Ia au i te Bibilia . . .

E horoa ra anei te Atua i te mau utua maitai?

E, E NA reira iho â oia. E huru miimii râ anei i te tavini i te Atua ma te manaˈo i te utua maitai? Aita, no reira oia e tuu ai i mua i ta ˈna mau tavini haapao maitai i te mau haamaitairaa. Oia mau, na nia i to ˈna tiaraa Atua parau-tia e te here, te faahepo nei o Iehova ia ˈna iho ia faautua maitai i te feia atoa e tavini ra ia ˈna. Te parau ra te hoê tuhaa i roto i te Hebera 11:6 e: “O te haamori i te Atua ra, e faaroo oia e, e Atua, e tia ˈi, e o oia te faautua i te feia i imi papu ia ˈna ra.”—Te Bibilia Moˈa.

E noaa mai ia tatou i te tiaraa hoa na roto i te faaiteraa i te faaroo mau i te Atua ra, e e aratai taua auhoaraa i te hoê utua maitai. E faautua maitai te Atua i te feia o te imi ma te tiaturi i to ˈna farii maitai.

E ohipa aroha te mau utua maitai

Te hinaaro nei o Iehova e ia ite tatou e e huru Atua oia o te faautua maitai i te feia e here ra ia ˈna. Ei hiˈoraa, e imi iho â te mau metua here i te mau ravea no te haamaitai i ta ratou tamarii o te hinaaro mau e rave i te ohipa i te fare ma te arataihia e te here i te metua. E horoa te mau metua hau atu â i te mea e titauhia ra no te oraraa, ma te haamaitai i te tamarii na roto i te horoaraa i te hoê ô taa ê mau. I te tahi taime, e nehenehe e horoahia i te moni ei ô e tuuhia i te fare moni no te parururaa i te tamarii a muri aˈe. No reira, e ere te Atua mai te mau taata o te ore e mauruuru ra e e haapao ra i te feia e rave ra i te ohipa ma te here mau e ma te aau mahorahora. E Atua horoa maitai o Iehova e e faatupu i te mau auraa piri roa e to ˈna mau hoa. Mai te peu e ua faatupu oe i te faaroo papu no ˈna, “e ore roa [oia] e taiva ia oe, e ore roa [oia] e faarue ia oe, e ore; e ore roa ˈtu.”—Hebera 13:5.

Te mauruuru nei e te farii maitai nei te Atua i te feia atoa e rave ra i te mea iti aˈe no te taviniraa ia ˈna, ma te horoa i te mau ravea hau atu â ia ite ratou e o vai ra o ˈna. Te faahohoˈa maitai ra te mau parau a Iesu i roto i te Mataio 10:40-42 i taua tuhaa ra: “O tei ite mai ia outou na, ua ite ïa ia ˈu, e o tei ite mai ia ˈu nei, ua ite ïa i tei tono mai ia ˈu nei ra. O tei ite mai i te peropheta, no te mea e peropheta, e e noaa ia ˈna ta te peropheta ra utua; e o tei ite mai i te taata parau-tia, no te mea e taata parau-tia, e noaa ia ˈna ta te taata parau-tia ra utua. E o te horoa i te hoê aˈua pape toetoe na te hoê o teie nei taata rii, no te mea e pǐpǐ oia na ˈu, e parau mau ta ˈu e parau atu ia outou nei, e ore roa oia e ere i te utua.”

Ua tonohia mai o Iesu e to ˈna Metua ra o Iehova. No reira, te hoê taata o te farii maitai ra i te mau pǐpǐ a te Mesia—noa ˈtu e e peropheta oia, e taata parau-tia, aore ra e mau taata rii noa—ua farii ïa oia i te Mesia e oia atoa i tei tono mai ia ˈna, te Atua. Papu maitai e haamaitaihia taua taata ra; eita oia e vai noa ma te ere i te utua maitai. E î roa ta ˈna mau vairaa taoˈa faufaa i te pae varua. No te aha? No te mea te haamanaˈo ra te Atua i te mau ohipa iti atoa i ravehia no te turu i te ohipa o te Basileia, e taua mau ohipa ra eita e vai noa ma te ore e faautua-maitai-hia.—Hebera 6:10.

Ma te anaanatae mau, ua ani papu o Petero, te hoê pǐpǐ a Iesu, ia ˈna mai te peu e te vai ra te hoê utua maitai no ˈna e no to ˈna mau hoa aposetolo: “Inaha matou, ua faarue i te mau mea atoa e ua pee mai ia oe; e eaha ta matou nei utua?” (Mataio 19:27) Aita o Iesu i manaˈo e aita i tano taua uiraa ra, ua horoa râ oia i te hoê pahonoraa tia, ma te parau e: “E te taata atoa no to ˈu nei iˈoa i faarue ai i te fare, e te mau taeae, e te mau tuahine, e te mau tane, e to metua vahine, e te vahine iho, e te tamarii, e te fenua, e hanere atu ïa ta ˈna e noaa, e roaa ia ˈna te ora mure ore.”—Mataio 19:29.

