Ua ineine anei outou no te mahana o Iehova?

“Ua fatata te mahana rahi o Iehova, te fatata maira, te peepee maira i te haere.”—ZEPHANIA 1:14.

1. Mea nafea to te mau Papai faataaraa i te mahana o Iehova?

E FATATA te “mahana rahi riaria” o Iehova i te tae mai i nia i teie faanahoraa ino o te mau mea. Te faataa ra te mau Papai i te mahana o Iehova mai te hoê mahana aroraa, poiri, riri, ahoaho, riaria, rurutaina, e te vai ano. Tera râ, te vai ra te mau taata e ora mai, no te mea ‘o tei tiaoro i te iˈoa ra ia Iehova, o te faaorahia ïa.’ (Ioela 2:30-32; Amosa 5:18-20) Oia, e haamou ïa te Atua i to ˈna mau enemi e e faaora oia i to ˈna nunaa.

2. No te aha e tia ia tatou ia haafaufaa i te ru o te mahana o Iehova?

² Ua haafaufaa te mau peropheta a te Atua i te ru o te mahana o Iehova. Ei hiˈoraa, ua papai o Zephania e: “Ua fatata te mahana rahi o Iehova, te fatata maira, te peepee maira i te haere.” (Zephania 1:14) E mea ru roa ˈtu â ïa i teie tau, no te mea e fatata te Mauhaa Rahi a te Atua, te Arii ra o Iesu Mesia, i te ‘tatua i ta ˈna ˈoˈe i nia i to ˈna humaha e i te horo no te faatupu i te parau mau, te mǎrû, e te parau-tia.’ (Salamo 45:3, 4) Ua ineine anei outou no taua mahana ra?

Ua tiai rahi ratou

3. Eaha ta te tahi mau Kerisetiano no Tesalonia i tiai na, e no teihea nau tumu e piti i hape ai ratou?

³ E rave rahi o tei tiai na i te mahana o Iehova, aita râ i tupu. Ua parau vetahi mau Kerisetiano matamua no Tesalonia e, ‘Ua tae mai te mahana o Iehova!’ (Tesalonia 2, 2:2, MN) Tera râ, te vai ra e piti tumu rahi i ore ai taua mahana ra i fatata i te tae mai. Teie ta te aposetolo Paulo i parau no nia i te hoê o teie nau tumu: “E parau hoi te taata e, E hau, e aita e ino, ei reira ra ratou e roohia-noa-hia mai ai e te pohe oioi.” (Tesalonia 1, 5:1-6) I roto i teie “tau hopea,” te tiai nei tatou i te tupuraa o taua mau parau ra. (Daniela 12:4) Ua ere-atoa-hia to Tesalonia i te tahi atu haapapuraa e ua tae mai te mahana rahi o Iehova, no reira o Paulo i parau atu ai ia ratou e: “O te [“ohipa apotata,” MN] te tupu na na mua e tae ai i taua mahana ra.” (Tesalonia 2, 2:3) I to Paulo papairaa i teie mau parau (i te area matahiti 51 o to tatou tau), aitâ “te ohipa apotata” no roto mai i te Kerisetianoraa mau, i parare roa ˈtura. I teie mahana, te ite nei tatou e te aano rahi nei oia i roto i te Amuiraa faaroo kerisetiano. Noa ˈtu râ e aita ta ratou mau tiairaa i tupu, ua noaa i taua mau taata haapao maitai ra i faatavaihia no Tesalonia, o tei tamau i te tavini i te Atua ma te taiva ore e tae noa ˈtu i te pohe, te haamauruururaa i nia i te raˈi. (Apokalupo 2:10) E haamauruuru-atoa-hia tatou, mai te peu e e vai haapao maitai noa tatou a tiai noa ˈi i te mahana o Iehova.

4. (a) I roto i te Tesalonia 2, 2:1, 2, ua faatuatihia te mahana o Iehova i te aha? (b) Eaha te mau manaˈo o te feia i piihia te mau Metua o te Ekalesia, no nia i te hoˈiraa mai o te Mesia e te mau mea i taaihia i te reira?

