Tiavaruraa Iesu i te demoni i rapae i te hoê tamaroa

I to Iesu, Petero, Iakobo e Ioane pouraa mai nia mai i te mouˈa, farerei maira ratou i te hoê nahoa rahi. E fifi te tupu ra. E papai parau tei haaati i te mau pǐpǐ a mârô ai ia ratou. Ua maere roa te taata i te iteraa mai ia Iesu, e horo maira e aroha ia ˈna. Ui atura oia: “Eaha ta outou e mârô nei i te mau pǐpǐ?”—Mareko 9:16.

Tuturi ihora te hoê tane i mua ia Iesu e faataa maira: “Orometua, ua afai mai au i ta ˈu tamaiti ia oe nei, no te mea e varua to ˈna i vava ˈi oia. I te mau taime atoa e uruhia ˈi oia, e taorahia oia i raro, e tahe to ˈna haae, e maˈuˈu to ˈna niho, a paruparu atu ai. Ua parau hoi au i ta oe mau pǐpǐ ia tiavaru i taua varua ra, aita râ i haere ia ratou.”—Mareko 9:17, 18.

E au ra e te faahapa ra te mau papai parau i te mau pǐpǐ aita te maˈi o te tamaroa i ora ia ratou, no te vahavaha paha i ta ratou mau tutavaraa. Na ô atura ïa Iesu i te nahoa, eiaha râ i te metua tane e hepohepo ra: “Auê ïa uˈi ino aore e faaroo, ehia â maororaa e parahi ai au ia outou nei? Ehia â maororaa e faaoromai ai au ia outou?” Teie mau parau faahapa, no te mau papai parau ïa tei haapeapea i te mau pǐpǐ a vai ai Iesu i nia i te mouˈa. Fariu atura Iesu i te metua tane e hepohepo ra e na ô atura: “Afai mai ia ˈna.”—Mataio 17:17.

A tapiri mai ai te tamaroa ia Iesu, taora ihora te demoni ia ˈna i raro e rave ihora e ia iriti roa oia. Taaviriviri noa ihora te tamaroa na raro, a tahe noa ˈi te haae. Ui atura Iesu i te metua tane: “Mai afea mai â e na ô noa ˈi oia?” Pahono maira te metua tane: “Mai to ˈna nainairaa mai â, pinepine to te varua huriraa ia ˈna i roto i te auahi e i roto atoa i te pape ia pohe oia.” Taparu maira oia: “Ia tia . . . ia oe ia faaora ia ˈna, aroha mai na e a tauturu mai.”—Mareko 9:21, 22.

Aita te metua tane i taa faahou e nahea râ, aita hoi i haere i te mau pǐpǐ a Iesu ia tauturu mai. Pahono atura Iesu ma te faaitoito atu: “Eaha oe e parau ai: ‘Ia tia ia oe’? I te taata hoi e faaroo to ˈna, e tia ïa te mau mea atoa.” Tuô ihora te metua tane: “E faaroo to ˈu! A tauturu mai ia rahi atu â to ˈu faaroo!”—Mareko 9:23, 24.

A ite ai Iesu i te nahoa e haere ru mai ra ia ˈna ra, tamaˈi ihora oia i te demoni i mua ia ratou: “Oe te varua i vava ˈi teie tamarii iti e i turi ai to ˈna tariˈa, te faaue nei au ia oe, a haere i rapae e eiaha e tomo faahou i roto ia ˈna.” Rave ihora te demoni e ia tuô e ia iriti roa te tamaroa e reva ˈtura i rapae. Tarava noa ˈtura te tamaroa aita e hauti faahou ra. Na ô aˈera e rave rahi: “Ua pohe oia!” (Mareko 9:25, 26) Rave ihora râ Iesu i te rima o te tamaroa, e tia maira oia e “ora ihora t[o ˈna] maˈi.” (Mataio 17:18) Maere roa ihora te nahoa.

Na mua ˈtu, i to Iesu tonoraa i te mau pǐpǐ e poro, i haere na ia ratou ia tiavaru i te mau demoni. I taua râ mahana ra, o ratou anaˈe i roto i te hoê fare, ui maira ratou ia Iesu: “No te aha i ore ai i tia ia matou ia tiavaru i te varua viivii?” Faataa ˈtura Iesu e no to ratou ereraa i te faaroo, a na ô ai: “I te pure noa e reva ˈi teie huru varua viivii i rapae.” (Mareko 9:28, 29) I te faaroo puai e te pure i te Atua no te ani i to ˈna mana hinaaro-mau-hia e reva ˈi te demoni puai i rapae.

Na ô atura Iesu: “Oia mau ta ˈu e parau atu: Ahiri to outou faaroo e mai te hoê huero sinapi te rahi, e parau outou i teie mouˈa, ‘A haere i ǒ atu,’ e haere iho â taua mouˈa ra, e aore e mea e ore e tia ia outou ia rave.” (Mataio 17:20) Tera te faaroo puai mau â!

E nehenehe te mau haafifiraa e te mau fifi o te faataupupu ra i ta tatou taviniraa ia Iehova e riro mai te hoê mouˈa eita e haere ia tatara. Ia rahi atu â râ to tatou faaroo, e nehenehe tatou e faaruru i te reira.