Te haapii ra anei outou mai ta Iesu i haapii?
“Ua maere anaˈe ihora te taata atoa i te huru o ta ˈna parau: i haapii hoi oia ia ratou ma te mana, e ere mai ta te mau papai parau ra.”—MATAIO 7:28, 29.
1. O vai tei apee mai ia Iesu ia ˈna i haapii na Galilea, e eaha hoi te huru o Iesu?
I TE mau vahi atoa ta Iesu i haere, e tiaa rahi taata na tei putuputu mai ia ˈna ra. “Haere atura [oia] na Galilea atoa e ati aˈe, i te haapiiraa i roto i to ratou mau sunago ra, e te aˈoraa i te parau maitai o te basileia e i te faaoraraa i te mau maˈi e te mau pohe atoa o te taata ra.” A parare noa ˈi te parau no nia i ta ˈna mau ohipa i rave, “e tiaa rahi tei pee mai ia ˈna no Galilea mai, e no Dekapoli, e no Ierusalema, e no Iudea, e no te pae Ioridana ra.” (Mataio 4:23, 25) E ia ite atu oia ia ratou, “aroha ˈtura oia ia ratou, no te mea, ua purara ratou e ua faarue-taue-hia, mai te mamoe tiai ore ra.” Ia haapii atu oia, ua nehenehe ratou e ite i te here aore ra i to ˈna aroha rahi ia ratou; mai te monoˈi tamǎrû ra hoi te reira i nia i to ratou mau paruparu, e huti hoi ia ratou ia ˈna ra.—Mataio 9:35, 36.
2. Hau atu i te mau semeio a Iesu, eaha tei huti i te manaˈo o te mau tiaa rahi taata?
2 Auê ïa mau faaoraraa semeio i te pae tino ta Iesu i rave—i te tamâraa i te mau lepera, i te raveraa e ia faaroo te mau tariˈa turi, ia ite te mau matapo, ia haere te mau pirioi, ia ora faahou mai te feia pohepohe! Papu maitai, ua huti teie mau faaiteraa faahiahia a te ohipa i ravehia e te mana o Iehova na roto ia Iesu, i te mau tiaa rahi taata! E ere te mau semeio anaˈe te mau mea i huti ia ratou; ua haere atoa mai te mau nahoa rahi taata no te faaoraraa varua e tupu na ia haapii o Iesu. Ei hiˈoraa, a tapao na i ta ratou pahonoraa, i muri aˈe i to ratou faarooraa i ta ˈna Aˈoraa tuiroo i nia i te Mouˈa: “E ia faaoti aˈera Iesu i teie nei parauraa, ua maere anaˈe ihora te taata atoa i te huru o ta ˈna parau: i haapii hoi oia ia ratou ma te mana, e ere mai ta te mau papai parau ra.” (Mataio 7:28, 29) E faahiti na ta ratou mau rabi i te mau tutuu a te mau rabi tahito ei turu i ta ratou mau haapiiraa. Ua haapii o Iesu ia ratou maoti te mana no ǒ mai i te Atua ra: “E teie nei ta ˈu e parau atu ia outou nei, o ta te Metua ïa i faaue mai ia ˈu, o ta ˈu e parau nei.”—Ioane 12:50.
