E oaoa mure ore te tiai ra i te feia horoa paieti
I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”—IOANE 3:16.
1, 2. (a) O vai te Taata horoa rahi roa ˈˈe, e eaha ta ˈna ô faahiahia roa ˈˈe na te huitaata nei? (b) Ia ˈna i horoa i ta ˈna ô faahiahia roa ˈˈe, eaha te huru maitai ta te Atua i faaite?
O IEHOVA te Atua horoa noa tei hau aˈe i te faahiahia. No ˈna hoi, te Poiete o te raˈi e te fenua, te pǐpǐ kerisetiano ra o Iakobo i papai ai e: “Te mau mea maitatai i ho-mai-hia mai, e te mau mea tia roa e maitai roa ˈi, no nia ïa, mai nia mai ïa i te Metua o te maramarama, aore roa e hirohirouri ia ˈna ra, aore hoi e huru-ê-raa e vahi iti noa ˈˈe.” (Iakobo 1:17) Na Iehova atoa i pûpû mai i te ô faahiahia roa ˈˈe i horoahia aˈenei. No nia i ta ˈna ô faahiahia roa ˈˈe i te huitaata nei, te na ôhia ra e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”—Ioane 3:16.
2 Te taata o tei faahiti i teie mau parau, o te Tamaiti fanau tahi iho ïa a te Atua. E mauruuru e e here te hoê tamaiti fanau tahi i to ˈna metua tane ma te faariro ia ˈna ei tumu no to ˈna ora e no te mau mea maitatai atoa o ta ˈna e fanaˈo ra i roto i to ˈna oraraa. Aita râ te here o te Atua i taotia-noa-hia i nia i teie Tamaiti otahi ra. Ia haafanaˈo atoa oia i teie ô i te tahi atu o ta ˈna mau mea ora poietehia, e faaite ïa te Atua i to ˈna here i nia i te hoê faito faahiahia roa. (A faaau e te Roma 5:8-10.) Te reira te vahi papu roa ˈˈe ia tuatapapa anaˈe tatou i te auraa mau o te parau ra “horoa” i roto i teie tuhaa parau.
Te ô o te “Tamaiti here” ta te Atua i pûpû mai
3. Taa ê atu i “ta ˈna Tamaiti here ra,” o vai te fanaˈo atoa ra i te here o te Metua i te raˈi ra?
3 I roto i te hoê tau haapapu-ore-hia, ua fanaˈo te Atua i te hoê taairaa piri roa e ta ˈna Tamaiti fanau tahi—“ta ˈna Tamaiti here ra”—i roto i te raˈi. (Kolosa 1:13) I roto i taua area taime atoa ra, ua rahi noa ˈtu te here e te aroha i rotopu i te Metua e te Tamaiti i nia i te faito e aita ˈtu here mai to raua ra te huru. Ua here-atoa-hia te tahi atu mau mea poietehia ta te Atua i hamani na roto i te ravea o ta ˈna Tamaiti fanau tahi ei mau melo o te utuafare fetii a te Atua ra o Iehova. Inaha, ua uˈana noâ te here i rotopu i te fetii taatoa o te Atua. Ua haapapuhia ma te tano roa i roto i te mau Papai moˈa e “e aroha hoi te Atua.” (Ioane 1, 4:8) E amui ïa te fetii o te Atua i te feia e herehia e te Metua, oia hoi te Atua ra o Iehova.
4. Mea nafea te pûpûraa te Atua i ta ˈna Tamaiti i te titauraa i te hoê haapaeraa hau atu â i te ereraa i te taairaa piri roa, e no to vai maitai?
4 I te mea e e taairaa piri roa e vai ra i rotopu ia Iehova e ta ˈna Tamaiti matahiapo, ia erehia raua i taua auraa fatata roa ra, e haapaeraa rahi roa ïa te reira. (Kolosa 1:15) Teie râ, te ‘horoaraa’ i teie Tamaiti fanau tahi, ua hau atu ïa to ˈna auraa i te faaere-noa-raa te Atua ia ˈna i te hoê auraa fatata e ‘te Tamaiti o to ˈna here.’ Ua tae roa hoi Iehova i te farii e ia pohe ta ˈna Tamaiti e ia ore oia e riro faahou no te hoê taime poto ei melo no te fetii rahi o te Atua. Ua pohe oia no te maitai o te feia o tei ore roa ˈtu i riro aˈenei ei melo no te fetii o te Atua. Aita ˈtu ô faahiahia aˈe ta Iehova e nehenehe e pûpû no te huitaata tei roohia i te ati maoti râ ta ˈna Tamaiti fanau tahi, ta te mau Papai e faahiti ra mai “te haamataraa o te mau mea i poietehia e te Atua.”——Apokalupo 3:14, T.a.a.
