Maitiraa Iesu hoê ahuru ma piti aposetolo

Hoê matahiti e te afa to Ioane Bapetizo faahitiraa ia Iesu mai te Arenio a te Atua. A haamata ˈi Iesu i ta ˈna taviniraa, riro maira e rave rahi tane haavare ore ei pǐpǐ na ˈna, mai ia Anederea, Simona Petero, Ioane, Iakobo atoa paha (te taeae o Ioane), Philipa e Baretolomea (pii-atoa-hia Natanaela). I muri aˈe, mea rahi atu â tei pee i te Mesia.—Ioane 1:45-47.

Ua ineine ïa Iesu no te maiti i ta ˈna mau aposetolo. E riro ratou ei hoa taviniraa piri roa no ˈna, e e fanaˈo ratou i te hoê faaineineraa taa ê. Hou râ Iesu a maiti ai ia ratou, haere aˈera oia i nia i te hoê mouˈa, e ere paha mea atea i Kaperenaumi i te pae miti o Galilea. Hoê po taatoa to ˈna pureraa i te Atua i reira no te ani i to ˈna paari e ta ˈna haamaitairaa. Ananahi aˈe, pii atura oia i ta ˈna mau pǐpǐ e maiti atura 12 o ratou ei aposetolo na ˈna.

Ua maiti Iesu e ono pǐpǐ tei faahitihia i nia aˈe, oia atoa Mataio, ta Iesu i titau mai roto mai i te fare aufauraa tute. E na pǐpǐ e pae e toe ra, o Iuda ïa (pii-atoa-hia Tadaio e “te tamaiti a Iakobo”), Simona parauhia “tei itoito rahi,” Toma, Iakobo te tamaiti a Alephaia, e Iuda Isakariota.—Mataio 10:2-4; Luka 6:16.

Mai reira mai to taua na 12 ra ratereraa e o Iesu, e ua matau maitai oia ia ratou. E fetii no ˈna vetahi o ratou. E taeae fetii piri roa no ˈna Iakobo raua Ioane. Te manaˈo ra vetahi e e taeae Alephaia no Iosepha tei faaamu ia Iesu. Mai te peu te reira iho â, e taeae fetii ïa no Iesu te aposetolo Iakobo, te tamaiti a Alephaia.

Papu, aita e fifi no Iesu ia haamanaˈo i te iˈoa o ta ˈna mau aposetolo. Ua mau râ anei ia oe? No te tauturu ia oe, a haamanaˈo e e piti Simona, e piti Iakobo e e piti Iuda. E taeae to Simona (Petero) o Anederea ïa, e e taeae to Iakobo (te tamaiti a Zebedaio) o Ioane ïa. Mea na reira ïa e mau ai ia tatou te iˈoa o e vaˈu aposetolo. Na maha e toe ra, Mataio ïa te titau tute, Toma tei feaa i muri aˈe, Natanaela tei piihia i raro aˈe i te hoê tumu raau, e Philipa te hoa o Natanaela.

No Galilea, to Iesu fenua, ahuru ma hoê aposetolo. No Kana o Natanaela. No Betesaida Philipa, Petero e Anederea. I muri aˈe, haere atura Petero e Anederea i Kaperenaumi, e au ra e i reira Mataio e ora ˈi. I Kaperenaumi atoa aore ra na pihai iho mai o Iakobo raua Ioane e ora ˈi, e ohipa ravaai ta raua na reira. E au ra e o Iuda Isakariota anaˈe, tei taiva ia Iesu i muri aˈe, te aposetolo no Iudea.