E parau mau te Parau a te Atua
“E haamaitai oe ia ratou i te parau mau na oe; o to parau na te parau mau.” — IOANE 17:17.
1. Eaha te huru hiˈoraa o te taata papai salamo no nia i te Bibilia, eaha râ te huru hiˈoraa to e rave rahi i to tatou nei mau mahana?
“E LAMEPA ta oe parau i to ˈu nei avae, e tiarama no to ˈu nei mau eˈa.” (Salamo 119:105). Mea na reira to te papai salamo hebera faahitiraa i te parau. I to tatou nei mau mahana, o te hoê noa ïa numera iti nainai o te mau taata teie e faaite nei i te hoê faatura mai te reira te huru no te Parau a te Atua. I te XXraa o te senekele, te vai ra oia mai te hoê buka: Te Bibilia Moˈa. Ua hurihia oia na roto e rave rahi aˈe mau reo e ua haaparare-rahi-aˈe-hia i te tahi atu mau buka i roto i te roaraa o te Aamu. Teie râ, te patoi nei te rahiraa o te mau taata i te farii ia ˈna ei lamepa no to ratou avae. I rotopu atoa i te feia e parau nei e e kerisetiano ratou, mea au aˈe na te rahiraa i te haapao atu i ta ratou iho huru hiˈoraa maoti i te vaiiho i te Bibilia e turama i to ratou eˈa. — Timoteo 2, 3:5.
2, 3. Eaha te huru hiˈoraa o te mau Ite no Iehova no nia i te Bibilia, e eaha te mau haamaitairaa e roaa nei ia ratou?
2 I te taa-ê-raa, tatou te mau Ite no Iehova, te rave nei tatou no tatou iho i te mau parau a te papai salamo. No tatou, ua riro te Bibilia ei aratai i horoahia mai e te Atua. Ua ite tatou e “te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia ra”. (Timoteo 2, 3:16.) Taa ê atu i te rahiraa o te feia e ora nei i to tatou nei tau, eita tatou e hinaaro ra e tamata i ta tatou iho mau huru raveraa i te pae o te morare e o te haerea. Ua ite tatou e eaha te mea maitai no te mea te faaite maira te Bibilia i te reira.
3 E roaa ïa ia tatou e rave rahi haamaitairaa na roto i taua huru feruriraa ra. Ua nehenehe tatou e ite e o vai o Iehova e ua haapii tatou i te mau opuaraa faahiahia mau ta ˈna i faaineine no te fenua e no te mau taata. No reira tatou e ite papu e e nehenehe tatou e fanaˈo i te hoê oraraa faahiahia mau no a muri aˈe, tatou e to tatou utuafare fetii. Te farii roa nei tatou i taua mau parau a te papai salamo e: “Te rahi roa nei to ˈu hinaaro i ta oe ra ture! o to ˈu ïa manaˈoraa i te mau mahana atoa nei. E ite rahi to ˈu i te parau na oe ra, i to tau mau enemi ra: e tia hoi i te vai-maite-raa i pihaiiho ia ˈu.” — Salamo 119:97, 98.
Ia faaite anaˈe na na roto i to tatou haerea
4. Mai te peu e te farii nei tatou e ua riro te Bibilia ei Parau na te Atua, eaha ïa te tia ia tatou ia rave?
4 Mea titauhia ïa ia farii tatou i teie mau parau ta Iesu i faatae atu i to ˈna Metua: “O to parau na te parau mau.” (Ioane 17:17). Mai te peu e te farii nei tatou i te reira, e tia ˈtura ïa ia tatou ia rave i te hoê ohipa, oia hoi te tautururaa ˈtu i to tatou taata-tupu ia taa e e parau mau iho â te Parau a te Atua. E nehenehe ïa ratou e fanaˈo i te hoê â mau haamaitairaa mai ia tatou nei. Nafea ïa tatou e nehenehe atu ai e hopoi i taua tauturu ra na ratou? I te hoê aˈe pae, e tia ia tatou iho ia rave i te mau tutavaraa atoa ta tatou e nehenehe e rave no te faaohipa i te mau faaueraa tumu bibilia i roto i to tatou oraraa. Ia na reira anaˈe tatou, e ite ïa te mau taata haerea tia e o te eˈa i faataahia e te Bibilia te eˈa maitai roa ˈˈe.
