Mau uiraa a te feia taio
I te tahi mau taime, te faaroo nei tatou i te mau taeae ia paraparau aore ra ia pure e ia haere mai te Basileia o te Atua i nia i te fenua. Mea tano anei taua faahitiraa parau ra?
Ma te tia mau, aita te mau Papai e faaite ra e mea nafea te Basileia e haere mai ai. Tei te raˈi te Basileia o te Atua. No reira, ua nehenehe ïa te aposetolo Paulo e papai e: “E na te Fatu â e faaora ia ˈu i te mau ino atoa ra, e e tiai mai ïa ia ˈu e tae noa ˈtu i to ˈna ra basileia i te ao ra: ei ia ˈna te haamaitai e a muri noa ˈtu. Amene.”—Timoteo 2, 4:18; Mataio 13:44; Korinetia 1, 15:50.
Ua haamauhia te Basileia i nia i te raˈi i te matahiti 1914, e eita roa ˈtu oia e hopoihia i nia i te fenua tei faarirohia ei Paradaiso aore ra i te tahi atu vahi. O Iesu Mesia te Arii o te Basileia. Ei Arii, e mana to Iesu i nia i te mau melahi. No reira, tei te rima atau o te Atua to ˈna parahiraa e au no te faatere i roto i te mau raˈi. E apiti te mau Kerisetiano faatavaihia ia ˈna ei mau arii e ei mau tahuˈa i nia i te raˈi.—Ephesia 1:19-21; Apokalupo 5:9, 10; 20:6.
Te auraa anei eiaha ïa tatou e faatae faahou i te Atua i te mau aniraa e vai ra i roto i te tuhaa o te Pure a te Fatu o te parau nei e: “Ia tae to oe ra hau. Ia haapaohia to oe hinaaro i te fenua nei, mai tei te ao atoa na”? (Mataio 6:10) E ere roa ˈtu, mea tano e e auraa hohonu to taua pure ra.
E ohipa te Basileia o te Atua a muri aˈe i roto i te tuhaa hopea i nia i teie fenua, e te reira te mea o ta tatou e hinaaro ra e pure e ia faaohipa anaˈe tatou hoê â mau pereota e to te Pure a te Fatu. Ei hiˈoraa, te tohu nei te Daniela 2:44 e e “haere mai” te Basileia no te haamou i te mau nunaa atoa e e faatere oia i nia i teie fenua. Te faahiti nei te Apokalupo 21:2 e e pou mai te Ierusalema apî mai nia mai i te raˈi. O na 144 000 Kerisetiano faatavaihia teie Ierusalema apî o te riro ei vahine faaipoipo a te Mesia. E apiti atoa ratou e o Iesu ei feia aiˈa i roto i te Basileia. No reira, te faataa nei te Apokalupo 21:2 i to ratou fariuraa i to ratou ara-maite-raa i nia i te fenua, e te mau haamaitairaa rahi no te huitaata haapao maitai.—Apokalupo 21:3, 4.
Hou teie mau parau tohu faahiahia mau e vetahi atu â e tupu ai, mea tano noâ iho â ia pure i te Atua ra o Iehova ia au i te mau parau a Iesu, “Ia tae to oe ra hau.” Ia tapea râ tatou i roto i te feruriraa e eita te Basileia e haere mai i nia i te palaneta Fenua i roto i te hoê auraa mau. Tei te raˈi te faatereraa o te Basileia, eiaha i nia i te fenua.
[Faaiteraa i te fatu o te hohoˈa i te api 31]
Earth: Based on NASA photo