Iehova—To tatou Metua here mau ra
“E ua î [Iehova] i te aroha, e te hamani maitai.”—IAKOBO 5:11, nota i raro i te apî.
1. No te aha te mau taata haehaa e haafatata ˈi i te Atua ra o Iehova?
NO TE rahi teie nei ao, te feia tuatapapa fetia e ore ai e nehenehe e faataa mai ehia rahiraa haapueraa fetia i roto ia ˈna. No te rahi to tatou nei haapueraa fetia parauhia te Eˈa Uouo, e ore ai te taata e nehenehe e haamata i te taio i ta ˈna mau fetia atoa. Vetahi mau fetia mai ia Antares, ua tausani ïa taime to ratou rahiraa e to ratou anaanaraa ia faaauhia i ta tatou mahana. Auê ïa te Poiete Rahi o te mau fetia atoa o te ao nei i te puai e! Inaha, “te aratai ra oia i taua mau nuu ra i rapae ma te taiohia; e ua mairi-anaˈe-hia to ratou mau iˈoa e ana.” (Isaia 40:26) Hau atu, e Atua tei “î i te aroha e te hamani maitai” taua Atua e titau ra i te mǎtaˈu. Auê ïa ite haumǎrû no te mau tavini haehaa a Iehova, no te feia iho â râ e faaruru nei i te haamauiuiraa, te maˈi, te taiâ, aore ra i te tahi atu mau fifi!
2. Eaha te huru hiˈoraa o te taata o teie nei ao i te mau manaˈo hohonu?
2 E rave rahi teie e faariro nei i te mau manaˈo mǎrû e horuhoru ai ra, mai “te aroha aau e te hamani maitai” o te Mesia, ei mau huru paruparu. (Philipi 2:1) Ma te turaihia e te manaˈo philosopho no nia i te haapiiraa tumu ore e mea tupu noa mai te mau mea atoa, te faaitoito nei ratou i te taata ia faahanahana ia ratou iho e tae roa ˈtu hoi i te haamauiuiraa i te mau manaˈo o vetahi ê. Ua riro te tahi mau aito i te pae no te mau peu faaanaanataeraa manaˈo e i roto i te ohipa taaaro, ei mau taata o te ore roa ˈtu e taˈi aore ra e faaite i te hamani maitai. Te na reira atoa nei te tahi mau faatere politita. Ua haapapu te philosopho setoiko ra o Sénèque, tei haapii i te emepera ino ra o Nero, e “huru paruparu te aroha.” Te haapapu ra te Cyclopædia a M’Clintock raua o Strong e: “Te tamau nei â te mau haapiiraa a te manaˈo setoiko . . . i te ohipa i roto i te feruriraa o te taata o teie atoa nei tau.”
3. Mea nafea to Iehova faaiteraa ˈtu ia ˈna ia Mose ra?
3 Taa ê atu hoi, e Poiete mafatu mahanahana mau te Poiete o te huitaata nei. Ua faataa ˈtu oia ia ˈna i mua ia Mose ma teie nei mau parau: “O Iehova, o Iehova, e Atua aroha noa, e te hamani maitai rahi, e te faaoromai rahi, e te maitai rahi, e te parau mau; . . . [te faaore i te hape e te hapa e te hara, e o te ore râ e haapae i te faautua].” (Exodo 34:6, 7) Parau mau, ua faaoti o Iehova i taua faataaraa no nia ia ˈna ra ma te haafaufaa i ta ˈna parau-tia. Eita roa ˈtu o ˈna e haapae i te faautua i te feia rave hara opua mau e o te tia mau â hoi ia faautuahia. Hau atu, te faaite ra oia ia ˈna na mua roa ˈˈe mai te Atua aroha faito ore.