⁴ Te faatuati ra te Bibilia i “te mahana rahi o Iehova” i “te [“vairaa,” MN] mai o to tatou Fatu o Iesu Mesia ra.” (Tesalonia 2, 2:1, 2) Ua rau te manaˈo o te feia i piihia te mau Metua o te Ekalesia, no nia i te hoˈiraa mai o te Mesia, to ˈna vairaa mai, e ta ˈna Faatereraa Tausani Matahiti. (Apokalupo 20:4) I te senekele 2 o to tatou tau, ua turu o Papias no Hierapoli i te mau tiaturiraa no nia i te hotu faahiahia o te fenua i te roaraa o te Faatereraa Mileniuma a te Mesia. Ua paraparau noa na o Justin Maratiri no nia i te vairaa mai o Iesu, e ua tiaturi oia e tei Ierusalema haamau-faahou-hia te pu o To ˈna Basileia. Ua haapii atu o Irénée no Lyon e, i muri aˈe i te haamouraahia te Hau Emepera Roma o Iesu e fa mai ai ma te iteahia e te mata taata, e ruuruu ai oia ia Satani, e e faatere ai oia i Ierusalema i nia i te fenua nei.

5. Eaha ta te tahi feia ite i parau no nia i te “Piti o te Faraa mai” o te Mesia e ta ˈna Faatereraa Mileniuma?

⁵ Ua tapao te taata tuatapapa aamu ra o Philip Schaff e “te haapiiraa rahi roa ˈˈe” i te tau hou te Apooraa no Nicée i te matahiti 325 o to tatou tau, o “te tiaturiraa ïa e e faatere mai te Mesia ma te iteahia e te mata taata, ma te hanahana i nia i te fenua nei e te feia moˈa i faatiahia mai, e tausani matahiti te maoro, hou te tia-faahou-raa e te haavaraa rahi.” Teie ta te hoê titionare (A Dictionary of the Bible), neneihia e James Hastings, e parau ra: “Te tiai noa ra o Tertullien, o Irénée, e o Hippolyte i te hoê Fa-oioi-raa mai [o Iesu Mesia]; tera râ, auaa te mau Metua no Alesanederia, te faura maira te hoê huru manaˈo apî. . . . I to Augustin faatuearaa i te Mileniuma e te tau o te Ekalesia e ohipa ra, ua faanuuhia te Piti o te Faraa mai no te hoê tau maoro a muri aˈe.”

Te mahana o Iehova e te vairaa mai o Iesu

6. No te aha eiaha tatou e manaˈo e mea atea â te mahana o Iehova?

⁶ Ua faatupu te mau manaˈo hape i te mau inoinoraa, tera râ, eiaha tatou e manaˈo e mea atea â te mahana o Iehova. Ua haamata aˈena te vairaa mai itea-ore-hia o Iesu, o tei taaihia ia au i te mau Papai i taua mahana ra. Ua horoa pinepine Te Pare Tiairaa e te tahi atu mau papai a te mau Ite no Iehova i te haapapuraa i roto i te mau Papai, e ua haamata te vairaa mai o te Mesia i te matahiti 1914.a No reira, eaha ta Iesu i parau no nia i to ˈna vairaa mai?

7. (a) Eaha vetahi mau tuhaa o te tapao o te vairaa mai o Iesu e te hopea o te faanahoraa o te mau mea? (b) Nafea tatou e nehenehe ai e ora ˈtu?

⁷ Ua riro te vairaa mai o Iesu ei tumu parau tauaparauraa na mua noa ˈˈe i to ˈna poheraa. I muri aˈe i to ratou faarooraa ia ˈna i te tohuraa e e haamouhia te hiero o Ierusalema, ua ani atura ta ˈna mau aposetolo ra o Petero, o Iakobo, o Ioane, e o Anederea e: “E faaite mai oe ia matou i te tupuraa o taua mau mea nei? e te tapao o to oe [“vairaa,” MN] mai e te hopea o teie nei ao?” (Mataio 24:1-3; Mareko 13:3, 4) Ei pahonoraa, ua tohu o Iesu e e tupu te tamaˈi, te oˈe, te aueueraa fenua, e te tahi atu mau tuhaa o “te tapao” o to ˈna vairaa mai e te hopea o te faanahoraa o te mau mea. Ua parau atoa oia e: “Te mau papu e tae noa ˈtu i te hopea ra, oia te ora.” (Mataio 24:13) E ora mai tatou, mai te peu e e mau papu tatou ma te haapao maitai e tae noa ˈtu i to tatou poheraa aore ra te hopea o teie faanahoraa ino.

