HAAPIIRAA 23
Te bapetizoraa: Hoê fa faufaa roa!
Ua haapii Iesu e titauraa te bapetizoraa no te mau Kerisetiano. (A taio i te Mataio 28:19, 20.) Eaha râ te bapetizoraa? Eaha te titauhia ia rave te hoê taata ia naea tera fa?
1. Eaha te bapetizoraa?
E taˈo Heleni “taumi” i raro i te pape te auraa o te taˈo bapetizo. I to Iesu bapetizoraahia, ua taumihia oia i raro i te pape o te anavai Ioridana, e ua haere mai i nia “mai raro mai i te pape.” (Mareko 1:9, 10) Hoê â huru no te mau Kerisetiano mau, e bapetizohia ratou ma te taumi roa i raro i te pape.
2. Eaha ta te bapetizoraa e faaite ra?
A bapetizo ai te hoê taata ia ˈna, e faaite oia e ua pûpû oia ia ˈna iho ia Iehova. Nafea te hoê taata e rave ai i te pûpûraa? Hou te bapetizoraa, e faaite oia ia Iehova na roto i te pure e te hinaaro ra oia e tavini ia ˈna e a muri noa ˈtu. E te mea faufaa roa ˈˈe i roto i to ˈna oraraa, e euhe oia e haamori ia Iehova anaˈe e e rave i to te Atua hinaaro. E faaoti oia e “haapae . . . ia ˈna iho e . . . , a pee” noa ˈi i te haapiiraa a Iesu e to ˈna hiˈoraa. (Mataio 16:24) Maoti ta ˈna pûpûraa e bapetizoraa, e piri ai to ˈna auhoaraa e o Iehova e i te mau taeae e tuahine.
3. Nafea te hoê taata e tapae ai i te bapetizoraa?
Hou oe a bapetizo ai, mea faufaa ia haapii oe no nia ia Iehova ia puai atu â to oe faaroo ia ˈna. (A taio i te Hebera 11:6.) A rahi ai to oe ite e faaroo, e rahi atoa to oe here ia Iehova. Mea papu, e hinaaro oe e poro no nia ia ˈna e e ora ia au i ta ˈna mau faaueraa. (Timoteo 2, 4:2; Ioane 1, 5:3) Ia ora te hoê taata ia au to ˈna “haerea ia Iehova ia mauruuru roa oia” ia ˈna, e faaoti paha oia e pûpû i to ˈna ora i te Atua e e bapetizo ia ˈna.—Kolosa 1:9, 10.a
A FAAHOHONU ATU Â
A hiˈo eaha ta tatou e nehenehe e haapii i te bapetizoraa o Iesu e e nafea te taata e nehenehe e faaineine ia ˈna no teie tuhaa faufaa roa.
4. E nehenehe tatou e haapii no nia i te bapetizoraa o Iesu
A taio i te Mataio 3:13-17 no te haapii hau atu â no nia i te bapetizoraa o Iesu. E a aparau i teie mau uiraa:
I to Iesu tamariiriiraa, ua bapetizohia anei oia?
Mea nafea oia i te bapetizoraahia, ua topatapata-noa-hia anei te pape i nia ia ˈna?
Ua haamata Iesu i ta ˈna ohipa taa ê i te fenua nei ta te Atua i horoa ia ˈna i te taime a bapetizohia ˈi oia. A taio i te Luka 3:21-23 e te Ioane 6:38, e a aparau i teie uiraa:
I muri iho, i to Iesu bapetizoraahia, eaha te ohipa matamua ta ˈna i rave i roto i to ˈna oraraa?
5. Te bapetizoraa te hoê fa e naea ia oe
I te omuaraa, ua manaˈo paha oe e ere no oe te pûpûraa e te bapetizoraa. Tera râ, ia tamau oe i te haapii atu â no nia ia Iehova e ia ite maitai o vai o ˈna, e papu atu â oe i te rave i te hoê faaotiraa faufaa mau. No te ite i ta vetahi ê i rave, a pata i te VIDEO.
A taio i te Ioane 17:3 e te Iakobo 1:5, e a aparau i teie uiraa:
Eaha te nehenehe e tauturu i te hoê taata ia faaineine ia ˈna no te bapetizoraa?
E pûpû tatou ia tatou ia Iehova ma te faaite e te hinaaro ra tatou e tavini ia ˈna e a muri noa ˈtu
Ia bapetizohia tatou, e faaite tatou i te taata e ua pûpû tatou ia tatou i te Atua
6. Ia bapetizohia tatou, e riro tatou ei mero no te utuafare fetii a Iehova
Ia bapetizohia tatou, e riro tatou ei mero o te utuafare fetii hoê roa na te ao. Noa ˈtu te vahi ta tatou e ora ra aore ra te mau tupuraa ta tatou i ora mai, hoê â tiaturiraa to tatou e e ora ia au i te hoê â mau ture aveia. A taio i te Salamo 25:14 e te Petero 1, 2:17, e a aparau i teie uiraa:
Nafea te bapetizoraa e ohipa ˈi i nia i te auhoaraa o te hoê taata e o Iehova e te feia e haamori ra ia Iehova?
TE MANAˈO O VETAHI: “Aita vau i ineine no te bapetizo ia ˈu.”
Mai te peu tera to oe manaˈo, e fa faufaa noa anei te bapetizoraa no oe?
HAAPOTORAA
Ua haapii Iesu e titauraa te bapetizoraa no te mau Kerisetiano. Ia naea ia ˈna tera fa, e haapuai oia i to ˈna faaroo ia Iehova, e ora oia ia au i ta Iehova mau ture aveia e e pûpû oia ia ˈna iho ia Iehova.
Haamanaˈoraa
Eaha te bapetizoraa e no te aha mea faufaa?
Eaha ta te bapetizoraa e faaite ra?
Eaha te mau taahiraa e aratai ra i te pûpûraa e te bapetizoraa?
HIˈOPOA
A haapii eaha te bapetizoraa e e ere râ te bapetizoraa i te aha.
A haamanaˈo i te mau ravea ta te hoê taata e nehenehe e rave ia tapae oia i te bapetizoraa.
“Na te here e te mauruuru ia Iehova e turai ia outou ia bapetizo” (Te Pare Tiairaa Mati 2020)
A taio eaha tei turai i te hoê taata ia bapetizohia o ˈna.
“Ua hinaaro raua e na ˈu iho e ite i te parau mau” (Te Pare Tiairaa Mati 2013)
A hiˈo no te aha e fa faufaa roa te bapetizoraa e e nafea oe e faaineine ai no te reira.
“E titauhia anei ia bapetizohia vau?” (Ta te feia apî e uiui nei, [Buka 2], pene 37)
a Mai te peu, ua bapetizo-aˈena-hia te hoê taata i roto i te tahi atu haapaoraa, e hinaarohia ia bapetizo-faahou-hia oia. No te aha? No te mea aita tera haapaoraa e haapii ra i te parau mau o te Bibilia.—A hiˈo i te Ohipa 19:1-5 e te haapiiraa 13.