“E faataua ˈtu outou i te taua no outou i te taoˈa haavare nei”
“E faataua ˈtu outou i te taua no outou i te taoˈa haavare nei . . . O tei haapao maitai i te mea iti ra, ua haapao maitai atoa i te mea rahi.”—LUKA 16:9, 10.
1. Mea nafea to Mose e to te mau tamarii Iseraela faahanahanaraa ia Iehova i muri aˈe i to ratou matararaa mai mai Aiphiti mai?
FAAORAHIA na te hoê semeio—auê ïa ohipa faaroo puai mau e! Aita ˈtu tumu no te faaoraraahia o Iseraela mai Aiphiti mai, maoti râ o te Puai Hope ra o Iehova. Eita ˈtura ïa e maerehia ia himene o Mose e te mau ati Iseraela e: “O Iehova to ˈu puai, e ta ˈu arueraa, e ua riro oia ei ora no ˈu. Oia to ˈu Atua, e oia ta ˈu e imi i te parahiraa; o to tau metua ïa Atua, e oia ta ˈu e faateitei.”—Exodo 15:1, 2; Deuteronomi 29:2.
2. Eaha ta te nunaa o Iehova i hopoi na muri ia ratou a faarue ai ratou i te fenua Aiphiti?
2 Auê ïa te tiamâraa apî o Iseraela i te taa ê i tei farereihia e ratou i Aiphiti e! I teie nei e nehenehe ratou e haamori ia Iehova ma te ore faahou e tapuni. E aita atoa hoi ratou i faarue i te fenua Aiphiti ma te taoˈa ore. Teie ta Mose e faatia ra: “Te mau tamarii a Iseraela . . . I ani na hoi ratou i to Aiphiti i te taoˈa ario, e te taoˈa auro ra, e te ahu. E i tiahia mai hoi ratou e to Aiphiti ia Iehova ra, i horoa mai ai ratou i ta ratou i ani ra. Pau ihora to Aiphiti ia ratou.” (Exodo 12:35, 36) Tera râ, mea nafea to ratou faaohiparaa i taua mau taoˈa no Aiphiti mai? Ua faaohipa anei ratou i te reira ‘no te faateitei ia Iehova’? Eaha ta tatou e haapii mai i to ratou hiˈoraa?—A faaau e te Korinetia 1, 10:11.
“Te ô a Iehova”
3. Eaha ta te faaohiparaa o Iseraela i te auro i roto i te haamoriraa hape i faatupu i nia ia Iehova?
3 I roto i te maororaa e 40 mahana to Mose faaearaa i nia i te Mouˈa ra i Sinai, no te rave mai i te mau faaueraa i haapaohia e te Atua no Iseraela, ua rahi roa ˈtu â te hepohepo o te nunaa e tiai noa ra i raro mai. Ma te rave oioi i to ratou mau tapea tariˈa auro, ua faaue atura ratou ia Aarona e hamani i te tahi idolo ei haamoriraa na ratou. Ua faatia atoa o Aarona i te hoê fata, e ia poipoi aˈe, ua pûpû atura ratou i te mau tusia i reira. Ua huti anei te faaohiparaa ratou i ta ratou auro ia ratou i to ratou ra Faaora? Papu maitai e aita roa ˈtu! Ua na ô maira Iehova ia Mose e “E teie nei, eiaha oe e parau mai ia ˈu, ia tupu noa na tau riri ia ratou a haapau roa ˈtu ai au ia ratou.” I te parau-noa-raa ˈtu o Mose, ua faaherehere aˈera o Iehova i te nunaa, noa ˈtu â ïa e ua pohe te mau aratai orure hau i te hoê ati no ǒ mai i te Atua ra.—Exodo 32:1-6, 10-14, 30-35.