4. Eaha te auraa mahanahana mau o te parau hebera, e pinepine i te hurihia na roto i te parau “aroha faito ore”?
4 I te tahi taime te parau “aroha faito ore,” e faaohipahia ïa i roto i te hoê auraa aroha ore mau i te pae no te haavaraa e te mauraa hoi i te faautuaraa. Tera râ, te horoa maira te hoê faaauraa no nia i te mau tatararaa bibilia i te auraa faufaa mau o te parau hebera no roto mai i te ihoparau haa ra ra·chamʹ. Ia au i te tahi mau taata tuatapapa bibilia, te auraa o to ˈna tumu mau “te riroraa ïa ei taata mǎrû.” “Te faataa ra te parau ra Racham,” ta te buka Synonyms of the Old Testament, ïa e parau ra “i te hoê manaˈo aroha hohonu mau o te hamani maitai, mai te nehenehe e matara mai ia itehia te paruparu aore ra te mauiui i roto i te feia herehia e tatou nei aore ra e hinaaro ra i ta tatou tauturu.” E nehenehe te tahi atu mau auraa no nia i te tahi atu huru o te aau mahanahana o teie nei huru faufaa rahi mau e itehia i roto i te Insight on the Scriptures, Tuhaa 2, api 375-9.
5. Mea nafea te parau ra aroha faito ore i te haapapuraahia i roto i te Ture a Mose?
5 E papu-maitai-hia te hamani maitai rahi o te Atua i roto i te Ture ta ˈna i horoa i te nunaa Iseraela. E tia te mau taata mai te mau vahine ivi, te mau otare, e te feia veve ia hamani-maitai-hia. (Exodo 22:22-27; Levitiko 19:9, 10; Deuteronomi 15:7-11) E fanaˈo te taatoaraa, mai te mau tavini e te mau animala, i te mahana faafaaearaa, hoê taime i te hebedoma oia hoi i te mahana sabati. (Exodo 20:10) Hau atu, e hiˈo mai na te Atua i te mau taata e hamani maitai i te taata riirii. Te na ô ra te Maseli 19:17 e: “O tei hamani maitai i te taata rii ra, ua horoa oia i te taoˈa na Iehova; e na ˈna e hopoi mai i ta ˈna utua.”
Te mau otia o te hamani maitai o te Atua
6. No te aha o Iehova i tono ai i te mau peropheta e te mau vea i to ˈna ra nunaa?
6 E amo hoi te mau ati Iseraela i te iˈoa o te Atua e ua haamori i te hiero i Ierusalema, tei riro ei “fare no te iˈoa o [te] Atua [o] Iehova.” (Paraleipomeno 2, 2:4; 6:33) Ia tae râ i te hoê taime, ua farii noa ˈˈera ratou i te ohipa faaturi, i te haamori idolo, e te ohipa taparahi taata, ma te faaino roa ˈtu i te iˈoa o Iehova. Ia au i to ˈna iho huru aroha, ua tamata te Atua ma te faaoromai, i te faatitiaifaro i taua huru tupuraa ino mau ra ma te ore e tairi i te taatoaraa o te nunaa. Ua “tono maira [te Atua] o to ratou mau metua o Iehova i te vea, aita i tuutuu; no te mea te aroha ra oia i to ˈna mau taata, e to ˈna ihora parahiraa. Ua tâhito râ ratou i te mau vea a te Atua, e ua vahavaha i ta ˈna parau, e ua hamani ino i te mau peropheta na ˈna, e tupu roa aˈera te riri o Iehova i to ˈna taata, e aita roa aˈera e haapuraa.”—Paraleipomeno 2, 36:15, 16.
7. Ia tapae te hamani maitai o Iehova i nia i to ˈna otia, eaha te ohipa i tupu i nia i te basileia o Iuda?
7 Noa ˈtu e Atua hamani maitai o Iehova e te ore e riri vave, mai te peu e titauhia, e faaite mai oia i to ˈna riri tia mau. Inaha i mutaa ihora, ua tapae roa te hamani maitai o te Atua i nia i to ˈna otia. Teie ta tatou e taio no nia i te mau faahopearaa: “I tuu mai [Iehova] i te arii o Kaladaio, tei tâpû noa i te mau taata apî i te ˈoˈe i roto i to ratou vahi moˈa, aore roa i aroha [hamani maitai] i te taata apî, e te potii rii apî, i te taata paari, e tei piˈo i raro i te ruhiruhia: tuu-atoa-hia ˈtura i tana rima.” (Paraleipomeno 2, 36:17) No reira, ua haamouhia ˈˈera o Ierusalema e to ˈna hiero, e ua hopoi-tîtî-hia ˈtura te nunaa i Babulonia.