5. Eaha te aˈoraa a Petero e turai nei ia tatou ia horoa i te faaiteraa na roto i to tatou haerea?
5 Teie te hohonuraa o te aˈoraa ta te aposetolo Petero i horoa i te mau vahine kerisetiano e aita ta ratou tane e tahoê ra i ta ratou tiaturiraa: “O outou atoa hoi, e te mau vahine, e auraro maite i ta outou mau tane ra; e aore te tahi pae i faaroo i te parau ra, ia noaa mai ratou i te haapao maitai o ta ratou mau vahine, eiaha ˈtu â te parau.” (Petero 1, 3:1). O te faaueraa tumu atoa o te matara mai na roto i teie aˈoraa ta te aposetolo i faahiti i te mau kerisetiano atoa — mau tane, mau vahine e mau tamarii: “Ia maitai ta outou parau i rotopu i te mau Etene: ta ratou hoi i faaino mai ia outou, mai te mea e feia rave parau ino, ia hiˈo râ ratou i ta outou parau maitai, ia haamaitai ratou i te Atua i te mahana e roohia mai ai ra.” — Petero 1, 2:12; 3:16.
Te paari teitei aˈe a te Bibilia
6. Mea nafea to Petero tautururaa ia tatou ia taa e e tia ia tatou ia tauturu i to tatou taata-tupu ia haafaufaa i te Bibilia?
6 E nehenehe atoa te mau kerisetiano e tauturu i to ratou taata-tupu ia haafaufaa i te Bibilia ma te pee i teie â aˈoraa a Petero: “E faateitei râ outou i te Fatu ra i te Mesia i roto i to outou aau: e ia vai ineine â outou ia parau atu i te taata atoa ia ui mai ia outou i te tiaturi i roto ia outou na, ma te mǎrû e te auraro maite atu.” (Petero 1, 3:15). E tia i te mau tavini kerisetiano ia ite i te paruru i te Bibilia e i te faataa ˈtu ia vetahi ê eaha mau na te Parau a te Atua. Nafea ïa ratou e nehenehe e na reira?
7. Na te aha e faaite ra e o te Bibilia iho â te Parau a te Atua?
7 Te horoa nei te buka a te mau Maseli i te hoê manaˈo e haapapu ra i to tatou feruriraa. Te taio nei tatou e: “E tau tamaiti, ia farii mai oe i ta ˈu nei parau, e ia vaiiho maite i ta ˈu parau i pihaiiho ia oe; ia fariu mai (...) i te paari (...) e noaa ïa ia oe te ite i te Atua. O Iehova hoi tei horoa mai i te paari; e no roto i to ˈna vaha te parau e te ite.” (Maseli 2:1-6). Te horoa nei te Atua i te paari na roto i te arai o te Bibilia. Ia ite anaˈe oia i te paari hohonu o te Bibilia, e taa papu te hoê taata aau rotahi e ua hau aˈe taua buka ra i te hoê noa parau a te taata.
8, 9. Na te aha e faaite ra i te papuraa o te aˈoraa bibilia e faaitoito ra i te hoê manaˈo aifaito i nia i te roaaraa mai i te taoˈa?