4. Eaha te “ô a Iehova,” e o vai tei pûpû i te reira?
4 I muri aˈe, ua nehenehe o Iseraela e faaohipa i ta ratou mau taoˈa ia au i te huru haerea i hinaarohia e Iehova. Ua faataa ratou “i te ô na Iehova.”a Te auro, te ario, te veo, te ahu ereere tape moana, e e rave rahi mau ahu ua rau huru te ǔ, e te iri mamoe oni e te iri seteka, e te raau sitima tei roto i te mau ô i horoahia no te paturaa e i te mau taoˈa i haapaohia no te sekene. Te huti ra te aamu i to tatou manaˈo i nia i te huru o te feia horoa. “O te taata i tia to ˈna aau, e hopoi mai oia i te ô na Iehova.” (Exodo 35:5-9) Ua pahono rahi mai o Iseraela. No reira, ua riro atura ïa te sekene ei faanahoraa “rahi nehenehe e te faahiahia mau,” ia au i te mau parau i faahitihia e te hoê taata tuatapapa bibilia.
Te mau ô no te hiero
5, 6. No nia i te hiero, mea nafea to Davida faaohiparaa i ta ˈna mau taoˈa, e mea nafea to te tahi pae pahonoraa ˈtu?
5 Noa ˈtu â ïa e ua aratai te arii no Iseraela ra o Solomona i te paturaa i te hoê fare e vai tamau mai no te haamoriraa ia Iehova, ua rave o Davida, to ˈna metua tane, i te mau faaineineraa rarahi no te reira. Ua haaputu o Davida e rave rahi auro, veo, ario, auri, raau, e mau ofai maitatai. “E no to ˈu nei aroha i te fare o tau Atua,” o ta Davida ïa i parau atu i te nunaa “te vai nei ta ˈu ra taoˈa no ˈu iho, te auro e te ario, o ta ˈu ïa e horoa nei no te fare o tau Atua, te taa ra tei faaitoitohia e au no taua fare moˈa nei; e toru tausani taleni auro . . . e hitu tausani i te taleni ario maitai ra, ei tapoˈi i taua fare ra i roto.” Ua faaitoito o Davida i te tahi pae e ia faatupu atoa ratou i te huru horoa maitai. Ua pahono-rahi-hia mai: inaha, ua rahi aˈe hoi te auro, te ario, te veo, te auri, e te mau ofai maitatai ra. “Ua horoa noa [te taata] ma te aau maitai i te horoa-noa-raa na Iehova.”—Paraleipomeno 1, 22:5; 29:1-9.
6 Na roto i teie mau ô horoa-maitai-hia ra, ua faaite te mau ati Iseraela i to ratou mauruuru hohonu no te haamoriraa a Iehova. Ua pure hoi o Davida ma te haehaa e: “O vai râ vau nei, e eaha to ˈu nei mau taata, e tia ˈi ia matou ia hopoi noa ˈtu mai teie te huru?” No te aha? “No ǒ na mai te mau mea atoa nei, e na oe iho tei hopoihia ˈtu e matou nei . . . Area vau nei, ua hopoi au i taua mau mea atoa nei ma te tia o te aau ra.”—Paraleipomeno 1, 29:14, 17.
7. Eaha te haapiiraa ta tatou e huti mai i te tau o Amosa?
7 Tera râ, aita te mau opu atoa o Iseraela i tamau noa i te tuu i te haamoriraa a Iehova i nia i te parahiraa matamua i roto i to ratou feruriraa e i to ratou mafatu. I te senekele iva hou to tatou nei tau, ua topa o Iseraela tei amahamaha i roto i te haapao ore i te pae varua. No nia i na opu hoê ahuru o te basileia no apatoerau o Iseraela, ua na ô aˈera o Iehova na roto ia Amosa e: “E pohe to tei parahi noa i Ziona ra, tei tiaturi i te mouˈa i Samaria ra.” Te faataa ra oia ia ratou mai te mau taata “o tei taoto i nia i te roi sena, a titoo ai ia ratou iho i nia i te roi hopohopoi ra, o tei amu i te fanauˈa no roto i te nǎnǎ ra, e te kafa no roto i te faaamuraa ra; . . . o tei taauˈa rahi ia inu i te uaina.” Aita râ hoi to ratou ruperupe i paruru ia ratou. Ua faaara maira te Atua e: “E teie nei, o ratou te reva na ei tîtî, i te feia atoa e reva ei tîtî ra, e te amuraa a te feia i titoo ia ratou ihora, e faaorehia ïa.” I te matahiti 740 hou to tatou nei tau, ua mauiui o Iseraela i roto i te rima o to Asura. (Amosa 6:1, 4, 6, 7) E i te tau mau ra, ua topa atoa aˈera te basileia o Iuda i roto i te marei o te nounou taoˈa.—Ieremia 5:26-29.
