Te hiero rahi o Iehova i te pae varua
“E tahuˈa rahi to tatou, . . . E tahuˈa no te vahi moˈa, i roto i te sekene mau, ta [Iehova] i faatia, e ere ta te taata ra.”—HEBERA 8:1, 2; MN.
1. Eaha te ravea î i te here ta te Atua i faanaho no te huitaata hara nei?
NO TO ˈNA here rahi i te huitaata nei te Atua ra o Iehova i horoa mai ai i te hoê tusia no te hopoi ê atu i te hara o te ao. (Ioane 1:29; 3:16) No reira, ua rave mai oia i te ora o ta ˈna Tamaiti fanau tahi mai te raˈi mai e ua tuu atu i roto i te opu o te hoê potii paretenia ati Iuda ra o Maria te iˈoa. Ua haapapu maitai te melahi a Iehova ia Maria e, te tamaiti o ta ˈna e hapû, ‘e parauhia oia e moˈa, o te Tamaiti na te Atua.’ (Luka 1:34, 35) Ua faaarahia Iosepha, te tane momoˈa a Maria, e ua hapû o Maria ia Iesu na roto i te semeio, e ua haapii atoa oia e “e faaora hoi oia i to ˈna taata i ta ratou hara.”—Mataio 1:20, 21.
2. Eaha ta Iesu i rave i te area e 30 o to ˈna matahiti, e no te aha?
2 I to Iesu paariraa mai, ua taa paha ia ˈna vetahi mau tupuraa no nia i to ˈna fanauraa semeio. Ua ite oia e ua tono mai to ˈna Metua i te raˈi ia ˈna i nia i te fenua nei no te faaora i te taata. No reira, ei taata paari faito 30 matahiti, ua haere atu Iesu i te peropheta a te Atua ra o Ioane ia bapetizohia oia i Ioridana.—Mareko 1:9; Luka 3:23.
3. (a) Eaha te auraa o teie mau parau a Iesu, “Aita aˈenei i tia ia oe te tusia e te perosephora [ô]”? (b) Eaha te hiˈoraa faahiahia ta Iesu i horoa no te feia atoa e hinaaro ra e riro ei pǐpǐ na ˈna?
3 Te pure ra Iesu i te taime a bapetizohia ˈi oia. (Luka 3:21) Oia mau, mai taua taime o to ˈna oraraa ra, ua faatupu oia i te mau parau i roto i te Salamo 40:6-8, mai ta te aposetolo Paulo i faaite i muri iho: “Aita aˈenei i tia ia oe te tusia e te perosephora [ô]; ua faaau râ oe i te hoê tino no ˈu.” (Hebera 10:5) Ua faaite ïa Iesu e ua taa ia ˈna e ‘aita i tia’ i te Atua e ia pûpû-noa-hia te tusia animala i te hiero o Ierusalema. Maoti râ, ua papu ia ˈna e ua faaineine te Atua i te hoê tino taata tia roa no ˈna, o Iesu, ia pûpûhia ei tusia. Eita ïa e titau-faahou-hia te tusia animala. Ma te faaite i to ˈna hinaaro hohonu e auraro i te hinaaro o te Atua, ua na ô â Iesu i te pure e: “Teie au, e tau Atua, te haere nei au e faatia i to oe hinaaro, (ua papaihia te parau no ˈu i roto i te otaro o te buka ra.)” (Hebera 10:7) Auê ïa hiˈoraa faahiahia no te itoito e te paieti miimii ore ta Iesu i horoa i taua mahana ra, no te feia atoa o te riro mai a muri aˈe ei pǐpǐ na ˈna!—Mareko 8:34.
4. Mea nafea to te Atua faaiteraa e ua farii oia i te pûpûraa Iesu ia ˈna iho?
4 Ua farii anei te Atua i te pure a Iesu i to ˈna bapetizoraahia? A vaiiho e na te hoê aposetolo maitihia a Iesu e pahono: “E oti aˈera Iesu i te bapetizohia, haere maira oia i nia mai raro mai i te pape, e inaha, vetea aˈera te raˈi ia ˈna, hiˈo aˈera oia i te [v]arua o te Atua i te pouraa mai mai te uupa ra, e te tauraa mai i nia iho ia ˈna: e inaha, o te reo maira no te raˈi mai, i te na ôraa mai e, Tau Tamaiti here teie, ua mauruuru roa vau ia ˈna.”—Mataio 3:16, 17; Luka 3:21, 22.
