Te Amuraa maa a te Fatu

I taua po ra, ua haapii iho nei Iesu i ta ˈna mau aposetolo i te haehaa ma te horoi i to ratou avae. I te otiraa ratou i te amu i te Pasa, faahiti atura oia i ta Davida parau tohu: “Tau hoa here nei hoi i tiaturihia e au ra, tei amu atoa i ta ˈu nei maa, o tei faateitei i to ˈna poro avae ia ˈu nei.” Faataa ˈtura oia: “E tuu atu te hoê o outou ia ˈu i te rima o to ˈu mau enemi.”—Salamo 41:9; Ioane 13:18, 21.

Hiˈo aˈera te mau aposetolo te tahi i te tahi, e ui maira ratou pauroa, o Iuda atoa: “E te Fatu, o vau anei?” Parau atura Petero ia Ioane ia ui atu o vai, to pihai iho hoi oia ia Iesu. Fariu maira Ioane ia Iesu e ui maira: “E te Fatu, o vai ta oe e parau ra?”—Mataio 26:22; Ioane 13:25.

Pahono atura Iesu: “O te taata ïa ta ˈu e horoa ˈtu i te pane ofatihia ta ˈu e tuu i roto i te auˈa.” Tuu atura Iesu i te pane i roto i te hoê auˈa i nia i te amuraa maa, e horoa ˈtura ia Iuda, a na ô ai: “Te reva nei iho â te Tamaiti a te taata nei, mai tei papaihia no ˈna, ua ati râ te taata na ˈna e tuu i te Tamaiti a te taata nei i to ˈna mau enemi! Mea maitai aˈe no tera taata ahani aita oia i fanauhia.” (Ioane 13:26; Mataio 26:24) Tomo ihora Satani i roto ia Iuda. Ua ino ê na teie taata, tuu atura ïa oia ia ˈna iho i te Diabolo a riro atu ai ei “taata o te haamouhia.”—Ioane 6:64, 70; 12:4; 17:12.

Na ô atura Iesu ia Iuda: “Ta oe e rave nei, haaviti atu â ïa i te rave.” Manaˈo ihora te tahi atu mau aposetolo e i te mea tei ia Iuda ra te afata moni, te na ô ra Iesu ia ˈna: “‘A hoo mai i tei hinaaro-mau-hia e tatou no te oroa,’ aore ra ia horoa oia i te tahi mea na te feia veve.” (Ioane 13:27-30) Aita, ua haere Iuda e tuu ia Iesu i to ˈna mau enemi.

I taua noa po ra o te Pasa, haamau ihora Iesu i te hoê oroa apî. Rave maira oia i te hoê pane, pure aˈera i te Atua no te haamaitai i te reira, ofati ihora i te pane e horoa ˈtura i te mau aposetolo ia amu. Na ô atura oia: “O to ˈu tino teie e horoahia no outou. A tamau i te rave i te reira ei manaˈoraa ia ˈu.” (Luka 22:19) Operehia ˈtura te pane ta te mau aposetolo i amu.

Rave maira Iesu i te hoê auˈa uaina, pure aˈera i te Atua no te haamaitai i te reira, e horoa ˈtura i te mau aposetolo. Inu aˈera ratou tataitahi i te uaina i roto i te auˈa, ta Iesu i parau: “Teie auˈa, o te faufaa apî ïa e haamauhia maoti to ˈu toto o te haamaniihia no outou.”—Luka 22:20.

Ua haamau ïa Iesu i te Oroa haamanaˈoraa o to ˈna pohe ta ta ˈna mau pǐpǐ e faatupu i te mau matahiti atoa i te 14 no Nisana. E haamanaˈo te reira eaha ta Iesu e to ˈna Metua i rave e tiamâ ˈi te feia e faaroo to ratou i te utua o te hara e te pohe. Ua hau aˈe teie oroa i te Pasa ati Iuda, o te taata atoa hoi e faaroo to ratou te tiamâ.

Ua parau Iesu e ia “haamaniihia [to ˈna toto] no te taata e rave rahi ia faaorehia ta ratou mau hara,” oia atoa ta ta ˈna mau aposetolo e ta te tahi atu mau pǐpǐ haapao maitai. O ratou te parahi e o ˈna i roto i te Faatereraa arii a to ˈna Metua.—Mataio 26:28, 29.