Te faaohiparaa tano mau o te mau taoˈa i te tau kerisetiano
8. Eaha te hiˈoraa maitai ta Iosepha raua o Maria i horoa mai i te pae no te faaohiparaa i te mau taoˈa?
8 I te tahi aˈe pae, aita atoa te huru tupuraa veve o te mau tavini a te Atua i te mau tau a muri aˈe, i tapea ia ratou ia faaite i te itoito no te haamoriraa mau. A tapao na ei hiˈoraa ia Maria raua o Iosepha. No te auraro i te faaueraa a Kaisara Auguto, ua tere atura raua i te oire o to raua fetii, i Betelehema. (Luka 2:4, 5) I reira hoi to Iesu fanauraahia. E maha ahuru mahana i muri aˈe, ua haere atura o Iosepha raua o Maria i te hiero i pihai noa ˈtu ia Ierusalema no te faatupu i te pûpûraa i haapaohia no te tamâraa. Ei haapapuraa i to raua veve i te pae materia, ua pûpû atura o Maria e piti nau manu iti. Aita oia e aita atoa o Iosepha i feruri e no to raua veve, eita ïa raua e pûpû i te taoˈa horoa na Iehova. Ua faaohipa râ raua ma te auraro, i ta raua mau taoˈa iti.—Levitiko 12:8; Luka 2:22-24.
9-11. (a) Eaha te aratairaa ta te mau parau a Iesu i roto i te Mataio 22:21 e horoa maira no nia i te huru faaohiparaa tatou i te moni? (b) No te aha te ô iti a te vahine ivi ra i ore ai i pûpû-faufaa-ore-hia?
9 I muri aˈe, ua tamata aˈera te mau Pharisea e te mau melo o te taatiraa a Heroda i te haavarevare ia Iesu, i te na ôraa ˈtu e: “E teie nei, e faaite mai oe ia matou i to oe manaˈo; E mea au anei i te ture ia hopoi i te moni aufau na Kaisara, e aore anei?” Ua haapapu atura te pahonoraa a Iesu i to ˈna ite i to ratou hinaaro. Ma te rave mai i te moni ta ratou i horoa ˈtu ia ˈna ra, ua ui atura Iesu e: “No vai teie nei hohoˈa e te parau?” Ua pahono atura ratou e: “No Kaisara.” Ma te paari, ua faaoti aˈera oia e: “E hopoi maori i ta Kaisara ia Kaisara ra, e ta te Atua ra, e hopoi â ïa i te Atua ra.” (Mataio 22:17-21) Ua ite o Iesu e te titau maira te mana no reira mai taua moni ra e ia aufauhia te tute. Tera râ, te tauturu ra oia i ta ˈna mau pǐpǐ e oia atoa i to ˈna mau enemi ia ite e e hopoi atoa te kerisetiano mau “i ta te Atua, i te Atua ra.” Tei roto atoa ïa te parau no te faaohiparaa te taata i ta ˈna mau taoˈa materia i taua tuhaa ra.
