite? No te mea te tuea ra te mau ohipa ta te toea faatavaihia e rave ra, i te pae varua, e ta Mose raua o Elia i rave. Te na ô ra te mau irava 5 e te 6 e: “Ia rave ino mai te hoê ia raua [na ite toopiti] ra, te puroro atura te auahi no roto i to raua vaha, e pau atura to raua enemi: e ia rave ino mai te hoê ia raua ra, e na reirahia oia e pohe roa ˈtu. E mana to raua ia opani i te raˈi, e eiaha te ûa ia mairi mai i to raua mau mahana tohuraa ra: e e mana hoi to raua i te mau pape ra ia faariro ei toto, e ia tairi i te fenua i te mau pohe atoa nei ia hinaaro raua ra.” No reira, te faahaamanaˈohia maira ia tatou i te mau semeio i faatupuhia e Elia raua o Mose.—Numera 16:31-34; Te mau arii 1, 17:1; Te mau arii 2, 1:9-12.

12. I roto i te faahuru-ê-raa, o vai tei faahohoˈahia e Mose raua o Elia?

¹² No reira, o vai ta Mose e ta Elia e faahohoˈa ra i roto i te faahuru-ê-raa? Te na ô ra o Luka e ua fa mai raua i pihai iho ia Iesu “i roto i te [“hanahana,” MN].” (Luka 9:31) Papu maitai, te faahohoˈa ra raua i te mau Kerisetiano i faatavaihia e te varua moˈa ei “feia tufaa” e o Iesu, e o tei fanaˈo i te tiaturiraa faahiahia e “faahanahana-apipiti-hia” e o ˈna. (Roma 8:17, MN) I pihai iho atoa te feia faatavaihia i faatiahia mai, ia Iesu ia haere mai oia ma te hanahana o to ˈna Metua no te ‘faautua maitai i te taata atoa ia au i ta ˈna ra ohipa.’—Mataio 16:27.

Te mau ite mai ia Mose e ia Elia

13. Eaha te mau tuhaa faahiahia e faataa ra ia Mose e ia Elia ei mau taipe tano maitai no te feia tufaa faatavaihia a Iesu, o te faahanahanahia e o ˈna?

¹³ Te vai ra te mau tuhaa faahiahia e faataa ra ia Mose e ia Elia ei mau taipe tano maitai no te feia tufaa faatavaihia a Iesu. Ua tavini na o Mose raua o Elia ei mau vea na Iehova e rave rahi matahiti te maoro. Ua ririhia raua toopiti e te hoê taata faatere. I te taime a hinaaro ai raua i te tauturu, na te hoê utuafare ê i haapao ia raua tataitahi. Ua tohu raua ma te mǎtaˈu ore i mua i te mau arii, e ua tia ˈtu raua ma te aueue ore no te patoi i te mau peropheta haavare. Ua ite roa o Mose raua o Elia i te mau faaiteraa no nia i te mana o Iehova i nia i te Mouˈa no Sinai (pii-atoa-hia Horeba). Ua nomino raua toopiti i te mono no raua i te pae hitia o te râ o Ioridana. E i te tau o Mose (e o Iosua) raua o Elia (e o Elisaia), e rave rahi roa ˈˈe semeio tei ravehia, taa ê atu i tei faatupuhia i te tau o Iesu.b

14. Mea nafea to te feia faatavaihia taviniraa ei mau vea na Iehova, mai ia Mose e ia Elia?

¹⁴ Aita anei teie mau mea atoa e faahaamanaˈo maira ia tatou i te Iseraela o te Atua? Oia mau. Ua na ô o Iesu i ta ˈna mau pǐpǐ haapao maitai e: “E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [varua moˈa]; ma te haapii atu ia ratou i te haapao i te mau mea atoa ta ˈu i parau atu ia outou na: e inaha, tei pihai atoa iho vau ia outou, e tae noa ˈtu i te hopea o teie [“faanahoraa o te mau mea,” MN].” (Mataio 28:19, 20) No te auraro i teie mau parau, ua tavini na te mau Kerisetiano faatavaihia ei mau vea na Iehova mai te Penetekose 33 o to tatou tau e tae mai i teie mahana. Mai ia Mose e ia Elia, ua ririhia ratou e te feia faatere, e ua poro atu ia ratou. Ua na ô o Iesu i ta ˈna na aposetolo 12 e: “No ˈu nei e hopoihia ˈi outou i te aro o te mau tavana e te hui arii, ei ite no ratou e no te mau Etene.” (Mataio 10:18) Ua tupu noa na ta ˈna mau parau i roto i te aamu o te amuiraa kerisetiano.—Ohipa 25:6, 11, 12, 24-27; 26:3.

15, 16. Eaha te mau tuearaa i rotopu i te feia faatavaihia i te hoê pae, e ia Mose e ia Elia i te tahi atu pae i te pae no to ratou (a) tiaraa ˈtu ma te mǎtaˈu ore no te parau mau? (b) fanaˈoraa i te tauturu a te feia e ere i te mau ati Iseraela?