5. Eaha tei faahohoˈahia e te fata mau o te hiero?
5 I to te Atua fariiraa i to Iesu pûpûraa i to ˈna tino no te tusia, te auraa ïa i te pae varua, ua haafaufaahia te hoê fata hau aˈe i to te hiero no Ierusalema. Ua faahohoˈa te fata mau i reira te mau animala e pûpûhia ˈi no te tusia i taua fata i te pae varua ra, oia hoi te “hinaaro” aore ra te faanahoraa a te Atua no te farii i te ora taata o Iesu ei tusia. (Hebera 10:10) No reira te aposetolo Paulo i papai ai i te mau Kerisetiano e: “E fata ta tatou o tei ore roa e au i te feia e haamori i roto i te sekene [aore ra, hiero] ra ia amu i te tusia.” (Hebera 13:10) Oia hoi te auraa, te fanaˈo nei te mau Kerisetiano mau i te hoê tusia taraehara hau aˈe, ta te rahiraa o te mau tahuˈa ati Iuda i ore i farii.
6. (a) Eaha tei haafaufaahia i te taime a bapetizohia ˈi o Iesu? (b) Eaha te auraa o te tiaraa iˈoa ra Mesia, aore ra Kirito?
6 Te auraa o te faatavairaahia Iesu e te varua moˈa oia hoi ua faatia te Atua i taua taime ra, i ta ˈna faanahoraa taatoa no te hiero i te pae varua, e o Iesu te Tahuˈa Rahi. (Ohipa 10:38; Hebera 5:5) Ua faauruahia te pǐpǐ ra o Luka ia haapapu e, te matahiti o taua ohipa faufaa roa ra, o “te ahuru ma pae i te matahiti [ïa] i te hau o Kaisara Tiberio.” (Luka 3:1-3) E tuea te reira i te matahiti 29 o to tatou tau—e 69 hebedoma matahiti tia, oia hoi e 483 matahiti, mai te tau a horoa ˈi te Arii ra o Aretehasaseta i te faaueraa ia faatia-faahou-hia te mau patu o Ierusalema. (Nehemia 2:1, 5-8) Ia au i te parau tohu, e fa mai “te Mesia te Arii” i taua matahiti i tohuhia ra. (Daniela 9:25) E rave rahi ati Iuda o tei ite i te reira. Te faatia ra o Luka e “te fatimauu noa ra te taata” no nia i te faraa mai te Mesia, aore ra Kirito, e mau iˈoa teie no roto mai i te mau parau hebera e heleni oia hoi te auraa, “faatavaihia.”—Luka 3:15.
7. (a) Afea to te Atua faatahinuraa i te vahi “Moˈa Rahi,” e eaha ïa to te reira auraa? (b) Eaha ˈtu â tei tupu i nia ia Iesu i to ˈna bapetizoraahia?
7 I te taime a bapetizohia ˈi Iesu, ua faatahinuhia, aore ra ua faataa-ê-hia, te vahi e parahi ai te Atua i nia i te raˈi, ei vahi “Moˈa Rahi” i roto i te faanahoraa no te hiero rahi i te pae varua. (Daniela 9:24) Ua faaohipahia ïa “te sekene mau [aore ra, hiero], ta [“Iehova,” MN] i faatia, e ere ta te taata ra.” (Hebera 8:2) Oia atoa, na roto i to ˈna bapetizoraahia i te pape e te varua moˈa, ua fanau-faahou-hia mai te taata ra o Iesu Mesia ei Tamaiti varua na te Atua. (A faaau e te Ioane 3:3.) Te auraa ra, i te taime faataahia, e faahoˈi faahou te Atua i ta ˈna Tamaiti i nia i te raˈi, i reira oia e tavini ai i te pae atau o to ˈna Metua ei Arii e ei Tahuˈa Rahi “e a muri noa ˈtu ia au i te parau ia Melehizedeka.”—Hebera 6:20; Salamo 110:1, 4.
