Te faaohipa nei Iehova i te “mea maamaa” no te faaora i te feia e faaroo

“Aore aˈera to te ao i ite i te Atua i to ˈna iho paari, i te ravea paari a te Atua ra, hinaaro aˈera te Atua i te faaora i te feia i faaroo i te mea maamaa i te aˈo.”—KORINETIA 1, 1:21.

1. E faaohipa Iehova i “te mea maamaa” i roto i teihea auraa, e nafea tatou e ite ai e aita te ao nei e to ˈna paari i naeahia i te ite i te Atua?

EAHA? E faaohipa anei Iehova i te mea maamaa? Eiaha i roto i te auraa mau! Teie râ e nehenehe ta ˈna e te na reira mau nei oia, e faaohipa i te mea maamaa i mua i te aro o teie nei ao. Te na reira nei oia no te faaora i te feia o tei ite e o te here nei ia ˈna. Maoti to ˈna iho paari, eita e tia i te ao ia ite i te Atua. Ua faaite papu o Iesu Mesia i te reira ia ˈna i pure e: “E tau Metua parau-tia e, aore â hoi to te ao i ite ia oe.”—Ioane 17:25.

2. Nafea e nehenehe ai e manaˈohia e te tuea ra te mau eˈa a Iehova e ta to teie nei ao, eaha râ te ohipa mau e itehia ra?

² Te faaite ra te mau parau a Iesu e mea taa ê te mau haerea o Iehova i to teie nei ao. Ia hiˈo-noa-hia ma te hohonu ore, e au ra e te haere tuea noa ra te opuaraa a te Atua e ta to teie nei ao. E au ra e te fanaˈo ra te mau opuaraa a te ao nei i te haamaitairaa a te Atua. Ei hiˈoraa, te na ô ra te Bibilia e e haamau te Atua i te hoê faatereraa parau-tia o te hopoi mai i te oraraa hau, te oaoa, e te ruperupe no te huitaata i nia i te fenua nei. (Isaia 9:6, 7; Mataio 6:10) Oia atoa, te faaoto nei teie nei ao i ta ˈna opuaraa e horoa mai na te taata i te hau, te ruperupe, e te faatereraa maitai na roto i te arai o te tahi faanahoraa o te ao apî. E ere râ hoê â huru te mau opuaraa a te Atua e ta to teie nei ao. Te opua nei te Atua e faatiamâ ia ˈna iho ei Arii Hau aˈe no te ao atoa nei. E na reira oia na roto i te arai o te hoê faatereraa i nia i te raˈi o te faaore i te mau faatereraa atoa o te fenua nei. (Daniela 2:44; Apokalupo 4:11; 12:10) No reira, aita hoê aˈe tuearaa i rotopu i te Atua e teie nei ao. (Ioane 18:36; Ioane 1, 2:15-17) No reira ïa te Bibilia e faahiti ai e piti huru paari—‘te paari o te Atua’ e “te paari o teie nei ao.”—Korinetia 1, 1:20, 21.

Te hapa matamua o te paari o teie nei ao

3. Noa ˈtu te faahiahia o te paari o teie nei ao, no te aha e ere te ao apî i tǎpǔhia mai e te taata i te mea papu?

³ No te feia aita e arataihia ra e te paari o te Atua, mea faahiahia mau â te paari o teie nei ao. Te vai nei te mau tatararaa philosopho teitei a te ao nei o te ume i te feruriraa. E mau tausani mau fare haapiiraa teitei o te tufa nei i te mau haamaramaramaraa no ǒ mai i te feia e faarirohia nei ei mau taata maramarama roa ˈˈe o te ao nei. Ua î roa te mau fare buka rahi i te ite i noaa mai maoti te mau tamatamataraa i ravehia e te taata i roto i te roaraa o te mau senekele. Noa ˈtu râ te reira, e riro noâ te faanahoraa o te ao apî ta te mau tia o te ao nei e faaau maira, ei faatereraa na te mau taata tia ore, te hara, e te roohia i te pohe. No reira, e faanahoraa tia ore ïa teie, o te na nia iho faahou i te rave i te mau hape tahito e eita roa oia e haamâha i te mau hinaaro atoa o te huitaata nei.—Roma 3:10-12; 5:12.