¹⁵ Hau atu, ua tia ˈtu na te mau Kerisetiano faatavaihia ma te mǎtaˈu ore mai ia Mose e ia Elia, no te parau mau no te patoi i te haavare i te pae faaroo. A haamanaˈo e mea nafea to Paulo faaite-tahaa-raa i te peropheta haavare ati Iuda ra o Bara-iesu e ma te mǎrû e te aueue ore, ua faaite tahaa oia i te huru haavare o te mau atua no Ateno. (Ohipa 13:6-12; 17:16, 22-31) A haamanaˈo atoa, e i teie nei tau, ua faaite tahaa na te toea faatavaihia ma te mǎtaˈu ore i te Amuiraa faaroo kerisetiano, e ua haamauiui teie pororaa ia ratou.—Apokalupo 8:7-12.c

¹⁶ I to Mose hororaa no te riri o Pharao, ua puhapa oia i te fare o Reuela, pii-atoa-hia Ietero, e ere oia i te ati Iseraela. I muri iho, ua fanaˈo o Mose i te mau aˈoraa a Reuela i te pae no te faanahonahoraa, e na te tamaiti a Reuela, o Hobaba, i aratai ia Iseraela na roto i te medebara.d (Exodo 2:15-22; 18:5-27; Numera 10:29) Te tauturu-atoa-hia ra anei te mau melo o te Iseraela o te Atua, na te mau taata e ere ratou i te mau melo faatavaihia o te Iseraela o te Atua? Oia, ua turuhia na ratou e te “feia rahi roa” o te mau “mamoe ê atu,” o tei fa mai i teie anotau hopea. (Apokalupo 7:9; Ioane 10:16; Isaia 61:5) Ma te faaite atea i te turu mahanahana e te here o ta teie mau “mamoe” e pûpû na to ˈna mau taeae faatavaihia, teie ta Iesu i tohu no nia ia ratou: “I poia na hoi au, e ua horoa mai outou i te maa na ˈu; i poihâ na vau e ua faainu mai outou ia ˈu; e taata ê au, e ua ite mai outou ia ˈu: i veve na vau, e ua faaahu mai outou ia ˈu; i pohe na vau i te maˈi, e ua utuutu mai outou ia ˈu; i roto vau i te tapearaa, e ua haere mai outou ia ˈu ra. . . . Oia mau ta ˈu e parau atu ia outou nei, O outou i na reira i te hoê taeae iti haihai roa i roto i tau mau taeae nei, ua na reira mai ïa outou ia ˈu.”—Mataio 25:35-40.

17. Mea nafea to te feia faatavaihia faarururaa i te hoê â tupuraa e to Elia i te Mouˈa no Horeba?

¹⁷ Hau atu, ua faaruru atoa te Iseraela o te Atua i te hoê â tupuraa e to Elia i te Mouˈa no Horeba.e Mai ia Elia i te taime oia a tapuni ai i te Arii vahine ra o Iezebela, ua manaˈo te toea faatavaihia tei mǎtaˈu e ua hope ta ratou ohipa i te hoperaa te Tamaˈi Rahi Matamua. No reira, mai ia Elia atoa, ua faaruru ratou ia Iehova, o tei haere mai no te haava i taua mau faanahonahoraa ra e faahua parau nei e o ratou “te utuafare o te Atua.” (Petero 1, 4:17; Malaki 3:1-3) A erehia ˈi te Amuiraa faaroo kerisetiano, ua fariihia te toea faatavaihia mai “te tavini haapao maitai e te paari,” e ua nominohia ratou ei tiaau i nia i te mau taoˈa atoa a Iesu i nia i te fenua nei. (Mataio 24:45-47) I Horeba, ua faaroo o Elia i te hoê “reo iti haihai” o Iehova iho, o tei horoa na ˈna i te ohipa rahi atu â. I te mau matahiti hau i muri aˈe i te tamaˈi, ua faaroo te mau tavini haapao maitai i faatavaihia a Iehova, i to ˈna reo mai roto mai i te Bibilia. Ua taa atoa ia ratou e e hopoia te tia ia ratou ia faatupu.—Te mau arii 1, 19:4, 9-18; Apokalupo 11:7-13.

