Te mau mahana hopea—Eaha ïa to muri iho noa mai?

“E ore e mou teie nei ui e hope ai teie nei mau mea atoa i te tupu.” — Iesu Mesia, Mataio 24:34.

TO IESU faataaraa ˈtu i te parau no nia i “te tapao (...) o te hopea o te amuiraa o te mau mea nei”, ua parau ihora oia i ta ˈna ra mau pǐpǐ o tei maere roa, i te mau parau i faahitihia ˈtu i nia nei. Eaha râ ta Iesu e hinaaro ra e haapapu na roto i te parau ra “ui”? Eaha te mau tupuraa o te aratai tia ˈtu i te hopea o te amuiraa o te mau mea nei? Aore ra eaha ïa ta tatou e tiai ra i te mau tau e fatata maira?

Eaha te maoro o te hoê ui?

Ia au i te Vea no te legiona marite (beretane), ua faaô 4 743 826 mau tane e mau vahine marite i roto i te Tamaˈi rahi Matamua o te ao nei. I te matahiti 1984 râ, e 272 000 anaˈe i rotopu ia ratou te ora noa ra, e te pohe ra ratou ia au i te faito iva i te hora. I teie nei mahana, e nehenehe anei e parauhia e ua mou te ui o te matahiti 1914?

Te parau heleni no te “ui” o généa ïa ta Mataio, Mareko e Luka i rave no te faahitiraa i te mau parau a Iesu. E rave rau to ˈna mau auraa ia faaau-anaˈe-hia e te taatoaraa o te mau parau. Teie râ, te faataa ra te Titionare apî no te mau nunaa atoa i te pae tuatapaparaa i te parau no nia i te Atua no te Faufaa Apî (beretane) i te reira parau mai teie te huru: “Te feia i fanauhia i te hoê anotau (...). Te tahi atu â auraa no roto mai i teie: te taatoaraa o te feia e ora i te hoê â taime e te tahi atu taata, te hoê tau.” Te haapapu ra te Titionare heleni-beretane no te Faufaa apî e: “Te taatoaraa o te feia i fanauhia i te hoê â taime e, i to ˈna auraa aano atu â, te feia atoa e ora ra i roto i te hoê taime haapaohia no te hoê ui, te feia no te hoê â tau.” Te faataa ra taua parau ra i te feia i fanauhia i te tau o te hoê tupuraa taa ê e te feia atoa e ora ra i te taime a tupu ai oia.

Te faˈi ra o J. Bengel i roto i ta ˈna ra Tuatapaparaa no nia i te mau parau e vai ra i roto i te Faufaa Apî (beretane) e: “No te mau ati Hebera (...) e taiohia ïa 75 matahiti no te hoê ui, e te horoa ra te parau ra e ore e mou i te manaˈo e e mou te rahiraa o te mau melo no taua ui ra [no to Iesu ra anotau] eiaha râ te taatoaraa, hou e tupu ai te mau mea atoa.” Parau mau, aita te taatoaraa o taua ui ra i mou i te matahiti 70 i te haamouraahia Ierusalema.

Mai te reira atoa ïa, no to tatou nei mau mahana, ua pohe te rahiraa o te mau melo no te ui o te matahiti 1914 ra. Teie râ, te vai râ i roto i te ao nei te mau milioni taata tei fanauhia i taua matahiti ra. E noa ˈtu e te iti noa maira te numera o taua mau taata ra, e tupu iho â te parau a Iesu e: “e ore e mou teie nei ui e hope ai teie mau mea atoa i te tupu.” Te vai nei râ te tahi tumu ê atu e nehenehe ai tatou e tiaturi e te fatata maira te mahana o Iehova mai te haereraa mai o tei eiâ i te po ra. Eaha ïa te mau tupuraa o ta te mau kerisetiano o te vai ara noa ra, e tia ia tamoemoe?

“E hau, e aita e ino”—Fatata roa anei?

“Ua ite papu hoi outou iho, e te haere maira taua mahana o te Fatu ra, mai te haereraa mai o te eiâ i te po ra. E parau hoi te taata e, E hau, e aita e ino, ei reira ra ratou e roohia-noa-hia mai ai e te pohe oioi.” — Tesalonia 1, 5:2, 3.

