O vai ta Iehova e mauruuru?

“E rave faaoti hua i to outou ora (...); o te Atua tei ohipa i roto ia outou i te hinaaro e te rave i te maitai ta ˈna iho e hinaaro ra.” — PHILIPI 2:12, 13.

1, 2. I tei hea taime to te Atua parauraa mai ia Iesu e te farii ra oia ia ˈna aore ra ua mauruuru roa oia ia ˈna, e no te aha te reira e tia ˈi ia huti i to tatou manaˈo?

E FAATUPU teie ohipa i te hoê tauiraa i roto i te Tuatapaparaa. Te poro ra o Ioane Bapetizo i te poroi a te Atua e te bapetizo ra i roto i te pape te feia i tatarahapa, a haere mai ai te hoê taata, ta ˈna i ite e e taata tia, ia ˈna ra; o Iesu hoi taua taata ra. Noa ˈtu e aita oia i rave i te hoê noa ˈˈe hara te tia hoi ia ˈna ia tatarahapa, ua ani atura Iesu e ia bapetizohia oia ‘no te faatia i te mau parau tia atoa e au ai’. — Mataio 3:1-15.

² Ma te haehaa, ua farii aˈera o Ioane i taua aniraa ra e, i muri aˈe i to Iesu haereraa mai i nia mai raro mai i te pape, “vetea aˈera te raˈi ia ˈna, hiˈo aˈera oia i te [v]arua o te Atua i te pouraa mai mai te uupa ra”. Te vahi faahiahia roa ˈtu â, “o te reo maira no te raˈi mai i te na ôraa mai e, Ta ˈu Tamaiti here teie, ua mauruuru roa vau ia ˈna.” (Mataio 3:16, 17; Mareko 1:11). Auê ïa faahitiraa parau putapû mau e! Mea hinaaro hoi na tatou paatoa ia auhia mai tatou e te taata ta tatou e faatura ra (Ohipa 6:3-6; 16:1, 2; Philipi 2:19-22; Mataio 25:21). A feruri na e nafea râ outou ia parau mai te Atua Puai-Hope ia outou e: ‘Ua mauruuru roa vau ia oe’!

3. Eaha te mau uiraa te nehenehe e uihia no nia i te fariiraa a te Atua?

³ E nehenehe anei te Atua e mauruuru ia tatou i teie mahana? E rave anaˈe na i te hiˈoraa o te hoê taata ‘aore e tiaturiraa, e aore hoi e Atua i te ao nei, e ua taa ê i te ora a te Atua’. (Ephesia 2:12; 4:18.) E nehenehe anei oia e matara mai mai roto mai i taua huru tupuraa ra e e oaoa ˈtu ai no te mea ua mauruuru roa Iehova ia ˈna? Mai te peu e e, nafea ïa? E tuatapapa anaˈe na i taua mau uiraa ra.

Eaha ta te Atua e hinaaro ra e parau?

4. a) Eaha te auraa o te parau heleni ra i hurihia na roto i te parau ra “mauruuru aore ra fariihia” i roto i te faahitiraa parau a te Atua? b) No te aha te faaohiparaahia taua parau ra i taua taime ra e rave ai i te hoê auraa taa ê?

⁴ No te faahiti i te mau parau a te Atua: “Ua mauruuru roa vau ia [Iesu]”, te faaohipa ra te mau Evanelia i te iho parau haa heleni ra eudokéô (Mataio 3:17; Mareko 1:11; Luka 3:22). Teie hoi te auraa o teie iho parau haa “oaoa roa, farii, anaanatae i”, e te parau no roto mai i teie iho parau haa ra “auhia ïa, anaanataehia, fariihia, hinaarohia”. Aita noa te parau ra eudokéô e faataa ra i te parau no nia i te farii maitai o te Atua. No reira, te mau kerisetiano no Makedonia i “oaoa ˈi” i te opere i ta ratou mau taoˈa na te tahi pae (Roma 10:1; 15:26; Korinetia 2, 5:8; Tesalonia 1, 2:8; 3:1). Teie râ, i roto i teie huru tupuraa, na te Atua i farii ia Iesu, e ere râ na te taata. Ua faaohipahia teie parau no nia ia Iesu i muri aˈe noa i to ˈna bapetizoraahia (Mataio 17:5; Petero 2, 1:17). I roto i te Luka 2:52, e faaohipahia ïa te hoê parau ê atu (kharis) ia parau-anaˈe-hia e, i to ˈna apîraa, hou oia e bapetizohia ˈi, mea “herehia” Iesu e te Atua e te taata atoa.