4. Na te aha e faahapa ra i te faanahoraa o te ao apî e faaauhia maira, e eaha ˈtura te faahopearaa?

⁴ Aita noa te faanahoraa o te ao apî e faaauhia maira e te taata e faahapahia ra e te paruparu o te taata, e te mana atoa râ a te mau varua iino—oia mau, a te Diabolo ra o Satani e ta ˈna mau demoni. Ua haapoiri o Satani i te feruriraa o te taata ia ore ratou ia tiaturi i “te maramarama o te evanelia hanahana o te Mesia.” (Korinetia 2, 4:3, 4; Ephesia 6:12) No reira ˈtura, te roohia ra teie nei ao i tera ati i muri aˈe i te tahi. Te aro nei e te mauiui nei oia i to ˈna tamataraa ma te manuïa ore i te faatere ia ˈna iho ma te haapae i te tauturu a te Atua e ma te ore e haapao i to ˈna hinaaro. (Ieremia 10:23; Iakobo 3:15, 16) No reira, mai ta te aposetolo Paulo i parau, “aore aˈera to te ao i ite i te Atua i to ˈna iho paari.”—Korinetia 1, 1:21.

5. Eaha te hapa matamua o te paari o teie nei ao?

⁵ Eaha ïa te hapa matamua o te paari o teie ao, e tae noa ˈtu ta ˈna mau opuaraa no te haamau i te hoê faanahoraa o te ao apî? Oia hoi te haafaufaa ore nei te ao i te mea te ore e tia ia haafaufaa-ore-hia no te manuïa—oia hoi te tiaraa arii teitei o te Atua ra o Iehova. Te patoi nei oia ma te teoteo i te farii i te tiaraa arii o te Atua. Ma te opua maite, te tuu nei te ao ia Iehova i te hiti i te mau faanahoraa atoa ta ˈna e rave nei e te tiaturi nei oia i to ˈna iho aravihi e ta ˈna mau raveraa. (A faaau e Daniela 4:31-34; Ioane 18:37.) Te faaite maramarama ra te Bibilia e “o te matamua o te paari ra, o te mǎtaˈu ïa ia Iehova.” (Maseli 9:10; Salamo 111:10) Aita râ te ao i haapii noa ˈˈe i teie titauraa matamua o te paari. Mai te peu e aita te turu a te Atua, nafea ïa oia e manuïa ˈi?—Salamo 127:1.

Te pororaa i te Basileia—Mea maamaa anei aore ra mea tano?

6, 7. (a) Eaha ta te feia e arataihia ra e te paari o te Atua e poro ra, teie râ, eaha te huru hiˈoraa o te ao nei ia ratou? (b) Te poro nei te mau raatira o te amuiraa faaroo kerisetiano ia au i teihea paari, e eaha ïa te faahopearaa?

⁶ I te tahi aˈe pae, te faaite nei te feia o tei ite i te Atua i te paari o te Atua e te maiti nei ratou i ta ˈna aratairaa. Mai ta Iesu i tohu na, te poro nei ratou i “te evanelia o te basileia nei e ati noa ˈˈe teie nei ao.” (Mataio 24:14; 28:19, 20) Mea tano anei teie ohipa pororaa i teie nei, inaha ua î roa te fenua i te aroraa, te haaviiviiraa, te veve, e te mauiui o te taata? I te manaˈoraa o te feia paari o teie nei ao, ua riro teie pororaa i te Basileia o te Atua ei ohipa maamaa, aore roa hoi i tano. Te faariro nei ratou i te feia poro i te Basileia o te Atua ei feia faatupu peapea o te haaparuparu nei i te Hau e o te faataere nei i to ˈna haereraa i mua ia naeahia te faatereraa politita aravihi roa ˈˈe. Te turu nei te mau raatira a te amuiraa faaroo kerisetiano i teie manaˈo to ratou, inaha, te poro nei hoi ratou ia au i te paari o teie nei ao e aita ratou e faaite ra i te taata e e tia ia ratou ia haapii e eaha te ao apî a te Atua e te faatereraa a to ˈna Basileia, noa ˈtu e te reira te haapiiraa tumu a te Mesia.—Mataio 4:17; Mareko 1:14, 15.