5. (a) Eaha te ati o te huaai a Adamu, e eaha ta te parau-tia a te Atua e titau ra i te hoê o Ta ˈna mau tamaiti haapao maitai? (b) Eaha ta te ô faahiahia roa ˈˈe a te Atua e titau i to ˈna iho pae?
5 Aita te tane e te vahine matamua, o Adamu raua o Eva, i manuïa i te tapea i to raua tiaraa ei melo no te fetii o te Atua. Tera ïa to raua huru i muri aˈe i to raua tiahiraahia i te ǒ i Edene ra no to raua hararaa i te Atua. E ere faahou raua e melo no te fetii o te Atua, e tei raro aˈe atoa raua i te utua o te pohe. No reira, te fifi, e ere noa ïa te faahoˈiraa i ta raua huaai i roto i te farii maitai o te Atua ei mau melo no to ˈna fetii, ua titau-atoa-hia râ ia faaorehia te utua pohe ta te Atua i tuu i nia ia ratou. Ia au i te faatupuraa i te parau-tia a te Atua, e titau te reira e ia roohia te hoê o te mau tamaiti haapao maitai a te Atua ra o Iehova i te pohe ei monoraa, aore ra ei hoo. Teie atura ïa te uiraa rahi: E farii anei te tamaiti e maitihia i te faaruru i teie huru pohe ei monoraa no te maitai o te mau taata hara? Hau atu, e titau te faatupuraa i teie ohipa e ia rave te Atua Mana hope ra i te hoê semeio. E titau atoa te reira e ia faaite te Atua i to ˈna here i nia i te hoê faito tei ore i itehia aˈenei.—Roma 8:32.
6. Mea nafea to te Tamaiti a te Atua faaîraa i te mau mea e titauhia ra e te huitaata hara, e eaha ta ˈna i parau no nia i teie ohipa?
6 O te Tamaiti matahiapo a Iehova anaˈe te nehenehe e amo i te mau hopoia taa ê i roto i te ohipa e farereihia ra e te huitaata hara nei. I te mea e ua riro oia ei hohoˈa no to ˈna Metua i te raˈi i te pae no te aroharaa ˈtu i te mau melo o te fetii poietehia e te Atua, aita ïa e taata mai ia ˈna i rotopu i te mau tamaiti a te Atua. I te mea e ua poietehia te taatoaraa o te tahi atu mau mea maramarama na roto ia ˈna, e here rahi ïa to ˈna no ratou. Hau atu, ua riro te here ei huru faufaa roa a te Tamaiti fanau tahi a Iehova, o Iesu Mesia, no te mea “o te anaana hoi oia o to ˈna ra hanahana [to te Atua], e o te hohoˈa mau ïa no ˈna iho.” (Hebera 1:3) Ma te faaite e ua ineine oia i te faaite i to ˈna here i roto i te faito teitei roa ˈˈe na roto i te pûpûraa i to ˈna ora no te maitai o te huitaata hara nei, ua parau atu o Iesu i ta ˈna mau aposetolo e 12 e: “Aita atoa hoi te Tamaiti a te taata nei i haere mai ia tavinihia to ˈna, ei tavini râ, e ia horoa i to ˈna ora ei hoo no te taata e rave rahi.”—Mareko 10:45; hiˈo atoa Ioane 15:13.
7, 8. (a) Eaha te hinaaro o Iehova i to ˈna tonoraa mai ia Iesu Mesia i roto i te ao o te huitaata nei? (b) Ua tono mai te Atua i ta ˈna Tamaiti fanau tahi no teihea huru hopoia?