Mai te hopea mai â o te Piti o te Tamaˈi rahi o te ao nei i te matahiti 1945 ra, te vai ra te au-ore-raa i rotopu i te Etats-Unis e to Rusia, e te mǎtaˈu noa nei te huitaata i te tamaˈi. Ua tupu te hoê faaûraa atâata mau i te matahiti 1962 no te fifi i te pae no te mau mauhaa atomi maoˈahia na te reva teitei i Cuba. I to te mau Rusia tatararaa mai ia ratou, i reira te mau Marite tatara-huna-raa ˈtu i ta ratou iho mau mauhaa e vai ra i Turquie. O te hoê noa ïa tuhaa o te mau tupuraa e rave rahi o te au ore e vai ra i rotopu i te mau hau.

Ua riro te faaitiraa mai e aore ra te faaoreraa i te mau mauhaa tamaˈi o te tauaparau-rahi-hia a hia ˈtura ahuru matahiti i teie nei, ei ravea politita no na fenua toopiti. I teie nei râ mahana, te fatata ra te hope te peretiteniraa a Reagan tane e te faaiti nei te polititaraa no te glasnost (ateate) a M. Gorbatchev i te mau faateimaharaa, ua faahiti-pinepine-hia ïa te parau no te faaitiraa aore ra te faaoreraa i te mau mauhaa tamaˈi atomi. O te mau taahiraa avae matamua anei ïa te reira no te haamau i te tahi huru hau e te ino ore i nia i te fenua nei? Aita tatou i ite noa ˈˈe. Te tiai nei râ te mau kerisetiano e tiaturi ra i te mau parau tohu a te Bibilia, i te hoê pororaa mai teie te huru. Eaha te tupu mai i te reira taime?

Mai te peu e, no roto mai teie piiraa “Hau e aita e ino!” i te mau Hau Amui (O.N.U.) aore ra i te mau hau rahi iho, eita ïa te mau kerisetiano e haapii maite ra i te mau Papai e vare i te reira. Oia mau, te haapapu maitai maira te Bibilia e no ǒ mai anaˈe ïa te hau e te ino ore mau i te Basileia o te Atua, faaterehia mai ma te parau-tia e te Mesia.

No taua ïa tumu ra te parau faaite rahi e hau e aita e ino i te ao taatoa nei e faatupuhia e te mau faatere o te ao nei, e riro mai ai ei tapao e ua haamata te Atua i te ohipa mai “te haerea mai o te eiâ i te po ra”, e e hitimahuta ïa te ao paieti ore ra. E tae mai “te haamouraa taue” i nia i te mau faanahonahoraa faaroo e politita o te haavahavaha ia Iehova e to ˈna ra mau Ite. No te aha tatou i papu ai i te reira? — Tesalonia 1, 5:3.

Te ohipa papu a tei parahi i nia iho i te puaahorofenua teatea

No nia i te taata faahoro puaahorofenua e maha ra, te toe nei ïa te hoê o ta tatou i ore â i faahiti i te parau: te taata matamua, tei parahi i nia i te puaahorofenua teatea. Te faataa ra te Bibilia ia ˈna i te na ôraa e: “Ua hiˈo atura vau, e inaha e puaahorofenua teatea e e fana ta tei parahi i nia ihora, e e korona tei horoahia mai na ˈna: haere atura oia ma te haapau atu, e ia pau atu â.” Te faahiti-atoa-hia ra te parau no taua taata ra i roto i te Apokalupo pene 19: “E inaha, e puaahorofenua teatea, e o tei parahi i nia ihora, ua parauhia oia, e Haapao mau ta ˈna e Te Parau mau, e haava oia, e te tamaˈi hoi i te tamaˈi ma te parau-tia ra. (...) E e ˈoˈe ooi tei na roto mai i tana vaha, ei tairiraa na ˈna i te mau fenua ra; e tavana oia i nia iho ia ratou ma te sepeta auri ra.” O vai ïa oia? Te parau ra teie iho â irava e e iˈoa to ˈna: “O te Arii o te mau arii, e te Fatu o te mau faru ra.” O te Tamaiti a te Atua o tei faatia-faahou-hia mai, o Iesu Mesia. — Apokalupo 6:2; 19:11-16.