10 Te faahohoˈa ra te hoê ohipa ta Iesu i ite i roto i te hiero i te reira. No faautua noa ˈtura oia i te mau papai parau nounou taoˈa ‘o tei pau ia ratou i te fetii o te mau vahine ivi ra.’ “E [ua ite atura oia] i te feia taoˈa rahi ra, i te tuuraa ˈtu i ta ratou taoˈa aufau i roto i te pueraa ra,” o ta Luka ïa e parau ra. “Ite atura [Iesu] i te hoê vahine ivi taoˈa ore i te tuuraa i na lepeta e piti i roto. Ua parau atura oia, E rahi ta teie nei vahine ivi taoˈa ore i tuu i roto i ta ratou atoa ra, e parau mau teie ta ˈu e parau atu ia outou nei. No roto hoi i ta ratou pueraa taoˈa rahi roa ra ta ratou i tuu i roto i te taoˈa a te Atua, area teie nei vahine, ua hope roa a ˈna pue taoˈa rii i te tuuhia e ana i roto.” (Luka 20:46, 47; 21:1-4) Te parau ra vetahi mau taata e ua faaunaunahia te hiero i te mau ofai rii maitatai ra. Ua pahono atura Iesu e: “Teie nei mau mea ta outou e hiˈo nei, te fatata maira te tau e ore e vaiihohia ˈi te tahi ofai i nia iho i te tahi, e ore e toe ai i te hurihia i raro.” (Luka 21:5, 6) Ua faufaa ore anei teie maa ô iti a taua vahine ivi ra? Aita roa ˈtu. Ua turu oia i te faanahoraa ta Iehova i faanaho i taua tau ra.
11 Ua na ô atura Iesu i ta ˈna mau pǐpǐ mau ra e: “Aore e tavini e tia ia faaroo atu i te fatu piti; e riro oia i te ore i te au atu i te tahi, e te au atu i te tahi; e aore ïa, e riro i te haapao atu i te tahi e te faarue taue atu i te tahi. O outou nei hoi e ore e tia ia faaroo i te Atua e te Mamona.” (Luka 16:13) No reira, nafea tatou e nehenehe ai e faaite i te huru aifaito mau i te pae no te faaohiparaa i ta tatou mau taoˈa materia?
Te mau tiaau haapao mau
12-14. (a) Ua riro te mau kerisetiano ei tiaau no teihea mau faufaa? (b) E tia i te nunaa o Iehova i teie mahana ia tuu ê ma te haapao maitai i ta ratou tiaauraa, i roto i teihea mau tuhaa taa ê? (c) Nohea mai te moni no te turu i te ohipa a te Atua i teie mahana?
12 Ia pûpû tatou i to tatou oraraa no Iehova, te parau ra ïa tatou e ta tatou mau taoˈa atoa, pauroa ta tatou mau faufaa, na ˈna anaˈe. Nafea râ hoi tatou ia faaohipa i ta tatou mau taoˈa? No nia i te parau no te taviniraa kerisetiano i roto i te amuiraa, teie ta Taeae C. T. Russell, te peretiteni matamua o te Taiete Watch Tower, i papai: “E tia i te taata tataitahi ia faariro ia ˈna mai te hoê taata i haapaohia e te Fatu ei tiaau no to ˈna iho tau, mana, moni, e rave rau atu â, e e tia i te taata tataitahi ia faaohipa i taua mau taleni ra ia au i to ˈna aravihi, ei faahanahanaraa i te Fatu.”—The New Creation, api 345.
13 “E e titauhia hoi te tiaau nei, ei taata haapao mau,” ta te Korinetia 1, 4:2 ïa e haapapu ra. Mai te hoê faanahonahoraa rahi, te tamata nei te mau Ite no Iehova i te ora ia au maite i taua faataaraa parau ra, ma te faaohipa-maitai-raa i to ratou taime ia au i tei maraa ia ratou, i roto i te taviniraa kerisetiano, e te faaohipa maite i to ratou aravihi i te pae no te haapiiraa. Hau atu, te horoa nei te mau pǔpǔ taata i to ratou taime i raro aˈe i te aratairaa a te mau Tomite o te Fenua i te pae no te Paturaa, i to ratou puai e i to ratou ite no te patu i te mau piha putuputuraa maitai mau e faaohipahia no te haamoriraa. Te mauruuru nei hoi Iehova i taua mau mea atoa nei.