E haaputapû ta ˈna haapiiraa i te mafatu
3. Mea nafea ta Iesu huru faaiteraa i ta ˈna poroi ia taa ê i ta te mau papai parau e te mau Pharisea?
3 Te taa-ê-raa i rotopu i te haapiiraa a Iesu e ta te mau papai parau e te mau Pharisea, e ere noa ïa te mau tumu parau i roto—te mau parau mau no ǒ mai i te Atua ra e taa ê i te mau tutuu teimaha a te taata tei ore i papaihia—o ta ˈna atoa râ huru haapiiraa. E mau taata teoteo e te etaeta te mau papai parau e te mau Pharisea, mea au na ratou e titau i te mau tiaraa e e faariro na ratou i te mau tiaa rahi taata “[ei mau taata haapaoraa ore].” Area o Iesu ra, e taata haehaa oia, te mǎrû, te hamani maitai, e te maitai, e e pinepine oia i te ore e aimârô aore ra i te tuu i te manaˈo e oia hoi i te aroha ia ratou. Aita noa o Iesu i haapii ma te faaohipa i te mau parau tano, ua faaohipa atoa râ oia i te mau parau e haaputapû, no roto roa mai i to ˈna mafatu, o te haaputapû roa hoi i te mafatu o te feia e faaroo ra ia ˈna. E huti hoi ta ˈna poroi oaoa i te mau taata ia ˈna ra, ma te faaitoito ia ratou ia haere i te hiero i te poipoi roa e faaroo ia ˈna, e inaha ua pee maira hoi ratou ia ˈna e ua faaroo ia ˈna ma te anaanatae mau. E rave rahi mau taata i haere mai e faaroo ia ˈna tei parau e: “[Aita aˈenei taata i parau mai teie te huru].”—Ioane 7:46-49; Mareko 12:37; Luka 4:22; 19:48; 21:38.
4. Eaha te mea i roto i te pororaa a Iesu tei huti taa ê i te manaˈo o te mau taata e rave rahi?
4 Papu maitai, te hoê o te mau tumu te taata i anaanatae ai i ta ˈna haapiiraa o te faaohiparaa ïa oia i te mau parabole. Ua ite o Iesu eaha ta vetahi ê i ite, tera râ te manaˈo ra oia i te mau mea ta ratou i ore aˈenei i manaˈo. Te mau lili e tupu na i roto i te mau aua, te mau manu e hamani i to ratou mau ofaaraa, te taata ueue huero, te mau tiai mamoe e imi i te mau arenio i moe, te mau vahine e tafai i te mau ahu tahito, te mau tamarii e hauti i te makete, te feia ravaai e huti ra i ta ratou mau upeˈa—mau ohipa e ite-pinepine-hia ta te taata atoa e ite ra—e ere roa ˈtu râ i te mau mea riirii i mua i te aro o Iesu. I te mau vahi atoa ta ˈna e hiˈo na, e ite oia eaha ta ˈna e nehenehe e faaohipa no te faahohoˈa i te Atua e i To ˈna Basileia aore ra no te haapapu i te hoê ohipa no nia i te totaiete taata e haaati ra ia ˈna.
5. Ua niu o Iesu i ta ˈna mau faahohoˈaraa i nia i te aha, e e na te aha e faariro i ta ˈna mau parabole ei mau parabole e faaanaanatae mau i te manaˈo?
5 Ua niuhia te mau faahohoˈaraa a Iesu i nia i te mau mea e tupu i te mau mahana atoa ta te taata i ite e rave rahi taime, e ia faatuatihia ˈtu te parau mau i teie mau mea matauhia, e mau oioi ïa te reira e e vai hohonu hoi i roto i te feruriraa o te feia e faaroo maira. Eita noa teie mau parau mau e faaroohia; e ite-atoa-hia râ ratou na te mata o te feruriraa e ohie roa i te faahaamanaˈohia mai a muri aˈe. E itehia i roto i te mau parabole a Iesu i te huru ohie, o te ore e faateimahahia e te mau mea faufaa ore e riro i te haafifi e i te tapea ia ratou ia taa i te auraa o te mau parau mau. A rave na ei hiˈoraa, i te parabole no nia i te taata samaria hamani maitai ra. E oioi noa hoi outou i te taa e e taata maitai teie. (Luka 10:29-37) Te vai atoa ra te parabole no nia i na tamarii tamaroa toopiti—hoê o tei parau e e haere o ˈna i roto i te ǒ vine e rave i te ohipa e aita râ i haere, te tahi tei parau e eita o ˈna e haere e o tei haere râ hoi. E oioi noa outou i te taa e te parau no te auraro mau—te raveraa ïa i te ohipa i faauehia. (Mataio 21:28-31) Eita te mau feruriraa e taoto aore ra e atea ê i roto i te haapiiraa oraora maitai a Iesu. E vai ohipa maitai to ratou mau feruriraa na roto i te faarooraa e te iteraa ˈtu ratou.
