Ia au i te Bibilia

Te faaturi—E faaore anei i te hapa aore ra eita?

“E E HAPA ta outou i nia ia vetahi ê ra, a faaore atu; ia faaore atoa mai to outou Metua i te ao ra i ta outou hapa.” (Mareko 11:25) Te faatupu nei teie mau parau a Iesu i te tahi mau fifi mai te peu e e haapeapeahia te hoê faaipoiporaa e te faaturi: E tia anei i te kerisetiano hapa ore ia faaore i te hara a to ˈna hoa e ia ore te faaipoiporaa ia motu?a Mai te peu e e faaoti oia e faataa, te haafifi ra anei oia i to ˈna mau taairaa maitai roa e o Iehova? E hiˈopoa anaˈe na tatou e nafea te Bibilia ia tauturu ia tatou ia pahono i taua uiraa ra.

E tia anei ia outou i te mau taime atoa ia faaore i te hara?

Te mau parau a Iesu, “e hapa ta outou i nia ia vetahi ê ra, a faaore atu,” e auraa anei ïa i roto i te mau tupuraa atoa—ia faaturi anaˈe te hoê hoa faaipoipo—e tia i te hoê kerisetiano ia faaore i te hara? E tia e ia taahia te mau faaueraa a Iesu ma te haapao atoa i te tahi atu mau parau ta ˈna i faahiti no nia i te faaoreraa hara.

Ei hiˈoraa, ua haapii tatou i te hoê faaueraa faufaa mau no nia i te faaoreraa hapa na roto i te mau parau a Iesu tei papaihia i roto i te Luka 17:3, 4: “Ia hamani ino mai to taeae ia oe, e aˈo atu; e ia tatarahapa oia ra, e faaore atu i ta ˈna hapa. E ia hitu noa ˈtu o ˈna hamani-ino-raa ia oe i te mahana hoê ra e te parauraa mai e, Ua tatarahapa vau, e faaore â oe i ta ˈna hapa.” Papu maitai i roto i te mau hara ino mau, e faaitoitohia te taata hapa ore ia faaore i te hara mai te peu e e tatarahapa oia ma te aau rotahi. Te reira atoa te huru hiˈoraa a Iehova; no te fanaˈo e ia faaore te Atua i ta tatou mau hara, e tia ia tatou ia tatarahapa ma te aau rotahi.—Luka 3:3; Ohipa 2:38; 8:22.

Te faaite atoa ra te reira e mai te peu e eita te hoa i faaturi e tatarahapa, ma te patoi i te farii i te mau hopoia e matara mai na roto i ta ˈna hara, e taa-maitai-hia e e nehenehe te hoa faaipoipo hapa ore e maiti e eita oia e faaore i te hara.—A faaau e te Ioane 1, 1:8, 9.

Te faaoreraa hara—Eaha ïa no nia i te mau faahopearaa?

Eaha ïa mai te peu e e tatarahapa te hoa o tei faaturi? Mai te peu e te vai ra te tatarahapa, te vai ra ïa te hoê niu no te faaore i te hara. Ia faaorehia te hara te faataa râ anei te reira e eita te taata hara e amo i te faahopearaa o to ˈna haerea tano ore? E hiˈopoa na tatou i te tahi mau hiˈoraa a faaore ai o Iehova i te hara.

I to te mau ati Iseraela patoiraa i muri aˈe i to ratou fariiraa i te mau parau o na taata hiˈopoa e ahuru o tei horoa i te hoê faataaraa tano ore no nia i te fenua no Kanaana, ua tauaparau atura o Mose ia Iehova ra: “O to ˈu teie hinaaro, e faaore oe i te hara a teie nei feia.” Ua pahono atura o Iehova: “Ua faaore hoi au i ta oe i parau maira.” Te auraa anei e aita te feia hara i amo i te faahopearaa o ta ratou mau ohipa? Ua parau faahou mai o Iehova: “E ore te mau taata atoa . . . e aore aˈenei i faaroo mai i tau nei reo, e ore ratou e ite i te fenua ta ˈu i tǎpǔ atu i to ratou hui metua ra.” (Numera 14:19-23) Ua faatupu o Iehova i taua mau parau ra; eita te ui paari aˈe—taa ê noa ˈtu ia Iosua e ia Kaleba—e ite i te Fenua Tǎpǔ.—Numera 26:64, 65.

Mai te reira atoa, i to te peropheta ra o Natana aˈoraa i te Arii ra o Davida no ta ˈna hara e o Bate-Seba, ua farii o Davida tei tatarahapa e: “Ua hara vau ia Iehova.” Ua parau atura o Natana ia Davida e: “Ua faataa-ê-hia e Iehova ta oe hara.” (Samuela 2, 12:13) No reira, noa ˈtu e ua faaore o Iehova i te hara a Davida, ua mauiui o Davida i te toea o to ˈna oraraa i te mau faahopearaa o ta ˈna hara.—Samuela 2, 12:9-14; e hiˈo atoa Samuela 2, pene 24.