14 Nohea mai hoi te moni o teie ohipa haapiiraa rahi mau e no te ohipa paturaa? No roto mai ïa i te feia aau paari ra, mai tei itehia i te mau mahana i patuhia ˈi te seneke. Te apiti atura anei tatou i roto i taua ohipa ra? Te faaite ra anei ta tatou huru faaohiparaa i ta tatou mau taoˈa materia e mea faufaa roa te taviniraa a Iehova no tatou nei? I te pae no te moni, ia riro na tatou ei tiaau haapao mau e tia ˈi.
Te hoê hiˈoraa i te pae no te horoa maitai
15, 16. (a) Mea nafea to te mau kerisetiano o te tau o Paulo faaiteraa i to ratou huru horoa maitai? (b) Eaha to tatou manaˈo no nia i ta tatou tauaparauraa?
15 Ua papai te aposetolo Paulo no nia i te feruriraa horoa maitai o te mau kerisetiano no Makedonia e no Ahaia. (Roma 15:26) Noa ˈtu â hoi to ratou iho veve, ua ineine noa ratou i te tauturu i to ratou mau taeae. Ua faaitoito o Paulo i te mau kerisetiano no Korinetia ia horoa maitai atoa ratou, ia horoa ratou i tei hau ia ratou ra na te feia e erehia ra. Aita e taata i nehenehe e pari ia Paulo i te eiâ. Teie hoi ta ˈna i papai: “O te ueue ma te faaherehere ra, e ooti ïa ma te iti; e o te ueue ma te faaherehere ore ra, e ooti ïa ma te rahi. E horoa te taata atoa i ta ˈna i opua i roto i to ˈna aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro.”—Korinetia 2, 8:1-3, 14; 9:5-7, 13.
16 Ua riro te mau ô horoa maitai ta to tatou mau taeae e ta te mau taata anaanatae e pûpû nei no te ohipa pororaa i te Basileia i roto i te ao taatoa nei i teie mahana, ei haapapuraa i to ratou anaanatae rahi i teie nei haamaitairaa. Tera râ, mai ta Paulo i faahaamanaˈo i to Korinetia, mea maitai ia tuatapapa tatou i teie nei aparauraa mai te hoê faahaamanaˈo-faahou-raa.
17. Eaha te hiˈoraa i te pae no te horoaraa ta Paulo e faaitoito mai nei, e e nehenehe anei te reira e faaohipahia i teie mahana?
17 Ua faaitoito o Paulo i te mau taeae e apee i te hoê faanahoraa ia horoa ratou i te ô. “Ia tae te mahana matamua o te hebedoma ra,” o ta ˈna ïa i parau, “e vaiiho aˈe outou atoa e ati noa ˈˈe i te tahi pae moni i roto i te vairaa ra, ia au i ta te Atua haamanuïaraa ia ˈna ra.” (Korinetia 1, 16:1, 2) E nehenehe te reira e riro ei hiˈoraa no tatou e no ta tatou mau tamarii i te pae no te mau ô ta tatou e horoa, ia na reira tatou i roto i te amuiraa aore ra i te amaa fatata roa ˈˈe a te Taiete Watch Tower. Ua titau te tahi nau taata mitionare i haapaohia no te poro i roto i te hoê oire no Afirika Hitia o te râ i te mau taata anaanatae, ia apiti mai ia raua i roto i te hoê haapiiraa bibilia. Ia hope teie putuputuraa matamua, ua tuu atura te mau mitionare ma te ore hoi e huti i te manaˈo, i te tahi moni i roto i te hoê afata i tapaohia “Mau ô no te ohipa pororaa i te Basileia.” Ua na reira atoa te tahi pae i tae mai. I muri aˈe, ia oti teie mau taata apî i te faanahohia ei amuiraa kerisetiano, ua tere maira te tiaau haaati e ua ite aˈera hoi oia e mea tuu tamau ratou i ta ratou mau ô.—Salamo 50:10, 14, 23.