5. a) Na te aha e haapapu ra e e nehenehe te mau taata tia ore e fariihia e te Atua? b) O vai ma “te feia i ite-au-hia” ra?

⁵ E nehenehe atoa anei te mau taata tia ore mai ia tatou nei e fariihia e te Atua? E, auaa pai no tatou. I to Iesu fanauraahia mai, ua na ô aˈera te mau melahi e: “Ia haamaitaihia te Atua i nia i te raˈi teitei, ei hau to teie nei ao, e ia ite auhia mai te taata nei [eudokias]!” (Luka 2:14). Ia au i te papai heleni, te faaite ra ïa te mau melahi na roto i ta ratou himene i te hoê haamaitairaa e tupu a muri aˈe no “te mau taata e manaˈo maitai to te [Atua] ia ratou” aore ra “te mau taata ta te Atua e farii”a. Te papai ra te orometua ra o Hans Bietenhard no nia i te faaohiparaa i te parau ra en anthrôpoïs eudokias e: “Te faahiti ra taua faanahoraa parau nei i te parau no te mau taata e auhia e te Atua (...). Aita ˈtura ïa e faahitihia ra i ǒ nei i te parau no te hinaaro mau o te taata (...). Te parauhia ra râ no nia i te hinaaro teitei mau e te hamani maitai o te Atua, hinaaro e maiti i te hoê nunaa no te faaora ˈtu ia ˈna.” No reira, mai ta te mau Ite o Iehova e faataa ra a hia ˈtura maororaa i teie nei, te faaite ra te Luka 2:14 e mea na roto i te pûpûraa ratou ia ratou iho no te Atua e na roto i te bapetizoraa ia ratou, e nehenehe ai te mau taata tia ore e riro mai ei mau taata auhia, ei mau taata fariihia aore ra ta te Atua e mauruurub!

6. Eaha ˈtu â te tia ia tatou ia haapii no nia i te fariiraa a te Atua?

⁶ Peneiaˈe te ite ra outou i te taa-ê-raa taatoa e vai ra i rotopu i te riroraa ei ‘enemi a te Atua no te mea ua huri tatou i to tatou feruriraa i nia i te mau ohipa ino’, e ia fariihia ei hoa ohipa no te Atua parau-tia e te paari (Kolosa 1:21; Salamo 15:1-5). Teie râ, a oaoa noa ˈi outou i te faarooraa e e nehenehe te taata e fariihia e te Atua, peneiaˈe te hinaaro ra outou e ite e eaha ta te reira e titau maira ia outou. No nia i teie tumu parau, e nehenehe tatou e haapii rahi mai i nia i te mau ohipa i ravehia e te Atua i mutaa ihora.

Ua farii oia i te feia e ere i te ati Iseraela

7. Eaha te faaiteraa ta Exodo 12:38 e horoa maira no nia i te huru o te Atua?

⁷ Tau senekele hou te Luka 2:14 i papaihia ˈi, ua farii popou aˈera Iehova i te mau taata tei haere mai e haamori ia ˈna. Parau mau, o te nunaa Iseraela anaˈe ta ˈna e faaau atu i te ohipa, nunaa tei pûpû ia ˈna no ˈna (Exodo 19:5-8; 31:16, 17). Ia haamanaˈo na râ tatou e a faaorahia ˈi o Iseraela i te faatîtîraa a to Aiphiti, e “taata ěê atoa e rave rahi i te anoi-atoa-raa i to ratou haerea”. (Exodo 12:38.) Eita e ore e atuatu na te mau taata e ere i te ati Iseraela i te tahi mau auraa e te nunaa o te Atua e ua ite atoa ratou i te mau ati i tairi ia Aiphiti. Ua maiti atura ïa ratou i teie nei e haere na muri i to Iseraela. Eita e ore e ua farii vetahi pae i te haapaoraa ati iuda.

