Iesu, to ˈna oraraa e ta ˈna taviniraa

Ua aroha o Iesu i te hoê lepera

A HAAATI noa ˈi Iesu, tei apeehia mai e e toomaha o ta ˈna mau pǐpǐ i te mau oire no Galilea, ua parare te parau no nia i te mau ohipa faahiahia mau ta ˈna i rave i roto i te mataeinaa taatoa, e tae roa ˈtu i roto i te tahi oire tei reira te hoê taata tei taeahia i te lepera i te faaearaa. Te haapapu ra te taote ra o Luka e “ua ati [taua taata ra] i te lepera”. Inaha, i roto i te tupuraa rahi roa o taua maˈi ra, e amu rii mǎrû noa taua maˈi riaria mau i te mau tuhaa taa ê o te tino. Tei roto atura ïa taua lepera nei i te hoê huru tupuraa aroha mau.

Ia tae mai Iesu i roto i taua oire nei, e haere tia mai te lepera i mua ia ˈna. Ia au i te ture a te Atua, e tia i te mau lepera atoa ia faaara i te mau taata e haaati ra ia ˈna ma te pii e: “Ua viivii, ua viivii!” ia ore ratou ia fatata roa mai ia ˈna e ia ore hoi ratou ia ino atoa. Ua tipapa ihora te lepera i raro e ua faateni maira ia ˈna i te na ôraa mai e: “E te Fatu, ia tia ia oe ra, e mâ vau ia oe.”

Ua haapapu maira ïa taua taata nei i to ˈna faaroo rahi ia Iesu. E, no to ˈna maˈi, mea aroha mau â oia. E nafea râ ïa Iesu? Ahiri e outou, e nafea ïa outou? Ma te aroha, ua toro atura Iesu i to ˈna rima e ua tapea ˈtura i taua taata i te na ôraa ˈtu e: “Ua tia ia ˈu, ia mâ oe.” E inaha, pee ê atura to ˈna lepera i reira ra.

Te hinaaro atoa ra anei outou ei arii no outou te hoê taata maitai mau? E tauturu mai te huru o Iesu i nia i taua lepera ra ia tatou ia tiaturi tatou e e faatupu mau â oia i taua parau tohu bibilia nei ia faatere mai oia ei arii: “E faaherehere oia i tei paruparu ra e tei veve, e faaora hoi oia i te feia taoˈa ore ra.” Oia mau, e faatupu Iesu i reira te mea faufaa roa no ˈna oia hoi: tauturu i te taatoaraa o te feia tei roohia i te ati ra.

Ua haamaere aˈenei te taviniraa a Iesu i te mau ati Iuda hou taua lepera nei e faaorahia ˈi? Te faatupu ra râ Iesu i te hoê parau tohu a Isaia ia ˈna i parau atu i te taata ta ˈna i faaora e: “Eiaha roa e faˈi i te taata.” Ua parau faahou atura oia e: “E haere râ e faaite ia oe iho i te tahuˈa ra, e e hopoi atu no te tamâraa ia oe i tei haapaohia e Mose, ei faaite atu i te taata.”

No te oaoa hoi taua taata nei aita oia i nehenehe e ore e faˈi i taua semeio nei. Ua reva ê atura oia e ua haere atura hoi e faaite i te parau apî i te mau vahi atoa. E, i te mea hoi e te huti ra oia i te manaˈo o te taata i ore roa ˈi Iesu e nehenehe faahou e tomo atu i roto i te hoê oire. Ua faaea ˈtura hoi oia i roto i te mau vahi moemoe e te taata ore, ua haere maira râ te hoê tiaa taata no te mau vahi atoa mai ia ˈna ra no te faaroo ia ˈna e ia nehenehe atoa hoi ratou ia ora i to ratou mau maˈi. Luka 5:12-16; Mareko 1:40-45; Mataio 8:2-4; Levitiko 13:45; 14:10-13; Salamo 72:13; Isaia 42:1, 2.

◆ Eaha ta te lepera e faatupu, e eaha te faaararaa te tia i te hoê lepera ia horoa ia haere noa ˈtu oia i te vahi taata?

◆ Eaha ta te hoê lepera i taparu atu ia Iesu, e te haapii maira ta ˈna pahonoraa ia tatou i te aha?

◆ Aita taua taata nei i auraro ia Iesu ia oti oia i te faaorahia i roto i tei hea tuhaa, e eaha te mau faahopearaa o to ˈna faaroo ore?