8. Hou te hopea o te faanahoraa ati Iuda, eaha tei tia ia ravehia, e eaha te ravehia ra i teie mahana?

⁸ Hou te hopea e tae mai ai, e tupu te hoê tuhaa rahi taa ê o te vairaa mai o Iesu. Teie ta ˈna i parau no nia i te reira: “E parau-haere-hia te [“parau apî maitai,” MN] o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) Hou to Roma haamouraa ia Ierusalema e te hoperaa te faanahoraa o te mau mea ati Iuda i te matahiti 70 o to tatou tau, ua nehenehe o Paulo e parau e, ua “faaite-haere-hia [te parau apî maitai] i te taata atoa i raro aˈe i teie nei raˈi.” (Kolosa 1:23) I teie râ mahana, te rave nei te mau Ite no Iehova i te hoê ohipa pororaa rahi roa ˈtu â “e ati noa ˈˈe teie nei ao.” I teie mau matahiti i mairi aˈenei, ua iriti te Atua i te uputa no te poro rahi i Europa Hitia o te râ. Ua ineine te faanahonahoraa a Iehova, na roto i te mau fare neneiraa e te tahi atu â mau fare na te ao nei, no te ohipa rahi atu â, i roto atoa i “te tuhaa fenua i ore i naeahia.” (Roma 15:22, 23, MN) Te turai ra anei to outou mafatu ia outou ia rohi i roto i te pororaa hou te hopea e tae mai ai? Mai te peu e oia, e nehenehe te Atua e faaitoito mai ia outou ia apiti ma te oaoa i roto i te ohipa e toe nei.—Philipi 4:13; Timoteo 2, 4:17.

9. Eaha te manaˈo ta Iesu i faahiti, mai tei faatiahia i roto i te Mataio 24:36?

⁹ Te tupu nei te ohipa pororaa o te Basileia e te tahi atu mau tuhaa o te tapao o te vairaa mai o Iesu, i tohuhia, i teie nei â mahana. Inaha, te fatata maira te hopea o teie faanahoraa ino o te mau mea. Oia mau, ua parau o Iesu e: “Area te reira mahana e te reira hora, e ore roa te hoê e ite, e ore hoi te mau melahi o te raˈi, [“e ore atoa te Tamaiti,” MN]; maori râ o tau Metua anaˈe ra.” (Mataio 24:4-14, 36) E nehenehe râ te parau tohu a Iesu e tauturu mai ia tatou ia ineine no “te reira mahana e te reira hora.”

Ua ineine ratou

10. Mea nafea to tatou iteraa e e nehenehe tatou e vai ara noa i te pae varua?

¹⁰ No te ora ˈtu i te mahana rahi o Iehova, e tia ia tatou ia vai ara noa i te pae varua e ia mau papu i te haamoriraa mau. (Korinetia 1, 16:13) Ua ite tatou e e nehenehe e faaoromai, no te mea ua na reira atoa te hoê utuafare paieti, e ua ora mai ratou i te Diluvi tei haamou i te feia iino i te matahiti 2370 hou to tatou tau. Ma te faaau i taua tau ra e to ˈna vairaa mai, ua parau o Iesu e: “Mai tei te anotau ra ia Noa ra, oia atoa te [vairaa] mai o te Tamaiti a te taata nei. Mai tei te anotau i mua iho i te diluvi ra, te amu ra ratou i te maa e te inu ra, te faaipoipo ra e te horoa ra ia faaipoipohia, e tae roa aˈera i te mahana i tomo ai Noa i roto i te pahi; aore roa i ite, e roohia noa ihora ratou e te diluvi, pau roa ˈtura ratou; oia atoa te [vairaa] mai o te Tamaiti a te taata nei.”—Mataio 24:37-39; MN.