8. Eaha na pǔpǔ e piti o te mau taata ěê e faaea na i Iseraela, e no te aha e ere hoê â mau auraa to te mau ati Iseraela i nia i te tahi e te tahi?

⁸ Te faataa ra te faufaa o te Ture i te tiaraa o te feia e ere i te ati Iseraela i mua i te Atua e i mua i to ˈna nunaa. E ora noa na vetahi mau taata ěê i Iseraela. E tia ia ratou ia auraro i te mau ture tumu o te fenua, mai te mau ture no nia i te taparahiraa taata e no nia i te sabati (Nehemia 13:16-21). Ma te ore roa ˈtu hoi e faariro i taua mau taata ěê ra ei mau taeae no ratou, e haapao maitai te hoê ati Iseraela ia parau atu oia ia ratou aore ra ia faaau atu oia i te tahi ohipa e o ratou, no te mea aitâ ratou i fariihia ˈtura i roto i te nunaa o te Atua. Ei hiˈoraa, eita te hoê ati Iseraela e nehenehe e hoo mai e e amu i te hoê animala pohe, tei ore hoi i faatahehia te toto, area te mau taata ěê ra, tei ore i farii i te haapaoraa ati iuda, e nehenehe ïa ta ratou e na reira (Deuteronomi 14:21; Ezekiela 4:14). I roto i te roaraa o te tau, e nehenehe atura ïa taua mau taata ěê ra e pee i te haerea o te tahi atu mau taata ěê tei farii i te haapaoraa ati iuda e oia hoi tei peritomehia. I reira noa ïa ratou e faarirohia ˈi ei taeae i roto i te haamoriraa mau e e tia ˈi ia faatura i te Ture i roto i to ˈna taatoaraa (Levitiko 16:29; 17:10; 19:33, 34; 24:22). Tei roto atoa o Ruta, te ati Moabi ra, e o Naamana, te ati Suria tei roohia i te lepera, i te mau taata e ere i te ati Iseraela tei fariihia e te Atua. — Mataio 1:5; Luka 4:27.

9. Mea nafea to Solomona haapapuraa mai e ua ineine te Atua i te farii i te mau taata ěê?

⁹ I te tau o te arii ra o Solomona, ua ite-maitai-atoa-hia e ua ineine te Atua i te farii i te feia e ere i te ati Iseraela. Ia ˈna i avari i te hiero, ua pure aˈera hoi Solomona i te na ôraa e: “I te taata ê ra, e ere i to Iseraela i to oe nei mau taata, mai te fenua roa maira no to oe nei iˈoa i tae mai ai (...) ia haere maira oia e ua pure tia mai i teie nei fare, e faaroo mai oe i reira i nia i te raˈi, (...) ia faaroo i to te ao atoa nei i to oe ra iˈoa, e ia mǎtaˈu ia oe, mai to mau taata atoa i Iseraela nei.” (Mau arii 1, 8:41-43). Oia mau, te faaroo ra Iehova i te mau pure a te feia ěê ra e imi mau ra ia ˈna. O ratou atoa, e riro paha ratou i te haapii i ta ˈna mau ture, i te auraro atu i te peritomeraa e i te riro mai ei feia fariihia no to ˈna nunaa haamaitaihia.

10. Eaha te huru o te mau ati Iuda i nia i te eunuka no Etiopia, e mea nafea, te otiraa oia i te peritomehia, i te haamaitairaa mai i taua taata ra?

