Te imi ra anei tatou i te mau taoˈa i hunahia?

“Ia faarahihia mai te maitai e te hau ia outou i te ite i te Atua, ei to tatou Fatu ia Iesu ra.” — PETERO 2, 1:2.

1, 2. Na te aha e horoa i te auro i to ˈna faufaa e to ˈna moni rahi?

NO TE AHA e mea moni roa te auro? Noa ˈtu e e taoˈa auri te reira, mea mǎrû aˈe oia; teie nei râ, e nehenehe te tahi noa tau tarame e hoohia e rave rahi hanere dala marite. Parau mau, mea ohie noa ia faaohipa ia ˈna, e nehenehe e tauiui ia ˈna na roto i te mau ofai maitatai nehenehe mau, mai te tahi mau tapea rima aore ra te mau taoˈa e haaati ra i te rima (Timoteo 1, 2:9; Iakobo 2:2). Teie nei râ, mai te peu e ua moe outou i roto i te medebara, ma te pohe i te poia e te poiha pape, eita outou e nehenehe e amu ia ˈna e e inu ia ˈna. I roto i taua tupuraa ra, e faufaa aˈe no outou te hoê tâpu faraoa aore ra te hoê auˈa raiti e te tahi maa pape iti.

² No te aha râ e e taoˈa faufaa roa te auro? Na mua roa, e ore e ite-pinepine-hia, e mea fifi atoa ia noaa mai i te reira. I te matahiti 1957 ra, ua opanihia aˈera te vahi paheruraa auro piihia Empire, i te pae apatoerau no Kalifornia, no te mea aita e faahotu faahou ra. Ua opehia e te feia e ohipa ra i roto i te vahi paheruraa auro e 1 500 metera i te hohonuraa, e e tia râ ia ratou ia pou e 3 kilometera ma te faatioi, no te tapae i te vahi te vai ra te auro. Tae roa i reira, ua rave te moni rahi o te auro e aita e mâuˈa te mau tutavaraa faufaa i horoahia no te tatara mai ia ˈna.

3. Eaha te taoˈa hunahia ta tatou e nehenehe e paimi?

³ Area o tatou, e nehenehe tatou e paheru ia noaa mai te hoê taoˈa faufaa rahi aˈe i te auro. Eaha ïa taua taoˈa ra? Na te arii paari ra o Solomona e faaite mai ia tatou a fatata 3 000 matahiti i teie nei: “Ia titau hua oe i te haapao maitai, e ia faateitei i to reo ia noaa te ite ra; ia imi hua oe ia ˈna mai te ario ra, e ia paheru hua oe ia ˈna, mai te taoˈa hunahia ra; e ite ïa oe i te mǎtaˈu ia Iehova, e noaa ïa ia oe te ite i te Atua.” A feruri na maa taime iti. E nehenehe e itehia e te mau taata veve mau i “te ite i te Atua”! — Maseli 2:3-5a.

No te aha e mea hinaaro mau na tatou paatoa i te ite mau

4. Eaha te mau tuhaa te tia ia tuuhia i roto i te ite mau o te hoê kerisetiano?

⁴ Mai te tau mai â o te Mesia, ua parare taua ite faufaa mau ra; e rave rahi mau tuhaa i roto i teie nei, ia faaauhia i tei horoahia na i te mau Hebera haapao maitai, taua mau tane e taua mau vahine ra o te tau tahito. No reira Paulo i parau ai e: “Ia horoa mai te Atua o to tatou Fatu ra o Iesu Mesia, te Metua no ˈna te hanahana, i te [v]arua no ˈna te paari e te parau, i faaitehia ra ia outou, ia ite â outou ia ˈna; ia maramarama te mata o to outou aau, ia ite outou i te maitai o ta ˈna parauraa mai, e te rahiraa hoi o te hinuhinu o te tufaa e te feia moˈa ia ˈna ra.” — Ephesia 1:17, 18.

