Te haamanaˈo ra anei outou?
Ua ite anei outou i te faufaaraa o te mau vea hopea nei o Te Pare Tiairaa? A tamata ïa i ta outou e haamanaˈo ra na roto i te mau uiraa i muri nei:
▫ Eaha te tia ia rave ia puta noa mai te tahi mau manaˈo tia ore i roto i to tatou feruriraa?
E tia ia tatou ia taui i to tatou feruriraa, ia haere e ori haere, ia taio, ia rave i te tahi ohipa fare. Ua riro atoa te pure ei tauturu puai mau i roto i teie tuhaa. (Salamo 62:8)—15/4, api 17.
▫ No te aha e tia ˈi i te mau taurearea ia ara i te huru upaupa o ta ratou e faaroo?
E mana to te upaupa no te turai, no te faaara i te hinaaro, e no te faahema. I te mea e e rave rahi mau upaupa au-roa-hia e te taata o te faahiti nei i te hoê numera maere mau o te mau poroi i te pae taatiraa e te huna nei i te tahi mau parau taiata, mea ohie ia ite e e tia ia ara maitai i te maitiraa i te mau pehe, te mau ripene, e te tahi atu mau huru pehe.—15/4, api 20-1.
▫ Eaha te auraa o te parau ‘te vairaa mai o to tatou Fatu ra o Iesu Mesia’? (Tesalonia 1, 5:23)
E tano te reira no te vairaa mai itea-ore-hia o te Fatu ra o Iesu Mesia ei Arii, mai te matahiti 1914, e i muri aˈe i to ˈna faateronoraahia i nia i te raˈi. (Salamo 110:1, 2)—1/5, api 11.
▫ Eaha te opuaraa i faatupuhia na roto i to Iehova tamâraa i to ˈna hiero i te pae varua? (Malaki 3:1-4)
Ua hinaaro o Iehova e ia riro to ˈna hiero ei vahi mâ e ia afaihia mai te mau tiaa rahi o te feia haamori e tiaturi ra e ora i nia i te fenua, e ite ïa ratou i te hoê vahi i reira to ˈna tiaraa arii mana hope e faaturahia ˈi, i reira to ˈna iˈoa e faaraahia ˈi, e i reira ta ˈna mau ture parau-tia e aurarohia ˈi.—1/5, api 16.
▫ Eaha te mau “taoˈa” ta Iesu Mesia e horoa ˈtu i ta ˈna tavini faatoroahia? (Mataio 24:45-47)
E tano teie mau “taoˈa” i te mau faufaa pae varua atoa i nia i te fenua o tei fatuhia mai e te Mesia ia au i to ˈna mana ei Arii i nia i te raˈi. Te vai ra i roto, te hopoia e faariro i te mau taata no te mau nunaa atoa ei pǐpǐ na te Mesia. (Mataio 28:19, 20)—1/5, api 17.
▫ Nafea te mau matahiapo kerisetiano ia faaite i to ratou ‘hinaaro mau’ i te tiairaa i te mamoe, ia au i te faaueraa a Petero i roto i te Petero 1, 5:2?
E rave te matahiapo kerisetiano o te aupuru i te mau mamoe i ta ˈna ohipa tiairaa ma te hinaaro mau, na nia i to ˈna iho hinaaro, i raro aˈe i te aratairaa a te Tiai mamoe Maitai, o Iesu Mesia. Te taviniraa ma te hinaaro mau, oia atoa ïa te auraa e e auraro te hoê tiai mamoe kerisetiano i te mana o Iehova e e faaite oia i te faatura no te faanahoraa teotaratia.—15/5, api 20.
▫ Eaha ta Iesu i hinaaro e parau ia ˈna i faahiti e e tia i te taata e pee mai ia ˈna ia ‘faarue ia ˈna iho’? (Mataio 16:24)
E ‘faarue ia ˈna iho’ oia hoi te auraa e e vaiiho outou e na Iehova e fatu ia outou. (Korinetia 1, 6:19, 20) Te auraa e ora outou, eiaha no te faaoaoa ia outou iho, i te Atua râ. (Roma 14:8)—1/6, api 9.
▫ Eaha te titauhia ia oaoa te hoê taata?
Ia atuatu i te mau taairaa maitatai e o Iehova e ia vai ohipa noa i roto i ta ˈna taviniraa, na te reira e afai mai i te oaoaraa mau i roto i te oraraa o te hoê taata.—1/6, api 22.
▫ No te aha Iehova i vaiiho ai ia Aberahama ia paraparau ia ˈna ma te tapeapea ore no nia i Ta ˈna opuaraa e haamou ia Sodoma? (Genese 18:22-32)
Hoê tumu oia ïa e ua riro o Aberahama ei hoa no te Atua. (Iakobo 2:23) Hau atu, ua taa ia Iehova i te hepohepo o Aberahama. Ua ite te Atua e te ora ra te tamaiti fetii a Aberahama, o Lota, i Sodoma e te haapeapea ra o Aberahama no te maitairaa o Lota. No teie mau tumu, ua farii Iehova i te pahono i te mau uiraa a Aberahama no nia i Ta ˈna opuaraa e haamou ia Sodoma.—15/6, api 16.
▫ Ua tapao anei te Reforomatio Porotetani o te senekele 16 i te hoˈiraa mai i te kerisetianoraa mau?
Aita roa ˈtu! Maoti i te hoˈi mai i te kerisetianoraa mau, ua faatupu te Reforomatio e rave rahi mau ekalesia i te fenua iho aore ra i te tuhaa fenua o tei faaau atu i te mau hau politita e o tei turu ia ratou ma te itoito i roto i ta ratou mau tamaˈi.—1/7, api 10-11.
▫ Eaha te mau ‘taoˈa i nia i te raˈi’ ta Iesu i faahiti i roto i te Mataio 6:20?
O te mau taoˈa ïa o te ore e morohi, oia hoi te hoê iˈoa maitai i mua i te aro o Iehova e te hoê oraraa haapao maitai i roto i te taviniraa kerisetiano. O te mau mea teie e ore roa e moehia ia Iehova. (Hebera 6:10)—1/7, api 32.
▫ Eaha te mau huru maitatai ta Petero e faahiti ra ei mau tuhaa faufaa roa o to tatou faaroo? (Petero 2, 1:5-7)
Ua parau o Petero e e tia i te haerea tura, te ite, te hitahita ore, te faaoromai, te paieti, te aroha autaeae, e te here ia apitihia i to tatou faaroo.—15/7, api 13.
▫ Eaha te faaararaa no te mau tavini a te Atua e vai ra i roto i te faatiaraa no nia i te hara a Davida e o Bate-seba? (Samuela 2, 11:2-4)
Noa ˈtu e e tiamâraa to ˈna no te fanaˈo i te navenave i roto i to ˈna iho faaipoiporaa, ua vaiiho o Davida i te hinaaro tia ore i te pae taatiraa ia rahi roa. I to ˈna iteraa i te haviti o te vahine a Uria, ua vaiiho noa ˈtura oia e ia tupu te manaˈo—e te ohipa—e faanavenave ia ˈna ma te tia ore e teie vahine. E nehenehe atoa te reira e tupu i nia i te tahi tavini a te Atua mai te peu e eita oia e haapae roa i teie huru nounou. (Iakobo 1:14, 15)—1/8, api 14.