Te mau utua maitai no teie nei e no a muri aˈe

Te faaite ra te pahonoraa ta Iesu i horoa e te haamaitaihia ra te feia e apee nei ia ˈna i teie nei e a muri aˈe. Te hoê o ta ratou utua maitai no teie nei o te riroraa ïa ei tuhaa no te utuafare rahi e maraa noa ˈtura na te ao atoa nei o te mau taeae e te mau tuahine i te pae varua. Te autâ ra te mau ekalesia o te amuiraa faaroo kerisetiano no te iti o to ratou mau melo e no te ereraa i te turu, area te mau putuputuraa a te mau Ite no Iehova ia faahohoˈa-anaˈe-hia, ua î ma te manii roa. E bapetizohia i te mau matahiti atoa te tahi tau hanere tausani Ite apî.

Te tahi atu utua maitai o te hau ïa o te feruriraa e te mauruuru e te oaoa ta te auhoaraa e te Atua e te iteraa e o vai ra o ˈna e hopoi mai. Oia mau, “te paieti e te mauruuru ra” e taoˈa rahi mau ïa. (Timoteo 1, 6:6) E matara mai i te hoê huru feruriraa oaoa e e nehenehe ai te hoê taata e parau, mai te aposetolo Paulo ra e: “Ua ite hoi au i te faaoromai i te mau mea atoa i roohia mai ai au nei.—Philipi 4:11.

Na mua iti noa ˈˈe i to ˈna poheraa, ua papai o Paulo no nia i te utua maitai no a muri aˈe no te “nǎnǎ iti” o te mau pǐpǐ faatavaihia a Iesu—te utua maitai o te tia-faahou-raa no te ora i nia i te raˈi: “E teie nei, te vaiihohia ra te korona o te parau-tia no ˈu, ta te Fatu, ta te hiˈo parau-tia ra, e horoa mai no ˈu ia tae i taua mahana ra; e ere hoi o to ˈu anaˈe ra, o to te feia atoa râ i hinaaro i taua faraa mai no ˈna ra.”—Luka 12:32; Timoteo 2, 4:7, 8.

Te hiˈo atea atoa ra te mau mirioni pǐpǐ a Iesu o tei riro ei mau “mamoe ê atu” no ˈna i te utua maitai no a muri aˈe o te ora mure ore i nia i te fenua o te faarirohia ei paradaiso. (Ioane 10:16) E ua haapapu o Iesu e ta ˈna mau pǐpǐ o tei pohe “e utuahia mai hoi . . . ia tae i te tia-faahou-raa o te feia parau-tia ra.”—Luka 14:14.

Ia vai te hohoˈa o te utua maitai i roto i te feruriraa

Mea tano mau â ia tamata i te tapea i roto i te feruriraa i taua mau huru utua maitai ra, noa ˈtu e aita hoê aˈe taata i ite papu mai te aha mau na te huru. E nehenehe anei outou e ite i te oaoa e faataahia ra i roto i te Isaia 25:8: “E na ˈna e haamou roa i te pohe e a muri noa ˈtu; e na te Fatu ra na Iehova, e horoi i te roimata i te mau mata atoa ra”? A tamata i te feruri i te mau parau a te Isaia 32:17: “E o ta te parau-tia ra ohipa, o te hau ïa, e te hopea o te parau-tia ra, o te peapea ore ïa, e te ora e a muri noa ˈtu.” Oia mau, e rave amui te mau taata atoa i te ohipa ma te auhoaraa mau. (Isaia 65:21-25) I teie nei atoa mahana, e itehia mai te mau utuafare maitatai e te mau hotu hau aˈe i te maitai ia ohipa anaˈe tatou ma te itoito. E i muri iho, i roto i te ao apî a te Atua, e nehenehe te mau taata oraora maitai i raro aˈe i te mau huru tupuraa tia roa e faahotu i te mau mea atoa o ta ratou e hinaaro no te fanaˈo i te oraraa.—Salamo 37:4.

Te utua maitai ta te Atua e horoa e ere no te tahi noa ˈˈe tuhaa taviniraa ta tatou i rave te tia ia aruehia no to ˈna râ here rahi ua riro ei ô noa ˈtu to tatou huru taata tia ore. (Roma 5:8-10) Teie nei râ, te vai ra te hoê taairaa i rotopu i te utua maitai e hiˈo-atea-hia e to tatou haerea. E tia ia tatou ia imi ia Iehova ma te tiaturi papu na roto i te hoê faaroo aueue ore e te faaoromai. (Hebera 10:35-39) Na roto i te tahi atu parau, “e ta outou mau mea atoa e rave ra, e rave ma te aau atoa mai te mea e e na Iehova, eiaha na te taata. Ua itea hoi e, e noaa mai ta outou ra utua i te aiˈa no ǒ mai [ia Iehova ra].” Oia mau, e horoa mai oia i te mau utua maitai.—Kolosa 3:23, 24.