HAAPIIRAA 17
Mai teihea o Iesu?
Ia haapii tatou i ta Iesu i parau e i rave i te fenua nei, e ite tatou i to ˈna mau huru maitatai a hinaaro atu ai tatou e riro ei hoa no Iesu e no to ˈna Metua ra, Iehova. Eaha te tahi o teie mau huru maitatai? E e nafea ia pee i te hiˈoraa o Iesu i roto i to tatou oraraa?
1. Ua tia Iesu i to ˈna Metua i roto i teihea tuhaa?
I te raˈi, ua ite e ua haapii Iesu i ta to ˈna metua i rave i te roaraa o na miria matahiti. No reira oia e manaˈo e e faaite ai i te huru aau e e ohipa ˈi mai to ˈna Metua. (A taio i te Ioane 5:19.) Ua faatupu Iesu i te mau huru maitatai o to ˈna Metua i parau ai oia: “O tei ite mai ia ˈu, ua ite atoa ïa i te Metua.” (Ioane 14:9) Ma te haapii i te huru o Iesu, e ite maitai ai oe o vai Iehova. Ei hiˈoraa, e taa ia tatou to Iehova huru aau na roto i te hamani maitai ta Iesu i faaite i te taata.
2. Mea nafea Iesu i te faaiteraa e ua here oia ia Iehova?
Ua parau Iesu: “Ia ite to te ao e mea here na ˈu te Metua, te rave nei au i ta te Metua i faaue mai.” (Ioane 14:31) I te fenua nei, ua faaite Iesu i to ˈna here rahi i to ˈna Metua eiaha noa ma te auraro ia ˈna, ma te paraparau atoa râ no nia i to ˈna Metua e ma te tauturu ia vetahi ia faatupu i te hoê auhoaraa e o Iehova.—Ioane 14:23.
3. Mea nafea Iesu i te faaiteraa e ua here oia i te taata?
Te parau ra te Bibilia no Iesu: “Mea here roa na ˈu i te huitaata.” (Maseli 8:31, nota i raro i te api) Ua faaite Iesu i teie here ma te faaitoito e ma te tauturu i te taata. I roto i te mau semeio ta ˈna i faatupu, aita noa e itehia to ˈna mana, oia atoa râ to ˈna hamani maitai. (Mareko 1:40-42) Ua hamani maitai Iesu i te taata e aita oia e maitiiti i te taata. Ua horoa ta ˈna mau parau i te tamahanahanaraa e te tiaturiraa no te feia aau tae tei faaroo ia ˈna. Ua ineine atoa Iesu i te pohe no to ˈna here i te taata, te taata iho â râ o tei pee i ta ˈna mau haapiiraa.—A taio i te Ioane 15:13, 14.
A FAAHOHONU ATU Â
A haapii hau atu â no nia i te huru o Iesu e e nafea ia faaite i te here e te aau horoa noa mai ia ˈna.
4. Mea here na Iesu i to ˈna Metua
Te haapii mai ra te hiˈoraa o Iesu e nafea tatou ia faaite i to tatou here i te Atua. A taio i te Luka 6:12 e te Ioane 15:10; 17:26. I muri aˈe i te taioraa i te mau irava tataitahi, a aparau i teie uiraa:
A pee ai i te hiˈoraa o Iesu, e nafea tatou e faaite ai i to tatou here ia Iehova?
Mea here na Iesu i to ˈna Metua i te raˈi e e paraparau pinepine oia ia ˈna na roto i te pure
5. Te haapao ra Iesu i te hinaaro o te taata
Ua haafaufaa Iesu na mua roa i te hinaaro o vetahi ê eiaha râ i to ˈna iho. Noa ˈtu ua rohirohi oia, ua faaohipa noa oia i to ˈna taime e puai no te tauturu i te taata. A taio i te Mareko 6:30-44, e a aparau i teie mau uiraa:
I roto i teie aamu, mea nafea Iesu i te faaiteraa e te tâuˈa râ oia ia vetahi ê?—A hiˈo i te mau irava 31, 34, 41 e te 42.
Na te aha i turai ia Iesu ia tauturu i te taata?—A hiˈo i te irava 34.
No te mea ua faaite Iesu i te huru o Iehova, eaha ta te reira e haapii ra ia oe no nia ia Iehova?
E nafea tatou e pee ai i te hiˈoraa o Iesu ma te tâuˈa ia vetahi ê?
6. E aau horoa to Iesu
E aau horoa to Iesu noa ˈtu aita i rahi ta ˈna mau mea e ua faaitoito oia ia tatou ia faaite i te aau horoa. A taio i te Ohipa 20:35, e a aparau i teie uiraa:
Ia au i te parau a Iesu, e nafea tatou e faaite ai i te oaoa?
A pata i te VIDEO, e a aparau i te uiraa i muri nei.
Noa ˈtu aita i rahi ta tatou taoˈa materia, e nafea tatou ia faaite i te aau horoa?
Ua ite anei oe?
Te haapii mai ra te Bibilia e nafea ia pure ia Iehova ma te iˈoa o Iesu. (A taio i te Ioane 16:23, 24.) Ia na reira tatou i te pure, e faaite tatou e ua mauruuru tatou i ta Iesu i rave no te tauturu ia tatou ia riro mai ei hoa no Iehova.
TE MANAˈO O VETAHI: “Aita te Atua e tâuˈa mai ra i to tatou mau fifi.”
I te mea hoi e ua faaite Iesu i te huru o to ˈna Metua, e nafea ta ˈna ohipa e haapapu ai e te tâuˈa mai ra Iehova ia tatou?
HAAPOTORAA
Ua here Iesu ia Iehova e i te taata. I te mea ua tia Iesu i to ˈna Metua, rahi atu â oe i te ite o vai o Iesu, rahi atu â oe e hinaaro i te ite o vai Iehova.
Haamanaˈoraa
E nafea tatou e faaite ai i to tatou here ia Iehova mai ia Iesu?
E nafea tatou e faaite ai i te here i te taata mai ia Iesu?
Eaha ta oe i au roa ˈˈe no nia i te huru o Iesu?
HIˈOPOA
A hiˈo i te tahi mau huru maitatai o Iesu o ta tatou e nehenehe e pee.
“Mai ia Iesu, e riro anaˈe ei taata . . .” (Iesu te eˈa, te parau mau, te ora, api 317)
A hiˈo no te aha mea faufaa ia pure tatou ma te iˈoa o Iesu.
“No te aha e pure ai ma te iˈoa o Iesu?” (Tumu parau o Te Pare Tiairaa)
Te parau ra anei te Bibilia i te tahi mea no nia i te huru rapaeau o Iesu?
Eaha ta tatou e haapii mai no nia i to Iesu huru i nia i te mau vahine?
“Te hinaaro ra te Atua ia faaturahia te vahine” (Te Pare Tiairaa 1 no Atopa 2012)