7 Te vai ra te hoê tumu taa ê no reira te Atua ra o Iehova i tono mai ai ia Iesu i roto i te ao atihia o te huitaata nei. O te aroha o te Atua te tumu o te reira, inaha, ua parau o Iesu iho e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore. Aore hoi te Atua i tono mai i ta ˈna Tamaiti i te ao nei e faahapa mai i to te ao, ia ora râ to te ao ia ˈna.”—Ioane 3:16, 17.
8 Ma te aroha, ua tono mai Iehova i ta ˈna Tamaiti fanau tahi no te faatupu i te hoê ohipa faaoraraa. Aita te Atua i tono mai i ta ˈna Tamaiti i ǒ nei no te haava i te ao nei. Ahiri e ua tonohia mai te Tamaiti a te Atua no te faatupu i te hoê ohipa haavaraa, aita ïa e tiaturiraa to te huitaata atoa nei. Inaha, te utua o te haavaraa ta Iesu e faaoti i nia i te fetii taata nei, e utua pohe ïa. (Roma 5:12) No reira, na roto i teie tapao otahi roa o te aroha o te Atua, ua faaaifaito te Atua i te utua pohe ta te haavaraa tia roa e titau.
9. Eaha te manaˈo o te papai salamo o Davida no nia i te mau ô a Iehova?
9 I roto i te mau tuhaa atoa, ua faaite te Atua ra o Iehova e ua haapapu atoa oia e o te here to ˈna huru teitei roa ˈˈe. E e nehenehe e parau ma te tano roa e te horoa nei te Atua na te feia haapao maitai e haamori nei ia ˈna i nia i te fenua hau atu i tei titauhia i te pae no te mau mea maitatai. O ta te papai salamo ïa o Davida i manaˈo ia ˈna i parau atu i te Atua e: “I te rahi hoi o te mau mea maitatai na oe, i tei vaiihohia e oe no te feia i mǎtaˈu ia oe ra! i tei haapaohia e oe no te feia i tiaturi ia oe i mua i te aro o te tamarii a te taata nei!” (Salamo 31:19) I to Davida faatereraa ei arii i nia i te nunaa o Iseraela—i roto i to ˈna oraraa taatoa ei melo no taua nunaa i maiti-taa-ê-hia e te Atua ra—ua tamata pinepine oia i te maitai o Iehova. E ua ite o Davida e maitai rahi to ˈna.
Ua erehia o Iseraela i te hoê ô faahiahia no ǒ mai i te Atua
10. No te aha o Iseraela tahito i taa ê ai i te tahi atu nunaa i nia i te fenua nei?
10 I te mea e o Iehova to ˈna Atua, e ere ïa o Iseraela tahito mai te tahi atu nunaa o te fenua nei. Ma te faaohipa i te peropheta o Mose ei arai, ua faatupu Iehova i te hoê faufaa i rotopu ia ˈna e te mau huaai a Aberahama, Isaaka, e Iakoba. Aita oia i faaau i te ohipa e te tahi atu nunaa na roto i teie ravea. No reira, ua pii hua ˈtura te papai salamo i faauruahia e: “Ua faaite oia i ta ˈna parau ia Iakoba; i ta ˈna mau ture e ta ˈna mau faaauraa parau, ia Iseraela. Aore oia i na reira i te mau fenua atoa: e ta ˈna ra mau faaauraa parau, aita ïa ratou i ite. Halelu Ia.”—Salamo 147:19, 20.
11. E tae roa ˈtu i teihea taime to Iseraela fanaˈoraa i te hoê tiaraa taa ê e te Atua, e mea nafea to Iesu faataaraa i te tauiraa to ratou taairaa?
11 Ua fanaˈo noa te nunaa o Iseraela i te pae tino i teie taairaa taa ê e te Atua e tae roa ˈtu i te taime a patoi ai oia ia Iesu na nia i to ˈna tiaraa Mesia i te matahiti 33 o to tatou nei tau. E mahana peapea mau ïa no Iseraela i to Iesu otoraa e: “A tae hoi oe, e Ierusalema e, e Ierusalema! o tei taparahi i te mau peropheta, e te pehi hoi i te ofai i te feia i tonohia ˈtu ia oe na e, e rave rahi to ˈu haaputuraa i to taamrii, mai te moa e haaputu i to ˈna fanauˈa i raro aˈe i to ˈna pererau ra; aita râ i tia ia outou. Ei teie nei, to outou utuafare e tuuhia ˈi i te ano.” (Mataio 23:37, 38) Te faaite ra te mau parau a Iesu e ua erehia te nunaa o Iseraela, tei maiti-taa-ê-hia hoi e Iehova na mua ˈtu, i te hoê ô faufaa no ǒ mai i te Atua ra. Eaha hoi te tumu?