⁷ Ua haamatara te taata tuatapapa aamu o H. G. Wells i teie hape a te mau raatira a te amuiraa faaroo kerisetiano. Teie ta ˈna i papai: “Mea faahiahia mau â te faufaa rahi ta Iesu i horoa i te haapiiraa o ta ˈna i pii te Basileia o te Raˈi, e to ˈna tiaraa faufaa ore roa ia faaauhia i te faanahoraa e te haapiiraa a te rahiraa o te mau ekalesia kerisetiano.” Teie râ, ia nehenehe te feia no teie nei ui e ora, e tia na mua ia faaroo ratou i te parau no te Basileia i haamauhia a te Atua, e no te reira, e tia ïa i te tahi taata ia poro i te parau apî maitai o teie Basileia.—Roma 10:14, 15.

8. No te aha te pororaa i te parau apî maitai a te Atua i riro ai ei ohipa tano roa ˈˈe ia rave i teie mahana, tera râ, eaha te haerea o te ore roa e manuïa?

⁸ Ua riro ïa te pororaa i te parau apî maitai a te Atua, ei ohipa tano roa ˈˈe te tia ia rave i teie mahana. E te reira no te mea te horoa maira te poroi o te Basileia i te hoê tiaturiraa mau o te faaî i te mafatu o te taata i te oaoa i roto i teie mau mahana hopea ‘e tupu ai te ati rahi.’ (Timoteo 2, 3:1-5; Roma 12:12; Tito 2:13) Mea papu ore e mea poto te oraraa i roto i teie nei ao, area te oraraa i roto i te ao apî a te Atua ra, e ora mure ore ïa, i roto i te oaoa, te ruperupe, e te hau i nia i te fenua nei. (Salamo 37:3, 4, 11) Mai ta Iesu Mesia i parau, “eaha ta te taata faufaa i noaa, ia noaa ia ˈna te taoˈa atoa o teie nei ao, ia ere oia i te ora? eaha hoi ta te taata e ore e horoa ei hoo i to ˈna iho ora?” Mai te peu e e erehia te hoê taata i te tiaraa e ora i roto i te ao apî a te Atua, eaha ïa te faufaa o teie ao o te mou atura? Ua riro te fanaˈoraa i teie nei mahana i te mau taoˈa materia ei ohipa faufaa ore, te papu ore, e te morohi noa.—Mataio 16:26; Koheleta 1:14; Mareko 10:29, 30.

9. (a) I to te hoê taata tei titauhia ia riro ei pǐpǐ na Iesu aniraa e ia haapaehia o ˈna, eaha ta Iesu i aˈo atu ia ˈna? (b) Nafea te pahonoraa a Iesu ia ohipa i nia ia tatou?

⁹ Ua parau te hoê taata ta Iesu i titau ia riro ei pǐpǐ na ˈna e: “A tuu aˈe na ia ˈu e haere au e tanu i tau metua tane.” Eaha ta Iesu i faaitoito atu ia ˈna ia rave? I te mea e ua ite oia e te tuu ra teie taata i te hoê ohipa faufaa roa ˈˈe i te hiti no te tiai noa i te taime e pohe ai to ˈna nau metua, ua pahono atura o Iesu e: “E vaiiho atu na i tei pohe e tanu i to ratou i pohe ra: e haere râ oe e poro haere i te basileia o te Atua.” (Luka 9:59, 60) Te feia o te faaite i te paari na roto i te auraroraa i te Mesia, eita ta ratou e nehenehe e ape i te rave i ta ratou hopoia e poro i te poroi o te Basileia. Te faaara nei te paari o te Atua ia ratou e ua faautuahia teie ao e to ˈna mau faatere. (Korinetia 1, 2:6; Ioane 1, 2:17) Ua ite te feia e turu nei i te tiaraa arii o te Atua e tei roto te tiaturiraa mau hoê roa no te huitaata nei i te ohiparaa mai e te faatereraa a te Atua. (Zekaria 9:10) No reira, noa ˈtu e aita te feia te vai ra ia ratou te paari o te ao nei e tiaturi ra i te Basileia o te Atua e aita ratou e hinaaro ra i taua faatereraa no te raˈi ra, te rave nei te feia e arataihia ra e te paari o te Atua i te mea o te haamaitai mau i to ratou taata-tupu, ma te faaineine ia ratou no te ora mure ore i roto i te ao apî i tǎpǔhia mai a Iehova.—Ioane 3:16; Petero 2, 3:13.

“E parau maamaa ïa i te feia e pohe”

10. (a) I to Saula no Tareso riroraa mai ei pǐpǐ, eaha te ohipa o ta ˈna i haamata, e eaha to ˈna manaˈo no nia i teie ohipa? (b) Ua tui te roo o te mau Heleni tahito no teihea mea, eaha râ te manaˈo o te Atua no nia i to ratou paari?