Te haamatara ra teie mau hiˈoraa no nia i te faaoreraa hara a te Atua i te hoê haapiiraa faufaa mau: Eita tatou e nehenehe e hara ma te ape i te mau faautuaraa. (Galatia 6:7, 8) Eita roa te hoê taata hara tei tatarahapa, noa ˈtu e e noaa ia ˈna i te faaoreraa hara, e ape i te mau faahopearaa o to ˈna haerea tano ore. Te faataa ra anei te reira e e tia iho â i te hoa faaipoipo hapa ore ia faaore i te hara o te hoa tei faaturi—i roto paha i te auraa e vaiiho i te inoino ia ore—e e faaoti ai ia faataa e to ˈna hoa?

Te faaoreraa hara e te faataaraa

I te roaraa o ta ˈna taviniraa, e toru taime to Iesu faahitiraa i te parau o te faataaraa. (Mataio 5:32; 19:3-9; Luka 16:18) Ma te anaanatae mau, aita hoê aˈe taime i roto i te hoê o ta ˈna faahitiraa to Iesu parauraa no nia i te faaoreraa hara. Ei hiˈoraa, ia au i te itehia i roto i te Mataio 19:9, ua parau oia e: “O te haapae noa i ta ˈna vahine, e ere i to te faaturi, a faaipoipo ai i te tahi, ua faaturi ïa.” Na roto i te parauraa e “e ere i to te faaturi,” te faataa ra o Iesu e te horoa nei te haerea tia ore i te pae taatiraa i te tiaraa i te hoa faaipoipo hapa ore, aore ra te “tumu” e tuea e te mau Papai ia faataa. Teie nei râ, aita o Iesu i parau e e tia i te hoa faaipoipo hapa ore ia faataa. Tera râ, ua faahiti papu oia e e nehenehe oia e na reira.

E taairaa te faaipoiporaa o te tahoê e piti na taata. (Roma 7:2) Tera râ, aita anaˈe hoê e tapea i to ˈna taiva ore, e nehenehe te taairaa e faaorehia. I roto i taua huru tupuraa ra tei mua mau â te hoa hapa ore i te tiaraa no te rave e piti faaotiraa. A tahi, e faaore anei oia i te hara? Mai ta tatou i ite aˈenei, te ô mai ra te hoê tuhaa faufaa mai te peu e ua tatarahapa anei te taata faaturi ma te aau rotahi aore ra aita. Mai te peu e ua tatarahapa, e tia i te hoa hapa ore ia faaore i te hara—i roto paha i te auraa e vaiiho i te inoino ia ore.

Te piti o te faaotiraa oia hoi, e imi anei oia i te faataaraa? No te aha taua uiraa ra e fa mai ai mai te peu e ua faaore oia i ta ˈna hara?b Oia mau, eaha ïa mai te peu e te hepohepo rahi nei oia i te hau no ˈna iho e no ta ˈna mau tamarii, mai te peu iho â râ e e taata haavî ta ˈna tane i mutaa ihora? Aore ra eaha ïa mai te peu e te vai ra te mǎtaˈu e ia roohia i te mau maˈi purumu e roaa na roto i te mau taatiraa i te pae tino? Aore ra eaha ïa mai te peu e ua inoino roa oia no ta ˈna haavareraa, eita oia e nehenehe faahou e tiaturi ia ˈna i roto i to raua mau taairaa tane e vahine? I roto i taua mau huru tupuraa ra e mea maitai aˈe e ia faaore te hoa hapa ore i te hara a to ˈna hoa (i roto i te auraa ia faaore i te inoino) e i reira e faaoti atu ai e faataa atu no te mea aita oia e hinaaro faahou ra e ora i pihai iho ia ˈna. E tauturu te faaoreraa i te inoino ia ˈna ia tamau noa i to ˈna oraraa. E nehenehe atoa te reira e tauturu ia maitai atu â te mau taairaa e titauhia no a muri aˈe e te taata faaturi.

Mai te peu e e faaoti oia e faataa e te hoê hoa aita i roto i te parau mau e na ˈna iho taua faaotiraa ra, e tia i te hoa hapa ore ia faito maitai e na roto i te pure i te mau ohipa atoa. (Salamo 55:22) Aita e tiaraa to vetahi pae no te tamata i te reni aore ra i te faahepo i te hoa hapa ore i roto i ta ˈna faaotiraa e faataa anei aore ra eita. (A faaau e te Galatia 6:5.) A haamanaˈo e aita o Iesu i parau eaha te tia i te hoa hapa ore ia rave. Ma te papu râ, eita o Iehova e riri i te feia o te maiti e faataa ia au i te mau tumu i faahitihia i roto i te mau Papai.

[Nota i raro i te api]

[Faaiteraa i te fatu o te hohoˈa i te api 10]

Life