No te aha ïa te “Arii o te mau arii” e ohipa ˈi? E tae te hoê taime i reira “te arii no apatoerau” (te pae au o te mau nunaa patoi i te mau capitalistes) e “te arii no apatoa” (te mau nunaa capitalistes i raro aˈe i te faatereraa a te mau Etats-Unis) e haaparuparu ai te tahi i te tahi, mai ta te pene 11 a Daniela e haapapu maira. (Ia au te Daniela 11:40, ua haru aˈena “te arii no apatoerau” e rave rahi mau fenua mai te matahiti 1945 mai âa.)

No reira ïa, eaha te tahi atu â mau tupuraa o ta tatou e ite hou te Atua e ohipa ˈi no te haamou i te amuiraa o te mau mea e vai nei?

Te faaite maira te parau tohu a te Bibilia e e huri tia ˈtu te mau melo politita no te pae aui o te mau Hau Amui (O.N.U.) ia tae i te hoê taime no te aro atu i te mau haapaoraa o te ao nei, e rave ra i te mau ohipa o te ore e tia ia ˈna ia haapao, no te faaite i to ratou huru mau e no te faaore roa i ta ratou faatereraa i nia i te mau taata faaroo ohie noa. — Apokalupo 17:16, 17b.

E aro-atoa-hia te mau Ite no Iehova ia haamou-anaˈe-hia te mau melo atoa o te haapaoraa hape. Na roto i taua ohipa ra e haamata ˈi te Arii faataahia e Iehova, maoti o tei parahi i nia iho i te puaahorofenua teatea i te aro atu ia ratou (Ezekiela 38:10-12, 21-23). Eaha ïa te hopea o taua aroraa ra? Ia au i te Daniela 2:44, “ia tae i te anotau o taua mau arii ra [te mau hau politita e vai ra], e faatupu ai te Atua o te raˈi ra i te hoê basileia, o te ore roa ïa e mou, (...) e hope roa hoi taua mau basileia ra i te parari e e pau, e vai tera e a muri noa ˈtu”. I Aramagedo, te tamaˈi ta te Atua e faatupu i nia i te mau melo politita o te faanahonahoraa ite-mata-hia a Satani, e roaa mai ïa ia Iehova e te Arii o te mau arii te re taatoa. — Apokalupo 16:14-16; 19:17-21.

Eaha ïa te tupu mai i muri iho? E ite ïa te mau kerisetiano o te here ra i te hau e o te mǎtaˈu ra i te Atua te tupuraa te mea o ta ratou i ani e mea maoro i teie nei i roto i ta ratou pure: te faatereraa tausani matahiti a te Basileia o te Atua i nia i te huitaata faaroo. I reira e tupu ai te mau parau tǎpǔ faahiahia mau i papaihia i roto i te Apokalupo 21:3, 4: “Inaha, tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, te mauiui, e ore atoa ïa, no te mea ua mou te mau mea tahito ra.”

Mai te peu e e hinaaro outou i te ite hau atu â no nia i teie mau parau tohu faahiahia mau a te Bibilia e i to ratou auraa mau, a haere atu farerei i te mau Ite no Iehova o to outou fenua e aore ra a papai atu i te amaa o to outou fenua.

[Nota i raro i te api]

[Parau iti faaôhia i te api 14]

Ui: “Te taatoaraa o te feia i fanauhia i te hoê â taime e, i to ˈna auraa aano atu â, te feia atoa e ora ra i roto i te hoê taime haapaohia no te hoê ui, te feia no te hoê â tau.” — Titionare heleni-beretane no te Faufaa apî.

[Parau iti faaôhia i te api 16]

Te faaite maira te parau tohu a te Bibilia e e huri tia ˈtu te mau melo politita no te pae aui o te mau Hau Amui (O.N.U.) ia tae i te hoê taime no te aro atu i te mau haapaoraa o te ao nei, e rave ra i te mau ohipa o te ore e tia ia ratou ia haapao.

[Hohoˈa i te api 15]

I muri aˈe ia Aramagedo, i roto i te ao apî i reira e vai ai te hau e te parau-tia ta te Atua e haamau, ‘e ore ai te mau mea tahito ra’. — Apokalupo 21:3, 4.