18. Nafea tatou e nehenehe ai e tauturu i to tatou mau taeae i roto i te ati?
18 Ua riro atoa ei haamaitairaa na tatou i te faaohiparaa i ta tatou mau faufaa no te tauturu i te feia i roohia i te mau ati natura e i te feia e ora ra i roto i te mau vahi i tairihia e te tamaˈi. Auê hoi to tatou mafatu i te horuhoru ia taio tatou no nia i te mau tauturu e haponohia i te pae Europa Hitia o te râ inaha, mea arepurepu hoi te pae faanavairaa faufaa e politita i roto i taua tuhaa ra o te ao nei! Ua faaite te mau ô taoˈa e moni i te huru horoa maitai o to tatou mau taeae e te tauturu ta ratou i horoa no te mau kerisetiano i roto i te fifi.b—Korinetia 2, 8:13, 14.
19. Eaha te mau mea ohie ta tatou e nehenehe e rave no te tauturu i te feia i roto i te taviniraa ma te taime taatoa?
19 Te haafaufaa rahi nei tatou i te ohipa a to tatou mau taeae tei faaô ia ratou i roto i te taviniraa ma te taime taatoa ei pionie, ei tiaau ratere, mitionare e ei mau rave ohipa horoa noa i te Betela, e ere anei? Mai te peu e e tia, e nehenehe ta tatou e pûpû atu i te tahi tauturu i te pae materia. Ei hiˈoraa, ia tere mai te tiaau haaati i roto i ta outou amuiraa, e nehenehe ta outou e horoa ˈtu na ˈna i te mau mea e au, te maa, aore ra e tauturu i te pae no te mau haamâuˈaraa e itehia i roto i to ˈna tere. Eita teie huru tapao no te horoa maitai e ore e itehia mai e to tatou Metua i te raˈi ra, e hinaaro ra e ia haapaohia ta ˈna mau tavini. (Salamo 37:25) Tau matahiti i teie nei, ua titau te hoê taeae o tei nehenehe noa hoi e horoa i te tahi maa amuamu iti, i te hoê tiaau ratere e ta ˈna vahine i to ˈna fare. Ia faarue mai teie nau taata no te haere i roto i te pororaa i te ahiahi, ua horoa ˈtura te taeae i roto i te rima o na taata o ta ˈna i titau, i te hoê vehî rata. E i roto, te vai ra te hoê parau moni (e tuea i te hoê hanere farane) e te tahi atoa parau i papaihia e: “No te tahi maa auˈa tî aore ra galani mori.” Auê ïa manaˈo maitai i faaitehia i roto i teie nei huru raveraa haehaa e!
20. Eaha te haamaitairaa e te hopoia ta tatou e ore e hinaaro e haafaufaa ore?
20 I te pae varua, ua haamaitai-mau-hia te nunaa o Iehova! Te oaoa nei tatou i te mau amuraa maa varua i ta tatou mau putuputuraa e mau tairururaa, i reira tatou e nehenehe ai e fanaˈo i te mau buka apî, i te mau haapiiraa maitatai, e te aˈoraa faahiahia mau. Ma te î to tatou mafatu i te mauruuru no ta tatou mau haamaitairaa i te pae varua, eita e moehia ia tatou ta tatou haamaitairaa e ta tatou hopoia i te pae no te horoaraa i te mau ô e faaohipahia no te faahaere i te mau faufaa o te Basileia o te Atua i mua, i roto i te ao taatoa nei.