5. No te aha e tia i te mau kerisetiano faatavaihia ia haapao maitai i to ratou ite no nia i te hinaaro o te Atua?

⁵ I taua tau ra, no te mau taeae a te Mesia iho taua aˈoraa ra, te mau kerisetiano i faatavaihia e te varua, e hoê â atoa i teie nei mahana. Ma te faatupu i te piti o te tuhaa o te “huaai” i tǎpǔhia, ua riro taua mau kerisetiano ra, ei mau tapao faahiahia roa na Satani o te hinaaro ra e faatopa ia ratou (Galatia 3:26-29; Ephesia 6:11, 12). E tia i te mau kerisetiano faatavaihia iho â râ, ia haapapu i to ratou piiraa, ma te haafaufaa i te ô horoa-noa-hia o te aroha faito ore a te Atua. No te reira, e tia ia ratou i te mau taime atoa ia faarahi atu â i ta ratou mau faufaa i te pae varua ma te faaara noa i to ratou ite mau no nia i te hinaaro o te Atua e no nia i ta ˈna Parau. — Ephesia 3:7; Hebera 6:4-6; Petero 2, 1:9-12.

6. a) No te aha, e tiaturiraa to tatou e ora i nia i te raˈi aore ra i nia i te fenua nei, e mea hinaaro mau â na tatou paatoa i te ite mau? b) Eaha te tia ia rave e noaa mai ai te ite mau?

⁶ Eaha ˈtura ïa no te feia e tiaturi ra e ora e a muri noa ˈtu i nia i te fenua nei? No te aha e mea faufaa te ite mau no ratou? No te mea aita e faito i roto i te haapao maitai kerisetiano, mai te huru ra ïa e mea teitei aˈe te mau faito i horoahia no te mau kerisetiano i faatavaihia, o te tiaturi ra e ora i nia i te raˈi, i ta te mau mamoe ê atu, o te tiaturi ra e ora i nia i te fenua nei (Ioane 10:16; Petero 2, 3:13). E faaohipa tatou paatoa i te mau faaueraa tumu kerisetiano i roto i te hoê â huru faito. No reira e tia ia tatou paatoa ia faaî tamau noa i to tatou mau “ito” i te pae varua e te ite mau. E ani te reira i te taime e te tahi mau tutavaraa. Oia, e tia ia tatou ia paheru, i te pae varua, no te ite mai i te mau taoˈa i hunahia ra. — Salamo 105:4, 5.

Ia faaherehere anaˈe na tatou i te taime no te paheru

7. a) Eaha te mau ohipa o te nehenehe e haafifi i te noaaraa mai ia tatou i te ite mau? b) Eaha te mau faahopearaa te nehenehe e tupu mai no to tatou tâuˈa-ore-raa i te pae varua?

⁷ I to tatou mau mahana, e rave rahi ohipa ta te mau taata; e mea rahi atu â ïa te ohipa a te mau kerisetiano. Te faatupu nei te mau putuputuraa, te pororaa, te ohipa, te utuafare, te haapiiraa e te tahi atu â mau tuhaa o to tatou nei oraraa i te hoê porotarama î maitai no tatou. Teie râ, mai ta tatou e faataa i te tahi mau hora no te mau tamaaraa i te mau mahana atoa, e tia atoa ia tatou ia faaherehere i te taime no te faatamaa i to tatou feruriraa e no te haapaari i to tatou maitai i te pae varua. Aita o Iesu i horoa i te hoê faataaraa parau faufaa ore, a parau ai oia, ma te faahiti i te Deuteronomi 8:3, e: “Ua papaihia, E ore te taata e ora i te maa anaˈe ra, i te mau mea atoa râ i haapaohia e te Atua.” (Mataio 4:4). Mai te peu e e ore tatou e haapao i to tatou maitai i te pae varua, o ta tatou ïa mau faufaa i te pae varua e to tatou tiaturiraa ta tatou e ore e haapao nei. E nehenehe ïa tatou e haamata i te atea i te tapao, e i te topa. No reira, nafea e itehia ˈi e tatou i te taime hinaarohia no ta tatou haapiiraa tataitahi e ta tatou haapiiraa tamau o te Bibilia?

8. Eaha te aˈoraa bibilia e haamaramarama ra ia tatou no nia i te tuhaa o te haapiiraa tataitahi?

⁸ Ua tano maitai taua mau parau ra a te aposetolo Paulo: “E tena na, e ara ia tia to outou haerea, eiaha mai ta te ite ore ra, mai ta te feia ite râ, ma te faaherehere maite i te taime, no te mea e anotau ino teie. E eiaha to outou ei manaˈo ore, ia ite râ outou i to te Fatu ra hinaaro.” E nehenehe tatou e taa eaha mau na te hinaaro o Iehova, mai te peu e e haapao maitai tatou i ta ˈna Parau na roto i ta tatou haapiiraa tataitahi. No te na reira, e tia ia tatou tataitahi ‘ia faaherehere maite i te taime’, oia hoi ‘ia faaohipa maitai i te mau ravea atoa i mua ia tatou’. — Ephesia 5:15-17, Français Courant.