Te vahi Moˈa Roa i nia i te raˈi
8. Eaha te mau tuhaa apî i itehia no nia i te terono o te Atua i te raˈi?
8 I te mahana a bapetizohia ˈi Iesu, ua rave mai te terono o te Atua i nia i te raˈi i te mau tuhaa apî. Ua haapapu maitai te titauraahia te hoê tusia taata tia roa no te tatara i te hara a te ao, i te huru moˈa o te Atua ia faaauhia i te huru hara o te taata. Ua haapapu-atoa-hia te aroha o te Atua i te mea e, ua ineine oia i teie nei i te faahau, aore ra i te tatara i te hara. Ua riro mai ïa te terono o te Atua i nia i te raˈi, mai te piha i roto roa i te hiero, i reira te tahuˈa rahi e tomo ai hoê taime i te matahiti e te toto animala no te tatara i te hara ia au i te hoê auraa taipe.
9. (a) Eaha ta te paruru i rotopu i te vahi Moˈa e te vahi Moˈa Roa i faahohoˈa? (b) Mea nafea to Iesu tomoraa ˈtu na roto i te paruru o te hiero o te Atua i te pae varua?
9 Ua faahohoˈa te paruru o te faataa ê na i te vahi Moˈa e te vahi Moˈa Roa i te tino iˈo o Iesu. (Hebera 10:19, 20) Ua riro to ˈna tino ei taotiaraa tei tapea ia ˈna ia tia ˈtu i mua i to ˈna Metua, a riro ai oia ei taata i nia i te fenua nei. (Korinetia 1, 15:50) I te taime a pohe ai Iesu, “ua mahae ihora te paruru o te hiero ra, mai nia mai â e raro roa.” (Mataio 27:51) Ua faaite puai te reira e ua tatarahia te taotiaraa tei tapea na ia Iesu ia tomo i roto i te raˈi. E toru mahana i muri aˈe, ua rave te Atua ra o Iehova i te hoê semeio maere mau. Ua faatia mai oia ia Iesu mai te pohe mai, eiaha ei taata tino iˈo e te toto o te pohe a muri aˈe, ei taata varua hanahana râ “e vai ora e a muri noa ˈtu.” (Hebera 7:24, MN) E maha ahuru mahana i muri iho, ua hoˈi aˈera Iesu i nia i te raˈi e ua tomo atura i roto i te vahi “Moˈa Rahi,” ‘e faaite ia ˈna iho i mua i te aro o te Atua no tatou.’—Hebera 9:24.
10. (a) Eaha tei tupu i muri aˈe i to Iesu hopoiraa i te faufaa o ta ˈna tusia i mua i to ˈna Metua i te raˈi ra? (b) Eaha te auraa o te faatavairaa i te varua moˈa no te mau pǐpǐ a te Mesia?
10 Ua farii anei te Atua i te faufaa o te toto haamaniihia o Iesu no te tatara i te hara o te ao? E. Ua haapapuhia mai te reira e 50 mahana tia i muri aˈe i te tia-faahou-raa o Iesu, i te mahana oroa Penetekose. Ua niniihia mai te varua moˈa o te Atua i nia i na pǐpǐ e 120 a Iesu tei putuputu mai i Ierusalema. (Ohipa 2:1, 4, 33) Mai to ratou Tahuˈa Rahi, o Iesu Mesia, ua faatavai-atoa-hia ratou i tera taime no te tavini “ei autahuˈa moˈa, ei hopoi i te tusia varua” i roto i te faanahoraa no te hiero rahi a te Atua i te pae varua. (Petero 1, 2:5) Hau atu, ua riro teie feia faatavaihia ei nunaa apî, ei “nunaa moˈa” a te Atua o te Iseraela pae varua. No reira, e tupu te mau parau tohu atoa o te mau mea maitatai no nia ia Iseraela, mai te tǎpǔ o te “faufaa apî” i roto i te Ieremia 31:31, i nia i te amuiraa o te mau Kerisetiano faatavaihia, ‘te Iseraela [mau] o te Atua.’—Petero 1, 2:9; Galatia 6:16.