11. Eaha te haerea ta Noa i tapi noa ˈtu te haavîraa uˈana i tupu i to ˈna ra tau?

¹¹ Mai ia tatou, ua ora na o Noa e to ˈna utuafare i roto i te hoê ao haavî. Ua rave te mau “tamarii a te Atua [“mau,” MN] ra” oia hoi te mau melahi faaroo ore, i te tino taata, e ua taati ihora i te mau vahine o tei fanau mai i te mau tamarii tei piihia te mau Nephilimi iino—e mau taata haavî o tei faaino roa ˈtu â i te huru oraraa. (Genese 6:1, 2, 4; Petero 1, 3:19, 20) Tera râ, “ua au to Noa haerea i te Atua [“mau,” MN],” i roto i te faaroo. E ‘taata hau oia i te parau-tia e te piˈo ore i to ˈna ra ui’—te ui ino i to ˈna ra tau. (Genese 6:9-11) Ma te tiaturi haavare ore i te Atua, e nehenehe atoa tatou e na reira i roto i teie ao haavî e te ino a tiai noa ˈi tatou i te mahana o Iehova.

12. (a) Taa ê noa ˈtu i te tarairaa i te araka, eaha te ohipa ta Noa i rave? (b) Eaha te huru o te taata i nia i te pororaa a Noa, e eaha te mau faahopearaa ta ratou i ite?

¹² Ua matau-maitai-hia o Noa mai te taata o tei tarai i te hoê araka no te ora mai i te Diluvi. E “taata [“poro,” MN] i te parau-tia” atoa oia, area te feia o to ˈna tau ra, “aore roa i ite” i ta ˈna poroi no ǒ mai i te Atua ra. Ua amu ratou i te maa e ua inu, ua faaipoipo, ua fanau i te tamarii, e ua tamau noa ratou i te rave i te mau ohipa matauhia o te oraraa e roohia noa ihora ratou i te Diluvi. (Petero 2, 2:5; Genese 6:14) Aita ratou i hinaaro e faaroo i te parau no nia i te paraparauraa e te haerea tia, mai te ui ino o teie tau atoa, o te tapiri nei i to ratou tariˈa i te mea o ta te mau Ite no Iehova e parau ra no nia i “te tatarahapa i te Atua,” te faaroo i roto i te Mesia, te parau-tia, e “te haavaraa a muri atu.” (Ohipa 20:20, 21; 24:24, 25) Aita e aamu e vai ra no te faaite mai e ehia rahiraa taata i ora na i nia i te fenua nei, i to Noa faaite-haere-raa i te poroi a te Atua. Te mea papu râ, oia hoi ua haamou-roa-hia te mau taata i nia i te fenua nei i te matahiti 2370 hou to tatou tau! Ua haamou te Diluvi i te feia iino, ma te faaora anaˈe i te feia i ineine no taua ohipa a te Atua ra—Noa e na melo e hitu o to ˈna utuafare.—Genese 7:19-23; Petero 2, 3:5, 6.

13. Ua tiaturi roa o Noa i teihea parau haavaraa, e mea nafea to ˈna ohiparaa ia au i te reira?

¹³ Aita te Atua i faaite atea ia Noa e mau matahiti na mua ˈˈe, i te taio mahana e te hora tia e tupu ai te Diluvi. I te 480raa râ o to Noa matahiti, teie ta Iehova i parau: “E ore roa tau [v]arua e mârô i te taata nei e a muri noa ˈtu, e taata hoi oia: e teie nei, o to ratou pue mahana e toe nei, hoê ïa hanere, e piti ahuru i te matahiti.” (Genese 6:3) Ua tiaturi roa o Noa i teie parau haavaraa no ǒ mai i te Atua ra. I te naearaahia ia ˈna e 500 matahiti, ua “fanau ihora ta ˈna o Sema, o Hama, e o Iapheta,” e ia au i te peu matauhia i taua tau ra, ua mairi e 50 e tae atu i te 60 matahiti, hou ta ˈna mau tamaiti i faaipoipo ai. I to Noa faaueraahia ia tarai i te araka no te ora mai i te Diluvi, papu maitai, ua tauturu taua mau tamaiti ra e ta ratou mau vahine ia ˈna i roto i taua ohipa ra. Ua tuea te tarairaa i te araka i te taviniraa a Noa ei “taata poro i te parau-tia ra,” a tamau noa ˈi oia i te haa i te maororaa e 40 e tae atu i te 50 matahiti hou te Diluvi. (Genese 5:32; 6:13-22) I te roaraa o taua mau matahiti ra, ua ohipa oia e to ˈna utuafare i roto i te faaroo. E faaite atoa anaˈe ïa i te faaroo a poro ai tatou i te parau apî maitai e a tiai noa ˈi i te mahana o Iehova.—Hebera 11:7.