9. Eaha te mau ohipa e haapau nei paha i te hoê taime o ta tatou hoi e nehenehe e “faaherehere” no ta tatou haapiiraa tataitahi? A faaite mai i te ohipa i tupu i nia ia outou iho.

⁹ Ma te hiˈopoa maitai i te mau ohipa e ere i te mea faufaa roa, ta tatou e rave ra i roto i te mahana, e nehenehe tatou e uiui i teie uiraa e: nafea tatou ia faaohipa i te rahiraa o te taime e vata ˈi tatou? No te mataitai anei i te afata teata? E nehenehe ta taua matini ra, e mana rahi hoi to ˈna, e faaere ia tatou, i te mau po atoa, e piti e tae atu i te pae hora. Outou iho, e hia hora i te mahana outou e faaea ˈi i mua i te afata teata? No te parahiraa matamua i horoahia no te haavîraa uˈana e no te melo taatiraa, e pinepine e e ohipa faufau roa te mea ta tatou e mataitai ra. E pinepine te mea e imihia ra, oia hoi te faanavenaveraa i “te hinaaro tia ore o te tino nei, (...) te hinaaro tia ore o te mata nei, (...) te ahaaha o te oraraa nei”. (Ioane 1, 2:15-17.) Tera râ, aita to te rahiraa e puai no te tupohe i ta ratou afata teata. Oia mau, e nehenehe ta teie taoˈa hamanihia i to tatou nei tau, e rave i te taoˈa faufaa roa ˈˈe e vai ra ia tatou nei: te taime.

10. No te aha, i to tatou nei tau, e mea faufaa roa e ia faaohipa maitai tatou i to tatou taime?

¹⁰ Mai te peu e aita tatou e haavare ra ia tatou iho, e farii tatou e e nehenehe iho â e ‘faaherehere i te taime’ no te mau ohipa faufaa, mai te haapiiraa o te Bibilia. I te tau fifi ta tatou e ora nei, mea faufaa mau no te hoê kerisetiano te haapiiraa tataitahi o te Bibilia o te horoa mai i te ite mau. Teie râ, i te matahiti i mairi aˈenei, ua tiavaruhia hau atu i te 41 000 taata; e e faaiteraa ïa te reira e e rave rahi taeae e tuahine o tei ore i haapao i to ratou maitai i te pae varua. No te faaahu mai e no te tapea mai i te “haana tamaˈi atoa a te Atua”, eita ïa e navai i te mau kerisetiano ia rave i te mau tutavaraa i te tahi noa mau taime. Mai te mau faehau e ahu ra i te hoê haana mau, e tia ia ratou ia amo i ta ratou hopoia i te mau mahana atoa. — Ephesia 6:10-18; Roma 1:28-32; Timoteo 2, 3:1.

11. Eaha te hiˈoraa ta te utuafare o te Betela e horoa ra no nia i te faanahonahoraa o te haapiiraa e te utuafare?

¹¹ Te vai ra ta te Taiete Watch Tower e 95 amaa i roto i te ao nei. I roto i taua mau amaa ra, e haapiiraa utuafare fetii to te hau atu i te 9 000 melo o te mau fetii o te Betela, i te po monire. Te haapii nei ratou i Te Pare Tiairaa no te putuputuraa o te hopea hebedoma e, mea pinepine, e apiti atoa ratou i te hoê oreroraa parau huiraatira aore ra i te hoê haapiiraa faanahohia no te mau melo o te utuafare i tae apî mai. No reira, te vai ra ïa ta te fetii i roto i te ao atoa nei o te Betela ta ˈna haapiiraa i te po monire. E outou, eaha te taime ta outou i faataa no ta outou haapiiraa tataitahi aore ra e te utuafare fetii? — Hebera 10:24, 25.