Te tahi atu mau tuhaa o te hiero o te Atua i te pae varua
11, 12. (a) Eaha ta te aumoa a te mau tahuˈa i faahohoˈa no Iesu, e eaha ta te reira i faahohoˈa no ta ˈna mau pǐpǐ faatavaihia? (b) Eaha ta te farii pape e faahohoˈa ra, e mea nafea te reira ia faaohipahia?
11 Noa ˈtu e ua faahohoˈa te vahi Moˈa Roa i “te raˈi mau,” tei reira te terono o te Atua, ua tuea te tahi mau tuhaa atoa o te hiero o te Atua i te pae varua, i te mau mea i nia i te fenua nei. (Hebera 9:24) I te hiero no Ierusalema, te vai ra i roto mai te hoê aumoa na te mau tahuˈa tei reira te hoê fata no te tusia e te hoê farii pape rahi, ta te mau tahuˈa i faaohipa no te horoi ia ratou hou ratou e rave ai i te taviniraa moˈa. Eaha ta teie mau mea e faahohoˈa ra i roto i te faanahoraa o te hiero a te Atua i te pae varua?
12 I roto i te hiˈoraa o Iesu Mesia, te aumoa i roto mai a te mau tahuˈa ra, o to ˈna ïa tiaraa hara ore ei Tamaiti taata tia roa a te Atua. Na roto i te faatupuraa i te faaroo i roto i te tusia o Iesu, e faarirohia te mau pǐpǐ faatavaihia a te Mesia ei feia parau-tia. No reira, e mea tia ia ohipa Iehova e o ratou mai te mea e e feia hara ore ratou. (Roma 5:1; 8:1, 33) Te faahohoˈa ra ïa teie aumoa i te huru taata parau-tia i horoahia na te mau melo tataitahi o te autahuˈa moˈa i mua i te Atua. I te hoê atoa râ taime, e feia tia ore noâ te mau Kerisetiano faatavaihia e e nehenehe â ratou e hara. Te faahohoˈa ra ïa te farii pape i roto i te aumoa i te Parau a te Atua, ta te Tahuˈa Rahi e faaohipa no te tamâ mǎrû noa i te autahuˈa moˈa. Na roto i te fariiraa i teie tamâraa, ua naeahia ia ratou te hoê tiaraa tura mau o te faahanahana ra i te Atua e o te huti maira i te feia no rapaeau i roto i ta ˈna haamoriraa viivii ore.—Ephesia 5:25, 26; a faaau e te Malaki 3:1-3.
Te vahi Moˈa
13, 14. (a) Eaha ta te vahi Moˈa o te hiero e faahohoˈa ra no Iesu e no ta ˈna mau pǐpǐ faatavaihia? (b) Eaha ta te vairaa lamepa auro e faahohoˈa ra?
13 Te faahohoˈa ra te piha matamua o te hiero, i te hoê tiaraa hau aˈe i to te aumoa. I roto i te hiˈoraa o te taata tia roa ra o Iesu Mesia, te faahohoˈa ra te reira i to ˈna fanau-faahou-raahia ei Tamaiti pae varua a te Atua o te hoˈi atu i nia i te raˈi. I muri aˈe i to ratou faariroraahia ei feia parau-tia na nia i to ratou faaroo i roto i te toto haamaniihia o te Mesia, e fanaˈo atoa te mau pǐpǐ faatavaihia i teie ohipa taa ê a te varua o te Atua. (Roma 8:14-17) Na roto i “te pape [oia hoi, to ratou bapetizoraa] e te [v]arua,” e ‘fanau-faahou-hia’ ratou ei mau tamarii pae varua a te Atua. Na nia i teie tiaraa to ratou, te tiaturi nei ratou e e faatiahia mai ratou i nia i te raˈi ei mau tamarii varua a te Atua, mai te peu e e tapea ratou i to ratou haapao maitai e tae noa ˈtu i te pohe.—Ioane 3:5, 7; Apokalupo 2:10.