8 E rave anaˈe na tatou i te tahi mau hiˈoraa. I to tatou nei mau mahana, i te rahiraa o te taime, e faitohia te manuïaraa o te hoê taata na nia i ta ˈna mau faufaa. Rahi noa ˈtu te moni a te hoê taata, e rahi noa ˈtu ïa i te manaˈohia e ua manuïa taua taata ra. Area te Bibilia, te aˈo nei oia e eiaha e haafaufaa rahi i te mau taoˈa i te pae materia. Ua papai te aposetolo Paulo e: “Area te feia e mârô e ia rahi te taoˈa, e roohia ïa i te ati, e te marei, e te nounou maamaa e rave rahi, e ino ai te taata ra, e topa taue ai te taata i roto i te ino rahi faarue roa ra, e te pohe mure ore. O te nounou moni hoi te tumu o te mau ino atoa nei, ua taa ê roa hoi te tahi pae i te parau nei i te titau-noa-raa i te reira, e ua patiatia pupu roa ia ratou iho i te oto e rave rahi.” — Timoteo 1, 6:9, 10; hiˈo Mataio 6:24.
9 Na te mau ohipa i tupu e faaite mai e e mea paari mau taua faaararaa ra. Ua tapao mai te hoê taote i te pae o te feruriraa e “eita outou e oaoa ia tapae anaˈe outou i te mau parahiraa matamua aore ra ia moni-anaˈe-hia outou, e eita te reira e faaite e ua manuïa iho â outou, aore ra te here-mau-hia ra outou aore ra te faaturahia ra outou”. Oia mau, te feia e horoa nei i to ratou itoito atoa ia monihia ratou, e pinepine ratou i te roohia i te mau manaˈo hepohepo e te inoino. Ma te farii i te faufaa o te moni, te haapapu nei te mau Papai no nia i te hoê mea faufaa roa ˈˈe: “E haapuraa hoi tei te paari, e haapuraa tei te moni, teie râ te maitai o te paari ia noaa, na te reira e horoa mai i te ora i te feia fatu ra.” — Koheleta 7:12.
10. No te aha e tia ia tatou ia pee i te aˈoraa a te Bibilia e titau ra ia haapao i ta tatou mau amuimuiraa?
10 Te vai ra i roto i te Bibilia e rave rahi mau faaueraa hoê â to ratou auraa. Teie te tahi atu â: “O tei amui atoa to ˈna haerea i to te feia paari ra, e paari atoa ia; o tei amui râ i te feia maamaa ra, e pohe ïa.” (Maseli 13:20). Te faaite faahou nei te mau ohipa i tupu i te parau mau o taua mau faahitiraa ra. Ma te turaihia e to ratou mau hoa, te haamata nei te tahi mau taurearea i te inu hua i te ava, i te rave i te raau taero, aore ra te topa roa nei ratou i roto i te hoê haerea tia ore i te pae morare. Te feia atoa o te apiti atu i te mau taata e parau faufau nei, e nehenehe atoa ratou iho e parau faufau atu. E rave rahi teie e eiâ nei i ta ratou paoti ohipa no te mea ‘te na reira nei te taatoaraa’. No reira, ua tano te Bibilia i te parauraa e: “E ino te parau maitai i te amuiraa iino ra.” — Korinetia 1, 15:33.
11. Mea nafea to te hoê tuatapaparaa i te pae o te feruriraa faaiteraa e mea paari mau ia faaohipa-anaˈe-hia i te Ture auro?
11 Te hoê o te mau aˈoraa bibilia ite-roa ˈˈe-hia, o te Ture auro ïa: “E te mau mea atoa ta outou i hinaaro ia vetahi ê ra, e na reira atoa ˈtu outou ia ratou.” (Mataio 7:12). E maitai aˈe te ao nei, mai te peu e e pee te taata tataitahi i taua ture ra! Teie râ, noa ˈtu e aita te rahiraa o te taata e na reira nei, mea au aˈe e ia pee outou iho i te reira. No te aha râ? No te mea ua poietehia tatou no te haapao ia vetahi ê, e no te hepohepo atu no ratou (Ohipa 20:35). Teie te manaˈo hopea no te hoê tuatapaparaa i te pae o te feruriraa i ravehia i te mau Etats-Unis no te ite eaha to tatou huru ia tauturu anaˈe tatou ia vetahi ê: “Te itehia ra e ua riro te tautururaa ia vetahi ê ei ohipa matauhia i te natura taata, mai te haapao-noa-raa ia tatou iho.” — Mataio 22:39.