Hamani maitai no To ˈna Iˈoa
8, 9. (a) No te aha o Iehova i parau ai e ua hamani maitai oia no to ˈna iˈoa? (b) No te aha te mau enemi o Iehova i mamû ai?
8 Ua oaoa roa te mau nunaa e haaati ra i taua nei ati. Ma te faaooo, ua parau atura ratou e: “O te mau taata teie no Iehova, e ua haere ê mai ratou i to ˈna fenua.” Ua ite maira hoi Iehova i taua manaˈo faaooo ra, e ua na ô aˈera: “Ua aroha râ vau ia ratou no to ˈu nei iˈoa moˈa . . . e haamaitai hoi au i tau iˈoa rahi, . . . e ite hoi te mau fenua, e o Iehova vau.”—Ezekiela 36:20-23.
9 I muri aˈe to ˈna nunaa e hopoi-tîtî-hia ˈi e 70 matahiti te maoro, ua faaora maira te Atua hamani maitai rahi ra o Iehova, e ua faatia aˈera hoi ia ratou e hoˈi e patu faahou i te hiero i Ierusalema. Ua haamamû roa te reira i te mau nunaa e haaati ra, e hiˈo noa maira e te maere rahi. (Ezekiela 36:35, 36) Ma te peapea râ, ua topa faahou aˈera te nunaa o Iseraela i roto i te mau peu iino. Ua tauturu maira te hoê ati Iuda haapao maitai o Nehemia te iˈoa, no te faatitiaifaro i te mau ohipa e tupu ra. I roto i te hoê pure i mua i te huiraatira, ua faahaamanaˈo faahou aˈera oia i te mau huru hamani maitai o te Atua i te nunaa, i te na ôraa e:
10. Mea nafea to Nehemia haafaufaaraa i te hamani maitai o Iehova?
10 “Ia roohia râ ratou i te ahoaho, e ia tiaoro atu ratou ia oe, ua faaroo mai oe i nia i te raˈi ra; e no to oe ra aroha rahi ua horoa mai oe i te faaora no ratou, o tei faaora ia ratou i te rima o to ratou mau enemi. E hau ihora to ratou, ua hoˈi faahou ratou i te parau ino i mua ia oe: vaiiho ihora oe ia ratou i te rima o to ratou mau enemi, e faahepohia ihora ratou: ia hoˈi râ ratou e ia tiaoro ia ora, ua faaroo mai oe i nia i te raˈi: e rave rahi to oe faaoraraa ˈtu ia ratou i to oe aroha rahi; e ua aˈo atu hoi oe ia ratou, ia fariu mai ratou i te ture na oe: ua teoteo râ ratou e aore i faaroo i ta oe parau, ua hara râ ratou i ta oe parau, (ua rave anaˈe hoi te taata i te reira, e ora ïa oia i te reira.) Ua iriti maira i te tapono, e ua faaetaeta, e aore aˈera i faaroo. E rave rahi râ to oe matahiti i te faaoromairaa ia ratou.”—Nehemia 9:26-30; a hiˈo atoa i te Isaia 63:9, 10.
11. Eaha te taa-ê-raa e vai ra i rotopu ia Iehova e te mau atua a te taata?
11 E i te pae hopea, i muri aˈe i to te nunaa ati iuda patoiraa i te Tamaiti here a te Atua, ua erehia aˈera oia i to ˈna tiaraa faufaa roa e a muri noa ˈtu. Hau atu i te 1 500 matahiti te maororaa to te Atua aupururaa ia ratou. E faaiteraa mure teie i te mea e ua riro mau o Iehova ei Atua aroha rahi mau. Auê ïa taa-ê-raa taa maitai e te mau atua iino e te aroha ore i hamanihia e te mau taata rave hara e!—A hiˈo i te api 8.