14 Aita te mau tahuˈa i tavini na i roto i te vahi Moˈa o te hiero i nia i te fenua nei, i itehia mai e te feia haamori i rapaeau mai i te hiero. Oia atoa, te fanaˈo nei te mau Kerisetiano faatavaihia i te hoê tiaraa pae varua o te ore e fanaˈohia ra aore ra o te ore e taa-papu-hia ra e te rahiraa o te feia haamori i te Atua, e tiaturi nei e ora e a muri noa ˈtu i roto i te Paradaiso i nia i te fenua nei. Te faahohoˈa ra te vairaa lamepa auro o te sekene i te maramarama fanaˈohia e te mau Kerisetiano faatavaihia. Mai te hinu i roto i te mau lamepa ra, te tufa nei te ohiparaa mai te varua moˈa o te Atua i te maramarama i nia i te Bibilia. E te ite e noaa mai i te mau Kerisetiano na roto i teie ravea, eita ïa ratou e tapea noa no ratou. Maoti râ, te haapao nei ratou i te faaueraa a Iesu, o tei parau e: “O outou te maramarama o teie nei ao . . . to outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.”—Mataio 5:14, 16.
15. Eaha tei faahohoˈahia e te pane i nia i te airaa maa o te pane faaiteraa?
15 No te fanaˈo noa i teie maramarama, e tia i te mau Kerisetiano faatavaihia ia tamau noa i te amu i te mea i faahohoˈahia e te pane i nia i te airaa maa o te pane faaiteraa. Te pu matamua o ta ratou maa pae varua, o te Parau ïa a te Atua, o ta ratou e tutava nei i te taio e i te feruri hohonu i te mau mahana atoa. Ua tǎpǔ atoa Iesu e horoa mai na ratou i te “maa i te hora mau ra” na roto i te arai o ta ˈna “tavini haapao maitai e te paari.” (Mataio 24:45) Teie “tavini,” o te taatoaraa ïa o te mau Kerisetiano faatavaihia i nia i te fenua nei, noa ˈtu eaha te anotau. Ua faaohipa te Mesia i teie tino faatavaihia no te haaparare i te haamaramaramaraa no nia i te tupuraa o te mau parau tohu a te Bibilia e no te horoa i te aratairaa i te taime tano, no nia i te faaohiparaa i te mau faaueraa tumu a te Bibilia i roto i to tatou oraraa i te mau mahana atoa. No reira, te faaamu nei te mau Kerisetiano faatavaihia ia ratou ma te aau mauruuru, i teie mau ravea atoa i te pae varua. Ia ora noa râ ratou i te pae varua, eita e navai ia faaî noa i te ite o te Atua i roto i to ratou feruriraa e to ratou mafatu. Ua parau Iesu e: “Teie ta ˈu maa, o te haapao i to ˈna hinaaro o to tei tono mai ia ˈu nei, e te faaoti i ta ˈna ohipa.” (Ioane 4:34) Oia atoa, te oaoa nei te mau Kerisetiano faatavaihia i te rave i te hinaaro o te Atua i faaitehia mai i te mau mahana atoa.