Te mau aˈoraa a te Bibilia: te hoê paari aita e nehenehe e faaauhia
12. Eaha te hoê o te mau tumu i riro mai ai te Bibilia ei buka otahi?
12 Oia mau, i to tatou nei mau mahana, te vai ra e rave rahi mau pu e horoa nei i te mau aˈoraa taa ê atu i ta te Bibilia. Te vai ra te tahi mau tuhaa aˈoraa i roto i te mau vea, e i roto i te mau fare hooraa buka, te pûpû nei e rave rahi mau buka i te mau pahonoraa no e rave rahi fifi. Hau atu, te horoa nei te mau taote i te pae no te feruriraa, te feia aravihi no te horoa i te mau aˈoraa e te tahi atu mau taata, i te mau aˈoraa i roto i te mau tuhaa taa ê. Teie râ, e buka otahi te Bibilia i roto e toru tuhaa. A tahi, e faufaa tatou i ta ˈna mau aˈoraa i te mau taime atoa. E ere i te mau aˈoraa papu ore, e eita atoa e faaino mai. E farii te taata e pee ra i taua mau aˈoraa ra, i teie mau parau ta te papai salamo i faatae atu i te Atua na roto i te hoê pure: “O ta oe hoi i faaite maira, e parau mau ïa.” — Salamo 93:5.
13. Na te aha e faaite maira e e faito teitei aˈe to te Bibilia i te mau pu a te taata no nia i te paari?
13 Te pitiraa o te tuhaa, ua upootia mai te Bibilia na roto i te mau fifi o te tau (Petero 1, 1:25; Isaia 40:8). Ua ite-maitai-hia e e tauiui noa te mau aˈoraa no ǒ mai i te taata ra, e te mea e tâuˈahia ra i te hoê matahiti, e mea pinepine e faainohia i te matahiti i muri iho. Noa ˈtu e ua hope to ˈna papairaahia fatata e 2 000 matahiti i teie nei, te vai noa râ i roto i te Bibilia te mau aˈoraa paari roa ˈˈe, e e nehenehe ta ˈna mau parau e faaohipahia i roto i te ao atoa nei. E horoa taua mau aˈoraa ra i te hoê â huru faahopearaa, noa ˈtu eaha te vahi ta tatou e ora nei: i Afirika, i Asia, i Marite Apatoerau e Apatoa, i Europa aore ra i te mau motu.
14. Aita e nehenehe e faaauhia te mau aˈoraa bibilia i roto i teihea auraa?
14 I te pae hopea, te pûpû nei te Bibilia e rave rahi huru aˈoraa o te ore e nehenehe e faaauhia. Te parau nei te hoê maseli a te Bibilia e “o Iehova hoi tei horoa mai i te paari” e, i roto i te mau huru tupuraa atoa, e tauturu te paari e vai ra i roto i te Bibilia ia faaafaro i to tatou mau fifi, e ia rave i te mau faaotiraa (Maseli 2:6). Te farii paatoa nei te mau tamarii, te mau taurearea, te mau metua, te feia ruhiruhia, te feia rave ohipa, te mau paoti ohipa e e te feia faatere e mea faufaa no ratou te paari o te Bibilia (Maseli 4:11). Noa ˈtu e tei roto tatou i te mau huru tupuraa aita i itehia i te tau o Iesu e o ta ˈna mau aposetolo, mea maitai roa te mau aˈoraa bibilia no tatou. Ei hiˈoraa, i te senekele I, aita i itehia i te ohipa puhipuhi avaava i te mau fenua no te pae Hitia o te râ, i to tatou nei râ tau, mea parare roa ïa taua peu ra. Tera râ, ia haapao anaˈe te hoê taata i te aˈoraa a te Bibilia ‘ia ore te mau mea atoa ia vi ia ˈna’ e ia faarue “i te mau viivii atoa o te tino e te varua”, eita ïa oia e puhipuhi i te avaava, o te haamatau i te tino e o te faaino i te oraora-maitai-raa. — Korinetia 1, 6:12; Korinetia 2, 7:1.
