Pahonoraa Iesu i te hoê raatira apî taoˈa rahi

Na Perea noa ra Iesu i te haere i Ierusalema. Horo maira te hoê taata apî taoˈa rahi ia ˈna ra e tuturi ihora i mua ia ˈna. E “raatira” o ˈna, e aratai paha o te hoê sunago aore ra e mero no te Sunederi. Ui maira oia: “Orometua maitai, eaha ta ˈu e rave e noaa ˈi ia ˈu te ora mure ore?”—Luka 8:41; 18:18; 24:20.

Pahono atura Iesu: “Eaha oe e parau mai ai Orometua maitai? Aita hoê aˈe e mea maitai, o te Atua anaˈe râ.” Eita e ore e ua faahiti oia i te parau “Orometua maitai” mai te hoê tiaraa, mai ta te mau rabi e rave ra. Mea ite Iesu i te haapii i te taata. Ua faaite râ oia i teie taata e no te Atua anaˈe te parau hanahana ra “maitai.”

Aˈo atura Iesu: “Ia hinaaro hoi oe e fanaˈo i te ora, a haapao noa ïa i te mau faaueraa.” Ui maira te taata apî: “Teihea mau faaueraa?” Faahiti atura Iesu e pae o na Ture Ahuru, eiaha e taparahi pohe i te taata, e faaturi, e eiâ, e pari haavare, e ia faatura i to ˈna na metua. Faahiti atura oia i te hoê faaueraa faufaa ˈtu â: “Ia here oe i to oe taata tupu mai ia oe iho.”—Mataio 19:17-19.

Parau maira teie taata: “Ua hope ia ˈu i te haapao i teie mau mea atoa, eaha te toe ra ia ˈu ia rave?” (Mataio 19:20) Ua manaˈo paha oia e te toe ra ia ˈna te tahi ohipa faahiahia a nehenehe atu ai oia e fanaˈo i te ora mure ore. No ta ˈna uiraa haavare ore, “hiˈo ihora Iesu ia ˈna ma te here.” (Mareko 10:21) E fifi râ to teie taata.

Mea au na ˈna ta ˈna mau taoˈa. Parau atura Iesu: “Hoê noa mea e toe ra ia oe: A haere a hoo i ta oe mau taoˈa, a horoa ˈtu ai i te moni na te feia veve, e taoˈa ïa ta oe i nia i te raˈi, e a pee mai ia ˈu.” E nehenehe teie taata e opere i ta ˈna moni na te feia veve, eita e haere ia ratou ia faahoˈi, a riro mai ai ei pǐpǐ na Iesu. Eita e ore ua peapea Iesu i to ˈna tiaraa e haereraa ma te oto. Mea au na ˈna ta ˈna mau taoˈa “mea rahi hoi,” aita ˈtura oia i haroˈaroˈa eaha te taoˈa mau. (Mareko 10:21, 22) Na ô atura Iesu: “Mea fifi mau â no te feia mea rahi ta ratou moni ia faaô i roto i te Faatereraa arii a te Atua!”—Luka 18:24.

Ua maere te mau pǐpǐ i teie mau parau e ta Iesu i parau i muri iho: “Inaha, mea ohie aˈe no te hoê kamela ia ô i roto i te hoê apoo nira eiaha râ no te hoê taata taoˈa rahi ia ô i roto i te Faatereraa arii a te Atua.” Ui maira te mau pǐpǐ: “O vai ïa te nehenehe e ora ˈtu?” Eita roa anei te hoê taata e nehenehe e ora ˈtu? Hiˈo roa ˈtura Iesu ia ratou e pahono atura: “Te mau mea e ore e tia i te taata, e tia ïa i te Atua.”—Luka 18:25-27.

Ua faaite Petero e mea taa ê te faaotiraa ta ratou i rave e ta teie taata taoˈa rahi: “Ua haapae hoi matou i te mau mea atoa e ua pee mai ia oe, eaha ïa ta matou e fanaˈo?” Ua faahiti Iesu i ta ratou e fanaˈo no ta ratou faaotiraa maitai: “E faaapî te Atua i te mau mea atoa ia parahi te Tamaiti a te taata nei i nia i to ˈna terono hanahana. I reira outou o tei pee mai ia ˈu e parahi atoa ˈi i nia 12 terono, a haava ˈi i na opu 12 o Iseraela.”—Mataio 19:27, 28.

Te manaˈo ra Iesu i te tau a muri aˈe e faaapîhia ˈi te mau mea atoa i te fenua nei mai tei itehia na i roto i te ô i Edene. E faatere Petero e te tahi atu mau pǐpǐ e o Iesu i taua fenua paradaiso ra. No teie haamaitairaa, e hoona mau â te mau haapaeraa atoa ta ratou e rave!

E ere râ te mau haamaitairaa no a muri aˈe noa. Te fanaˈo ra ta ˈna mau pǐpǐ vetahi. Ua parau Iesu: “Te taata tei haapae i te fare aore ra vahine faaipoipo, taeae, metua aore ra tamarii no te Faatereraa arii a te Atua, e fanaˈo iho â oia hau atu i teie nei â, e i roto i te faanahoraa o te ao nei no a muri aˈe, te ora mure ore ïa.”—Luka 18:29, 30.

I te mau vahi atoa e haere ai ta ˈna mau pǐpǐ, te vai ra to ratou fetii taeae e haamori ra ia Iehova mea piri aˈe e mea faufaa aˈe i to ratou iho fetii. Te mea peapea, e au ra e eita te raatira apî taoˈa rahi e fanaˈo i taua haamaitairaa ra e te oraraa i roto i te Faatereraa arii a te Atua i te raˈi.

Na ô faahou atura Iesu: “E rave rahi râ to mua, e riro ïa no muri e to muri no mua.” (Mataio 19:30) Eaha te auraa?

To rotopu atoa te raatira apî taoˈa rahi i “to mua,” oia hoi te mau aratai ati Iuda. Te haapao ra oia i te mau faaueraa a te Atua, e au ra ïa e riro mai oia ei pǐpǐ na Iesu, a rave atu ai e rave rahi ohipa maitatai. Te mea faufaa roa ˈˈe râ no ˈna, te mau taoˈa ïa e te faufaa. Area te feia riirii, ua ite ïa i te parau mau e te eˈa e tae atu ai i te ora na roto i ta Iesu haapiiraa. O ratou “to muri,” ei auraa parau, tei riro “no mua.” E nehenehe ïa ratou e tiai ru i te parahi i nia i te mau terono i nia i te raˈi i pihai iho ia Iesu, a faatere mai ai i te fenua paradaiso.