16. Eaha tei faahohoˈahia e te taviniraa i te fata o te mea noˈanoˈa?
16 I te poipoi e i te ahiahi, e pûpû na te tahuˈa i te mea noˈanoˈa na te Atua i nia i te fata o te mea noˈanoˈa i roto i te vahi Moˈa. I te hoê â taime, e pure na te feia haamori e ere i te tahuˈa, i te Atua a tia noa ˈi ratou i roto i te mau aumoa i rapaeau mai i to ˈna hiero. (Luka 1:8-10) Te faataa ra te Bibilia e, “te mea noˈanoˈa, oia te pure a te feia moˈa ra.” (Apokalupo 5:8) “Ia tano atu tau pure i mua ia oe mai te mea hauˈa noˈanoˈa,” o ta te papai salamo ra o Davida ïa i papai. (Salamo 141:2) Te haafaufaa atoa nei te mau Kerisetiano faatavaihia i ta ratou haamaitairaa taa ê e haafatata ˈtu ia Iehova ma te pure na roto ia Iesu Mesia. E au te mau pure hohonu mai roto roa mai i te mafatu i te hauˈa o te mea noˈanoˈa ra. Te arue atoa nei te mau Kerisetiano faatavaihia i te Atua na roto i te tahi atu mau ravea, ma te faaohipa i to ratou vaha no te haapii ia vetahi ê. Mea faahiahia roa na te Atua to ratou faaoromai tamau i mua i te mau haafifiraa e to ratou taiva-ore-raa i mua i te tamataraa.—Petero 1, 2:20, 21.
17. Eaha tei titauhia ia tupu te hohoˈa i tohuhia mai o te tomoraa matamua te tahuˈa rahi i roto i te vahi Moˈa Roa i te mahana tatararaa hara?
17 I te mahana tatararaa hara, e tomo na te tahuˈa rahi a Iseraela i roto i te vahi Moˈa Roa no te tutui i te mea noˈanoˈa i roto i te hoê aˈua auro e arahu veavea to roto. E tia ia ˈna ia rave i teie ohipa na mua ˈˈe oia e hopoi atu ai te toto o te mau tusia no te hara. Ei faatupuraa i teie hohoˈa i tohuhia mai, ua tapea te taata ra o Iesu i te taiva-ore-raa taatoa i te Atua ra o Iehova hou oia a pûpû ai i to ˈna ora ei tusia otahi e te vai maoro no ta tatou mau hara. Ua haapapu ïa oia e e nehenehe te hoê taata tia roa e tapea i to ˈna taiva-ore-raa i te Atua noa ˈtu eaha te faateimaharaa ta Satani e faahepo mai ia ˈna. (Maseli 27:11) I te taime a tamatahia ˈi oia, ua pure Iesu “ma te oto rahi e te roimata, . . . ei faaroohia oia [“no to ˈna mǎtaˈu i te Atua,” MN].” (Hebera 5:7) Na reira, ua faahanahana oia ia Iehova ei Arii parau-tia o te tia ia mana i te ao atoa nei. Ua haamauruuru te Atua ia Iesu na roto i te faatiaraa mai ia ˈna mai te pohe mai no te fanaˈo i te ora pohe ore i nia i te raˈi. Mai nia mai i to ˈna tiaraa teitei, te horoa nei Iesu i to ˈna ara-maite-raa i te piti o te tumu no to ˈna haereraa mai i nia i te fenua nei, oia hoi no te faahau i te mau taata hara i tatarahapa e te Atua.—Hebera 4:14-16.