Te hiˈoraa rahi roa ˈˈe o te hamani maitai
12. Eaha te hiˈoraa rahi roa ˈˈe no te hamani maitai o te Atua?
12 Te hiˈoraa rahi roa ˈˈe no te hamani maitai o te Atua, te parau ïa no te tonoraa mai oia i ta ˈna Tamaiti here i nia i te fenua nei. Parau mau, ua haamauruuru rahi te oraraa taiva ore o Iesu ia Iehova, tei horoa i te hoê pahonoraa papu maitai i te mau pariraa a Satani. (Maseli 27:11) Oia atoa, i te hiˈoraa mai oia i ta ˈna Tamaiti here i te mauiuiraa i te hoê pohe riaria mau, eita e ore te reira i te haamauiui rahi aˈe ia Iehova, mauiui ta te tahi metua i nia i te fenua nei i ore aˈenei i faaoromai. E tusia here mau â taua tusia ra, tei iriti i te uputa no te faaora i te huitaata nei. (Ioane 3:16) Mai ta Zekaria, te metua tane o Ioane Bapetizo, i faaite atea mai, ua faahanahana te reira “i te aroha [hamani maitai] rahi o to tatou Atua.”—Luka 1:77, 78.
13. Mea nafea to Iesu haafaufaaraa i te huru o to ˈna Metua?
13 Ua haapapu atoa te tonoraahia mai te Tamaiti a te Atua i nia i te fenua nei, i te hiˈoraa maramarama aˈe no nia i te huru o Iehova. Nafea hoi? I te mea ïa e ua faaite papu mai o Iesu i te huru o to ˈna Metua, i roto iho â râ i te parau no to ˈna here i te feia haehaa! (Ioane 1:14; 14:9) No reira, ua faaohipa na papai evanelia tootoru ra o Mataio, Mareko e o Luka i te ihoparau haa heleni ra splag·khniʹzo·mai, no roto mai i te parau ra “aau.” “Ia ravehia te parau no reira mai oia,” ta te taata tuatapapa Bibilia ra ïa o William Barclay e faataa ra, “e nehenehe e itehia e aita te reira e faataa ra i te hoê huru aroha mǎtauhia, i te hoê râ manaˈo hohonu e turai i te hoê taata ia faatupu i te mau mea hohonu roa no roto roa mai ia ˈna. O te parau puai roa ˈˈe hoi teie na roto i te reo heleni no te manaˈo hamani maitai.” E huri-taa-ê-hia na na roto i te mau parau ra “mea aroha roa” aore ra “turaihia i te aroha.”—Mareko 6:34; 8:2.
I to Iesu aroharaa
14, 15. I roto i te hoê oire no Galilea, mea nafea to Iesu faaiteraa i to ˈna aroha, e te faahohoˈa maira te reira i te aha?
14 Tei te oire tatou no Galilea. Te haafatata maira te hoê taata tei “ati i te lepera” ia Iesu ma te ore e faaara mai ia au i tei mǎtauhia. (Luka 5:12) Ua faahapa etaeta atu anei Iesu ia ˈna i te oreraa oia e pii e “Ua viivii, ua viivii,” ia au i tei titauhia e te Ture a te Atua? (Levitiko 13:45) Aita. Maoti hoi i te na reira, ua faaroo atura Iesu i te manaˈo peapea o taua taata ra: “Ia tia ia oe ra, e mâ vau ia oe.” “Aroha aˈera Iesu ia ˈna, faatoro atura i te rima, faatiaia ˈtura ia ˈna, na ô atura, Ua tia ia ˈu, ia mâ oe.” Pee ê atura hoi te maˈi o taua taata ra. Ia ˈna i na reira, aita noa o Iesu i faaite i te mana semeio ta te Atua i horoa mai no ˈna, ua faaite atoa râ oia i te mau manaˈo hohonu here mau tei turai ia ˈna ia faaohipa i taua mana ra.—Mareko 1:40-42.