Ta tatou mau mauhaa e nafea ia faaohipa i te reira

12. Eaha te tahi mau tuhaa e faariro nei i Te mau Papai Moˈa — Tatararaa a te ao apî (farani) ei buka haapiiraa?

¹² Mai ta te taata heru te vai ra ta ˈna mauhaa hinaarohia no ta ˈna ohipa, oia atoa no tatou, te vai atoa ra ta tatou mauhaa e nehenehe atu ai tatou e heru taua vahi paheruraa auro, oia hoi te Parau a te Atua. O Te mau Papai Moˈa — Tatararaa a te Ao Apî (farani) ïa te hoê o taua mauhaa ra. Te vai ra taua tatararaa ra na roto i te mau reo helemani, beretane, paniora, farani, italia, tapone, néerlandais e potiti. Te vai ra ïa ta te rahiraa o te mau Ite o Iehova te hoê mauhaa faahiahia mau ia nehenehe e noaa ia ratou i te ite mau no nia i te Atua mau. Te vai ra i roto i taua neneiraa Bibilia nei e rave rahi tausani faahororaa i ropu i te api e, i roto i te rahiraa o taua mau reo ra, e rave rahi mau nota. Te vai atoa ra te hoê titionare e 20 api, tei roto te mau haamaramaramaraa faataa-maitai-hia no nia i te mau tumu parau faufaa roa no nia i te Bibilia.

13. Eaha ta tatou e nehenehe e parau no nia i te faaohiparaa o te mau parau “ite” e “ite mau” i roto i te mau Papai hebera e i roto i te mau Papai heleni?

¹³ I te hopearaa o taua Bibilia ra, e itehia te hoê “Haapueraa o te mau parau faufaa roa ˈˈe o te Bibilia”. Nafea ia faaohipa i te reira? A imi, i roto i ta outou Bibilia, i te parau ra “ite mau”: e ite ïa outou i te hoê tabula e hitu irava. Teie râ, aita hoê aˈe irava no roto i te mau Papai hebera. E auraa anei te reira e aita te mau Papai hebera e haapapu ra i te faufaaraa o taua ite ra? Eita; no te mea i raro aˈe i te parau “ite”, te itehia ra e 39 faahororaa, e 34 no roto ïa i te mau Papai hebera. Teie nei râ, aita ta te reo hebera e faahitiraa o te faataa maitai i te parau “ite mau”. No reira, mai te nehenehe e itehia maoti te mau faahororaa i tapaohia, te faaite ra oia i te faufaaraa ia noaa hau atu i te hoê ite papu ore, ma te faatano i te parau ra “ite” e te mau parau mai “[ite] aravihi” e “haapao maitai”, aore ra ma te faahiti i te parau o te hoê ite “e tupu (...) i te rahiraa”. — Daniela 1:4; 12:4; Ieremia 3:15.

14. Eaha te mau uiraa anaanatae mau e tuatapapahia ra i roto i te tumu parau ra “ite” i roto i te Tauturu no te taa-maitai-raa i te Bibilia (farani)?

¹⁴ Mai ta tatou i haapii i roto i te tumu parau na mua ˈtu, te horoa nei te reo heleni a te Bibilia i te hoê taa-ê-raa aita e ite-maitai-hia, i rotopu i na faito e piti o te ite. Teie te hoê tumu parau ta tatou e hinaaro ra e imi, ia ite hau atu â tatou no nia i te taa-ê-raa e vai ra i rotopu i na parau e piti, ia faaohipa-anaˈe-hia i nia i te mau kerisetiano. No te aha e mea faufaa roa te ite, gnôsis, e te ite mau, épignôsis, no te mau kerisetiano? I hea roa e itehia ˈi te pahonoraa? I roto i te Tauturu no te taa-maitai-raa i te Bibilia (farani), o te hoê ïa buka parau paari bibilia mau te reira. Oia, e mau taoˈa huna tei roto i taua na haapueraa buka ra e hitu. A rave na i te parau “ite”. E ite atu outou i te hoê faataaraa parau taatoa no nia i te mau parau ta tatou e hiˈopoa ra e no nia i te mau maitai e tuati ra i teie mau parau: te paari, te maramarama, te haapao maitai e te ravea e vai ra ia tatou no te feruri-hohonu-raa. Pauroa taua “auro” ra, taua haapiiraa ra, e nehenehe e roaa ia outou ma te heheu i te tahi mau buka no te haapiiraa bibilia. E ere râ te reira anaˈe. — Salamo 19:9, 10.

