Iesu, to ˈna oraraa e ta ˈna taviniraa
Te pahono ra o Iesu, i te feia e faahapa maira ia ˈna
Tei te mahana sabati tatou. Ua faaora o Iesu i te hoê taata tei pohehia na i te maˈi a 38 atura matahiti. Te faahapa ra hoi te mau upoo faatereraa haapaoraa ati Iuda ia ˈna e aita oia e haapao ra i te mahana sabati. Te pahono atura Iesu ia ratou i te na ôraa e: “Te ohipa noa nei â tau Metua, e ohipa atoa hoi au.”
Noa ˈtu te mau parau a te mau Pharisea, aita roa ˈtu hoi te taviniraa a Iesu e tano ra i nia i ta te ture o te sabati e opani ra. Na te Atua iho i horoa mai i te ohipa pororaa e te ohipa faaoraraa e mai ia ˈna atoa, aita o Iesu i faaea i te rave i ta ˈna ohipa i tera e i tera mahana. Ua faariri roa ˈtura ta ˈna pahonoraa i te mau ati Iuda, e ua imi aˈera ratou e taparahi haapohe roa ia ˈna. No te aha hoi?
No te mea i teie nei, aita ratou e manaˈo noa ra e aita o Iesu e haapao ra i te sabati, te parau atoa ra râ ratou e te faahiti ra oia i te parau faaino i te na ôraa e e Tamaiti oia na te Atua. Teie râ, noa ˈtu ta ratou parau, ua faaite faahou maira o Iesu i te parau no nia i to ˈna mau auraa faufaa roa e te Atua. “E here â hoi te Metua i te Tamaiti, e faaite mai â hoi ia ˈna i te mau mea atoa ta ˈna iho e rave ra.”
‘Mai te Metua hoi e faaora i tei pohe ra e ua faatia ia ratou i nia, o ta Iesu ïa e parau faahou ra, e faaora atoa hoi te Tamaiti i ta ˈna i hinaaro.’ Oia mau, e faaora hoi te Tamaiti i tei pohe i te pae varua! ‘O tei ite i ta ˈu parau e ua faaroo ia ˈna i tei tono mai ia ˈu nei, o ta ˈnâ hoi e parau ra, e ora mure ore to ˈna, e ore ïa e faahapahia, mai te pohe mai ïa e ora ˈtu ai.’ E te haapapu râ oia e: “Ua fatata e teie nei â te hora e faaroo ai tei pohe i te reo o te Tamaiti a te Atua, e tei faaroo ra, e orâ ïa.”
Noa ˈtu e aitâ o Iesu i faatia aˈenei i te taata mai te pohe maira, te faataa ra oia i te feia e faahapa maira ia ˈna e e tupu mau â te hoê tia-faahou-raa mai te reira te huru. “Eiaha e maere i te reira; o ta ˈna ïa e parau ra; te fatata mai nei hoi te hora e faaroo ai te feia atoa i roto i te apoo ra i tana reo e e haere mai i rapae.”
E tae roa mai i teie nei, mai te huru ra ïa e aita aˈenei o Iesu i faataa mai i mua i te huiraatira e ma te papu maitai hoi i to ˈna tiaraa faufaa roa i roto i te opuaraa a te Atua. Tera râ hoi, ua faaite atu Iesu i te feia i faahapa mai ia ˈna hau atu â no nia i taua mau tumu parau nei. Inaha, ua faahaamanaˈo atura oia ia ratou e “outou iho hoi tei tono i te vea ia Ioane ra, e ua faaite mai oia i te parau mau”.
Fatata e piti matahiti na mua ˈtu, ua parau atura Ioane Bapetizo i taua mau upoo faatere haapaoraa ati iuda ra no nia i Te haere mai i muri aˈe ia ˈna. Ma te faahaamanaˈo atu e i mutaa ihora, mea faahiahia roa na ˈna ia Ioane tei tapeahia hoi i roto i te fare tapearaa i teie nei, ua na ô atura Iesu ia ratou e: “E i oaoa poto noa ˈtura outou i to ˈna maramarama.” Te faahaamanaˈo atura Iesu ia ratou ma te tiaturi e e nehenehe te reira e tauturu ia ratou, oia mau e faaora ia ratou. Inaha hoi, aita e faufaa no ˈna te faaiteraa a Ioane.
“O taua mau ohipa ra ta ˈu e rave nei [no faatupu noa ˈtura oia i te semeio], o te faatia mai ïa ia ˈu e na te Metua vau i tono mai.” Hau atu â râ te na ô râ oia e: “O te Metua hoi i tono mai ia ˈu nei, ua faatia mai oia iho ia ˈu.” Ei hiˈoraa ua faatia mai te Atua ia Iesu i te taime oia e bapetizohia ˈi, ia ˈna i parau e: “Ta ˈu Tamaiti here teie.”
Oia mau, aita roa ˈtu e hororaa to te feia i faahapa ia Iesu no te ore hoi e farii ia ˈna. Te haapapu maira hoi te mau Papai iho, ta ratou hoi e parau ra e te heheu ra ratou, i ta ˈna parau! “Ahiri hoi outou i faaroo ia Mose, ua faaroo mai ïa outou ia ˈu, i papai hoi oia i te parau no ˈu. Aore outou i faaroo i ta ˈna i papai ra, eaha atoa outou e faaroo mai ai i ta ˈu parau?” Ioane 5:17-47; 1:19-27; Mataio 3:17.
◆ No te aha hoi te taviniraa a Iesu aita roa ˈtu ïa e faahapa ra i te mahana sabati?
◆ Mea nafea to Iesu faataaraa mai i to ˈna tiaraa faufaa roa i roto i te opuaraa a te Atua?
◆ Ei haapapuraa e o ˈna te Tamaiti a te Atua, o vai te taata i ite mata roa ˈtu ta Iesu e faahiti ra?