‘E tia anei ia outou’ ia tauturu ia vetahi ê?

¹ Ua haapeapea mau â Iesu no to ˈna taata-tupu. I to te hoê lepera taparuparuraa ˈtu e tauturu mai, ua toro atu oia i te rima, e ua faatiaia ˈtura ia ˈna ma te parau atu e: “Ua tia ïa ia ˈu, ia mâ oe.” (Mar. 1:40-42) E nafea ia pee ia Iesu no nia i te tautururaa ia vetahi ê?

² Te feia o te anaanatae i te parau mau: E tuhaa ta te melo taitahi o te amuiraa ia amui mai taua mau taata ra i roto i te feia haamori o Iehova. Ia haere mai te taata apî i te mau putuputuraa, a farii ia ratou e a haamatau atu. A imi i te mau ravea no te faaitoito atu. A haapopou atu no ta ratou mau pahonoraa, tae noa ˈtu no ta ratou mau tutavaraa e faaohipa i te mau faaueraa tumu bibilia i roto i to ratou oraraa. A faataa ˈtu e e nehenehe ratou e fanaˈo i te mau hoa mau i roto i te amuiraa.

³ To tatou mau hoa Kerisetiano: E au iho â râ ia tauturu tatou “i to te fetii faaroo” na roto i te mau ravea rau. (Gal. 6:10) E mau fifi i te pae o te ea to to tatou mau taeae e rave rahi. Maoti te hoê tere faaitoitoraa e nehenehe ai ta outou e haafanaˈo ia ratou i te auhoaraa ta ratou e hinaaro e peneiaˈe e paturu mau atoa ˈtu. Te farerei ra vetahi i te tahi atu mau fifi. A faaite e te anaanatae ra outou ia ratou ma te rave i te taime no te faaroo e no te patu ia ratou. (Tes. 1, 5:14) Mea hinaaro atoa na te mau matahiapo ia haa amui tatou ia amo ratou i ta ratou mau hopoia. (Heb. 13:17) Mai te peu e te hinaaro ra tatou e tavini e e tauturu, ia riro ïa tatou ‘ei haamanahanaraa’ no to tatou mau hoa Kerisetiano.—Kol. 4:11.

⁴ To tatou mau melo utuafare: E tia atoa ia tatou ia tutava i te pee ia Iesu i roto i te utuafare. Ma te haapeapea no te mau maitai o ta ratou mau tamarii, ‘e [tamau] te mau metua i te haapii ia ratou e ia paari ma te aˈo a te Fatu ra.’ (Eph. 6:4; MN) E rave te mau tamarii i ta ratou tuhaa ma te faaineine noa ia ratou no te haapiiraa utuafare, te mau putuputuraa aore ra te pororaa. Ei taata paari, e nehenehe te mau tamarii e faaite i te aumauiui o Iesu a tauturu ai ratou ma te aroha i to ratou mau metua ia faaruru i te mau fifi i taaihia i te faito matahiti. E tauturu teie mau ravea e te tahi atu, ia tatou paatoa ‘ia rave i te paieti i roto i to tatou iho fetii.’—Tim. 1, 5:4.

⁵ A tauturu ai tatou ia vetahi ê mai ia Iesu i na reira, e nehenehe paha tatou e faaiti mai i te mau fifi e e haapaari i to tatou taairaa i roto i to tatou utuafare e i roto i te amuiraa. Te mea faufaa roa ˈtu â râ, e faahanahana tatou ia Iehova, ‘te Metua o te aroha.’—Kor. 2, 1:3.