15 E tia anei ia haafatata ˈtu ia Iesu i reira ïa oia e faaite mai ai i te mau manaˈo hamani maitai? Eita. I te hoê taime, ua farerei aˈera oia i te hoê nahoa rahi taata e apee ra i te hoê taata pohe no te oire mai no Naina. Papu maitai, ua ite ê na o Iesu e rave rahi mau taata pohe na mua ˈˈe, tera râ e hunaraa taa ê teie. E tamaiti otahi te taata i pohe na te hoê vahine ivi. “[Ma te] aroha,” ua haafatata ˈtura Iesu ia ˈna e ua na ô atura e: “Eiaha e oto.” E inaha, ua faatupu aˈera oia i te semeio faahiahia mau, i te faaora-faahou-raa i ta ˈna tamaiti.—Luka 7:11-15.
16. No te aha o Iesu i aroha ˈi i te nahoa rahi taata i apee mai ia ˈna?
16 Te haapiiraa faufaa mau e huti mai i te mau ohipa i faahitihia ˈtu na i nia nei, inaha ia “aroha” o Iesu, e rave oia i te tahi ohipa maitai no te tauturu. I te tahi â taime i muri aˈe, ua hiˈo atura Iesu i te mau nahoa rahi taata i tamau noa i te apee mai ia ˈna. Te faaite ra o Mataio e “aroha ˈtura oia ia ratou, no te mea, ua purara ratou e ua faarue-taue-hia, mai te mamoe tiai ore.” (Mataio 9:36) Mea iti roa te ohipa i ravehia e te mau Pharisea no te haamâha i te poia i te pae varua o te nunaa. Maoti te reira, ua faateimaha ratou i te mau taata riirii ma te tuu atu i te mau ture faufaa ore. (Mataio 12:1, 2; 15:1-9; 23:4, 23) Ua itehia to ratou manaˈo no nia i te nunaa, ia ratou i parau i te feia e faaroo ra ia Iesu e: “Area teie nei [nahoa] taata tei ore i ite i te ture nei, ua ino ïa.”—Ioane 7:49.
17. Mea nafea te aroha o Iesu i te turairaa ia ˈna ia ohipa, e eaha te aratairaa atea ta ˈna e horoa maira?
17 Taa ê atu, ua putapû roa o Iesu i te huru pae varua ino mau o te mau nahoa rahi taata. Tera râ, no te rahi te taata e anaanatae ra i te poroi o te Basileia, i fifi ai oia i te haapao ia ratou tataitahi. No reira, ua faaue atura oia i ta ˈna mau pǐpǐ e pure e ia rahi te feia rave ohipa. (Mataio 9:35-38) Ia au i taua mau pure nei, ua tono atura Iesu i ta ˈna mau aposetolo e haere e faaite i teie nei poroi: “Te fatata mai nei te basileia o te ao.” Ua riro te mau faaueraa i horoahia i taua taime ra ei aratai papu maitai no te mau kerisetiano e tae roa mai i teie nei mahana. Ma te feaa ore, ua turai te mau manaˈo hamani maitai o Iesu ia ˈna, ia haamâha i te hiaai pae varua o te huitaata nei.—Mataio 10:5-7.
18. Eaha te huru o Iesu ia ô mai te mau nahoa taata i roto roa i to ˈna oraraa, e eaha te haapiiraa ta tatou e huti mai i te reira?
18 I te tahi atu taime, ua anaanatae â o Iesu i te parau no te mau hinaaro pae varua o te mau tiaa rahi taata. I teie nei, ua rohirohi roa o ˈna e ta ˈna mau aposetolo i muri aˈe i te hoê tere pororaa î maitai, e ua imi aˈera hoi ratou i te hoê vahi i reira ratou e faafaaea rii ai. Aita râ i maoro roa, ua itea maira te taata ia ratou. Maoti hoi o Iesu i te riri i te mea e ua faaô mai ratou ia ratou i roto roa i to ratou oraraa, te faatia ra o Mareko e “aroha ˈtura oia ia ratou.” E eaha hoi te tumu teie mau manaˈo hohonu to Iesu? “Mai te nǎnǎ mamoe tiai ore ra ratou.” Ua faaite â o Iesu i to ˈna mau manaˈo na roto i te ohipa e ua haamata aˈera hoi i te haapii i te mau nahoa taata “no nia i te Basileia o te Atua.” Oia mau, no to ˈna putapû i to ratou hiaai i te pae varua oia i horoa i te taime hinaarohia ta ˈna i faataa no te faafaaea rii no te haapii atu ia ratou.—Mareko 6:34; Luka 9:11.
