Iesu, to ˈna oraraa e ta ˈna taviniraa

Ua faatamaa semeio o Iesu e rave rahi tausani taata

UA HAAATI ihora na aposetolo hoê ahuru ma piti ia Galilea e ua anaaanatae rahi ratou i te poro atu i te parau apî maitai i reira. I teie nei râ, i muri noa ˈˈe i te poheraa o Ioane, ua hoˈi maira ratou ia Iesu ra e ua faatia ˈtura ia ˈna i te mau taime faahiahia ta ratou i ite. No to ˈna iteraa e ua rohirohi ratou e aita to ratou taime no te tamaa no te rahi o te taata e hahaere noa ra, ua parau atura Iesu ia ratou e: ‘Haere anaˈe tatou i te hoê vahi moemoe e faaea iti noa ˈˈe.’

Haere ihora ratou na nia i to ratou pahi, peneiaˈe i pihai iho ia Kaperenaumi, e fano atura ratou i te hoê vahi moemoe, e au ra i te pae hitia o te râ o Ioridana, i te vahi atea atu ia Betesaida. Ua ite râ te tahi pae ia ratou i te fanoraa e ua haapii aˈera vetahi i te reira. Ua horo atura ratou pauroa na te hiti o te pape e tei reira ratou a tapae mai ai te pahi.

I to ˈna pouraa i rapae i te pahi, aroha ˈtura Iesu i mua i taua feia rahi ra, no te mea mai te nǎnǎ mamoe tiai ore ra ratou. Ua faaora aˈera oia i te feia maˈi i rotopu ia ratou e ua haamata ihora oia i te haapii ia ratou i te parau e rave rahi.

Ua mairi oioi aˈera te mahana, no reira te mau pǐpǐ a Iesu i haere mai ai ia ˈna ra e ua na ô aˈera ia ˈna e: “E vahi moemoe teie, e ua poto roa hoi te mahana; a tuu atu i te taata ia haere na i te mau fare e te mau oire rii fatata nei, e hoo i te maa na ratou; aore roa hoi a ratou maa ia amu.”

Tera râ, ua pahono atura Iesu ia ratou e: “Na outou iho e hopoi atu i te maa na ratou.” I muri iho, no te mea e ua ite aˈena hoi oia eaha ta ˈna ohipa e rave, ua ani ihora oia ia Philipa no te tamata ia ˈna e: “Ei hea tatou e hoo ai i te maa ei faaamuraa ˈtu i teie nei mau taata?”

I to Philipa hiˈoraa, eita e nehenehe e rave hau atu â. Oia mau, te vai ra i reira e 5 000 taata i haaputuputu mai, peneiaˈe ua hau atu ïa te taatoaraa i te 10 000 taata mai te peu e e taio-atoa-hia te mau vahine e te mau tamarii! No reira oia i pahono atu ai ia Iesu e: “Ia piti noa ˈtu â hanere i te moni veo ia hoo i te maa [hoê moni veo, te moni ohipa ïa o te mahana ohipa o tera ra tau], eita roa e ravai ia tataitahi hua iti i te taata hoê.”

Peneiaˈe no te haapapu e eita roa ˈtu e nehenehe e faatamaa i te hoê nahoa rahi taata mai teie te huru, ua parau maira o Anederea e: “E pae a te hoê tamaiti iti nei pane, e piti hoi iˈa”, e ua na ô faahou aˈera oia e: “Eaha ra hoi te reira e ravai ai i teie nei feia rahi?”

No te mea hoi i taua taime ra, o te tau ïa o te tupuraa raau, na mua noa ˈˈe i te Pasa o te matahiti 32, e rave rahi aihere i taua vahi ra. No reira, na nia i te aniraa a Iesu, ua titau ihora te mau pǐpǐ i te mau taata ia tarava i nia i te aihere, taipae ahuru i te tahi pǔpǔ e taihoê hanere i te tahi. I muri iho, ua rave ihora o Iesu i na pane e pae e i na iˈa e piti ra, hiˈo atura i nia i te raˈi e parau ihora i te hoê haamaitairaa, e haamata ihora i te vavahi i na pane e i te opere i na iˈa. Ua horoa ihora oia i taua maa ra i ta ˈna mau pǐpǐ ra o tei opere atu na te nunaa. Ohipa maere mau, amu anaˈe ihora ratou e paia roa ˈˈera!

I muri aˈe i te reira, ua parau ihora o Iesu i ta ˈna mau pǐpǐ e: “A haaputu na i te huˈahuˈa rii maa toea ra, eiaha te hoê vahi iti e faaruehia.” E faaî ratou 12 ete rarahi i te toea maa! Mataio 14:13-21; Mareko 6:30-44; Luka 9:10-17; Ioane 6:1-13.

◆ No te aha Iesu i imi ai i te hoê vahi moemoe no ta ˈna mau aposetolo?

◆ I hea to Iesu aratairaa i ta ˈna mau pǐpǐ, e noa ˈtu te reira, no te aha ratou e ore ai e nehenehe e rave i te hoê taime faafaaearaa, e mea faufaa hoi te reira?

◆ I te mairiraa o te mahana, eaha ta te mau pǐpǐ i faaitoito atu ia Iesu, tera râ, eaha ta ˈna i rave no te haapao maite atu i te nunaa?