Te hanahana rahi aˈe o te hiero o te Atua i te pae varua
18. Mea nafea to Iehova tuuraa mai i te hanahana hau aˈe i te faahiahia i nia i to ˈna hiero i te pae varua?
18 Ua tohu Iehova e: “Te hanahana o teie nei fare hopea, e rahi ïa i to tei mutaa ihora.” (Hagai 2:9) Na roto i to ˈna faatiaraa mai ia Iesu ei Arii e ei Tahuˈa Rahi pohe ore, ua tuu mai Iehova i te hanahana hau aˈe i te faahiahia i nia i to ˈna hiero i te pae varua. E mana to Iesu i teie nei no te horoa i “te ora mure ore no te feia atoa e faaroo ia ˈna ra.” (Hebera 5:9) Te feia matamua i faaite i teie faaroo, o na pǐpǐ ïa e 120 tei faatavaihia i te varua moˈa i te Penetekose o te matahiti 33 o to tatou tau. Ua tohu te buka a te Apokalupo e e naeahia teie mau tamarii Iseraela pae varua i te numera e 144 000. (Apokalupo 7:4) Ia pohe anaˈe ratou, e rave rahi o te taoto i roto i te apoo matauhia a te huitaata nei, ma te tiai i te tau o te vairaa mai o Iesu ei arii. Ua faataa te tabula o te tau i tohuhia mai i roto i te Daniela 4:10-17, 20-27, i te matahiti 1914, ei taime e haamata ˈi Iesu i te faatere i rotopu i to ˈna mau enemi. (Salamo 110:2) E rave rahi mau ahuru matahiti na mua ˈtu, ua tiai maite te mau Kerisetiano faatavaihia i taua matahiti ra. Ua haapapu te Tamaˈi Rahi Matamua e te mau ati i apeehia mai o tei tairi i te huitaata nei, e ua faaterono-mau-hia o Iesu ei Arii i te matahiti 1914 ra. (Mataio 24:3, 7, 8) I muri noa iho, i te mea e ua tae i te tau “e tupu ai te [“haavaraa,” MN] i te utuafare o te Atua,” e faatupu Iesu i te parau i tǎpǔhia i ta ˈna mau pǐpǐ faatavaihia o tei varea i roto i te pohe: “E hoˈi mai au e aratai ia outou i o ˈu ra.”—Petero 1, 4:17; Ioane 14:3.
19. Mea nafea te toea o te mau 144 000 e tae ai i roto i te vahi Moˈa Roa i nia i te raˈi?
19 Aitâ te taatoaraa o te mau 144 000 melo o te autahuˈa moˈa i tapaohia ˈtura i te titiro hopea e i haaputuputuhia ˈtura i roto i to ratou nohoraa i nia i te raˈi. Te ora noa nei â te hoê toea o ratou i nia i te fenua nei i roto i te tupuraa i te pae varua i faahohoˈahia e te vahi Moˈa, ma te faataa-ê-hia e te vairaa moˈa roa o te Atua na te “paruru,” aore ra taotiaraa, o to ratou mau tino taata. Ia pohe anaˈe teie feia ma te haapao maitai, e faatiahia mai ratou i te reira iho taime ei mau taata varua pohe ore no te apiti atu i te mau 144 000 tei tae aˈena i nia i te raˈi.—Korinetia 1, 15:51-53.
20. Eaha te ohipa faufaa roa e ravehia ra e te toea o te autahuˈa moˈa i teie tau, e eaha te mau faahopearaa?
20 E teie rahiraa tahuˈa e tavini ra i pihai iho i te Tahuˈa Rahi i nia i te raˈi, ua fanaˈo te hiero o te Atua i te pae varua i te hanahana rahi atu â. I to ratou aˈe pae, te rave nei te toea o te autahuˈa moˈa i te hoê ohipa faufaa roa i nia i te fenua nei. Na roto i ta ratou pororaa, ‘te faaaueue nei’ te Atua ‘i te mau fenua atoa’ na roto i te faaiteraa i ta ˈna haavaraa, mai tei tohuhia i roto i te Hagai 2:7. I te hoê â taime, te haaputuputu nei te mau mirioni taata haamori faaauhia i te mau mea “tei hinaarohia e te mau fenua atoa ra,” i roto i te mau aumoa o te hiero o Iehova i nia i te fenua nei. Eaha te tuhaa a teie mau taata i roto i te faanahoraa a te Atua no te haamoriraa, e eaha te hanahana no a muri aˈe o ta ratou e nehenehe e tiaturi no to ˈna hiero rahi i te pae varua? E tuatapapahia teie mau uiraa i roto i te tumu parau i muri nei.
Uiraa faahaamanaˈoraa
◻ Eaha te hiˈoraa faahiahia ta Iesu i horoa mai i te matahiti 29 o to tatou tau?
◻ Eaha te faanahoraa o tei haamata i te ohipa i te matahiti 29 o to tatou tau?
◻ Eaha tei faahohoˈahia e te vahi Moˈa e te vahi Moˈa Roa?
◻ Mea nafea te hiero rahi i te pae varua i te faahanahanaraahia?
[Hohoˈa i te api 17]
Ua haamata te hiero rahi o te Atua i te pae varua i te ohipa i to Iesu faatavairaahia i te varua moˈa i te matahiti 29