No to tatou maitai no te hoê tau roa
15. No te aha te rahiraa e parau nei e e buka tahito te Bibilia?
15 Oia mau, e rave rahi teie e parau nei e e buka tahito te Bibilia e aita to ˈna e faufaa i te XXraa o te senekele. Teie nei râ, mai te peu e te reira to ratou manaˈo, no te mea paha ïa e aita oia e parau ra i te mea ta ratou e hinaaro ra e faaroo. Te tumu o te mau faaueraa bibilia, o to tatou ïa oaoaraa e a muri noa ˈtu, e titau râ te faaohiparaa o taua mau faaueraa ra i te faaoromai, te auraro i te aˈoraa e te haapaeraa — mau huru maitai aita e auhia ra e te ao nei o te faaitoito nei i te imiraa i te faaanaanataeraa oioi roa. — Maseli 1:1-3.
16, 17. Eaha te mau faaueraa teitei ta te Bibilia e haamau ra i roto i te tuhaa o te morare no nia i te taatiraa, e mea nafea taua mau faaueraa ra i te faainohia i to tatou nei tau?
16 E faaea na tatou i teie nei i nia i te tuhaa o te morare no nia i te taatiraa i te pae tino. Te haamau nei te Bibilia i te mau ture etaeta i roto i taua tuhaa ra. Te taotia nei oia i te mau taatiraa i te pae tino i roto noa i te faaipoiporaa, i rapae au râ, mea opanihia ïa. Te taio nei tatou e: “E ore hoi te taiata, e te haamori idolo, e te faaturi, e te mahu, e te paia (...) e ore anaˈe ïa e parahi i te basileia o te Atua.” (Korinetia 1, 6:9, 10). Hau atu, te faaitoito nei te Bibilia i te mau kerisetiano ia faaipoipo i te hoê noa taata: te hoê noa tane no te hoê noa vahine (Timoteo 1, 3:2). I rapae mai i te mau huru tupuraa ino mau o te faatia ra i te hoê faataaraa aore ra te hoê faataa-ê-raa, te faaite nei oia i te rahiraa o te taime i te faaipoiporaa mai te hoê taairaa o te ore roa e nehenehe e ofatihia. Ua parau o Iesu iho e: “O tei hamani i te taata i te matamua ra, i hamani ïa i te tane hoê e te vahine hoê, e ua na ô aˈera, E faarue ai te taata i tana metua tane e tana metua vahine a ati atu ai i tana vahine; e riro hoi raua ei hoê (...) E teie nei, e ere atura raua i te toopiti, hoê râ. E ta te Atua i taati ra, eiaha te taata e faataa ê atu.” — Mataio 19:4-6, 9; Korinetia 1, 7:12-16.
17 Ua faaino-rahi-hia taua mau ture ra i teie mahana. Ua fariihia te mau peu i te pae morare e ere i te mea etaeta roa. Te fariihia nei te mau taatiraa i te pae tino i rotopu i te mau taurearea e haamatau nei ia ratou, mai te hoê peu tano. E rave rahi mau tane e mau vahine aita i faaipoipohia. I rotopu i te feia tei faaipoipo, mea pinepine e te vai ra ta te hoê o na hoa faaipoipo hoê vahine aore ra hoê tane apî. I te tahi aˈe pae, te itehia ra e rave rahi mau faataaraa i teie tau apî. Aita râ taua huru faatiaraa ra no te rave i te mau mea atoa i horoa i te oaoaraa. Te haapapu nei te mau faahopearaa iino e ua tano te Bibilia i te horoaraa i te mau ture etaeta mau i te pae morare.