12. O vai te mau ‘tamarii a Ierusalema,’ e eaha ïa te auraa ia haaputu Iesu ia ratou?
12 Ia ˈna i faaohipa i te parau ra “tamarii,” ua faahiti noa o Iesu i te mau ati Iuda anaˈe i te pae tino tei peritomehia e ora ra i Ierusalema e tei faahohoˈa i te taatoaraa o te nunaa ati Iuda. Ia nehenehe o Iesu e haaputu i te mau ‘tamarii a Ierusalema,’ e titauhia ïa o ˈna ia afai mai i teie mau “tamarii” i roto i te hoê faufaa apî e te Atua, e o ˈna iho hoi te Arai i rotopu ia Iehova e teie mau ati Iuda i te pae tino. (Ieremia 31:31-34) E faatupu te reira i te faaoreraa i te hara, e naea-roa-hia hoi te aroha o te Atua i taua faito ra. (A faaau e te Malaki 1:2.) E riro mau â te reira ei ô faahiahia mau.
13. Na roto i to Iseraela patoiraa i te Tamaiti a te Atua, eaha ïa tei erehia e a ˈna, no te aha râ aita te oaoa o Iehova i iti mai?
13 Ia au maite i teie Parau tohu, ua tiai Iehova i te area taime e tano hou oia e horoa ˈtu ai i te ô o te riroraa ei feia apiti i roto i te faufaa apî na te feia e ere i te ati Iuda. Teie râ, i to ˈna patoiraa i te Tamaiti iho a te Atua, te Mesia, ua erehia te nunaa Iseraela i te pae tino i taua ô faahiahia ra. No reira, ua faaaifaito Iehova i te patoiraa i ta ˈna Tamaiti na roto i te horoaraa ˈtu i teie ô na te feia e ere no roto i te nunaa ati Iuda. I reira, aita te oaoa o Iehova ei Atua horoa noa i iti mai.
Te oaoaraa ia horoa
14. No te aha o Iesu Mesia te taata poietehia oaoa roa ˈˈe i roto i te ao atoa nei?
14 O Iehova ‘te Atua oaoa.’ (Timoteo 1, 1:11) Te horoaraa na vetahi ê, o te hoê ïa mea e faaoaoa nei ia ˈna. E i te senekele matamua o to tatou nei tau, ua parau ta ˈna Tamaiti fanau tahi e: “E mea maitai i te horoa ˈtu i te rave mai.” (Ohipa 20:35) Ia au maite i teie faaueraa tumu, ua riro o Iesu ei taata oaoa roa ˈˈe tei hamanihia e te Poiete o te ao atoa nei. Mea nafea ïa? I muri noa iho i te Atua ra o Iehova, ua horoa o Iesu Mesia i te ô faahiahia roa ˈˈe na roto i te pûpûraa i to ˈna ora no te maitai o te huitaata nei. Inaha, o ˈna ‘te Arii oaoa.’ (Timoteo 1, 6:15) Ua haapapu roa mai Iesu i ta ˈna parau no nia i te oaoaraa rahi o te horoaraa.
15. Eita roa Iehova e faaea i te riro ei hiˈoraa i roto i teihea tuhaa, e nafea te mau mea maramarama o ta ˈna i poiete e nehenehe ai e tamata i te hoê faito o to ˈna oaoa?
15 Na roto i te arai o Iesu Mesia, eita roa ˈtu te Atua ra o Iehova e faaea i te riro ei Atua o te pûpû i te mau taoˈa horoa na te mau mea maramarama atoa o ta ˈna i poiete e e riro noâ oia ei hiˈoraa maitai roa ˈˈe no ratou i te pae no te horoaraa. Mai ta te Atua e oaoa i te horoaraa i te mau ô maitatai na vetahi ê, ua tuu atoa oia i te manaˈo horoa maitai i roto i te mafatu o te feia maramarama o ta ˈna i poiete i nia i te fenua. Mea na reira ïa ratou e nehenehe ai e faahohoˈa e e pee i to ˈna huru e e tamata i te tahi faito o to ˈna oaoa. (Genese 1:26; Ephesia 5:1) Ma te tano roa, ua parau atu Iesu i ta ˈna mau pǐpǐ e: “E horoa, e e noaa hoi ta outou; e î te faito, e neneihia, e ueuehia, e manii noa ˈtu, na te taata e ninii i roto i to outou ahu. O taua faito hoi ta outou e faito ra, o te faito-faahou-hia mai ïa ta outou.”—Luka 6:38.