15. Eaha ˈtu â te mauhaa e vai ra ia tatou no ta tatou mau maimiraa, e nafea tatou e nehenehe ai e faaohipa i te reira?

¹⁵ Mai te peu e te hinaaro ra outou e faahohonu atu â i ta outou haapiiraa no nia i te ite e te mau parau e tapiri mai, e nehenehe outou e faaohipa i te mau Buka faahororaa o te mau buka a te Taiete Watch Tower, e vai ra na roto i te tahi mau reo. Taua mau maimiraa ra, tei tano no nia i te tumu parau o te ite, e nehenehe ta outou, na roto i taua iho ravea ra, e na reira no e rave rahi hanere tumu parau. A feruri na i te taoˈa rahi i te pae varua te nehenehe e roaahia mai i raro aˈe i te iˈoa ra o “Iehova”. Auê hoi te ite mau no nia i te Fatu Teitei ra o te ao nei i te rahi e! — Salamo 68:19, 20; Ohipa 4:24.

16. Eaha ta te mau Papai e parau ra no nia i te haapiiraa?

¹⁶ Auê hoi mau “taoˈa hunahia” faahiahia mau ta tatou e nehenehe e ite mai maoti te mau buka bibilia i neneihia e te Taiete Watch Tower! Te hinaaro ra anei outou i taua “auro” ra? Te manaˈo ra anei outou e aita e mâuˈa i te taime? Te rave ra anei outou i te taime no te heru i te reira? — Maseli 2:1-5.

O vai teie e horoa nei i te hiˈoraa i roto i te paimiraa o te auro i te pae varua?

17. Eaha te tia ia tatou ia rave e roaa mai ai te ite no nia i te Atua e te Mesia?

¹⁷ E roaa mai ia tatou taua ite faufaa mau ra no nia i te Atua e te Mesia i roto i tei hea tupuraa? Mai te peu e te hinaaro uˈana nei tatou e ia fariihia mai tatou e Iehova e ta ˈna Tamaiti, e ia horoahia mai na tatou i te ô o te ora mure ore. Te faaite nei Iesu i teie manaˈo na roto i teie nei parau: “E ani, e horoahia mai ta outou, e imi, e itea ïa ia outou; e patoto atu, e iritihia mai te opani ia outou. O tei ani ra hoi, ua noaa ïa; e o tei imi ra, ua itea ïa; e te feia atoa i patoto ra, ua iritihia ïa te opani.” A tapao na i te ravea ta ˈna e faahiti ra: ‘E ani, e imi, e patoto.’ Eita te reira mau mea e ravehia i te hoê noa taime. Te ani nei te imiraa i te ite i te tamau-maite-raa. — Mataio 5:6; 7:7, 8.

18. O vai te tia, i roto i te utuafare, ia horoa i te hiˈoraa i roto i te maimiraa o te ite mau, e no te aha?

¹⁸ O vai te tia, i roto i te hoê utuafare kerisetiano, ia horoa i te hiˈoraa i roto i te maimiraa o te ite mau? Te pahono nei o Paulo e: “O outou hoi, e te feia metua ra, eiaha e faaooo atu i ta outou tamarii ia riri, e haapii râ ia ratou e ia paari ma te aˈo a te Fatu ra.” Oia mau, na te mau metua, o te metua tane iho â râ, o te tia ia horoa i te hiˈoraa i roto i taua tuhaa ra ma te haafaufaa i te mau maitai i te pae varua. Na te reira ïa e faahaamanaˈo ia tatou i te faufaa ia tapao i te hoê taime papu no te haapiiraa, ta te utuafare e tiai ra ma te oaoa. — Ephesia 6:4.

19. Nafea tatou e nehenehe ai e faariro i ta tatou haapiiraa e te utuafare ei taime anaanatae mau? Eaha te ohipa e tupu ra i roto i to outou iho utuafare?