¹⁰ E na reira hoi te hoê taata, tau senekele i muri aˈe: te taata mana no Kaneda, arii vahine no te fenua atea ra no Etiopia. A faaroo atu ai oia no te taime matamua, i te parau no nia i te mau ati Iuda e ta ratou haamoriraa, mea papu maitai e aita to ˈna huru oraraa e ta ˈna mau peu faaroo i nehenehe e fariihia e Iehova. Eita e ore ua tia i te mau ati Iuda ia faaoromai ia ˈna a haapii noa ˈi taua taata ěê ra i rotopu ia ratou i te Ture, ia nehenehe oia e ite e eaha ta te Atua e titau maira ia ˈna. Ma te papu maitai, ua haere oia i mua e ua rave aˈera i te mau tauiraa e au i roto i to ˈna oraraa, ia nehenehe oia ia peritomehia. I roto i te Ohipa 8:27, e taio tatou e ua “haere maira oia i Ierusalema e haamori i te Atua”. (Exodo 12:48, 49.) Mai ta teie ohipa i tupu e haapapu maira, ma to ˈna tiaraa taata ěê, ua farii mau atura oia i te haapaoraa ati iuda. E nehenehe atura hoi ta ˈna e farii i te Mesia e riro atu ai ei pǐpǐ bapetizohia na ˈna, ma te faaau ia ˈna i te hinaaro o te Atua i faaite-riirii-hia mai.

Te feia faaroo ore e te amuiraa kerisetiano

11, 12. a) Eaha ˈtu â te tahi tauiraa i tupu i roto i te oraraa o te taata Etiopia ra a bapetizohia ˈi oia? b) E tuati maitai taua tauiraa ra i tei papaihia i roto i te Philipi 2:12, 13, i roto i tei hea auraa?

¹¹ Teie ta Iesu i faaue atu i ta ˈna mau pǐpǐ: “E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti e no te [varua moˈa], ma te haapii atu ia ratou i te haapao i te mau mea atoa ta ˈu i parau atu ia outou na.” (Mataio 28:19, 20). Ua ite taua taata ěê etiopia ra ta tatou i faahiti aˈenei, o vai mau na o Iehova e ua ite atoa oia eaha mau na te varua moˈa. No reira, a tauturu atu ai o Philipa ia ˈna ia ite e o vai mau na o Iesu e ia farii e o ˈna te Tamaiti mesia a te Atua, ua nehenehe aˈera taua taata Etiopia ra e bapetizohia. E riro maira ïa oia ei melo fariihia no te nunaa a Iehova, ei pǐpǐ na te Mesia. Papu maitai, e tia ˈtu oia i mua i te Atua no ˈna iho inaha: e tia ia ˈna ‘ia haapao i te mau mea atoa i faauehia’ i te mau kerisetiano. E apeehia râ taua hopoia ra i te hoê tiaturiraa faahiahia mau: te ora!

¹² I muri iho, ua papai atura o Paulo i te taatoaraa o te mau kerisetiano ia ‘rave faaoti hua i to ratou ora ma te mǎtaˈu e te rurutaina’. E nehenehe iho â e na reirahia, “no te mea o te Atua [no to ˈna hinaaro maitai] [eudokias] i roto ia outou i te hinaaro e te rave mai ta ˈna iho e hinaaro ra”. — Philipi 2:12, 13.

13. Eaha ihora ïa te huru o te mau kerisetiano i nia i te feia tei ore i ineine i te bapetizo oioi ia ratou mai te eunuka etiopia ra?

¹³ Aita te taatoaraa o te feia i faaô atu ia ratou i roto i te mau kerisetiano mau i ineine mai te taata Etiopia ra i te haere oioi i mua e tae roa ˈtu ai i te bapetizoraa. Vetahi pae, e ere hoi i te ati Iuda, e aita atoa i farii i te haapaoraa ati Iuda, aita ratou i ite noa ˈˈe o vai mau na o Iehova e eaha to ˈna mau haerea; aita ta ratou mau peu i tuati noa ˈˈe i ta ˈna mau ture no nia i te parau-tia. Nafea ïa te mau kerisetiano ia faariro ia ratou? E tia ia ratou ia pee i te hiˈoraa o Iesu. Aita oia i faaitoito noa ˈˈe e aita atoa hoi i faariro noa ˈˈe i te hara ei ohipa maitai (Ioane 5:14). Ua faaite râ oia i to ˈna hamani maitai i te feia hara tei pee mai ia ˈna e o tei hinaaro e faaau i to ratou mau haerea i nia i to te Atua. — Luka 15:1-7.