¹⁰ Ua rave atoa o Saula no Tareso, o tei riro mai o Paulo, e aposetolo na Iesu Mesia, i teie ohipa faaoraraa. Mea tano anei ia manaˈo e i to Iesu Mesia faariroraa ia Saula ei pǐpǐ, ua faaue atu Oia ia ˈna ia rave i te hoê ohipa maamaa? Aita o Paulo i na reira i te manaˈo. (Philipi 2:16) I taua tau ra, o te mau Heleni tei faarirohia ei feia maramarama roa ˈˈe o te ao nei. Ua teoteo ratou i ta ratou mau philosopho e ta ratou mau taata paari. Noa ˈtu e e paraparau na o Paulo i te reo Heleni, aita oia i pee i te tatararaa philosopho e te haapiiraa Heleni. Eaha te tumu? No te mea ïa e mea maamaa te paari no teie nei ao i mua i te aro o te Atua.a Ua imi o Paulo i te paari o te Atua, o tei turai ia ˈna ia poro i te parau apî maitai na te mau fare. Ua vaiiho mai te Taata poro rahi roa ˈˈe o te mau tau atoa, o Iesu Mesia, i te hiˈoraa e ua faaue atu oia ia ˈna ia rave i taua ohipa atoa ra.—Luka 4:43; Ohipa 20:20, 21; 26:15-20; Korinetia 1, 9:16.

11. Ma te faahiti i te manaˈo tumu, eaha ta Paulo i parau no nia i ta ˈna hopoia pororaa e te paari o teie nei ao?

¹¹ Teie ta Paulo e parau ra no nia i ta ˈna hopoia no te pororaa: “[Ua tono te Mesia ia ˈu] e parau haere . . . i te evanelia; eiaha râ ma te paari parau, o te riro hoi te [pou haamauiuiraa] o te Mesia ra ei mea faufaa ore. O te parau hoi i te [pou haamauiuiraa] nei [oia hoi te tusia o te hoo], e parau maamaa ïa i te feia e pohe; area ia tatou ia faaorahia nei, o te mana ïa o te Atua. Ua papaihia hoi e, E faaore au i te paari o te feia paari, e e faariro vau i te ite o te feia i ite ra ei mea faufaa ore. Teihea te taata paari [mai te philosopho ra]? teihea te papai parau? teihea te taata mârô i te parau o teie nei ao? e ere anei ua faariro te Atua i te paari o teie nei ao ei maamaa? Aore aˈera to te ao i ite i te Atua i to ˈna iho paari, i te ravea paari a te Atua ra, hinaaro aˈera te Atua i te faaora i te feia i faaroo i te mea maamaa i te aˈo.”—Korinetia 1, 1:17-21.

12. Eaha ta Iehova e faatupu ra na roto i te ‘maamaa o te mea e porohia ra,’ e eaha te huru o te feia e hinaaro ra i ‘te paari no nia maira’?

¹² Noa ˈtu e mea fifi roa ia tiaturi, te feia mau ta te ao e pii ra e feia maamaa, o ratou ta Iehova e faaohipa ra ei feia poro no ˈna. Oia mau, na roto i te maamaa o te taviniraa a teie feia poro, te faaora nei te Atua i te feia e tiaturi. Te faanaho nei Iehova i te mau ohipa ia ore taua mau taata poro i teie “parau maamaa” ra, ia faahanahana ia ratou iho, e ia ore te tahi atu mau taata ia faahanahana i te feia mea na roto ia ratou to ratou faarooraa i te parau apî maitai. E te reira no te mea ‘aore roa te taata nei e tia ia teoteo i mua i te Atua.’ (Korinetia 1, 1:28-31; 3:6, 7) Parau mau, e tuhaa faufaa ta te taata poro, tera râ, na te poroi o ta ˈna i faauehia ia poro e ohipa no te faaora i te taata mai te peu e e tiaturi oia. Eita te feia e hinaaro i ‘te paari no nia maira,’ e haavahavaha i te poroi a te taata poro no te mea e au ra e e taata maamaa oia e te haihai, e te hamani-ino-hia ra o ˈna, e te haere ra o ˈna na te mau fare. Area ra, e faatura te feia haehaa i te hoê taata faaite i te Basileia ei taata poro i faatoroahia e Iehova o te haere maira na nia i te iˈoa o te Atua. E haafaufaa rahi ratou i te poroi ta te taata poro e afai ra na roto i te parau vaha e te parau i papaihia.—Iakobo 3:17; Tesalonia 1, 2:13.

