Afea te Faatereraa arii a te Atua e faatere ai i te fenua?

EAHA ÏA TE MAU MEA E TUPU?

Ua parau Iesu: “E aro te tahi nunaa i te tahi atu nunaa e te tahi faatereraa i te tahi atu faatereraa. E tupu te aueueraa fenua rahi, e i tera e tera vahi te oˈe e te maˈi pee.” (Luka 21:10, 11) E riro te patiri e te uira ei tapao papu e ua fatata te ûa i te topa. Hoê â huru, e riro teie mau tupuraa atoa o te tupu i te hoê â taime ei tapao papu e ‘ua fatata te Faatereraa arii a te Atua.’ Ua tupu anei te reira i te hoê â taime e na te ao atoa nei? A hiˈo i te haapapuraa.

1. TE MAU TAMAˈI

I 1914 te paainaraa te tamaˈi tei ore i itehia aˈenei! E pinepine te feia tuatapapa i te parau e i tera matahiti te ao i te taui-roa-raa, i te Tamaˈi rahi matamua. I reira te faaohipa-rahi-raahia te mau pereoo pâ auri, paura faaruehia e te manureva, te mau pupuhi, te mau mâhu taero e te tahi atu mau mauhaa no te haapohe roa i te taata. Aratai atura te reira i te Piti o te tamaˈi rahi i reira te iteraahia te mau mauhaa atomi. Mai te matahiti 1914, ua aro noa te taata i roto i te mau tamaˈi i tera e tera vahi e e mirioni taata tei pohe.

2. TE MAU AUEUERAA FENUA

Ia au i te Britannica Academic, i te mau matahiti atoa, e itehia fatata 100 aueueraa fenua puai. E ia au i te tahi pu (United States Geological Survey), ia hiˈopoahia te mau titorotororaa mai te matahiti 1900 mai, fatata 16 aueueraa fenua puai mau te tiaihia i te matahiti atoa. No vetahi, auaˈe te mau matini apî e itehia ˈi te rahiraa o te mau aueueraa fenua. Tera râ, te rahi noa ˈtura te taata e mauiui nei e e pohe nei na te ao no te mau aueueraa fenua puai mau.

3. TE MAU OˈE

E pinepine e itehia te oˈe no te tamaˈi, te ohipa taviri, te fifi peapea mau i te pae moni, te tiaauraa hape o te mau ohipa faaapu aore ra te oreraa e faanaho i te ohipa ia au i te anuvera. Ia au i te hoê faanahonahoraa no nia i te opereraa maa i 2018: “Na te ao, e 821 mirioni taata aita e navai ra te maa, 124 mirioni râ o ratou te pohe nei i te poia.” Fatata e 3,1 mirioni tamarii te pohe nei i te mau matahiti atoa no te tano-ore-raa o te maa. I 2011, fatata ïa te afaraa o te mau tamarii o te pohe nei na te ao.

4. TE MAU MAˈI PEE

Te na ô nei te hoê papai a te Faanahonahoraa no te ea na te ao: “Ua itehia te maˈi pee peapea mau i te mau matahiti 2000. Ua fa faahou mai te mau maˈi tahito mai te choléra, te peste e te fiva rearea. E ua faura mai te mau maˈi apî taaihia i te mau fifi ia huti i te aho mai te SRAS e te MERS, te fiva Paniora, te Ébola e te Zika.” O te COVID-19 te hopea ta tatou i faaruru. Noa ˈtu mea rahi ta te aivanaa e te taote i ite mai no nia i te maˈi, aita i tia ia ratou ia faaore i tera mau maˈi atoa.

5. TE HOÊ OHIPA PORORAA NA TE AO

Ua faataa Iesu i te tahi atu tuhaa o te tapao a tohu ai: “E porohia te parau apî oaoa o te Faatereraa arii e ati aˈe te fenua ia ite te mau nunaa atoa, i reira ïa te hopea e tae mai ai.” (Mataio 24:14) A faaruru ai te ao i te mau fifi peapea mau, ua hau atu i te vaˈu mirioni taata no te mau nunaa atoa te faaite haere nei i te parau apî oaoa o te Faatereraa arii a te Atua. Te na reira nei ratou i e 240 fenua e na roto hau atu 1 000 reo. A tahi ra e itehia ˈi te reira!

EAHA TE AURAA O TE TAPAO NO TATOU?

Te tupu nei te mau tuhaa o te tapao ta Iesu i horoa. No te aha e anaanatae ai i te reira? No te mea ua parau Iesu: “Ia ite outou i teie mau mea ia tupu, ua fatata ïa te Faatereraa arii a te Atua.”—Luka 21:31.

Ia au i te tapao ta Iesu i horoa e te tuatapaparaa tau Bibilia, e taahia e ua haamau te Atua i ta ˈna Faatereraa arii i te raˈi i 1914.a I tera taime o ˈna i te haamauraa i ta ˈna Tamaiti o Iesu Mesia ei Arii. (Salamo 2:2, 4, 6-9) Fatata te Faatereraa arii a te Atua i te faatere i te fenua. E haamou te reira i te mau faatereraa atoa e e faariro i te fenua ei paradaiso ia ora te taata i reira e a muri noa ˈtu.

Fatata roa ta Iesu mau parau i roto i te Pure a te Fatu i te tupu: “Ia tae mai ta oe Faatereraa arii. Ia tupu to oe hinaaro i te fenua nei, mai i te raˈi atoa na.” (Mataio 6:10) Tera râ, eaha ta te Faatereraa arii e rave nei mai te matahiti 1914? E eaha ta tatou e nehenehe e tiai ru a faatere ai te Faatereraa arii i te fenua?