Eita o Iesu e aimârô ia ô mai te parau no te here
6. Afea te manaˈo maitai, aore ra te oreraa e mârô, aore ra te tuuraa i te manaˈo e riro ai ei tauturu taa ê mau?
6 E rave rahi taime, ia faahiti te Bibilia i te parau no te riroraa ei taata manaˈo maitai, e faaite mai te tahi haamaramaramaraa e te auraa ra eiaha ïa e faatupu i te manaˈo aimârô. E titau te paari no ǒ mai i te Atua ra ia ore tatou e mârô i roto i te tahi mau huru tupuraa e tia ˈi ia na reirahia. E tia hoi ia tatou ia riro ei mau taata manaˈo maitai, aore ra eiaha e aimârô i te tahi mau taime. E hinaaro te mau matahiapo e ore e aimârô ia itehia te here e ia riro te tatarahapa ei niu no te manaˈo mârô ore. (Timoteo 1, 3:3; Iakobo 3:17) Ua vaiiho mai o Iesu e rave rahi mau hiˈoraa faahiahia mau i te pae no te oreraa e aimârô, e ua na nia ˈˈe hoi i te mau ture matauhia ia titau te aroha faito ore aore ra te here i te reira.
7. Eaha vetahi mau hiˈoraa a Iesu no nia i te tuuraa te manaˈo aore ra te oreraa e aimârô?
7 Teie ta Iesu i parau i te hoê taime: “O tei huna râ ia ˈu i mua i te aro o te taata nei, e huna atoa vau ia ˈna i mua i te aro o tau Metua i te ao ra.” Aita râ oia i huna ia Petero, noa ˈtu â ïa e ua huna o Petero ia ˈna e toru taime. Te vai ra te tahi mau huru tupuraa te tia ia tamǎrûhia e ua tâuˈa mau o Iesu i te reira. (Mataio 10:33; Luka 22:54-62) Ua ite-atoa-hia te mau huru tupuraa tei nehenehe e tamǎrûhia i te ofatiraa te vahine e tapahi to ˈna i te Ture a Mose, ia ˈna i haere mai i roto i te mau tiaa rahi taata. Aita o Iesu i faahapa ia ˈna. Ua taa maitai ia ˈna i to ˈna fifi. (Mareko 1:40-42; 5:25-34; hiˈo atoa Luka 5:12, 13.) Ua parau atu o Iesu i ta ˈna mau aposetolo eiaha e faaite i te taata e o te Mesia o ˈna, inaha aita hoi oia i fati i raro aˈe i taua ture ra ia faaite oia ia ˈna ei Mesia i te vahine Samaria, i te apoo pape ra. (Mataio 16:20; Ioane 4:25, 26) I roto i taua mau hiˈoraa atoa nei, na te here e te aroha faito ore i faariro i taua manaˈo mârô ore ra ei manaˈo tano.—Iakobo 2:13.
8. Afea te mau papai parau e te mau Pharisea e ofati ai i te mau ture, e afea ratou e ore ai e ofati?
8 Mea taa ê roa no te mau papai parau manaˈo aimârô e te mau Pharisea. Ratou iho, e ofati na ratou i ta ratou mau tutuu no nia i te sabati no te aratai i ta ratou mau puaatoro i te pape. Aore ra ia topa ta ratou puaatoro aore ra ta ratou tamarii i roto i te hoê apoo pape, e ofati ïa ratou i te ture o te sabati no te tatara mai ia ˈna. No te mau taata riirii râ, eita roa ˈtu ïa ta ratou e nehenehe e farii! E ore râ “te hoê rima o ratou e faatiaia noa ˈtu i taua mau hopoia ra.” (Mataio 23:4; Luka 14:5) No Iesu, mea faufaa aˈe te taata i te mau ture e rave rahi; no te mau Pharisea, mea faufaa aˈe te mau ture i te taata.