14, 15. Taa ê atu i te mau kerisetiano faatavaihia, eaha te mau pǔpǔ taata e amuimui na i roto i te mau putuputuraa e tupu na i Korinetia, e e riro te mau vahi apî i noaa mai ia ratou i te pae varua, i te taa ê i roto i tei hea tuhaa?

¹⁴ Te faaite papu maitai maira te mau faahitiraa parau a Paulo no nia i te mau putuputuraa i faanahohia i Korinetia e ua farii maitai te mau kerisetiano i te feia e haamata ra i te noaa mai ia ratou i te ite no nia i te Atua. Ma te faahiti i te parau no nia i te faaohiparaa o te mau ǒ semeio o te varua e haapapu ra e te haamaitai maira te Atua i te kerisetianoraa matamua, te parau ra o Paulo i “te feia i faaroo” e “te feia faaroo ore ra”. (Korinetia 1, 14:22.) “Te feia i faaroo” ra o te feia ïa i farii i te Mesia e o tei bapetizohia (Ohipa 8:13; 16:31-34). “E rave rahi atoa to Korinetia i ite e ua faaroo, e bapetizohia ihora.” — Ohipa 18:8.

¹⁵ Ia au i te Korinetia 1, 14:24, te amuimui atoa ra ‘te mau taata faaroo ore aore ra te mau taata ite ore ra’ i roto i te mau putuputuraa e faatupuhia na i Korinetia e ua farii-maitai-hia hoi ratou i reirac. Parau mau, e ere hoê â mau vahi apî i noaa mai i te taatoaraa i roto i te haapiiraa e te faaohiparaa i te Parau a te Atua. Peneiaˈe te hapa noa râ vetahi pae. Area vetahi pae ra, ua roaa ïa ia ratou i te tahi faito faaroo, ua rave ê na i te tahi mau tauiraa i roto i to ratou oraraa, e hou aˈe ratou e bapetizohia ˈi, ua faaite atu ratou ia vetahi ê i te mau mea ta ratou i haapii mai.

16. Eaha te mau haamaitairaa ta taua mau taata ra e nehenehe e huti mai i te amuimuiraa ˈtu ratou e taua mau kerisetiano ra i roto i te mau putuputuraa a te amuiraa?

¹⁶ Parau mau, aita hoê noa ˈˈe o taua feia tei ore i bapetizohia ra e ora ra “i roto i te Fatu”. (Korinetia 1, 7:39.) Mai te peu e i mutaa ihora, ua faatupu ratou i te tahi mau huru ino mau i te pae morare e i te pae varua, te taa maitai ra ïa tatou e ei taime iho â no te faaau atu ia ratou i nia te mau ture a te Atua. I roto i taua area tau ra, a ore noa ˈi ratou e tamata i te hauti i nia i te huru viivii ore o te amuiraa e i te faatahuri i te faaroo o to ˈna mau melo, mea farii-maitai-hia ratou. E nehenehe te mau mea ta ratou e ite e e faaroo i te mau putuputuraa, e ‘aˈo ia ratou’, no te mea ‘e itehia hoi te parau aro i roto i to ratou aau’. — Korinetia 1, 14:23-25; Korinetia 2, 6:14.

Fariihia e te Atua no te ora

17. Mea nafea te faahitiraa parau a Luka 2:14 i te riroraa mai ei parau mau i te senekele 1?

¹⁷ Maoti te pororaa i te vahi taata a te mau kerisetiano bapetizohia, e rave rahi tausani taata tei faaroo i te parau apî maitai i te senekele 1. Ua tiaturi ratou i te mau mea ta ratou i faaroo, ua tatarahapa i to ratou haerea tahito ra e ua bapetizohia ratou, ma te “faahiti i te parau e ia roaa ˈtu te ora”. (Roma 10:10-15; Ohipa 2:41-44; 5:14; Kolosa 1:23.) Te feia i bapetizohia i taua tau ra, mea papu maitai e ua fariihia ratou e Iehova, inaha ua faatavai oia ia ratou i te varua moˈa, ma te farii atura hoi ia ratou ei mau tamarii i te pae varua ra. Teie hoi ta te aposetolo Paulo i papai: “E ua haapao atea noa ia tatou, ia riro ei tamarii tavai na ˈna iho, ia Iesu Mesia ra, i te haapaoraa i te hamani maitai [eudokian] o to ˈna ihora aau.” (Ephesia 1:5). No reira, i te senekele 1, ua haamata aˈera ïa te parau tohu a te mau melahi no nia i te fanauraa o Iesu, i te riro ei parau mau: “Ei hau to teie nei ao, ei ia ite-au-hia mai te taata nei [aore ra te mau taata ta te Atua e farii]! — Luka 2:14.