16. Ua faahiti o Iesu i teihea huru horoaraa i roto i te Luka 6:38?
16 Ua vaiiho Iesu na ta ˈna mau pǐpǐ i te hoê hiˈoraa faahiahia i te mea e ua matau oia i te horoa. Ua parau oia e e farii maitai mai te feia e faataehia ˈtu i teie huru horoaraa. I roto i te Luka 6:38, aita o Iesu i faahiti anaˈe i te horoaraa i te mau taoˈa materia. Aita o ˈna i faaue atu i ta ˈna mau pǐpǐ ia pee i te hoê haerea o te haaveve ia ratou i te pae materia. Area râ, te aratai ra o ˈna ia ratou i nia i te hoê eˈa e fanaˈo ai ratou i te mauruuru i te pae varua.
E ohipa papu te oaoa mure ore
17. Eaha te ô faahiahia ta te Atua i horoa mai na ta ˈna mau Ite i roto i teie mau mahana hopea?
17 Auê ïa ô faahiahia mau ta Iehova, te Tumu o te poieteraa atoa, i horoa mai na to ˈna mau Ite i teie mau mahana hopea! Ua horoa mai oia i te parau apî maitai o to ˈna Basileia. Te fanaˈo nei tatou i te hopoia faufaa roa e riro ei feia poro no te Basileia o te Atua te faaterehia ra e ta ˈna Tamaiti, o Iesu Mesia. (Mataio 24:14; Mareko 13:10) I te mea e ua faarirohia tatou ei mau Ite o te faateitei i to ratou reo no te Atua Teitei, e ô faito ore ïa teie, e te ravea maitai roa ˈˈe e nehenehe ai tatou e horoa ia au i te hiˈoraa o te Atua, o te faaiteraa ïa i te poroi o te Basileia ia vetahi ê hou te hopea o teie faanahoraa o te mau mea iino e tae mai ai.
18. Ei mau Ite no Iehova, eaha ta tatou e horoa na vetahi ê?
18 Ua faahiti te aposetolo Paulo i te mau haafifiraa o ta ˈna i farerei i to ˈna faaiteraa i te poroi o te Basileia ia vetahi ê. (Korinetia 2, 11:23-27) Te farerei atoa ra te mau Ite no Iehova no teie nei tau i te mau haafifiraa e te tuu nei ratou i te mau mea ta ratou iho e au ra i te hiti no te horoa ˈtu na vetahi ê i te tiaturiraa o te Basileia. E ere paha i te mea ohie no tatou ia tia ˈtu i mua i te uputa o te taata, mai te peu iho â râ e e haama ohie noa tatou. Teie râ, ei mau pǐpǐ na te Mesia, eita ta tatou e nehenehe e ape, aore ra e maue ê, i te hopoia taa ê e horoa ˈtu i te mau mea i te pae varua na vetahi ê na roto i te pororaa i “te evanelia o te basileia nei.” (Mataio 24:14) E tia ia tatou ia pee i te haerea o Iesu. I to ˈna faarururaa i te pohe, ua pure oia e: “E tau Metua e, . . . ia tupu râ to oe hinaaro, eiaha to ˈu.” (Mataio 26:39) I te pae no te horoaraa ˈtu i te parau apî maitai o te Basileia na vetahi ê, e tia i te mau tavini a Iehova ia rave i te hinaaro o te Atua, eiaha râ to ratou iho—te mea o ta ˈna e hinaaro ra, eiaha râ te mea o ta ratou e hinaaro ra.