Te riroraa ei “Tamaiti no te Faaueraa”
9, 10. I muri aˈe i to ˈna hoˈiraa ˈtu i Ierusalema, ihea roa to te mau metua o Iesu iteraa ˈtu ia ˈna, e eaha te faufaaraa no te ui a Iesu?
9 Te mutamuta nei vetahi pae i te mea e hoê anaˈe ohipa no nia i te vai-apî-raa o Iesu tei faatiahia mai. Inaha, aita hoi te rahiraa e taa ra i te faufaa rahi o taua ohipa i tupu ra. Te parauhia ra i roto i te Luka 2:46, 47: “E rui toru aˈera, ite atura raua ia ˈna i roto i te hiero ra, te parahi ra i ropu i te mau orometua, te faaroo atura e te ui atura ia ratou. Maere anaˈe ihora te feia atoa i faaroo ia ˈna ra, i to ˈna ite e ta ˈna parau.” Te faaite ra te Theological Dictionary of the New Testament a Kittel e i ǒ nei, te parau heleni no te parau ra “ui” e ere roa ˈtu ïa no te haapapu noa mai i te manaˈo hiˈopoa o te hoê tamaiti iti. E nehenehe atoa te parau ra ui e faaohipahia i roto i te parau no te tuatapaparaa i te pae no te ture, no te maimiraa aore ra no te hiˈopoa-maite-raa, mai te mau parau “râmâ e te haavarevare a te mau Pharisea e te mau Sadukea,” i faahitihia i roto i te Mareko 10:2 e te 12:18-23.
10 Te na ô râ taua nei â titionare e: “Ia au i teie nei faaohiparaa e nehenehe ïa e uihia e . . . aita anei te [Luka] 2:46 e haapapu ra, eiaha noa no nia i te manaˈo hiˈopoa o te tamaiti iti, no nia râ i ta ˈna tuatapaparaa manuïa mau. E tano maitai hoi te [Irava] 47 i taua manaˈo hopea nei.”a Te faaite ra te tatararaa a te taata ra o Rotherham no nia i te irava 47 i te reira mai te hoê tauaparauraa peapea mau: “Inaha, ua arepurepu roa te feia i faaroo ia ˈna no to ˈna ite e ta ˈna mau pahonoraa.” Te parau ra te Word Pictures in the New Testament a Robertson e te auraa no to ratou maere tamau, mai te huru ra ïa e “ua matara roa mai to ratou poro mata i rapae.”
11. Eaha te huru o Maria raua o Iosepha i te mau mea ta raua i ite e i faaroo, e eaha te tahi manaˈo ta te hoê titionare e tuatapapa i te parau no nia i te Atua, e horoa ra?
11 E ia tae mai na metua o Iesu i te hiero, “hitimaue atura raua.” (Luka 2:48) Te na ô ra o Robertson e te auraa o teie parau na roto i te reo heleni “huru ê ïa, turaihia i rapae na te hoê aho.” Te na ô faahou ra oia e “ua hitimaue roa” o Iosepha raua o Maria i te mau mea ta raua i ite e i faaroo. Oia hoi te auraa, e orometua maere rahi mau â o Iesu. E ia au i teie ohipa i tupu i te hiero, te na ô ra te buka a Kittel e “te haamata ra o Iesu i roto i to ˈna vai-tamarii-rii-raa, i te aroraa i rotopu ia ˈna e te mau aratai faaroo e i te pae hopea, ua tia hoi i to ˈna mau taata patoi ia tuu.”