13. (a) Mea nafea to te mau ati Iuda e te mau Heleni hiˈoraa i te pororaa a te Mesia i patitihia i nia i te pou? (b) Eaha te mau pǔpǔ taata mea iti roa te riro mai ei pǐpǐ na Iesu, e no te aha?

¹³ Ma te tuatapapâ i te parau no te mau eˈa a te Atua, te na ô ra o Paulo e: “Te ani ra hoi te ati Iuda i te tapao, e te titau ra te Heleni i te paari; te parau nei râ matou i te Mesia [patitihia i nia i te pou] ra, e turoriraa no te ati Iuda, e e mea maamaa i te Heleni. Area i te feia i haapaohia ra, te ati Iuda e te Heleni atoa, o te mana ïa o te Atua, e te paari o te Atua, te parau i te Mesia nei. E paari rahi hoi to te mea maamaa a te Atua nei, i to te taata nei paari; e puai rahi to te paruparu o te Atua, i to te taata nei puai. Te ite na hoi outou, e au mau taeae, i to outou parauraahia, e aita rea e taata paari i te haapaoraa i te tino nei, aita rea e taata mana, aita rea e taata teitei fanau i parauhia. Ua maiti râ te Atua i te mau mea maamaa o te ao nei, ei faahaama ˈtu i te feia paari; e ua maiti hoi te Atua i te mea paruparu o te ao nei, ei faahaamaraa ˈtu i te feia puai.”—Korinetia 1, 1:22-27; a faaau e Isaia 55:8, 9.

14. (a) Mai te peu e e anihia ta ratou parau haamanaraa, eaha ta te mau Ite no Iehova e faataa? (b) No te aha o Paulo i patoi ai i te haamauruuru i te mau Heleni na roto i te faaiteiteraa i te paari o teie nei ao?

¹⁴ I to Iesu oraraa i nia i te fenua nei, ua ani aˈera te mau ati Iuda i te hoê tapao no te raˈi mai. (Mataio 12:38, 39; 16:1) Aita râ o Iesu i farii i te horoa ˈtu i te hoê tapao. Oia atoa i teie mahana, aita te mau Ite no Iehova e faaite ra i te tahi parau haamanaraa. Area ra, te faataa nei ratou i ta ratou hopoia e poro i te parau apî maitai, ia au i tei papaihia i roto i te mau irava a te Bibilia mai ia Isaia 61:1, 2; Mareko 13:10; e te Apokalupo 22:17. Ua titau te mau Heleni no tahito ra i te paari, te haapiiraa teitei i roto i te mau mea o teie nei ao. Noa ˈtu e ua haapiihia o Paulo i te paari o teie nei ao, ua patoi oia i te haafaahiahia ˈtu ia ˈna i mua i te mau Heleni na roto i te faaiteiteraa i teie ite no ˈna ra. (Ohipa 22:3) Ua paraparau oia e ua papai oia na roto i te reo Heleni paraparauhia e te nunaa, maoti hoi i te reo Heleni tahito. Ua parau atu o Paulo i to Korinetia e: “Ia ˈu hoi i haere atu ia outou na, e au mau taeae, aore au i haere atu ma te parau ahaaha e te paari, i te parauraa ˈtu ia outou i te [parau aro moˈa a] te Atua. . . . E ere hoi ta ˈu parau e ta ˈu aˈoraa i te parau taparu no te paari o te taata nei, parau atu râ vau ma te faaite papu a te Varua e te mana: ia ore to outou faaroo ia faatumuhia i te paari o te taata nei, i te mana râ o te Atua.”—Korinetia 1, 2:1-5.

15. Eaha ta Petero e haamanaˈo ra i te feia faaooo i te parau apî maitai, e mea nafea te tupuraa no teie nei tau e tuea ˈi i to te tau o Noa?