14. E eaha ˈtura ta Iehova i parau ia Noa, e no te aha?

¹⁴ A fatata ˈi te araka i te oti, ua manaˈo paha o Noa e te fatata maira te Diluvi, noa ˈtu e aita oia i ite i te taime tia e tupu ai te reira. E ua parau atura o Iehova ia ˈna e: “E hitu â rui toe e haamairi mai ai au i te ûa i nia i te fenua nei, e ia piti taau rui, e ia piti taau ao.” (Genese 7:4) Ua navai noa te taime no Noa e to ˈna utuafare, no te faahaere i te mau huru animala atoa i roto i te araka e ia tomo atoa ratou i roto, na mua ˈˈe te Diluvi a tupu ai. Aita e faufaa ia ite tatou i te mahana e te hora e haamata ˈi te haamouraa o teie faanahoraa; aita tatou i faauehia ia faaora i te mau animala, e te haamata nei te feia e nehenehe e ora, i te tomo i roto i te araka taipe, te paradaiso pae varua a te nunaa o te Atua.

“E ara”

15. (a) Na roto i ta outou iho mau parau, nafea outou ia faataa i te mau parau a Iesu i roto i te Mataio 24:40-44? (b) No te mea hoi aita tatou i ite i te taime tia o Iesu e haere mai ai no te faatupu i te tahooraa a te Atua, eaha ta te reira e turai ra ia tatou ia rave?

¹⁵ Teie ta Iesu i faataa no nia i to ˈna vairaa mai: “Toopiti pue taata [e ohipa] i roto i te aua ra; e riro te tahi, e ora ˈtu te tahi. Toopiti pue vahine i te taviriraa [i te huero ei faraoa ota] i te mule; e riro te tahi, e ora ˈtu te tahi. E teie nei, e ara, aore hoi outou i ite i te hora e tae mai ai to outou Fatu. Ua ite râ outou e, ahiri te taata fare i ite i te hora e tae mai ai te eiâ, e riro oia i te ara, e ore e vaiiho noa i to ˈna fare ia vavahi-noa-hia na. E teie nei, ia parahi ineine noa outou; ei te hora manaˈo-ore-hia e outou na e tae mai ai te Tamaiti a te taata nei.” (Mataio 24:40-44; Luka 17:34, 35) No te mea hoi aita tatou i ite i te taime tia o Iesu e haere mai ai no te faatupu i te tahooraa a te Atua, e vai ara ïa tatou e e haapapu tatou i te mau mahana atoa e te tavini nei tatou ia Iehova ma te mau hinaaro miimii ore.

16. Eaha te tupu i nia i te feia tei “riro” e te feia e “ora ˈtu”?

¹⁶ I rotopu i te feia tei “riro” i te haamouraa e te feia iino, te vai atoa ra te feia i haamaramaramahia i mutaa ihora, tera râ, ua topa ratou i roto i te hoê huru oraraa miimii. Ia apiti ïa tatou i rotopu i te feia e “ora ˈtu,” te feia tei pûpû taatoa ia ratou no Iehova e tei mauruuru mau no ta ˈna mau faanahoraa pae varua, na roto i te arai o “te tavini haapao maitai e te paari.” (Mataio 24:45-47) E tavini anaˈe i te Atua e tae noa ˈtu i te hopea, ma “te aroha ïa no roto i te aau viivii ore ra, e te [“haava manaˈo,” MN] maitai, e te faaroo haavare ore.”—Timoteo 1, 1:5.

Te mau ohipa moˈa faufaa

17. (a) Eaha tei tohuhia i roto i te Petero 2, 3:10? (b) Eaha vetahi mau ohipa i faaitoitohia ia rave i roto i te Petero 2, 3:11?

¹⁷ Ua papai te aposetolo Petero e: “E tae mai râ te mahana o [“Iehova,” MN] mai te eiâ i te rui ra; e pee ê atu ai teie nei raˈi ma te haruru rahi, e mou hoi te mau mea rii tumu i te veavea rahi, e te fenua hoi e te mau ohipa i nia iho, e pau ïa i te auahi.” (Petero 2, 3:10) Eita te mau raˈi e te fenua taipe e ora i te riri ura o te Atua. No reira o Petero e parau faahou ai e: “E teie nei, e mou anaˈe taua mau mea atoa nei, mai te aha to outou huru e tia ˈi i te [“haerea e te mau ohipa moˈa,” MN] e te paieti!” (Petero 2, 3:11) I rotopu i taua mau ohipa ra, te vai ra te haere-tamau-raa i te mau putuputuraa kerisetiano, te hamani-maitai-raa ia vetahi ê, e te apiti-rahi-raa i roto i te pororaa i te parau apî maitai.—Mataio 24:14; Hebera 10:24, 25; 13:16.