12. Na te aha i tapao i te tauaparauraa i rotopu ia Iesu e te mau aratai faaroo i muri aˈe?
12 E ua tuu mau â hoi te mau taata patoitoi o Iesu! E tau matahiti i muri iho, mea na roto i teie mau huru uiraa to Iesu haamâmûraa i te mau Pharisea e inaha “mai taua mahana maira aore roa i tia i te hoê ia ui faahou mai ia ˈna.” (Mataio 22:41-46) Ua faaea muhu ore noa aˈera te mau Sadukea i nia i te tumu parau no te tia-faahou-raa, e “i muri aˈera, aita roa ratou i ui faahou mai ia ˈna i te mǎtaˈu.” (Luka 20:27-40) Aita atoa te mau papai parau i manuïa. I muri aˈe te tauaparauraa te hoê o ratou e o Iesu, “aita roa ˈtu e taata i ui faahou i te ui ia ˈna mai reira mai â.”—Mareko 12:28-34.
13. Na te aha i faariro i te ohipa i tupu i roto i te hiero ei ohipa faufaa roa i roto i te oraraa o Iesu, e eaha ˈtu â te ohipa e tupu a muri aˈe ta te reira e faaau maira?
13 No te aha teie anaˈe te ohipa i tupu no nia ia Iesu e te mau orometua i te hiero i to ˈna vai-tamarii-rii-raa ra tei faatiahia mai? O te hoê hoi teie taime faufaa roa i roto i te oraraa o Iesu. I te area o te 12raa o to ˈna matahiti, ua riro maira oia mai ta te mau ati Iuda e parau ra ei “tamaiti no te faaueraa” e tia ia ˈna ia haapao i ta ˈna mau faaueraa atoa. Ia parau atu o Maria ia Iesu i te hepohepo ta ˈna i faatupu i roto ia raua o Iosepha, te faaite ra te pahonoraa a ta ˈna tamaiti ia ˈna e ua faatupu mau â oia i te naturaraa semeio o to ˈna fanauraa e o to ˈna huru mesia a muri aˈe. Ua itehia taua manaˈo ra ia ˈna i haapapu tahaa e o te Atua to ˈna Metua: “Eaha orua i imi ai ia ˈu? aita orua i ite, e ia haapao vau i ta ta ˈu metua e tia ˈi?” Auaa râ hoi, teie te mau parau matamua no roto mai ia Iesu tei faatiahia i roto i te Bibilia, e te haapapu maira te reira i to ˈna haapao maitai i te opuaraa a Iehova no nia i to ˈna tonoraahia mai i te fenua nei. No reira, teie aamu taatoa o te hoê ïa o te mau aamu faufaa roa ˈˈe.—Luka 2:48, 49.
Mea here na Iesu i te tamarii e ua ite atoa oia i to ratou mau hinaaro
14. Eaha te mau tuhaa anaanatae mau ta te aamu no nia ia Iesu i to ˈna vai-tamarii-rii-raa ra i te hiero, e faaara maira i te mau ui apî?
14 E riro teie aamu i te faaoaoa taa ê i te mau ui apî. Te faaite ra hoi te reira i te itoito o Iesu i roto i te parau no te haapiiraa e paari noa mai oia. Ua maere roa te mau rabi i te hiero i te paari o teie nei “tamaiti no te faaueraa”, 12 matahiti. E a rave noa ˈi oia i te ohipa ia Iosepha ra i roto i te ohipa tamuta, “[ua tamau noâ oia i te auraro]” ia ˈna e ia Maria, e ua tupu atura i te rahi “i te herehia mai e te Atua e te taata atoa.”—Luka 2:51, 52.
15. Mea nafea to Iesu tururaa i te mau ui apî ia ˈna i tavini i te fenua nei, e eaha to te reira auraa no te mau ui apî o teie nei tau?