19. Mea nafea te anaanatae o Iesu i te mau nahoa rahi taata i te na nia-ê-raahia i te mau hinaaro i te pae varua?
19 Noa ˈtu â ïa e ua riro te mau hinaaro i te pae varua o te taata ei tapitapiraa matamua na ˈna, aita o ˈna i haafaufaa ore aˈenei i to ratou mau hinaaro i te pae tino. I taua atoa taime ra, ua “faaora ˈtura [oia] i te feia maˈi.” (Luka 9:11) I te tahi â taime i muri aˈe, ua faaea maoro mai te mau tiaa rahi taata ia ˈna ra, e ua atea roa hoi ratou i to ratou mau fare. Ia ite oia i to ratou hinaaro i te pae tino, ua na ô atura oia i ta ˈna mau pǐpǐ e: “Te aroha nei au i teie nei feia rahi, i te mea a rui toru aˈenei ratou ia ˈu nei e aita a ratou maa ia amu: e ore au e tuu porori noa ia ratou, oi paruparu noa ratou i te aratia.” (Mataio 15:32) Ua rave o Iesu i teie nei i te hoê ohipa no te tamǎrû i to ratou mauiui. Na roto i te hoê semeio, ua faaamu aˈera oia tau tausani tane, vahine e tamarii i e hitu noa maa faraoa iti e te tahi tau iˈa.
20. Eaha ta tatou e haapii mai i te hiˈoraa hopea i faatiahia mai no nia i te parau no te faaohiparaa o Iesu i te aroha?
20 Te hiˈoraa hopea e faatiahia ra no nia i te aroha o Iesu, no nia ïa i to ˈna tere hopea i Ierusalema. E rave rahi nahoa taata tei tere mai na muri ia ˈna no te faatupu i te oroa Pasa. E i nia i te eˈa e fatata ˈtu i Ieriko, ua haere maira e piti nau taata taparu matapo e te pii e: “E te Fatu, e aroha mai ia mâua.” Ua tamata te mau tiaa rahi taata e haamamû ia raua, ua pii atura râ Iesu ia raua e ua ani atura i to raua hinaaro ia ˈna: “E te Fatu, ia ara to mâua mata,” o ta raua ïa ani. “Aroha ˈtura Iesu ia raua,” e ua tapea ˈtura i to raua mata; araara aˈera to raua mata. (Mataio 20:29-34) E haapiiraa faufaa mau ta tatou e nehenehe e huti mai i taua ohipa ra! Te fatata ˈtura Iesu i te ô i roto i te hebedoma hopea o ta ˈna taviniraa i nia i te fenua nei. Mea rahi te ohipa te tia ia ˈna ia rave hou aˈe oia e faaruru ai i te hoê pohe riaria mau i roto i te rima o te mau tavini a Satani. Hau atu, aita o ˈna i faatia i te faaheporaa o taua taime poto ra ia tapea ia ˈna i te faaite i to ˈna mau manaˈo hamani maitai no te mau hinaaro faufaa ore aˈe hoi o te taata nei.
Te mau parabole e haafaufaa i te hamani maitai
21. Eaha tei faahohoˈahia mai na te fatu i faaore i te utua rahi roa a ta ˈna tavini?
21 Te ihoparau haa heleni splag·khniʹzo·mai, i faaohipahia i roto i te mau aamu no nia i te oraraa o Iesu, ua faaohipa-atoa-hia ïa i roto e toru parabole a Iesu. I roto i te hoê aamu, te taparu ra te hoê tavini e ia horoahia na ˈna i te taime no te faahoˈi i ta ˈna utua rahi roa. “Ua aroha maira” to ˈna fatu ia ˈna, e ua faaore atura hoi i ta ˈna utua. Te faahohoˈa maitai ra te reira i te hamani maitai rahi o te Atua o Iehova i te faaoreraa oia i te hara rahi a te kerisetiano tataitahi e faaohipa i te faaroo i roto i te tusia taraehara o Iesu.—Mataio 18:27; 20:28.