18. Mea nafea te faatupuraahia te mau faaiteraa maere o te mana o Iehova na roto i te arai o te Iseraela o te Atua?

¹⁸ I te pae hopea, ua faatupuhia anei te mau faaiteraa maere o te mana o Iehova na roto i te arai o te Iseraela o te Atua? I muri aˈe i te poheraa o Iesu, ua faatupu te mau aposetolo e rave rahi semeio, teie râ, ua ore mǎrû noa te reira. (Korinetia 1, 13:8-13) I to tatou nei tau, aita tatou e ite ra i te mau semeio i roto i te hoê auraa pae tino. I te tahi aˈe pae, ua parau o Iesu i ta ˈna mau pǐpǐ e: “E parau atu vau ia outou, O te faaroo mai ia ˈu ra e rave atoa oia i teie nei mau ohipa ta ˈu e rave nei, e e rahi atu â ta ˈna e rave i teie.” (Ioane 14:12) Ua tupu matamua te reira i to te mau pǐpǐ a Iesu pororaa i te parau apî maitai ati aˈe i te Hau Emepera Roma i te senekele matamua. (Roma 10:18) Ua rave-atoa-hia i teie mahana te mau ohipa rahi atu â, i to te toea faatavaihia aratairaa i te pororaa o te parau apî maitai “e ati noa ˈˈe teie nei ao, ia ite te mau fenua atoa.” (Mataio 24:14) Eaha te faahopearaa? Ua ite te senekele 20 i te haaputuputuraa o te mau tavini pûpûhia e te haapao maitai a Iehova, rahi roa ˈˈe i roto i te aamu. (Apokalupo 5:9, 10; 7:9, 10) Auê ïa faaiteraa rahi o te mana o Iehova!—Isaia 60:22.

Te haereraa mai o te mau taeae o Iesu ma te hanahana

19. Afea e itehia ˈi te mau taeae faatavaihia o Iesu ma te hanahana e o ˈna?

¹⁹ A faaea ˈi te toea o te mau taeae faatavaihia o Iesu, i ta ratou hororaa i nia i te fenua nei, te faahanahanahia nei ratou e o ˈna. (Roma 2:6, 7; Korinetia 1, 15:53; Tesalonia 1, 4:14, 17) E riro mai ïa ratou ei mau arii e ei mau tahuˈa pohe ore i roto i te Basileia i nia i te raˈi. E na ratou e o Iesu, e ‘tavana i nia iho i te taata ma te sepeta auri ra; e e huahua roa ratou mai te aˈua a te potera ra.’ (Apokalupo 2:27; 20:4-6; Salamo 110:2, 5, 6) E parahi atoa ratou e o Iesu i nia i te mau terono, no te haava “i te mau opu o Iseraela tino ahuru ma piti ra.” (Mataio 19:28) Ua tiai ru te mau mea ora i poietehia e autâ nei, e ia tupu teie mau ohipa, e tuhaa hoi te reira o “te faaiteraahia mai o te tamarii a te Atua.”—Roma 8:19-21; Tesalonia 2, 1:6-8.

20. (a) Ua haapuai te faahuru-ê-raa i te faaroo o Petero no nia i teihea tiaturiraa? (b) Nafea te faahuru-ê-raa ia haapuai i te mau Kerisetiano i teie mahana?

²⁰ Ua faahiti o Paulo i te parau o te faaiteraa o Iesu i roto i te “ati rahi,” ia ˈna i papai e: “Ia tae i te mahana e tae mai ai oia ra, ia faateiteihia oia e to ˈna ra feia moˈa, e ia umerehia e te feia atoa i faaroo ra.” (Mataio 24:21; Tesalonia 2, 1:10) Auê ïa tiaturiraa faahiahia no Petero, no Iakobo, e no Ioane, e no te mau Kerisetiano atoa i faatavaihia e te varua! Ua haapuai te faahuru-ê-raa i te faaroo o Petero. Papu maitai, e haapuai atoa te taioraa i teie tumu parau i to tatou faaroo, e te haapapu ra i to tatou tiaturiraa, e e fatata o Iesu i te ‘faautua maitai i te taata atoa ia au i ta ˈna ra ohipa.’ Te ite nei te mau Kerisetiano haapao maitai i faatavaihia, o tei ora mai e tae mai i teie mahana, e ua papu to ratou tiaturiraa e e faahanahanahia ratou e o Iesu. Ua haapuaihia te faaroo o te mau mamoe ê atu i to ratou iteraa e, e faaora oia ia ratou i te hopea o teie faanahoraa ino o te mau mea no te ora ˈtu i roto i te ao apî hanahana. (Apokalupo 7:14) Auê ïa faaitoitoraa no tei mau papu e tae atu i te hopea! E e nehenehe teie orama e haapii hau atu â mai ia tatou, o ta tatou ïa e ite i roto i te tumu parau i muri nei.

[Nota i raro i te api]

Te haamanaˈo ra anei outou?

◻ O vai tei fa mai i pihai iho ia Iesu i roto i te faahuru-ê-raa?

◻ Mea nafea te haapuairaahia te faaroo o te mau aposetolo e te faahuru-ê-raa?

◻ I to Mose e to Elia faraa mai “i roto i te hanahana” i pihai iho ia Iesu i roto i te faahuru-ê-raa, o vai ta raua i faahohoˈa?

◻ Eaha te mau tuearaa i rotopu ia Mose e ia Elia i te hoê pae, e i te Iseraela o te Atua i te tahi atu pae?

[Hohoˈa i te api 10]

Ua haapuai te faahuru-ê-raa i te faaroo o te mau Kerisetiano no tahito ra e no teie nei tau