15 Mea paruru roa na Iesu i te mau tamarii rii ia ˈna i faatupu i ta ˈna taviniraa i te fenua nei: “Ia hiˈo mai râ te feia tahuˈa rarahi e te mau papai parau i te mau mea huru ê ta ˈna i rave ra, e ia faaroo i te tamarii i roto i te hiero i te piiraa, e te na ôraa e, Hosani te Tamaiti a Davida, î aˈera ratou i te riri: e ua parau maira ia ˈna, Te ite na oe i ta ratou e parau nei? Ua parau atura Iesu ia ratou, E; aitâ outou i taio i te vaha o te tamarii rii e te aiû rii?” (Mataio 21:15, 16; Salamo 8:2) Te turu atoa nei oia i te mau hanere tausani feia apî i teie mahana teie e tapea nei i to ratou haapao maitai e te tia ia haapopouhia, e ua horoa roa hoi vetahi o ratou i to ratou ora!
16. (a) Eaha te haapiiraa ta Iesu i haapii i ta ˈna mau aposetolo ia ˈna i rave mai i te hoê tamarii rii e ua tuu maira i rotopu ia ratou? (b) I teihea taime o te oraraa o Iesu to ˈna horoa-noa-raa i te taime no te mau tamarii?
16 I te aimârôraa te mau aposetolo no te ite e o vai tei rahi aˈe i roto ia ratou, ua na ô atura Iesu i na tino 12 ra e: “O te taata i hinaaro e ei mua oia, ei hopea roa oia e tia ˈi, e ei tavini no ratou atoa. E ua rave aˈera oia i te hoê tamaiti iti, e ua tuu atura i ropu ia ratou, ua rave atura hoi e ua hii ihora ia ˈna e na ô atura ia ratou, O te ite mai i te hoê tamaiti iti mai teie nei no to ˈu nei iˈoa, ua ite mai ïa ia ˈu; e o te ite mai ia ˈu ra, e ere ïa o vau anaˈe ra ta ˈna i ite maira, oia atoa râ o tei tono mai ia ˈu nei ra.” (Mareko 9:35-37) Hau atu, ia ˈna i tere atu i Ierusalema i te taime hopea, no te faaruru atu i te hoê ati riaria mau e i te pohe, ua rave oia i te taime no te mau tamarii: “A tuu mai i te tamarii rii ia haere noa mai ia ˈu nei, e eiaha e tapeahia ˈtu; mai ia ratou hoi to te basileia o te Atua ra.” I muri iho, ua “rave atura [oia] ia ratou, ua hii ihora, ua tuu atura i tana rima i nia iho ia ratou, e ua faaora ˈtura oia ia ratou.”—Mareko 10:13-16.
17. No te aha e mea ohie roa na Iesu ia taai atu e te mau tamarii, e e tia i te mau tamarii ia haamanaˈo i te aha no nia ia ˈna?
17 Ua ite o Iesu eaha te auraa no te riroraa ei tamarii i roto i te ao taata paari. Ua ora oia i pihai iho i te mau taata paari, ua rave i te ohipa e o ratou, ua ite oia nafea ia auraro ia ratou, e ua ite atoa oia i te mahanahana, te manaˈo hau ia herehia mai oia e ratou. E te mau tamarii, taua nei â Iesu ra o to outou ïa hoa; ua pohe oia no outou, e e ora outou e a muri noa ˈtu ia auraro outou i ta ˈna mau faaueraa.—Ioane 15:13, 14.
18. Eaha te manaˈo faufaa mau ta tatou e tapea i roto i to tatou feruriraa, i te mau taime hepohepo iho â râ aore ra fifi mau?