19. O vai ma te mau Fatu o te mau “fare tahuti ore ra,” e nafea tatou ia faahoa ˈtu ia raua?
19 E titau teie huru horoaraa i to tatou taime e ta tatou mau faufaa, teie râ, na roto i te riroraa ei feia horoa paieti, e nehenehe tatou e tiaturi e fanaˈo i te oaoa e a muri noa ˈtu. No te aha? No te mea ua parau o Iesu e: “E faataua ˈtu outou i te taua no outou i te taoˈa haavare nei [“te faufaa o teie nei ao,” ia au i te tatararaa New International Version], e ia tuua-ê-hia outou ra, ia fariihia outou e ratou i roto i te fare tahuti ore ra.” (Luka 16:9) E tia ia tatou ia titau i te faaohipa i ta tatou mau “taoˈa haavare” no te faahoa ˈtu i te mau Fatu o “te fare tahuti ore ra.” Na nia i to ˈna tiaraa Poiete, o Iehova te Fatu o te mau mea atoa, e te tufa nei ta ˈna Tamaiti fanau tahi i teie tiaraa fatu no te mea o ˈna te taata aiˈa o te mau mea atoa. (Salamo 50:10-12; Hebera 1:1, 2) No te faahoa ˈtu ia raua, e tia ia tatou ia faaohipa i te mau taoˈa faufaa ia au i te hoê huru raveraa o ta raua e farii. E titau te reira i te peeraa i te haerea tia i te pae no te faaohiparaa i te mau taoˈa materia no te maitai o vetahi ê. (A faaau e te Mataio 6:3, 4; Korinetia 2, 9:7.) E nehenehe tatou e faaohipa i te moni ma te au no te faaitoito i to tatou auhoaraa e te Atua ra o Iehova e o Iesu Mesia. Ei hiˈoraa, e nehenehe tatou e na reira na roto i te faaohiparaa ma te oaoa i ta tatou faufaa no te tauturu i te feia e fifihia ra e na roto i te pûpûraa i ta tatou mau taoˈa no te faahaere i te mau ohipa a te Basileia o te Atua i mua.—Maseli 19:17; Mataio 6:33.
20. (a) No te aha Iehova e o Iesu e nehenehe ai e faaô ia tatou i roto i te mau “fare tahuti ore ra,” e teihea roa taua mau fare nei? (b) Eaha te haamaitairaa ta tatou e nehenehe e fanaˈo e a muri noa ˈtu?
20 No te mea eita roa ˈtu raua e roohia i te pohe, e nehenehe te Atua ra o Iehova e o Iesu Mesia e riro ei mau Hoa no tatou e a muri noa ˈtu e e faaô ia tatou i roto i te mau “fare tahuti ore ra.” E te reira i nia i te raˈi e te mau melahi moˈa atoa aore ra i nia i te fenua i roto i te Paradaiso e haamau-faahou-hia. (Luka 23:43) Auaa te Atua i pûpû mai ai i te ô here mau o Iesu Mesia, e nehenehe ai teie mau mea atoa e tupu. (Ioane 3:16) E e faaohipa te Atua ra o Iehova ia Iesu no te tamau noa i te horoa i te ô na te poieteraa atoa, no To ˈna iho oaoaraa. Inaha, i roto i te oraraa mure ore, e fanaˈo atoa tatou iho i te faufaa o te horoaraa i raro aˈe i te faatereraa a te Atua ra o Iehova na te ao atoa nei e te tiaraa arii o ta ˈna Tamaiti fanau tahi, to tatou Fatu e to tatou Faaora, o Iesu Mesia. E faatupu te reira i te oaoaraa e a muri noa ˈtu no te feia horoa paieti atoa.
Te haamanaˈo ra anei outou?
◻ Eaha ta te ô faahiahia roa ˈˈe a te Atua e titau i to ˈna aˈe pae?
◻ Ua tono mai te Atua i ta ˈna Tamaiti no te rave i teihea hopoia?
◻ O vai te taata poietehia oaoa roa ˈˈe i roto i te ao atoa nei, e no te aha?
◻ Mea nafea te feia horoa paieti ia tamata i te oaoa mure ore?
[Hohoˈa i te api 10]
Te haafaufaa ra anei outou i te ô a te Atua, o ta ˈna Tamaiti ei hoo?
[Hohoˈa i te api 12]
Te imi ra anei outou na mua i te Basileia o te Atua na roto i te pororaa i te parau apî maitai e te tururaa i teie ohipa e ta outou mau taoˈa?