Iesu, to ˈna oraraa e ta ˈna taviniraa

Te eˈa o te ora

TEIE hoi te eˈa o te ora, ia farii tatou i te mau haapiiraa a Iesu. E ere râ i te mea ohie ia apee maite atu i te reira. Ei hiˈoraa, e haava ohie noa te mau Pharisea ma te etaeta mau hoi i to ratou mau taata-tupu, e e rave rahi paha feia te na reira atoa ra. No reira, i roto noâ i ta ˈna Aˈoraa i nia i te mouˈa, te horoa nei Iesu i teie nei faaueraa: “Eiaha e faaino, ia ore outou ia faainohia mai. O ta outou hoi e faaino ia vetahi ê ra, e faaino-atoa-hia ïa outou i te reira.”

Mea fifi roa ia pee i te hiˈoraa o te mau Pharisea o tei faaino rahi noa na. Ia au i te faatiaraa a Luka, te faahohoˈa nei Iesu i taua fifi ra mai teie te huru: “E tia anei i te matapo ia aratai i te matapo? e ore anei e hiˈa apitipiti i roto i te apoo?”

E hara ino roa ia faaino rahi tatou ia vetahi ê, na roto i te faarahiraa ta ratou mau hara aore ra na roto i te faahaamanaˈo-noa-raa ˈtu ia ratou i te reira. Teie atura ïa te uiraa a Iesu: “E eaha hoi oe e tia ˈi ia parau atu i to taeae, Ho mai na ˈu e iriti i te pâpaa i roto i to mata na, e inaha, e raau rahi hoi tei roto i to oe iho mata? E tera ra haavare e! e mata na i te iriti i te raau rahi i roto i to oe iho mata; ei reira oe e ite maitai ai ia iriti i te pâpaa iti i roto i te mata o to oe taeae.”

Teie râ e tia i te mau pǐpǐ ia haapao maitai eaha ta te taata e hinaaro ra, te parau ra o Iesu e: “Eiaha te mea moˈa ra e hopoihia ˈtu na te urî, eiaha atoa ta outou poe e paruhia ˈtu i te puaa.” Mea moˈa te mau parau mau i roto i te Parau a te Atua. E faaauhia ratou i te mau poe. Teie nei râ, mai te peu e, te vai ra te mau taata e nehenehe e faaauhia i te mau urî aore ra i te mau puaa, aita hoi ratou e haafaufaa ra i taua mau parau mau faahiahia mau ra, e tia ïa i te mau pǐpǐ ia vaiiho atu ia ratou e ia imi atu i te vahi ê i te tariˈa faaroo aˈe.

Noa ˈtu â ïa e ua faahiti aˈena Iesu i te parau no te pure i roto i ta ˈna aˈoraa, te haapapu nei râ o ˈna i teie nei e mea faufaa mau â ia tamau â i te na reira. “E ani, o ta ˈna ïa e faaitoito nei, e horoahia mai ta outou.” Ei haapapuraa e ua ineine noa te Atua i te pahono mai i te mau pure, teie te manaˈo ta Iesu e horoa ra: “O vai ïa i roto ia outou i te taata nei e hopoi i te ofai na ta ˈna tamaiti ia ani mai oia i te pane? (...) E tia na ia outou, ino noa ˈi, ia horoa i te mea maitai na ta outou mau tamarii, a tae ai hoi i to outou Metua i te ao ra i te horoa i te mea maitai i te feia i ani atu ia ˈna ra?

I muri iho, e faahiti Iesu i te hoê ture tei tui te roo i te pae no te haerea, e parauhia e te ture auro. Teie hoi ta ˈna e parau ra: “E te mau mea atoa ta outou i hinaaro ia vetahi ê ra, e na reira atoa ˈtu outou ia ratou.” Te oraraa ia au maite i teie nei ture, te titau maira ïa ia tatou ia hamani maitai i te tahi, ma te rave i nia ia ratou mai ta tatou e hinaaro ia na reirahia mai tatou.

Te haapapu maira te manaˈo i muri nei o Iesu e e ere te eˈa o te ora i te mea ohie ia apee: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!”

Mea ohie roa hoi ia atea ê. No reira ˈtura Iesu e horoa mai ai i teie nei faaararaa: “E ara râ i te orometua haavare, o tei haere mai ia outou ma te huru o te mamoe ra, area o roto ra, e luko taehae ïa.” Mai ta tatou e nehenehe e ite i te mau raau maitai e te mau raau iino i to ratou mau hotu, ta Iesu ïa e parau ra, e nehenehe atoa tatou e ite o vai ma te mau peropheta haavare na roto i to ratou haerea e ta ratou mau haapiiraa.

Ma te tamau â i ta ˈna oreraa parau, ua faataa ˈtura Iesu e e ere noa na roto i ta ˈna parau e parau te hoê taata e nehenehe ai e haapapu e e pǐpǐ o ˈna na ˈna, na roto râ i te ohipa ta ˈna e rave. A parau noa ˈi vetahi pae e o Iesu to ratou Fatu, mai te peu e eita ratou e rave i te hinaaro o to ˈna Metua, teie ïa ta Iesu e haapapu maira: “O ta ˈu ïa e parau atu, Aita roâ vau i ite ia outou. E haere ê atu outou, e te feia rave parau ino.”

I te tahi aˈe pae, te haapapu ra Iesu e: “Area tei faaroo noa mai i ta ˈu nei mau parau, e aore i haapao, e faitohia ïa i te maamaa, o tei faatia noa i to ˈna fare i nia i te one; e mairi ihora te ûa, e tahe ihora te pape pue, e te mataˈi hoi i te uihiraa i nia iho i taua fare ra, mairi ihora e e parari rahi to taua fare ra.”

Ia faaoti Iesu i ta ˈna aˈoraa, ua maere anaˈe ihora te taata atoa i te huru o ta ˈna parau, inaha te haapii atura oia ia ratou mai te hoê taata mana, eiaha râ mai to ratou mau upoo faatere haapaoraa. Mataio 7:1-29; Luka 6:27-49.

◆ Eaha ta Iesu e parau ra no nia i te haavaraa ia vetahi ê, e nafea râ oia i te faaiteraa e e tia i ta ˈna mau pǐpǐ ia haapao maitai eaha ta te taata e hinaaro ra?

◆ Eaha ta Iesu e parau ra i muri iho no nia i te pure, e eaha te huru haerea ta ˈna e horoa ra?

◆ Nafea to Iesu faaiteraa e e ere te eˈa o te ora i te mea ohie ia pee e e nehenehe atoa tatou e atea ê?

◆ Na roto i tei hea mau parau to Iesu faaotiraa i ta ˈna aˈoraa, e eaha te faahopearaa o te reira?