Mea maitai anei te mau haapaoraa atoa?

TE ORA nei tatou i roto i te hoê ao e ua rau te haapaoraa. Ua faataa te hoê titorotororaa apî 19 haapaoraa rarahi e tau 10 000 pǔpǔ faaroo na te ao nei. No teie rauraa, tei mua ïa te taata i te hoê maitiraa aita i itehia aˈenei. E mea faufaa anei ïa te haapaoraa ta oe e maiti?

No vetahi, e au te haapaoraa taitahi i te eˈa taa ê e aratai i nia i te hoê mouˈa. No ratou, aita e taa-ê-raa te eˈa e maiti, i te mea e e aratai te taatoaraa i te hoê â vahi. I to ratou manaˈo, hoê anaˈe Atua Mana hope, e aratai iho â ïa te mau haapaoraa atoa ia ˈna ra.

E aratai anei te mau eˈa atoa i te Atua ra?

Eaha ta Iesu Mesia, hoê o te mau taata haapii faatura-roa ˈˈe-hia o te tuatapaparaa i te pae faaroo, i parau? “E tomo na te uputa pirihao,” ta ˈna i na ô atu i ta ˈna mau pǐpǐ. No te aha? “Te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!”—Mataio 7:13, 14.

E aratai vetahi mau haapaoraa i “te pohe,” te reira mau anei ta Iesu e parau ra? Aore ra, te haapii ra anei oia e o te feia tiaturi ore i te Atua anaˈe to nia i te eˈa aano area te feia tiaturi ia ˈna, noa ˈtu eaha ta ratou haapaoraa, to nia ïa i te eˈa piri e aratai i te ora?

I muri iti noa ˈˈe i to ˈna faahitiraa e e piti noa eˈa, ua parau Iesu: “E ara i te mau peropheta haavare, o te haere mai ia outou na ma te huru mamoe, area o roto ra e luko taehae ïa.” (Mataio 7:15, V.C.J.S.a) I muri mai, ua parau oia: “E ore e hope paatoa te feia e parau mai iaˈu e, e te Fatu, e te Fatu, i te ô i te basileia o te rai; o oia râ, o te rave i te hinaaro o taˈu Metua i te rai ra, o te ô ïa i te basileia o te rai.” (Mataio 7:21, V.C.J.S.) Ia parauhia te hoê e peropheta aore ra ia parau oia e o Iesu to ˈna “Fatu,” e taata faaroo ïa o ˈna, eiaha râ i te taata tiaturi ore i te Atua. Mea papu atura ïa e ua faaara Iesu e e ere te mau haapaoraa atoa i te mea maitai e te mau taata haapii atoa i te mea tia ia tiaturihia.

E itehia anei te eˈa piri?

I te mea e eita te mau eˈa atoa e aratai i te Atua, e nafea oe e ite ai i te eˈa piri e aratai i te ora i rotopu i na tausani haapaoraa? Ei hiˈoraa: Ua moe paha oe i roto i te hoê oire rahi. Ani atura oe i te tauturu. Parau maira te hoê taata ma te papu e a haere i te pae atau, e te tahi atu a haere i te pae aui. Tera râ, e parau mai te tahi atu, a maiti i te purumu ta oe e manaˈo ra e mea maitai. I te pae hopea, e tatara mai te tahi atu taata i te hoê hohoˈa purumu papu e ua faaite maira i te purumu tano. Horoa maira oia i te reira ia nehenehe oe e hiˈo atu a tere ai oe. Eita anei oe e papu e e tapae iho â oe?

Oia atoa ia maiti tatou i te haapaoraa tano, e hinaaro tatou i te hoê pu aratairaa papu. Te vai ra anei te tahi? E. Te Bibilia ïa, o te na ô ra: “Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia ra.”—Timoteo 2, 3:16.

Te vai ra paha i roto i to oe reo, te hoê huriraa o te Bibilia o ta oe e faaohipa ei aratai no te ite i te haamoriraa tano. Ua nenei te feia i pia i teie vea, te mau Ite no Iehova, i te hoê huriraa o te nehenehe e tiaturihia, te Huriraa a te ao apî o te mau Papai moˈa (e vai ra na roto i te reo Farani). Teie râ, mai te peu e e ere oe i te Ite no Iehova, e hinaaro paha oe e faaohipa i te tahi atu huriraa a hiˈopoa ˈi oe i te tumu parau no nia i te iteraa i te haapaoraa maitai e te haapaoraa ino. No reira, e faaohipahia no teie anairaa tumu parau te mau huriraa bibilia faatura-rahi-hia e te tahi atu mau haapaoraa.

A taio ai oe i to muri nei mau tumu parau, a faaau i ta oe i ite e i ta te Bibilia e parau ra. A haamanaˈo i ta Iesu mau parau e nafea ia faataa ê i te haapaoraa maitai e te haapaoraa ino. Ua parau oia: “E faahotu mai te mau raau maitatai atoa i te huero maitai, e te mau raau iino ra, e faahotu mai ïa i te huero ino. E ore e tia i te raau maitai ia faahotu mai i te huero ino, e ore atoa te raau ino e faahotu mai te huero maitai.” (Mataio 7:17, 18) E hiˈo mai tatou e toru noa o te mau hotu maitatai ta te Bibilia e parau ra, e tapao o te “raau maitai.”