18. No te aha te mau kerisetiano faatavaihia e ore ai e tia ia manaˈo e ua farii-roa-hia ratou e te Atua?

¹⁸ No te atuatu i taua hau ra, e tia ˈtura i taua “mau taata i ite-au-hia mai” ‘ia rave faaoti hua i to ratou ora ma te mǎtaˈu e te rurutaina’. (Philipi 2:12.) E ere hoi te reira i te mea ohie, no te mea e feia hara noâ ratou. E tia ia ratou ia patoi i te mau faahemaraa e te mau huru e faaitoito ia ratou ia rave i te ino. Ia rave ratou i te hara, e erehia ïa ratou i te haamaitairaa a te Atua. Ma te here, ua nomino aˈera Iehova i te mau tiai mamoe i te pae varua, no te tauturu e no te paruru i te mau amuiraa. — Petero 1, 5:2, 3.

19, 20. Eaha te mau faanahoraa i ravehia e te Atua ia nehenehe te mau kerisetiano bapetizohia, ia tamau â i te fariihia ei tavini na ˈna?

¹⁹ E tia i te mau matahiapo o te mau amuiraa ia haapao i teie nei aˈoraa a Paulo e na ô ra e: “Ia roohia-noa-hia te hoê taata i te hapa ra, e faaora outou o tei haapao i ta te [varua] ra i te reira ma te aau mǎrû, ma te manaˈo ia oe iho, o te roohia-atoa-hia oe e te ati.” (Galatia 6:1). Te taa papu maitai ra ïa tatou e i muri aˈe i to ˈna raveraa i te opuaraa faufaa roa e bapetizo ia ˈna, te farii ra ïa taua taata ra i te hoê hopoia rahi roa ˈtu â, mai te taata ěê o tei riro mai i muri iho ei taata o tei farii i te haapaoraa ati Iuda e tei peritomehia, i Iseraela. Teie râ, mai te peu e e hara te hoê kerisetiano tei bapetizohia, e nehenehe e noaa ˈtu ia ˈna i te hoê tauturu here mau i roto i te amuiraa.

²⁰ I roto i te amuiraa, e nehenehe te mau matahiapo e pûpû i ta ratou tauturu i te taata e rave noa ˈtu i te hoê hara ino mau. Teie ta Iuda i papai: “E aroha ˈtu i te tahi pae, ei haapaoraa ê ïa; e e faaora ˈtu hoi i te tahi pae ma te mǎtaˈu, i te haruraa ia ratou no roto i te auahi; i te atâtaraa ˈtu i te ahu i poraorao i te iino ra.” (Iuda 22, 23). E nehenehe te hoê melo bapetizohia o te amuiraa, e noaa ia ˈna i teie huru tauturu, e tamau noa i te haamaitaihia mai e Iehova, e e tamau â i te fanaˈo i te hau ta te mau melahi i faahiti no nia i te fanauraa o Iesu.

21, 22. Ia ore te hoê taata e hinaaro e tatarahapa, eaha te tia ia ravehia no ˈna, e eaha te tia i te mau melo haapao maitai o te amuiraa ia rave?