22. Eaha ta te parabole no nia i te tamaiti i haere i te fenua roa e faahohoˈa ra?
22 Te vai atoa ra te aamu no nia i te taimaiti i haere i te fenua roa. A haamanaˈo na eaha te ohipa i tupu ia hoˈi mai te tamaiti i haere i te fenua roa, i te fare. “E tei te atea ê â oia, ite maira tana metua ia ˈna, aroha maira, horo maira, tauvahi maira i nia i tana aˈî, hôˈihôˈi maira ia ˈna.” (Luka 15:20) Te faaite ra te reira e ia faaite te hoê kerisetiano tei atea ê, i te tatarahapa mau, e aroha mai o Iehova e e farii hoi oia ma te here i te taata e hoˈi mai. No reira, na roto i teie nau parabole e piti nei, te faaite ra o Iesu e “ua î [to tatou Metua o Iehova] i te aroha e te hamani maitai rahi.”—Iakobo 5:11, nota i raro i te api.
23. Eaha te haapiiraa ta tatou e haapii mai i roto i te parabole a Iesu no nia i te taata samaria?
23 Te toruraa o te faaohiparaahia i roto i te hoê parabole, te parau ra splag·khniʹzo·mai, no nia ïa i te taata samaria hamani maitai tei “aroha” i te hoê ati Iuda i eiâhia e i vaiiho-noa-hia e ua fatata i te pohe. (Luka 10:33) Ma te faaohipa i taua mau manaˈo ra, ua rave aˈera taua taata no Samaria ra i ta ˈna e nehenehe e rave no te tauturu i taua taata ěê ra. Te faaite ra hoi te reira e te tiaturi ra o Iehova e o Iesu, e e pee te mau kerisetiano mau i to raua hiˈoraa na roto i te faaiteraa i te aroha e te hamani maitai. Vetahi mau ravea i reira tatou e nehenehe ai e na reira, e tuatapapahia ïa i roto i te tumu parau i mua nei.
Te mau uiraa e hiˈopoa-faahou-hia
◻ Eaha te auraa te parau no te aroha faito ore?
◻ Mea nafea to Iehova faaiteraa i to ˈna hamani maitai no to ˈna iˈoa?
◻ Eaha te hiˈoraa hamani maitai rahi roa ˈˈe?
◻ Mea nafea to Iesu faaiteraa i te huru o to ˈna Metua?
◻ Eaha ta tatou e haapii mai i te mau ohipa aroha i ravehia e Iesu e i ta ˈna mau parabole?
[Tumu parau tarenihia i te api 12, 13]
TE PARAU FAAHIAHIA NO TE PARAU RA “HERE HOHONU”
“AUÊ tau aau e! e tau aau!” ta te peropheta ra o Ieremia ïa i autâ. Te autâ ra anei oia i te mea e te fifi ra to ˈna aau no te tahi mea ta ˈna i amu? Aita roa ˈtu. Ua faaohipa o Ieremia i te hoê faaauraa parau no te faataa mai i to ˈna manaˈo hohonu no nia i te ati i roohia i nia i te basileia o Iuda.—Ieremia 4:19.