18 No te rave mai ta Iesu e faaue maira, e ere roa ˈtu i te mea teimaha mai te nehenehe e manaˈohia. E te mau ui apî, ua ineine o ˈna i te turu ia outou e i te mau taata atoa, mai ta tatou e taio i roto i te Mataio 11:28-30: “E haere mai outou ia ˈu nei e te feia atoa i haˈa rahi, e tei teiaha i te hopoia, e na ˈu outou e faaora. A rave mai i tau zugo i nia ia outou [aore ra, “A haere mai i raro aˈe i ta ˈu nei zugo e o vau nei,” nota i raro i te api] e ia haapiihia outou e au, te mǎrû nei hoi au e te haehaa o te aau: e e noaa hoi te ora i to outou varua. Te mǎrû nei hoi ta ˈu zugo e te mâmâ nei ta ˈu hopoia.” A feruri na e a haere noa ˈi outou i roto i te oraraa ma te tavini ia Iehova, te haere atoa ra o Iesu i pihai iho ia outou, ma te faariro i te zugo ei zugo maitai e te hopoia ei hopoia mâmâ. E manaˈo faahiahia mau â teie no tatou paatoa!
19. Eaha te mau uiraa no nia i te mau huru haapiiraa a Iesu te tia ia tatou ia hiˈopoa i te tahi mau taime?
19 I muri aˈe tatou e hiˈopoa faahou ai i te tahi noa mau ravea ta Iesu i faaohipa no te haapii, ia manaˈo tatou, te haapii ra anei tatou mai ta ˈna i haapii? Ia hiˈo tatou i te feia maˈi i te pae tino aore ra i te feia e mauiui ra i te pae varua, te turai ra anei te aroha ia tatou ia rave i ta tatou e nehenehe e rave no te tauturu ia ratou? Ia haapii tatou ia vetahi ê, te haapii ra anei tatou i te Parau a te Atua, aore ra, mai te mau Pharisea, te haapii ra tatou i to tatou iho mau manaˈo? E vitiviti anei tatou i te ite i te mau mea e haaati ra ia tatou i te mau mahana atoa o te nehenehe hoi e faaohipahia no te haamaramarama, no te ite roa ˈtu, no te haapapu maitai, e te haafaufaa i te ite no nia i te mau parau mau i te pae varua? E ape anei tatou i te aimârô i te tahi mau ture, mai te peu e i roto i te tahi mau tupuraa, o te here e te aroha faito ore o te haafaufaahia na roto i te oreraa e mârô i te faaohipa i taua mau huru ture ra? E eaha ˈtura ïa no nia i te mau tamarii? Te faaite ra anei tatou hoê â huru maitai e te hamani maitai e o Iesu? Te faaitoito ra anei outou i ta outou mau tamarii ia tuatapapa e mea nafea to Iesu haˈaraa i to ˈna vai-tamarii-rii-raa ra? E ohipa anei outou ma te manaˈo papu mai ia Iesu e ua ineine anei outou i te farii ma te mahanahana i te feia tatarahapa, mai te hoê moa e haaputuputu i to ˈna mau fanauˈa i raro aˈe i to ˈna pererau?—Mataio 23:37.
20. Eaha te manaˈo faufaa mau ta tatou e nehenehe e faaohipa a tavini noa ˈi tatou i to tatou Atua?
20 Ia tutava tatou i te haapii mai ta Iesu i haapii, papu maitai oia i te tuu ia tatou ‘i raro aˈe i ta ˈna zugo.’—Mataio 11:28-30.
[Nota i raro i te api]
a Papu maitai, e mau tumu ta tatou no te tiaturi e e hiˈo maitai o Iesu i taua feia paari aˈe ia ˈna ra, te feia rouru teatea iho â râ e te mau tahuˈa.—A faaau e te Levitiko 19:32; Ohipa 23:2-5.
Te haamanaˈo ra anei outou?
◻ No te aha te mau tiaa rahi taata i putuputu mai ai ia Iesu ra?
◻ No te aha, i te tahi mau taime, o Iesu i ore ai e aimârô i nia i te tahi mau ture?
◻ Eaha ta tatou e nehenehe e haapii mai i te ui a Iesu i te mau orometua o te hiero?
◻ Eaha te mau haapiiraa ta tatou e nehenehe e haapii mai i roto i te mau taairaa o Iesu e te mau tamarii?