18, 19. Eaha te ohipa i tupu i muri aˈe to te taatoaraa faarueraa i te mau faaueraa i te pae morare faataahia e Iehova?
18 Ua papai te hoê vea (Ladies’ Home Journal) e: “Maoti i te hopoi mai i te oaoaraa rahi i te taata, ua faatupu mai te faateiteiraahia i te melo taatiraa i roto i te mau matahiti 60 e 70, e rave rahi mau haamauiuiraa.” I roto i taua mau “haamauiuiraa”, e faahiti anaˈe na tatou i te mau pepe mauiui mau ta te faataaraa o to ratou mau metua e horoa ra i te mau tamarii, aore ra te mau fifi iino mau i te pae o te mau manaˈo hohonu e haafifi ra i te mau taata paari. E faahiti atoa na tatou i te rahiraa o te mau utuafare hoê anaˈe metua e te rahiraa o te tamahine apî teie e hapû nei, no matara noa maira ratou mai roto mai i te tamariiriiraa. I roto i taua mau haamauiuiraa ra, e faahiti atoa na tatou i te rahiraa o te mau maˈi e nehenehe e roaahia na roto i te mau taatiraa i te pae tino, mai te herpès génital, te blennorragie, te syphilis, te haaperaa a te Chlamydiae e te SIDA.
19 No te mau mea atoa i faahitihia i nia mai, ua horoa te hoê orometua haapii i te pae totiare i teie haaferuriraa nei: “Peneiaˈe ua paari tatou i teie nei no te aniani e aita anei e mea faufaa aˈe na te taiete ia faaitoito atu i te haapaeraa na mua ˈˈe i te faaipoiporaa, o te mea tano aˈe i te mau hinaaro o te feia no te fenua e o te faarahi nei i to ratou tiaraa no nia i te tiamâraa; tiamâraa ia ore e maˈihia aore ra ia ore e roohia i te hoê hapûraa hinaaro-ore-hia.” Ua tano te Bibilia i te parauraa e: “E ao to te taata e tiaturi ia Iehova, e aore i haapao i te teoteo, e tei fariu i te parau haavare ra.” (Salamo 40:4). Aita te feia e tiaturi nei i te paari o te Bibilia, e vaiiho nei ia ratou ia haavarehia e te feia o te faaino nei ia ˈna e o te parau nei e e horoa mai te hoê ture morare aita hoi i etaeta roa i te oaoaraa. No to tatou hoi maitai te mau ture etaeta, mea paari râ, a te Bibilia.
Te mau huru tupuraa fifi mau o te oraraa
20. Eaha te mau faaueraa tumu bibilia tei riro ei faufaa na te feia e ora nei i roto i te hoê veve rahi?
20 Te tauturu atoa nei te paari o te Bibilia ia tatou ia faaruru i te mau huru tupuraa fifi mau o te oraraa. Ei hiˈoraa, i roto e rave rahi mau fenua, te ora nei te tahi mau kerisetino i roto i te veve rahi. Noa ˈtu â râ, te faaruru nei ratou i to ratou veve e te ite nei ratou i te oaoa. Nafea ïa te reira? Te pee nei ratou i te Parau faauruahia a te Atua. Te haafaufaa nei ratou i te mau parau tamahanahana mau a te Salamo 55:22, i reira tatou e taio ai e: “E tuu oe i ta oe hopoia ia Iehova ra, e na ˈna oe e tauturu mai.” Te tiaturi nei taua mau kerisetiano ra i te Atua no te horoa no ratou i te puai no te faaoromai i ta ratou mau fifi. E, i muri iho, e faaohipa ratou i te mau faaueraa tumu bibilia e e faarue ratou i te mau ohipa iino e mea moni hoi, mai te puhipuhiraa i te avaava aore ra te inu-hua-raa i te ava. E feia rave ohipa ratou, mai ta te Bibilia e faaue ra, e e nehenehe atura ïa ratou, i te rahiraa o te taime, e faatamaa i to ratou utuafare, ia faaauhia i te feia hupehupe aore ra te feia o te vaiiho nei ia ratou ia haere roa i te hepoheporaa (Maseli 6:6-11; 10:26). Te haapao atoa ra ratou i teie aˈoraa bibilia e: “Eiaha e feii i tei rave i te hara ra.” (Salamo 37:1). Aita ratou e faaohipa ra i te pere aore ra i te tahi atu mau ohipa taparahi taata, mai te hooraa i te raau taero. E nehenehe taua mau peu ra e horoa mai i te hoê “pahonoraa” oioi i ta ratou mau hepoheporaa i te pae o te moni, i roto râ i te roaraa o te tau e mau hopearaa ino mau ïa tei roaa mai.