I te mea hoi e e mau manaˈo hohonu to Iehova, e faaohipa-atoa-hia te parau hebera ra “aau” (me·ʽimʹ), no te faataa i te parau no to ˈna mau manaˈo here e horuhoru ai oia ra. Ei hiˈoraa, tau matahiti na mua aˈe i te tau o Ieremia, ua hopoi-tîtî-hia na basileia hoê ahuru o Iseraela na te arii ra o Asura. Ua faatia o Iehova i te reira ei faautuaraa i to ratou faaroo ore. Tera râ, ua moehia anei ratou e te Atua i roto i to ratou hopoi-tîtî-raahia? Aita. Te haafaufaa hohonu mau râ oia ia ratou i te mea e ua riro ratou ei nunaa o ta ˈna i faaau atu i te hoê faufaa. Ma te faahiti i to ratou parau na roto i te faaohiparaa i te iˈoa o te opu tuiroo ra no Epheraima, ua ani atura o Iehova e: “O tau tamaiti here anei Epheraima? e tamaiti hinaaro-rahi-hia anei oia? e ua parau anaˈe au ia ˈna, ua riro faahou atura tau manaˈo i te papuraa ˈtu ia ˈna; e teie nei, ua horuhoru tau aau ia ˈna: e aroha ˈtu â ia ˈna.”—Ieremia 31:20.
Ia ˈna i parau e “ua horuhoru tau aau ia ˈna,” te faaohipa ra o Iehova i te hoê huru paraparau no te faataa mai i to ˈna mau manaˈo hohonu i te pae no te here no to ˈna nunaa i hopoi-tîtî-hia. I roto i ta ˈna tatararaa parau no nia i teie nei irava, teie ta te taata tuatapapa Bibilia o te 19 o te senekele o E. Henderson i papai: “Aita e mea e nehenehe e faaore i te huru putapû mau o te here metua i nia i te hoê tamaiti i haere i te fenua roa, teie e faaitehia nei i ǒ nei na Iehova. . . . Noa ˈtu â ïa e ua faautua oia [i te mau ati Epheraima haamori idolo] . . . , aita roa ˈtu ratou i moehia ia ˈna, aita, ua faaoioi râ oia i te haafaufaa i te parau no to ratou faaoraraa hopea.”
Te parau heleni no te parau ra “aau,” e faaohipahia ïa mai te reira te huru i roto i te mau Papai Heleni kerisetiano. Ia ore oia e faaohipahia i roto i to ˈna auraa mau, mai roto i te Ohipa 1:18, e faahiti ïa oia i te parau no te mau manaˈo horuhoru rahi mau aore ra hamani maitai. (Philemona 12) E faatuatihia teie parau i te tahi mau taime i te parau heleni ra oia hoi te auraa “maitai” aore ra “au.” Te faaohipa ra te mau aposetolo Paulo raua o Petero i teie nau parau ia faaitoito raua i te mau kerisetiano ei “[hamani maitai rahi],” oia hoi “ia ineine maitai ratou i te aroha.” (Ephesia 4:32; Petero 1, 3:8) E nehenehe atoa te parau heleni no te parau ra “aau” e faatuatihia i te parau heleni ra pol·yʹ. Ia amuihia na parau e piti nei teie ïa te auraa “ei aau rahi aˈe.” Hoê anaˈe taime to teie nei faanahoraa parau heleni varavara roa faaohiparaahia i roto i te Bibilia, e e tano hoi oia no te Atua o Iehova. Mai teie te huru te Tatararaa a te ao apî huriraa i te reira: “E Atua here rahi roa o Iehova.”—Iakobo 5:11.
Auê tatou i te mauruuru i te mea e e ere te manahope o te ao nei, oia hoi te Atua o Iehova mai te mau atua i hamanihia e te mau taata aroha ore! Mai to ratou Atua “[hamani maitai rahi ra],” te faaitoitohia nei te mau kerisetiano mau ia na reira atoa i roto i to ratou mau auraa i nia i te tahi e te tahi.—Ephesia 5:1.
[Hohoˈa i te api 10]
I te tapaeraa te aroha o te Atua i nia i to ˈna otia, ua faatia aˈera o Iehova i to Babulonia ia haru i to ˈna nunaa i atea ê
[Hohoˈa i te api 11]
Te hiˈoraa oia i ta ˈna Tamaiti here i te poheraa, eita e ore te reira i te faatupu i te mauiui rahi roa ˈˈe i roto i te Atua o Iehova, ta te hoê taata i ore aˈenei i mauiui
[Hohoˈa i te api 15]
Ua faaite papu o Iesu i te huru hamani maitai o to ˈna Metua