¹⁹ Ia rave na tatou e ia anaanatae maitai ta tatou haapiiraa e te utuafare fetii. Ei hiˈoraa, mai te peu e e tamarii ta tatou, no te aha e ore ai e vaiiho ia ratou e maiti i te hoê tumu parau e e ani atu ia ratou, ia au i to ratou matahiti e i te mea ta ratou e nehenehe e rave, ia rave i te tahi mau maimiraa i roto i te mau buka taa ê? E i muri aˈe i te hoê afa hora, e nehenehe atu ai e amui no te tuatapapa e eaha ta te taata tataitahi i ite no nia i te tumu parau i horoahia ˈtu na ˈna. Mai te peu e te vai ra ta tatou te hoê buka faahororaa, e nehenehe tatou e ani atu i te hoê tamarii nainai aˈe ia taio e hia rahiraa taime e itehia ˈi te hoê parau i roto i te mau Papai hebera e i roto i te mau Papai heleni. E nehenehe te hoê tamarii paari aˈe e tapao mai i te tahi mau taoˈa piru i roto i te buka Tauturu (farani). Ua ite te mau metua i te mea ta ta ratou mau tamarii e nehenehe e rave e te roaraa ta ratou e nehenehe e apee noa i te aparauraa: ma te tâuˈa ˈtu i taua mau tuhaa ra ratou e faanahonaho atu ai i te haapiiraa. Ia ite na tatou i te faaau ia tatou, e ia haapopou na tatou i ta tatou mau tamarii. Ia faaitoito na tatou i to tatou utuafare ia “paheru”, i te pae varua, ma te tapea noa mai i te mau opuaraa maitai.

Ia tapea anaˈe na tatou i te mau opuaraa maitai

20. Eaha te mau opuaraa iino e tia ia tatou ia patoi atu ia haapii anaˈe tatou?

²⁰ Ua riro te haehaa ei huru kerisetiano (Maseli 11:2; Timoteo 1, 2:9). No reira, e tia anei ia tatou ia haapii ia nehenehe atu ai tatou e faatiatia ia tatou no te mea ta tatou i ite? Aore ra, e tia anei ia tatou ia faaiteite tahaa i to tatou ite, e peneiaˈe ma te faariro atu i te tahi mau pueraa ei feia ite ore? Hau atu â, e tia anei ia tatou ia poro i ta tatou mau tatararaa aore ra ta tatou mau faataaraa? Teie te hoê aˈoraa a Paulo no nia i taua tumu parau nei: “Teie ta ˈu parau ia outou atoa e ati noa aˈe, i te maitai i horoahia mai ia ˈu nei, eiaha ia hau te manaˈo ia ˈna iho, i tei au ia ˈna ia manaˈo ra: e haapao maite râ i te manaˈo, ia au i te huru o te faaroo i tufahia e te Atua i te taata atoa ra.” — Roma 12:3.

21, 22. Eaha te mana e faaohipahia ra e to tatou ite mau i nia ia tatou?

²¹ Mai te peu e e rave tatou i te mau tutavaraa ma te aau rotahi e e faaohipa tatou i te ite mau, e nehenehe e roaa mai ia tatou i te faaroo, te mǎtaˈu ore, te hitahita ore, te faaoromai, te paieti, te aroha autaeae e te aroha. Ua faaite mai o Petero i te faufaaraa o taua mau mea ra ia ˈna i papai e: “E tei ia outou te reira mau mea, e te rahi ra, na te reira e faaite e, aore outou i toaruaru e te hotu ore i te ite i to tatou Fatu ia Iesu Mesia ra.” — Petero 2, 1:2-8.

²² E tia e na to tatou ite e faatere i to tatou mafatu. E tia ia ˈna ia turai ia tatou ia faaite i to tatou here no te Atua e no to tatou taata-tupu, e ia riro mai ei kerisetiano e faahotu ra i te mau hotu maitai, na roto i to tatou haerea e ta tatou taviniraa. No reira, e ite ïa tatou i te autahoêraa, e e roaa mai ia tatou i te hoê taa-maitai-raa no nia i te hiˈoraa o te Mesia (Ephesia 4:13). Auê ïa haamaitairaa nehenehe mau e roaa mai ia tatou na roto i to tatou maimiraa i te mau taoˈa i hunahia!

[Nota i raro i te api]

Mau uiraa no te haaferuri

◻ Ia au i te parau a te arii ra o Solomona, eaha te mea faufaa roa ˈˈe i te mau taoˈa i hunahia?

◻ No te aha e mea faufaa roa te ite mau no te mau kerisetiano faatavaihia e no te mau mamoe ê atu?

◻ Nafea tatou e nehenehe ai e ‘faaherehere i te taime’ no te haapiiraa tataitahi?

◻ I roto i ta tatou maimiraa i te ite mau, eaha te mau mauhaa taa ê e vai ra ia tatou nei?

◻ I roto i te tuhaa o te haapiiraa e te utuafare, na vai e rave i te aratairaa, e e tia ia tatou ia haapii e tei hea mau huru manaˈo?