21, 22. a) Eaha te tauturu e eaha te faaitoitoraa tei roaa mai i te hoê vahine kerisetiano i roto i te Bibilia? b) Eaha te tahi atu â tapao a te Bibilia teie e tauturu nei ia tatou ia taa e e Parau oia na te Atua?
21 Ua riro anei te mau faaueraa a te Bibilia ei tautururaa papu no te feia e ora nei i roto i te hoê veve rahi? Oia mau, mai ta e rave rahi mau ohipa i tupu e haapapu ra. Ua papai te hoê kerisetiano vahine no Asia o tei riro hoi i muri iho ei vahine ivi, e: “Noa ˈtu e te ora nei au i te otia o te veve, aita vau e ite ra i te inoino e te mauiui. E horoa mai te mau parau mau bibilia i te mau manaˈo maitai.” Ua ite atoa o ˈna i te parau mau o teie parau tǎpǔ faahiahia mau a Iesu: “E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou.” (Mataio 6:33). Te haapapu nei oia e, ia tuu-anaˈe-hia te taviniraa a te Atua i mua, e roaa noa ta ˈna, na roto i te tahi aore ra i te tahi ravea, i te mau mea hinaarohia i te pae materia. E na ta ˈna taviniraa kerisetiano e faahoˈi i to ˈna faatura e e horoa nei na ˈna i te hoê tapao i roto i te oraraa o te tauturu nei ia ˈna ia faaruru i to ˈna veve.
22 Ma te papu, te haapapu maitai maira te Bibilia, na roto i te hohonuraa o to ˈna paari, e ua riro mau oia ei Parau na te Atua. Aita hoê aˈe buka tei faatupuhia e te manaˈo o te taata, teie e faahiti nei i te parau no te oraraa i roto e rave rahi mau tuhaa taa ê, tei roto te hoê paari hohonu mau e te faaite ra i te parau mau mai te tahi api e tae atu i te tahi api. Te vai ra râ te tahi atu tapao a te Bibilia e haapapu ra e no ǒ mai iho â te reira i te Atua ra. Te vai ra ia ˈna te mana no te haamaitai atu â i te mau taata. O ta tatou ïa e tuatapapa i roto i te tumu parau i mua nei.
A faataa na:
◻ Eaha te mau haamaitairaa tei roaa i te mau Ite no Iehova a farii ai ratou i te Bibilia mai te Parau a te Atua?
◻ Eaha te titauraa te tia ia tatou ia faatupu, tatou teie e tiaturi nei i te Parau a te Atua, e e nehenehe to tatou haerea e tauturu ia tatou ia faatupu i taua titauraa ra i roto i teihea auraa?
◻ Na te aha e faariro nei i te mau aˈoraa bibilia paari ei mau aˈoraa teitei aˈe i te mau manaˈo a te taata iho?
◻ A horoa na i te tahi mau hiˈoraa e faaite ra i te rahi o te paari a te Bibilia.