18. Mai te peu e te faatupu ra tatou i te tahi here no te ao nei, eaha te tia ia tatou ia rave?

¹⁸ Te titau ra “te haerea e te mau ohipa moˈa e te paieti” e ‘eiaha tatou ia viivii i teie nei ao.’ (Iakobo 1:27) Tera râ, e mai te peu e te faatupu ra tatou i te tahi here no teie nei ao? Peneiaˈe te hema nei tatou i roto i te hoê tiaraa atâta i mua i te Atua, na roto i te imiraa i te faaanaanataeraa manaˈo viivii aore ra te faarooraa i te upaupa e te mau himene o te faaitoito ra i te feruriraa paieti ore o teie nei ao. (Korinetia 2, 6:14-18) Mai te peu e te reira iho â, e ani anaˈe i te tauturu a te Atua na roto i te pure, ia ore tatou e mou e te ao nei, ia tia ˈtu râ tatou ma te fariihia i mua i te aro o te Tamaiti a te taata. (Luka 21:34-36; Ioane 1, 2:15-17) Mai te peu e ua pûpû tatou ia tatou no te Atua, papu maitai, e hinaaro tatou e rave i te mea maitai aˈe no te faatupu e no te atuatu i te hoê taairaa mahanahana e o ˈna, e ia ineine tatou no te mahana rahi riaria o Iehova.

19. No te aha te nahoa taata poro i te Basileia e nehenehe ai e tiaturi e e ora ˈtu ratou i te hopea o teie faanahoraa ino o te mau mea?

¹⁹ Ua ora mai te taata paieti ra o Noa e to ˈna utuafare mai te Diluvi mai, o tei haamou i te ao no tahito ra. Ua ora mai te feia tia i te haamouraa o te faanahoraa o te mau mea ati Iuda i te matahiti 70 o to tatou tau. Ei hiˈoraa, te ohipa noa ra te aposetolo Ioane i roto i te taviniraa a te Atua i te mau area matahiti 96-98 o to tatou tau, i to ˈna papairaa i te buka Apokalupo, ta ˈna Evanelia, e e toru rata faauruahia. I rotopu i te mau tausani taata o tei farii i te faaroo mau i te Penetekose 33 o to tatou tau, e rave rahi paha tei ora mai i te haamouraa o te faanahoraa ati Iuda. (Ohipa 1:15; 2:41, 47; 4:4) E nehenehe te nahoa taata poro i te Basileia i teie mahana, e tiaturi e e ora ˈtu ratou i te hopea o teie faanahoraa ino o te mau mea.

20. No te aha e tia ia tatou ia riro ei ‘feia poro [itoito] i te parau-tia’?

²⁰ Ma te faaorahia i roto i te ao apî i mua ia tatou, ia riro ïa tatou ei ‘feia poro [itoito] i te parau-tia.’ Auê ïa haamaitairaa e tavini i te Atua i teie anotau hopea! E auê te oaoa ia aratai mai te taata i roto i te “araka” no teie tau, te paradaiso pae varua e fanaˈohia ra e te nunaa o te Atua! Ia vai haapao maitai noa ïa te mau mirioni taata i roto, ia vai ara i te pae varua, e ia ineine no te mahana rahi o Iehova. Tera râ, na te aha e tauturu ia tatou paatoa ia vai ara?

[Nota i raro i te api]

Nafea outou ia pahono?

◻ Eaha ta te tahi mau Kerisetiano no Tesalonia i tiai na no nia i te mahana o Iehova e te vairaa mai o te Mesia?

◻ No te aha tatou e nehenehe ai e parau e ua ineine o Noa e to ˈna utuafare no te Diluvi?

◻ Eaha te tupu i nia i te feia “e ara” ra e te ore e na reira ra?

◻ No te aha mea faufaa te mau ohipa moˈa, a fatata noa mai iho â râ te mahana rahi o Iehova?