²¹ Noa ˈtu â ïa e mea varavara roa, e nehenehe te taata hara e ore tatarahapa. E tia ˈtura ïa i te mau matahiapo ia tiavaru ia ˈna mai roto atu i te amuiraa, ia ore oia ia viivii noa ˈˈe. O te ohipa ïa i tupu i Korinetia a ore ai te hoê kerisetiano bapetizohia i hinaaro e faaore roa i to ˈna mau taatiraa viivii i te pae tino. Teie te aˈoraa ta Paulo i horoa ˈtu i te mau melo o te amuiraa: “[Eiaha] outou e amui atu i te taiata. Eiaha râ te mau taiata atoa, e te nounou taoˈa, e te haru, e te haamori idolo o teie nei ao ra; ahiri hoi te reira ra, e faarue mai outou i teie nei ao e tia ˈi. Te papai nei râ vau ia outou, e eiaha outou e amui atu i te taata i parauhia e taeae ia riro ei taiata, e te nounou taoˈa, e te haamori idolo, e te faaino, e te taero ava, e te haru: e eiaha atoa e amu noa ˈtu i te maa i reira.” — Korinetia 1, 5:9-11.

²² I te mea hoi e ua rave taua taata no Korinetia ra i te hoê taahiraa avae faufaa roa ma te bapetizo ia ˈna, a riro atu ai ei taata fariihia e te Atua e ei melo no te amuiraa, mea faufaa roa ˈtura ïa to ˈna tiavaruraa. Ua haapapu mai o Paulo e eiaha roa ˈtu te mau kerisetiano e tamau â i te amuimui atu e taua taata ra, no te mea ua faarue oia i to ˈna tiaraa tavini fariihia e te Atua (hiˈo Ioane 2, 10, 11). Teie ta Petero i papai no nia i taua mau huru kerisetiano ra i tiavaruhia mai roto atu i te amuiraa: “E huru maitai aˈe ratou ahiri eiaha roa ia ite i te parau-tia ra, eiaha ia ite ra a fariu ê atu ai i te parau moˈa i tuuhia ˈtu ia ratou ra. Ua tupu iho nei râ ia ratou te maa parau mau ra e, Ua hoˈi te urî i to ˈna iho ruai.” — Petero 2, 2:21, 22.

23. I te senekele 1, eaha te huru o te rahiraa o te mau kerisetiano i mua i te aro o te Atua?

²³ Ma te papu maitai, eita ta Iehova e nehenehe e farii faahou i teie mau huru taata, inaha ua tiavaruhia ratou, no te mea ua patoi ratou i te fariu i to ratou haerea ino (Hebera 10:38; hiˈo Korinetia 1, 10:5). Mai te huru ra ïa e mea iti roa te numera o te mau melo o te amuiraa i tiavaruhia. Ua tapea noa te rahiraa o te feia i noaa ia ratou i te “aroha mau e te hau no ǒ mai i te Atua” e tei fariihia ‘ei tamarii tavai i te haapaoraa i te hamani maitai o to ˈna ihora aau’ i to ratou haapao maitai. — Ephesia 1:2, 5, 8-10.

24. Eaha te mau uiraa te tia ia tatou i teie nei ia tuatapapa?

²⁴ I te paeau rahi, mai te reira atoa i to tatou nei tau. E tuatapapa anaˈe na râ nafea tatou e nehenehe ai i teie mahana e tauturu i ‘te feia faaroo ore ra aore ra te taata ite ore ra’ ia fariihia ratou e te Atua e ta tatou e nehenehe e rave no ratou ia atea ê ratou i te eˈa mau ra. O ta te tumu parau ïa i mua nei e tuatapapa.

[Nota i raro i te api]

Te haamanaˈo ra anei outou?

◻ Ia au i te mau Papai, mai tei hea mai taime e mea nafea te mau taata e nehenehe ai e fariihia e te Atua?

◻ Eaha to te Atua huru i nia i te mau taata ěê e faaea na i rotopu i to ˈna nunaa, e no te aha râ te mau ati Iseraela e tia ˈi ia haapao maitai e ia faaoromai ia ratou?

◻ Eaha ta tatou e nehenehe e parau i te mea e e amuimui na te “feia faaroo ore ra” i roto i te mau putuputuraa kerisetiano e tupu na i Korinetia?

◻ Eaha te mau faanahoraa ta te Atua i rave no te tauturu i te mau kerisetiano bapetizohia ia riro noa ei mau tavini fariihia na ˈna?