‘E faataua ˈtu outou i te taua no outou i te taoˈa haavare nei’
21, 22. Eaha te fatata roa i te tupu i nia i te “mau taoˈa haavare ra,” e titau hoi te reira ia tatou ia rave i te aha i teie nei?
21 Parau mau, mea rahi roa te mau ravea e nehenehe ai tatou e faaite e mea faufaa aˈe te haamoriraa a Iehova i roto i to tatou nei oraraa, e te hoê ravea faufaa roa no te faaite i te reira, ia pee ïa tatou i te aˈoraa a Iesu e tia ˈi: “E faataua ˈtu outou i te taua no outou i te taoˈa haavare nei, e ia tuua-ê-hia outou ra, ia fariihia outou e ratou i roto i te fare tahuti ore ra.”—Luka 16:9.
22 A tapao na e te parau ra Iesu no nia i te ereraahia i te mau taoˈa haavare ra. Oia mau, ia tae i te hoê mahana e riro te moni o teie nei amuiraa i te faufaa ore. “E faarue ratou i ta ratou ario i roto i te aroâ, e riro hoi ta ratou auro mai te mea viivii ra,” o ta Ezekiela ra ïa i tohu. “E ore hoi ratou e ora i te ario e te auro, i te mahana e riri ai Iehova ra.” (Ezekiela 7:19) A tiai noa ˈtu ai tatou i teie mau mea ia tupu, e tia ia tatou ia faaohipa i te paari e te ite i te pae no ta tatou huru faaohiparaa i ta tatou mau taoˈa materia. No reira, eita ïa tatou e hiˈo i muri ma te tatarahapa, i te mea e aita tatou i haapao i te faaararaa a Iesu: “E teie nei, aore outou i haapao i te taoˈa haavare ra, na vai e tuu atu ia outou i te taoˈa mau? . . . O outou nei hoi e ore e tia ia faaroo i te Atua e te Mamona.”—Luka 16:11-13.
23. Eaha ta tatou e faaohipa ma te paari, e eaha ta tatou haamaitairaa?
23 Ia haapao na tatou paatoa i teie nei mau faahaamanaˈoraa no te tuu i te haamoriraa a Iehova i nia i te parahiraa matamua i roto i to tatou oraraa e ia faaohipa maitai na tatou i ta tatou mau taoˈa atoa ma te paari. Ia na reira tatou, e tapea ïa tatou i to tatou auhoaraa e o Iehova raua o Iesu, tei tǎpǔ mai e ia ore te moni, na raua tatou e farii i roto i “te fare tahuti ore ra,” ma te tiaturi i te ora mure ore i roto i te Basileia i nia i te raˈi aore ra i roto i te paradaiso i nia i te fenua nei.—Luka 16:9.
[Nota i raro i te api]
a No roto mai te parau hebera i hurihia na roto i te parau ra “ô” i te hoê ihoparau haa oia hoi te auraa “ia teitei; ia faahanahanahia; tuu i nia.”
b A hiˈo i te buka ra Jehovah’s Witnesses—Proclaimers of God’s Kingdom, api 307-15, i neneihia i te matahiti 1993 ra na te Watchtower Bible and Tract Society of New York, Inc.
Te haamanaˈo ra anei outou?
◻ Mea nafea to Iseraela pahonoraa i te titauraa a Iehova no te tauturu i roto i te paturaa i te sekene?
◻ No te aha te ô a te vahine ivi i ore ai i faufaa ore?
◻ Eaha te hopoia a te mau kerisetiano i te pae no te faaohiparaa ratou i ta ratou mau faufaa?
◻ Nafea tatou e nehenehe ai e ore e tatarahapa no ta tatou huru faaohiparaa i te moni?
[Hohoˈa i te api 15]
Noa ˈtu te haihai o te ô a te vahine ivi, aita te reira i faufaa ore
[Hohoˈa i te api 16, 17]
Te turu ra ta tatou mau ô i te ohipa pororaa i te Basileia i roto i te ao taatoa nei