¹⁵ I teie mau mahana hopea, te faahaamanaˈohia ra te feia faaooo i te parau apî maitai no nia i te ao apî a te Atua i mua nei e te hopea o teie ao e fatata maira, e te aposetolo Petero e ‘ua roohia [te ao o te tau o Noa] i te haamouraa i te diluviraahia e te pape.’ (Petero 2, 3:3-7) I mua i taua haamouraa ra, eaha ta Noa i rave? E rave rahi o te manaˈo ra e e taata patu araka noa oia. Tera râ, te parau ra o Petero e i to te Atua faatupuraa i te Diluvi i nia i te ao tahito, ua ‘faaora ihora [Oia] ia Noa, e taata poro i te parau-tia, e na feia toohitu ra.’ (Petero 2, 2:5) Na roto i to ratou paari no teie nei ao, eita e ore e ua faaooo taua feia paieti ore hou te Diluvi ra i te mea ta Noa i poro e ua pii ratou ia ˈna e taata maamaa, aore ta ˈna parau e tupu, e te ore e tano ia ravehia. I teie mahana, te faaruru atoa nei te mau kerisetiano mau i teie huru tupuraa, inaha, ua faaau Iesu i to tatou nei ui i to te tau o Noa ra. Noa ˈtu râ te feia faaooo, ua hau atu te pororaa i te parau apî maitai o te Basileia i te tahi noa parau faufaa ore. Mai te pororaa i ravehia e Noa ra, ua riro oia ei parau ora no te taata poro e tae noa ˈtu no te feia e faaroo mai ia ˈna!—Mataio 24:37-39; Timoteo 1, 4:16.

‘Te riroraa ei feia maamaa no te riro mai ei feia paari’

16. Eaha te roohia i te paari o teie nei ao i Aramagedo, e o vai te ora ˈtu i roto i te ao apî a te Atua?

¹⁶ Fatata roa, i Aramagedo, e rave te Atua ra o Iehova ia mou roa “te paari o te feia paari.” E tumâ oia i ‘te ite o te feia ite’ o te tohu nei e mea nafea ta ratou faanahoraa o te ao apî e hopoi mai ai i te oraraa maitai aˈe no te huitaata nei. E vavahi roa “te tamaˈi i taua mahana rahi o te Atua Puai hope ra” i te maramarama, te philosopho, e te paari atoa o teie nei ao. (Korinetia 1, 1:19; Apokalupo 16:14-16) Te feia anaˈe o te ora ˈtu i taua tamaˈi ra e o te fanaˈo i te ora i roto i te ao apî a te Atua, o te feia ïa o te faaroo i te mea ta teie nei ao e pii ra e mea maamaa—oia hoi, te parau apî maitai o te Basileia hanahana o Iehova.

17. Mea nafea to te mau Ite no Iehova riroraa ei ‘maamaa,’ e eaha te opuaraa papu a te feia poro i te parau apî maitai a te Atua?

¹⁷ Aita te mau Ite no Iehova, tei arataihia e to ˈna varua, e haama ra i te poro i ta te ao nei e pii ra e mea maamaa. Maoti i te tamata i te riro ei feia paari ia au i to teie nei ao, ua riro mai ratou ei feia ‘maamaa.’ Mea nafea ïa? Mea na roto ïa i te raveraa i te ohipa pororaa i te Basileia ia riro mai ratou ei feia paari, mai ta Paulo i papai ra: “Te manaˈo ra te hoê taata i roto ia outou na, e e taata paari oia i teie nei ao, ia riro oia ei maamaa, ia paari oia.” (Korinetia 1, 3:18-20) Ua ite te feia poro i te parau apî maitai a Iehova i te faufaa o ta ratou poroi faaora e te tamau noa nei ratou i te poro i te reira ma te ore e faaea e tae roa ˈtu i te hopea o teie nei ao e o to ˈna paari i te tamaˈi o Aramagedo. Fatata roa, e faatiamâ te Atua ra o Iehova i to ˈna tiaraa arii na te ao atoa nei e e horoa oia i te ora mure ore na te feia atoa e tiaturi nei e e faaohipa nei i ‘te maamaa o te mea e porohia ra.’

[Nota i raro i te api]

Eaha ta outou e pahono mai?

◻ Eaha na paari e piti e vai nei?

◻ Eaha te hapa matamua o te paari o teie nei ao?

◻ No te aha te pororaa i te parau apî maitai i riro ai ei ohipa tano roa ˈˈe ia rave?

◻ Eaha te fatata roa i te roohia i te taatoaraa o te paari o te ao nei?

◻ No te aha eita te mau Ite no Iehova e haama i te poro i ta te ao nei e pii ra e mea maamaa?

[Hohoˈa i te api 23]

Ua titau te mau Heleni i te paari o teie nei ao e ua faariro pinepine ratou i te pororaa a Paulo ei mea maamaa