Iesu, to ˈna oraraa e ta ˈna taviniraa

Te maiti ra Iesu i ta ˈna mau aposetolo

UA MATAHITI e te afa atura to Ioane Bapetizo faaiteraa mai ia Iesu mai te Arenio a te Atua e to Iesu atoa haamataraa i ta ˈna taviniraa i te vahi taata. Mai reira mai, ua riro maira o Anederea, o Simona Petero, o Ioane e peneiaˈe atoa paha o Iakobo (te taeae o Ioane), e tae noa ˈtu ia Philipa e o Nataniela (tei pii-atoa-hia o Baretolomea), ei mau pǐpǐ matamua na ˈna. I muri aˈe, e rave rahi atu â tei apiti mai ia ratou no te pee atu i te Mesia.

I teie nei, ua ineine o Iesu no te maiti i ta ˈna mau aposetolo. E tahoê maite atu ratou ia ˈna i roto i ta ˈna ohipa e e horoahia ˈtu na ratou i te tahi haapiiraa taa ê. Hou râ oia e maiti ai ia ratou, e haere o Iesu i nia i te mouˈa e e pure atu ai i te po taatoa, ma te ani atu paha i te Atua i te paari e to ˈna farii maitai. I te poipoi aˈe, e titau oia i ta ˈna mau pǐpǐ atoa e e maiti oia hoê ahuru e ma piti. Teie râ, i te mea e e feia haapii noâ ratou na Iesu, e tamau noa ïa te mau Papai i te parau ia ratou ei mau pǐpǐ.

Ua maiti o Iesu i na pǐpǐ e ono i faahitihia i nia ˈtu tei riro mai hoi ei mau pǐpǐ matamua na ˈna. E rave atoa oia ia Mataio, ta ˈna i haere e tii i te piha ohipa haapao tute. Na taata e pae e toe ra ta ˈna i maiti o Iuda ïa (tei piihia o Tadaio), o Iuda Isakariota, o Simona Kanaana, o Toma e o Iakobo, te tamaiti a Alephaia. E pii-atoa-hia taua Iakobo nei, o Iakobo iti, peneiaˈe paha no te faataa ê ia ˈna i te tahi atu aposetolo hoê â to raua iˈoa.

Mea maoro i teie nei to taua na taata hoê ahuru e ma piti ra apeeraa ˈtu ia Iesu, e ua matau maitai Iesu ia ratou. Inaha hoi, e mau fetii vetahi pae no Iesu. Eita paha e ore e mau taetaeae fetii o Iakobo e to ˈna taeae o Ioane no Iesu. Mea papu e e taeae o Alephaia no Iosepha, te metua tane faaamu o Iesu. No reira, e tuaane fetii atoa ïa te aposetolo Iakobo, e tamaiti hoi oia na Alephaia, no Iesu.

Oia mau, mea ohie roa ïa na Iesu ia haamanaˈo i te mau iˈoa o ta ˈna mau aposetolo. E o outou, te haamanaˈo ra anei outou i taua mau iˈoa nei? A haamanaˈo noa na e e piti Simona, e piti Iakobo e e piti Iuda, e taeae to Simona o Anederea te iˈoa, e e taeae atoa to Iakobo o Ioane te iˈoa. No reira, e nehenehe ïa ta outou e haamanaˈo i te iˈoa o e vau mau aposetolo. I roto i na aposetolo e maha e toe ra, te vai te hoê kelero (o Mataio), te hoê aposetolo tei ore i tiaturi a muri aˈe (o Toma), te tahi atu tei parahi na i raro aˈe i te hoê tumu raau i to Iesu piiraa ˈtu ia ˈna (o Nataniela) e to ˈna hoa, o Philipa.

Hoê ahuru ma hoê mau aposetolo, no Galilea mai ïa ratou, mai ia Iesu iho. No Kana mai o Nataniela. No Betesaida mai o Petero raua o Anederea. Teie râ, ua ora o Petero raua o Anederea i Kaperenaumi i muri iho, i reira atoa hoi o Mataio e ora ˈi. E mau taata taiˈa o Iakobo raua o Ioane, e e ora atoa na raua i Kaperenaumi aore ra i te tahi vahi fatata mai. O Iuda Isakariota anaˈe, tei hoo ia Iesu i muri aˈe, te aposetolo no Iudea mai. Mareko 3:13-19; Luka 6:12-16.

◆ O vai ma te mau aposetolo no roto mai paha ratou i te opu fetii o Iesu?

◆ O vai ma te mau aposetolo a Iesu, e nafea tatou ia haamanaˈo i to ratou iˈoa?

◆ No hea mai te mau aposetolo?

[Hohoˈa i te api 31]

Hou oia i maiti ai i na aposetolo hoê ahuru e ma piti, ua pure o Iesu ia Iehova hoê po taatoa.